Libro Para Kadakayo?

“Iti panagaramid kadagiti adu a libro awan ti gibusna,” kinuna ni Solomon agarup 3,000 a tawenen. (Eclesiastes 12:12) Dayta a paliiw maikanatad pay la unay agingga ita. Malaksid kadagiti gagangay a klasika, rinibu dagiti kabbaro a libro ti mayim-imprenta kada tawen. Gapu ta nagadu a libro a pagpilian, apay a masapul a basaenyo ti Biblia?

ADU dagiti agbasa kadagiti libro tapno maliwliwada wenno tapno maimpormaranda, wenno gapu kadagita a dua a rason. Kasta met laeng no iti panangbasa iti Biblia. Makapabileg, ken makaliwliwa pay ketdi a basbasaen dayta. Ngem ad-adu pay ti maaramidan ti Biblia. Nagpaiduma a gubuayan dayta iti pannakaammo.​—Eclesiastes 12:9, 10.

Sungbatan ti Biblia dagiti saludsod a nabayagen nga inut-utob ti tattao​—salsaludsod maipapan iti napalabastayo, ti agdamatayo, ken ti masanguanantayo. Adu ti agim-imtuod: Naggapuantayo? Ania ti panggep ti biag? Kasanotay a magun-odan ti kinaragsak ti biag? Addanto latta kadi ti biag ditoy daga? Ania ti masakbayantayo?

Ti nagtitipon a puersa dagiti amin nga ebidensia a naidatag ditoy sibabatad a pasingkedanna nga umiso ken autentiko ti Biblia. Nausigtayon no kasano a dagiti praktikal a pammagbagana tumulongda kadatayo nga agbiag a nabunga ken naragsak itatta. Tangay makapnek dagiti sungbatna maipapan iti agdinama, sigurado a dagiti sungbatna maipapan iti napalabas ken dagiti padtona maipapan iti masanguanan maikarida iti naannad a panangasikaso.

No Kasano a Magun-od ti Kasayaatan a Paglaingan

Adun dagiti nangirugi a mangbasa iti Biblia ngem insardengda idi matakuatanda nga adda dagiti pasetna a narigat a matarusan. No kasta ti kapadasanyo, adda bambanag a makatulong.

Pumilikayo iti mapagtalkan a patarus iti moderno a lenguahe, kas iti Baro a Lubong a Patarus ti Kristiano a Griego a Kasuratan. * Dadduma irugida a basaen ti salaysay ti Ebanghelio maipapan iti kabibiag ni Jesus, a dagiti nainsiriban a pannursurona, kas kadagiti masarakan iti Sermon idiay Bantay, iparangarangda ti nasiglat a pannakaawatna iti natauan a kababalin ket balabalaenna no kasanotay a parang-ayen ti kabibiagtayo.​—Kitaenyo ti Mateo kapitulo 5 agingga ti 7.

Malaksid iti panangbasa nga interamente iti Biblia, makaisuro ti topiko a wagas ti panagadal. Saklawen daytoy ti panangusig iti makuna ti Biblia iti partikular a tema. Mabalin a masdaawkayto nga umammo iti pudpudno a makuna ti Biblia kadagiti topiko a kas iti kararua, langit, daga, biag, ken ipapatay, agraman ti Pagarian ti Dios​—no ania dayta ken no anianto ti magapuananna. * Adda urnos dagiti Saksi ni Jehova para iti topiko a panagadal iti Biblia, nga ipapaayda a libre. Mabalinyo ti agimtuod babaen ti panagsuratyo kadagiti nagipablaak, nga usarenyo ti maikanatad a direksion iti panid 2.

Kalpasan a sinukimatda ti ebidensia, adu dagiti nagkuna a ti Biblia naggapu iti Dios, nga isu ti dinakamat dagiti Kasuratan a kas “Jehova.” (Salmo 83:18) Nalabit saankayo a kombinsido a ti Biblia ket naggapu iti Dios. Ngem apay a diyo sukimaten a mismo? Agtalekkami a kalpasan nga inkay maadal, mautob, ken nalabit mapasaran dagiti praktikal a kinapateg dagiti di agkupas a siribna maammuanyonto a ti Biblia talaga a libro para iti amin a tao, ken ad-adda pay​—libro para kadakayo.

[Footnotes]