Biag iti Maysa a Natalna a Baro a Lubong

No mingmingminganyo ti buya iti daytoy a polieto, ania a rikrikna ti adda kadakayo? Di aya il-iliwen ti pusoyo ti talna, ragsak, ken kinarang-ay a makitkita sadiay? Sigurado a kasta. Ngem tagtagainep laeng aya dayta, wenno ar-arapaap, no patien a maaddanto dagitoy a kasasaad ditoy rabaw ti daga?

Mabalin a kasta ti panunoten ti kaaduan a tattao. Dagiti kinapudno itatta ket isuda ti gubat, krimen, bisin, sakit, panaglakay—no dakamaten ti sumagmamano laeng. Kaskasdi adda rason ti pananginanama. No kumitatay iti masanguanan, sawen ti Biblia a “datayo urayentayo dagiti baro a langlangit ken ti maysa a daga a baro kas mayanurot iti karina [ti Dios], isuda a pagtaengan ti kinalinteg.”—2 Pedro 3:13; Isaias 65:17.

Dagitoy “baro a langlangit” ken ti “baro a daga,” sigun iti Biblia, ket saanda a baro a namaterialan a langlangit wenno baro a literal a daga. Naan-anay ti pannakaaramid ti pisikal a daga ken ti langlangit, ket ipakita ti Biblia a dagitat’ agtalinaed iti agnanayon. (Salmo 89:36, 37; 104:5) Ti “baro a daga” ket isunto ti maysa a nalinteg a kagimongan dagiti tattao nga agnaed iti rabaw ti daga, ken ti “baro a langlangit” isunto ti perpekto a nailangitan a pagarian, wenno gobierno, a mangituray iti daytoy naindagaan a sosiedad dagiti tattao. Ngem realistiko aya ti panamati a “ti maysa a baro a daga,” wenno ti nadayag a baro a lubong, ket posible?

Panunotenyo ti kinapudno a dagita a makaay-ayo a kasasaad ket pasetda ti orihinal a panggep ti Dios nga agpaay iti daytoy a daga. Insaadna ti immuna a natauan a pagassawaan iti naindagaan a Paraiso ti Eden ket inikkanna ida ti nakaskasdaaw a trabaho: “Agbungakayo ket agadukayo ket punnuenyo ti daga ken iturayanyo dayta.” (Genesis 1:28) Wen, ti panggep ti Dios ket ti panaganakda ken iti agangay  maisaknap ti Paraisoda iti amin a daga. Nupay iti kamaudianan pinilida a sumukir iti Dios, ket pinaneknekanda a saanda a maikari nga agbiag ti agnanayon, saan a nagbalbaliw ti orihinal a panggep ti Dios. Ket dayta ti masapul a matungpal iti maysa a baro a lubong!—Isaias 55:11.

Kinapudnona, no kararagenyo ti Kararag ti Apo, wenno ti Amami, nga idawdawatyo ti iyaay ti Pagarian ti Dios, ikarkararagyo a ti nailangitan a gobiernona parmekenna manipud iti daga ti kinadakes ken agturay iti daytoy baro a lubong. (Mateo 6:9) Ket agtalektayo a sungbatan ti Dios dayta a kararag, ta inkari ti Saona: “Ti sililinteg tawidennanto ti daga, ket agtaengto kenkuana nga agnanayon.”—Salmo 37:29.

Ti Biag Idiay Baro a Lubong ti Dios

Iyegto ti Pagarian ti Dios dagiti naindagaan a gunggona nga awan pulos pakaiyaspinganna, a tungpalennanto amin a naimbag a pinanggep ti Dios idi punganay nga agpaay a tagiragsaken ti ilina ditoy daga. Awanton ti guranggura ken panagidumduma, ket inton agangay tunggal maysa ditoy daga agbalinton a pudno a gayyem met ti tunggal maysa. Idiay Biblia, inkari ti Dios a ‘pasardengenna dagiti gubgubat inggana iti ungto ti daga.’ “Ti maysa a nasion saannanto nga itag-ay ti kampilan a maibusor iti nasion, ket didanto met adalenen ti pannakigubat uray kaano.”—Salmo 46:9; Isaias 2:4.

Inton agangay maiyegton ti intero a daga iti kas minuyongan a paraiso a kasasaadna. Kuna ti Biblia: “Ti let-ang ken ti namaga a daga naragsakdanto, ket ti tay-ak a langalang agragrag-onto ken agsabongto a kas iti rosa. . . . Ta iti let-ang pumsuakto dagiti dandanum, ken barbaresbes iti tay-ak a langalang. Ket ti sumilsilap a darat agbalinto a libtong, ket ti mawaw a daga agbalinto nga ub-ubbog ti danum.”—Isaias 35:1, 6, 7.

Addanto amin a rason nga agragsak iti Paraiso a daga. Nikaanoman dinton agbisin ti tattao gaput’ kinakirang ti taraon. “Ti daga pinaaduna ti apit,” kuna ti Biblia. (Salmo  67:6; 72:16) Amin tagiragsakendanto ti bungbunga ti nagbannoganda, kas inkari ti Namarsuatayo: “Ket agmuladanto kadagiti kaubasan ket kanendanto ti bungada. . . . didanto agmula ket sabali ti mangan.”—Isaias 65:21, 22.

Idiay baro a lubong ti Dios, saanton nga aglilinnetlet dagiti tattao kadagiti dadakkel nga apartment a patpatakder wenno kadagiti marmarpuogen a balbalay, ta pinanggep ti Dios: “Ket bangonendanto dagiti balbalay ket agtaengdanto kadakuada . . . Isuda didanto mangbangon ket sabali ti agnaed.” Inkari pay met ti Biblia: “Isuda didanto agtrabaho iti ubbaw.” (Isaias 65:21-23) Gapuna addaanto dagiti tattao iti nabunga, makapnek nga ar-aramid. Saanto a makauma ti biag.

Inton agangay, maisublinto payen ti Pagarian ti Dios ti natalna a relasion nga adda idi idiay minuyongan ti Eden kadagiti an-animal, ken dagiti an-animal ken tattao. Kuna ti Biblia: “Ket ti lobo makipagnaedto iti kordero, ket ti leopardo makikaiddanto iti urbon a kalding, ket ti urbon ti baka ken ti urbon ti leon ken ti napalukmeg agkakaiddadanto; ket ti maysa nga ubing a bassit idalannanto ida.”—Isaias 11:6-9; Oseas 2:18.

Panunotenyo, idiay Paraiso a daga amin a saksakit ken pisikal nga an-anayen maagasandanton! Ipasiguro kadatayo ti Sao ti Dios: “Ket ti agtaeng dinanto kunaen: ‘Masakitak.’” (Isaias 33:24) “[Ti Dios] punasennanto ti amin a lulua kadagiti matada, ket awanton ni patay, ket awanto metten ti sasaibbek wenno sangsangit wenno rigrigat. Ta dagidi immuna a bambanag napalabasdan.”—Apocalipsis 21:4.

Kasano a Posible Dayta para Kadakayo

Siempre ti pusoyo ti masapul a matignay kadagiti karkari  ti Dios maipapan iti biag idiay baro a lubong ti kinalintegna. Ket numan pay dadduma ibilangda ti kaitungpalan dagita a bembendision a nakasaysayaat unay a pumudno, saanda a nakasaysayaat unay nga umay manipud ima ti naayat a Namarsuatayo.—Salmo 145:16; Mikias 4:4.

Siempre, addada dagiti pagalagadan a masapul a maragpat no kayattay ti agbiag nga agnanayon iti um-umayen a Paraiso ditoy daga. Impakita ni Jesus ti kangrunaan, a kunana iti kararagna iti Dios: “Daytoy kaipapanan ti biag nga agnanayon, ti panangammoda kenka a maymaysa a pudno a Dios, ken ni Jesu-Kristo nga imbaonmo.”—Juan 17:3.

Gapuna no pudpudno a kayattayo ti agbiag idiay baro a lubong ti Dios, masapul nga adalentayo nga umuna ti pagayatan ti Dios ken aramidentay dayta. Ta maysa a kinapudno a: Daytoy a “lubong aglabas ken ti tartarigagayna, ngem ti agaramid ti pagayatan ti Dios agtalinaed iti agnanayon,” tapno tagiragsaken nga agnanayon dagiti bendision nga iparukpokto ti naayat a Namarsuatayo.—1 Juan 2:17.

Malaksid no naipakita, amin a panagadaw ti Biblia ket naggapuda iti New World Translation of the Holy Scriptures.