Tagiragsakenyo ti Biag ti Pamilia

Pudno kadi nga agbalin a naragsak dagiti pamilia?

Kasano a posible dayta?

 Adda kadi aniaman a pampamilia nga ammoyo nga agkaykaysa ken naragsak a kas dagidiay makita iti daytoy a polieto? Dagiti pamilia iti sadinoman masinasinadan. Ti diborsio, ti kinakurang ti natalged a trabaho, dagiti parikut ti agsolsolo a naganak, ti pannakapaay—amin dagitoy makaipaayda iti rigat. Nagsennaay ti maysa nga eksperto iti biag ti pamilia: “Itan, pagaammon ti tunggal maysa dagiti padto maipapan iti pannakapukaw ti pamilia.”

Apay a nakaad-adu dagiti nadagsen a parparikut dagiti pamilia itatta? Kasano a tagiragsakentayo ti biag ti pamilia?

No Kasano a Timmaud ti Pamilia

Tapno masungbatan dagitoy a saludsod, masapul nga ammuentayo ti namunganayan ti panagasawa ken ti pamilia. Ta no adda Namunganay kadagitoy—maysa a Namarsua—rebbeng a kumita dagiti miembro ti pamilia kenkuana maipaay iti panangiwanwan, yantangay sigurado nga ammona ti kasayaatan no kasano a tagiragsaken a naan-anay ti biag ti pamilia.

Makapainteres, adut’ mamati nga awan ti Nangmunganay ti urnos ti pamilia. Kunaen ti The Encyclopedia Americana: “Dadduma nga eskolar agannayasda a mangtunton iti namunganayan ti panagasawa iti urnos a panangiparis kadagiti animal a nababbaba ngem tao.” Kaskasdi, sinarita ni Jesu-Kristo ti pannakaparsua ti lalaki ken ti babai. Inadawna kas autoridad ti  immuna a rekord ti Biblia ket kinunana: “Ti pinagtipon ti Dios saan koma a pagsinaen ti tao.”—Mateo 19:4-6.

Gapuna umiso ni Jesu-Kristo. Ti maysa nga intelihente a Dios pinarsuana dagiti immuna a tao ket inyurnosna ti naragsak a biag ti pamilia. Pinagtipon ti Dios dagiti immuna a paris iti panagasawa ket kinunana a ti lalaki “tumiponto iti asawana ket agbalindanto a maymaysa a lasag.” (Genesis 2:22-24) Mabalin kadi ngarud, a dagiti parikut ti pamilia itatta ket gapu iti panangsursurot iti estilo ti panagbiag a manglabsing kadagiti pagalagadan nga intuyang ti Namarsua iti Saona, ti Biblia?

Sadino ti Dalan nga Agturong iti Balligi?

Kas awan duadua a pagaammoyon, itantandudo ti moderno a lubong ti panagimbubukodan  ken ti panangpennek iti bagi. “Nasayaat ti kinaagum,” imbaga ti maysa a managipuonan iti agraduar a klase iti kolehio idiay Estados Unidos. “Nasayaat ti riknam uray no agagumka.” Ngem di mangiturong iti balligi ti pananggun-od kadagiti material a sanikua. Kinapudnona, ti materialismo, ti maysa kadagiti kadadakkelan a pagpeggadan ti biag ti pamilia agsipud ta bumallaet iti natauan a relasion ken ibusenna ti tiempo ken kuarta dagiti tao. Maisupadi iti dayta, usigenyo no kasano a tulongannatayo dagiti dua laeng a proverbio ti Biblia a mangkita no ania ti napateg iti kinaragsak.

“Nasaysayaat ti mangan iti natnateng a kadua dagiti inay-ayat ngem ti mangan ti kasayaatan a karne a gura ti kakuyogna.”

“Nasaysayaat ti mangan iti kimmarandikang a tinapay a kakuyogna ti kinatalna ngem ti makibangkete iti balay a napno ti riri.”

Proverbio 15:17; 17:1, “Today’s English Version.”

Nabileg a sasao, saan kadi? Anian a nagpaiduma koma ti lubong no tunggal pamilia salimetmetanda dagitoy nga ipangpangruna! Mangipaay met ti panangiwanwan ti Biblia maipapan iti no kasano ti panangtrato dagiti miembro ti pamilia iti maysa ken maysa. Usigenyo ti sumagmamano laeng a panangiwanwan nga ipaayna.

Assawa a lallaki: ‘Ayatenyo ti asawayo a kas iti bagiyo.’—Efeso 5:28-30.

Simple, ngem praktikal! Iwanwan met ti Biblia ti asawa a lalaki a ‘padayawanna ti asawana.’ (1 Pedro 3:7) Aramidenna daytoy babaen ti panangipaayna iti naisangsangayan nga atension, agraman ti lailo, pannakaawat, ken panangipanamnama. Ipategna met dagiti kapanunotanna ken umimdeng kenkuana. (Idiligyo ti Genesis 21:12.) Umanamongkayo kadi a magunggonaan ti aniaman a pamilia no ti asawa a lalaki maseknan iti asawana, a kas ti tarigagayanna a mismo a pannakatrato?—Mateo 7:12.

 Assawa a babbai: “Maaddaan ti nauneg a panagraem iti asawa[yo].”—Efeso 5:33.

Makaipaay iti kinaragsak ti pamilia ti asawa a babai babaen ti panangtulongna iti asawana a mangibanag iti nadagsen a rebbengenna. Daytoy ti nakairantaanna, yantangay impaay ti Dios ti asawa a babai nga agbalin a “katulonganna, a maitutop kenkuana.” (Genesis 2:18) Apresiarenyo kadi ti bendision ti biag iti pamilia no mangipakita ti asawa a babai iti panagraem iti asawana babaen ti panangsuportarna kadagiti pangngeddengna ken pannakitinnulongna kenkuana a mangibanag kadagiti kalat ti pamilia?

Dagiti Agassawa: “Masapul nga agmatalek dagiti agassawa iti maysa ken maysa.”—Hebreo 13:4, TEV.

No matalekda, pudno a magunggonaan ti biag ti pamilia. Ti pannakikamalala dadaelenna ti maysa a pamilia. (Proverbio 6:27-29, 32) Nainsiriban, ngarud, ti panangigunamgunam ti Biblia: “Agragsakka iti asawam ken pagrag-oam ti asawam . . . Apay koma nga itedmo ti ayatmo iti sabali a babai?”—Proverbio 5:18-20, TEV.

Nagannak: “Sanayen dagiti [annakyo] iti dalan a rebbeng a papanan[da].”—Proverbio 22:6.

No mangipaay dagiti nagannak iti tiempo ken atension kadagiti annak, sigurado a sumayaat ti biag ti pamilia. Gapuna, igunamgunam ti Biblia kadagiti nagannak nga isuroda dagiti umiso a prinsipio kadagiti annakda ‘no agtugawda iti balayda ken no magnada iti kalsada ken no agiddada ken no bumangonda.’ (Deuteronomio 11:19) Ibaga met ti Biblia a dagiti nagannak rebbeng nga ayatenda dagiti annakda babaen ti panangdisiplinada kadakuada.—Efeso 6:4.

Annak: “Annak, agtulnogkayo kadagiti dadakkelyo a mayalubog iti Apo.”—Efeso 6:1.

Pudno unay, iti daytoy nakillo a lubong, saan a kanayon a nalaka ti agtungpal kadagiti nagannakyo. Ngem, dikay kadi umanamong a nainsiriban ti panangaramid iti ibagbaga kadatayo ti Namunganay iti pamilia? Ammona ti kasayaatan a mamagbalin a naragragsak iti biag ti pamiliatayo. Gapuna ikagumaanyo a tungpalen dagiti dadakkelyo. Determinadokayo a mangliklik kadagiti adu a pannulisog ti lubong nga agaramid iti dakes.—Proverbio 1:10-19.

 No tunggal miembro ti pamilia iyaplikarna ti balakad ti Biblia iti inggat’ kabaelanna, magunggonaan ti biag ti pamilia. Saan laeng a tagiragsaken ti pamilia ti nasaysayaat a biag itan no di ket inanamaendanto ti nagsayaatan a masanguanan idiay baro a lubong nga inkari ti Dios. (2 Pedro 3:13; Apocalipsis 21:3, 4) Gapuna iyugali ti pamiliayo ti agadal ti Biblia a sangsangkamaysa! Nasarakan ti minilion a pamilia iti isuamin a daga a pudno a makagunggona ti panangiwanwan a naipaay iti libro a Ti Sekreto ti Kinaragsak iti Pamilia.

Malaksid no nainaganan, amin dagiti naadaw iti Biblia ket manipud iti New World Translation of the Holy Scriptures.