Kasanok nga Usaren a Nainsiriban ti Tiempok?
KAPITULO 21
Kasanok nga Usaren a Nainsiriban ti Tiempok?
Mano pay nga oras ti kasapulam iti kada aldaw? ․․․․․
Pangusaram kadagita a kanayonan nga oras?
□ Makikadua kadagiti gagayyem
□ Maturog
□ Agadal
□ Dadduma pay ․․․․․
TI TIEMPO ket mayarig iti napartak a kabalio—tapno mausarmo a naimbag, masapul a sursuruem a kontrolen. No usarem a nainsiriban ti panawenmo, saanka unay a ma-stress, ngumato ti gradom, ken dumakkel ti panagtalek kenka dagiti dadakkelmo. “Nagsayaat dayta,” nalabit kunam, “kasla naglaka nga ibaga ngem nagrigat nga aramiden!” Pudno nga adu a karit ti mapasaram ngem mapagballigiam dagita. Usigentayo ti sumagmamano a pagarigan.
Karit #1: Panagaramid iti Eskediul
Ti lapped. Pampanunotem pay laeng ti mangaramid iti eskediul ngem panagriknam ket kaska la naigaluten! Saanmo a kayat nga adda sursurotem nga eskediul dagiti aramidem.
No apay nga aramidem dayta. Insurat ni Ari Solomon: “Dagiti gakat daydiay nasaet sigurado a mangipaay iti pagsayaatan.” (Proverbio 21:5) Okupado a tao ni Solomon. Isu ket maysa nga asawa, ama, ken ari. Ken bayat a tumataengan, umad-adu dagiti pakakumikomanna. Mabalin nga okupadoka met a kas kenkuana. Ngem bayat a tumataenganka nalabit ad-addanto manen nga okupadoka. Isu nga uray ita pay laeng, sursuruemon ti agbalin nga organisado!
Ti makuna dagiti kapatadam. “Rinugiak nga urnosen a regular ti eskediulko agarup innem a bulanen ti napalabas. Ikagkagumaak a pasimplien dagiti bambanag, ket kasla nakatulong ti panangaramidko iti eskediul!”—Joey.
“Nakatulong ti panangilistak kadagiti aramidek tapno masurotko ti eskediulko. No adu pay ti nasken nga aramidek, isuratmi dagita ken ni Nanang tapno makitami no kasano a makapagtinnulongkami a mangragpat kadagiti kalatmi.”—Mallory.
Ti makatulong kenka. Usigem daytoy: Ipapantayon nga agbiahekayo a sangapamiliaan. Tunggal maysa kadakayo ket basta ikabilna lattan ti bagahena iti kargadera ti lugan. Kasla awanen ti paglugaran ti dadduma a bagaheyo. Ania ti mabalinmo nga aramiden? Mabalin nga iruarmo amin a naikarga, iyun-unam nga isimpa dagiti dadakkel a bag sa isarunom dagiti babbabassit a bag.
Kasta met laeng no iti panangorganisarmo kadagiti aramidem. No iyun-unam nga aramiden dagiti saan unay a napateg, baka saanmonton a maaramid dagiti napapateg a bambanag.
Iyun-unam dagiti narigrigat nga aramiden ket masdaawkanto ta ad-adunto ti panawenmo a mangaramid kadagiti nabatbati a banag!—Filipos 1:10.
Ania dagiti kapatgan a banag a nasken nga aramidem?
․․․․․
Ita, subliam dagiti insungbatmo ken ikeddengmo no ania ti iyun-unam—numeruam dagiti banag a kasapulan nga aramidem sigun iti kapategda. No iyun-unam nga aramiden dagiti
napatpateg, mabalin a masdaawkanto ta adun ti tiempom a mangaramid kadagiti saan unay a napateg a banag.Ti maaramidam. Isuratmo iti bassit a planner dagiti agsasaruno nga aramidem sigun iti kapategda. Wenno, nalabit makatulong kenka ti maysa kadagiti sumaganad.
□ Kalendario iti selpon
□ Bassit a kuaderno
□ Kalendario iti kompiuter
□ Kalendario a maiparabaw iti lamisaan
Karit #2: Panangsurot iti Eskediul
Ti lapped. No nakaawidkan a naggapu iti eskuelaan, kayatmon ti agrelaks ken agbuya iti TV iti sumagmamano a minuto. Wenno panggepmo ti ag-review para iti eksaminasion ngem adda nagteks a mangaw-awis kenka a mapankayo agbuya ti sine. Saan a maitantan ti pabuya idinto ta ti panagadal ket mabalinmo nga aramiden iti rabii. ‘Maysa pay,’ kunkunam iti bagim, ‘kasla ad-adda a makapagadalak no agap-apuraak.’
No apay nga aramidem dayta. Mabalin a nangatngato ti gradom no agadalka a saan a nabannog ti utekmo. Maysa pay, saan kadi nga ad-adda a ma-stress-ka no saan nga organisado ti eskediulmo? Nakarkaro manen no ikamkamakammo ti ag-review iti rabii para iti eksaminasionyo. Anianto laengen ti mapasamak iti kabigatanna? Nalabit maladawka a makariing, ad-addanto a ma-stress-ka, agdardaraska a pumanaw, ken maladawka a sumrek iti eskuelaan.—Proverbio 6:10, 11.
Ti makuna dagiti kapatadam. “Magusgustuak ti agbuya iti TV, aggitara, ken makikadua kadagiti gagayyemko. Saan met ketdi a dakes dagita; ngem no dadduma, maitungtungkuakon dagiti napatpateg a banag isu nga agap-apuraakton.”—Julian.
Ti makatulong kenka. Saan a dagiti laeng nasken nga aramidem ti iyeskediulmo—iyeskediulmo met dagiti magusgustuam nga aramiden. “Nalaklakak nga ileppas dagiti nasken nga aramidek ta ammok nga adda dagiti isarunok a magusgustuak
nga aramiden,” kuna ni Julian. Ti sabali pay a singasing ket: Mangikeddengka iti dakkel a kalat sa mangpanunotka kadagiti banag a mabalinmo nga aramiden tapno maragpatmo dayta a kalat.Ti maaramidam. Ania ti maysa wenno dua a realistiko a kalat a kabaelam a ragpaten iti sumaganad nga innem a bulan?
․․․․․
Ania a realistiko a kalat ti kabaelam a ragpaten iti sumaganad a dua a tawen, ken ania ti nasken nga aramidem itan tapno maragpatmo dayta? *
․․․․․
Karit #3: Panagbalin a Nadalus ken Nadalimanek
Ti lapped. Saanmo a maawatan no kasano a makatulong ti kinamanagdaldalus ken kinadalimanek tapno mausarmo a nasaysayaat ti tiempom. Maysa pay, kasla nalaklaka nga amang
ti agbalin a nawara. Mabalinmo nga ipabigat ti panagdalusmo iti kuartom—wenno saan pay ketdin! Total, awan met aniamanna kenka uray nakawarwara, isu a saan unay a problema dayta. Ngem kasta kadi a talaga?No apay nga aramidem dayta. No nadalus ken nadalimanekka, saan a maibus ti tiempom a mangbirok kadagiti banag a sapsapulem. Nataltalna pay ti panunotmo.—1 Corinto 14:40.
Ti makuna dagiti kapatadam. “No dadduma, diak masango nga ipakni dagiti badok isu a marigatanak a mangbirok kadagiti kasapulak gapu ta nakawarwara!”—Mandy.
“Masuronak unay idi makalawas a diak nabirokan ti pitakak. Idi nagdalusak iti kuartok, adda met la gayam sadiay.”—Frank.
Ti makatulong kenka. Ipaugalim nga isubli dagiti bambanag iti umiso a lugarda apaman a malpasmo nga usaren. Kanayon nga aramidem dayta tapno saanka a maurnongan iti wara.
Ti maaramidam. Iyugalim ti agdalus. Mabang-aranka no nadalimanek ti amin.
Napateg ti panawen. Agpapadakayo kadagiti kapatadam ken kadagiti dadakkelmo no iti kaadu ti orasyo iti kada aldaw. Agsagabaka no saanmo nga usaren a naimbag dayta. Ngem no usarem a nainsiriban, adunto ti magunggonam. Adda kenka no kasanom nga usaren dayta.
Imigrante dagiti dadakkelmo? Panagriknam kadi ket naidumdumaka iti man eskuelaan ken iti pagtaenganyo? Ammuem no ania ti nasayaat nga aramidem tapno magunggonaanka iti kasasaadmo.
[Footnote]
^ Para iti kanayonan nga impormasion, kitaem ti Kapitulo 39 daytoy a libro.
NAPAPATEG A TEKSTO
‘Siguraduenyo dagiti napatpateg a bambanag.’—Filipos 1:10
BALAKAD
Saanmo a paggigiddanen nga aramiden dagiti amin a naisingasing iti daytoy a kapitulo. Imbes ketdi, iti sumaganad a bulan, aramidem ti maysa laeng a singasing. No kabaelamon dayta, sabalinto manen ti aramidem.
AMMOM KADI . . . ?
Ma-stress-ka no nakaad-adu ti iyeskediulmo nga aramiden iti maysa nga aldaw. No ikeddengmo no ania ti iyun-unam, ammom no ania ti aramidem itan ken no ania ti saanmo pay laeng nga aramiden.
DAGITI ARAMIDEK!
Ti trabaho a nabiit laeng nga aramidek ket ․․․․․
Usarek ti tiempok a mangaramid iti ․․․․․
Ti kayatko a saludsoden kadagiti dadakkelko maipapan iti daytoy a banag ket ․․․․․
ANIA TI MAKUNAM?
● No ita pay laeng ket sursuruemon nga iyeskediul ti tiempom, kasano a makatulong dayta kenka iti masanguanan?
● Ania ti masursurom kadagiti dadakkelmo mainaig iti nainsiriban a panangusar iti tiempo?
● No addan ti sursurotem nga eskediul, ania dagiti mabalinmo a baliwan tapno nasaysayaat ti panangusarmo iti tiempom?
[Blurb iti panid 154]
“Adda nangngegko a mangyang-angaw a tapno makasangpetak iti maysa a lugar iti alas kuatro, ibagam a masapul nga addaakton sadiay iti alas tres. Idi laeng a naamirisko a nasken nga urnosek ti eskediulko!’’—Ricky
[Kahon iti panid 155]
Pangus-usarak iti Tiempok?
Iti makalawas, dagitoy ti pangus-usaran dagiti agtutubo nga agtawen iti 8 agingga iti 18 iti tiempoda ken ti promedio nga oras a mabusbusbosda:
17
kadua dagiti dadakkelda
30
iti eskuelaan
44
panagbuya iti TV, panagay-ayam kadagiti video game, panagteks, ken panagdengngeg iti musika
Bilangem no mano nga oras ti mabusbosmo nga
agbuya iti TV ․․․․․
agay-ayam iti video game ․․․․․
aginternet ․․․․․
agdengngeg iti musika ․․․․․
Dagup ․․․․․
Oras a mabalinko nga usaren kadagiti napatpateg a banag ․․․․․
[Ladawan iti panid 153]
Ti tiempo ket mayarig iti napartak a kabalio—masapul a sursuruem a kontrolen