Dagiti Linaon ti Libro
Dagiti Linaon ti Libro
Mabalin a matakuatan ti maysa a tao a damona ti sumrek iti libraria a makatikaw ti nakaad-adu a libro. Ngem babaen iti sangkabassit a panangilawlawag no kasano ti pannakaurnos dagiti libro, di agbayag ammonan no kasano a biroken ti kayatna. Kasta met, nalaklaka ti panangukagyo iti Biblia no maawatanyo ti pannakaurnos dagiti linaonna.
TI SAO a “Biblia” naadaw iti Griego a sao a bi·bliʹa, a kayatna a sawen “lukot dagiti papiro” wenno “liblibro.”1 Kinapudnona ti Biblia maysa a koleksion—maysa a libraria—dagiti 66 nga indibidual a libro, a ti pannakaisuratna sinaklawna ti agarup 1,600 a tawen, manipud 1513 K.K.P. agingga iti agarup 98 K.P.
Ti umuna a 39 a libro, agarup tallo a kakapat ti linaon ti Biblia, maaw-awagan a Hebreo a Kasuratan, gapu ta kaaduanna naisuratda iti dayta a lenguahe. Kaaduanna mabalin a bingayen iti tallo a grupo dagitoy a libro: (1) Historikal, Genesis agingga iti Ester, 17 a libro; (2) Daniw, Job agingga iti Canta ni Solomon, 5 a libro; ken (3) Propetiko, Isaias agingga iti Malakias, 17 a libro. Saklawen ti Hebreo a Kasuratan ti immuna a pakasarsaritaan ti daga ken ti sangatauan agraman ti pakasarsaritaan ti nagkauna a nasion ti Israel manipud pannakabuangayna agingga iti maikalima a siglo K.K.P.
Maaw-awagan dagiti natda a 27 a libro iti Kristiano a Griego a Kasuratan, gapu ta naisuratda iti Griego, ti internasional a lenguahe iti daydi a tiempo. Ad-adda a naurnosda sigun iti tema: (1) dagiti 5 a historikal a libro—dagiti Ebanghelio ken Aramid, (2) dagiti 21 a sursurat, ken (3) ti Apocalipsis. Naipamaysa ti Kristiano a Griego a Kasuratan kadagiti pannursuro ken aktibidad ni Jesu-Kristo ken dagiti adalanna idi umuna a siglo K.P.
