Kapitulo 8

Apay nga Ipalubos ti Dios ti Panagsagaba?

1, 2. Kasanot’ masansan a panagrikna dagiti tattao iti panagsagaba ti tao?

NO DUMTENG dagiti didigra, a mangdadael iti sanikua ken mangkettel iti biag, di maawatan ti adu no apay a mapasamak ti kakasta a nakas-ang a bambanag. Mariribukan ti dadduma iti kasaknap, kaulpit, ken kadawel ti krimen ken  kinaranggas. Mabalin a pinampanunotyo metten, ‘Apay nga ipalubos ti Dios ti panagsagaba?’

² Gapu ta awan masarakanda a makapnek a sungbat daytoy a saludsod, adut’ napukawen ti pammatida iti Dios. Ipagarupda nga isu ket saan a maseknan iti sangatauan. Dagiti dadduma a mangaklon iti panagsagaba kas paset ti biag ket nasakit ti nakemda ken ipabasolda iti Dios ti amin a kinadakes iti natauan a kagimongan. No addaankay iti kasta a karirikna, awan duadua nga interesadokay unay iti ibagbaga ti Biblia maipapan kadagitoy a banag.

SAAN A GAPUANAN TI DIOS TI PANAGSAGABA

3, 4. Apay a masiguradotayo a saan a gapuanan ni Jehova ti kinadakes ken panagsagaba?

³ Ipanamnama kadatayo ti Biblia a saan a gapuanan ni Jehova a Dios ti panagsagaba a makitkitatayo iti aglawlaw. Kas pagarigan, insurat ti Kristiano nga adalan a ni Santiago: “No adda iti sidong ti pannakasuot, awan koma ti agkuna: ‘Susuotennak ti Dios.’ Ta kadagiti dakes a bambanag di mabalin a suoten ti Dios ket isu a mismo dina met suoten ti asinoman.” (Santiago 1:13) No kasta, saan a gapuanan ti Dios ti nakaad-adu a pakarigatan a mangsapsaplit iti sangatauan. Saanna a suoten dagiti tattao tapno maikarida nga agbiag idiay langit, wenno parigaten dagiti tattao gapu kadagiti maipagarup a dakes nga inaramidda iti napalabas a panagbiagda.​—Roma 6:7.

⁴ Maysa pay, nupay adu dagiti nakas-ang a banag a naaramid iti nagan ti Dios wenno ni Kristo, awan a pulos ti masarakan iti Biblia a mangiparipirip nga anamonganda ti kakasta nga aramid. Awan ti pakainaigan ti Dios ken ni Kristo kadagidiay agkunkuna nga agserserbi kadakuada ngem agsuitik ken mangallilawda met, mamapatay ken mangsamsam, ken agar-aramid iti adu a dadduma pay a banag a pakaigapuan ti panagsagaba ti tao. Kinapudnona, “ti dalan ti nadangkes makarimon ken ni Jehova.” “Adayo [ti Dios] kadagiti nadangkes.”​—Proverbio 15:9, 29.

5. Ania ti sumagmamano a galad ni Jehova, ken kasanot’ panagriknana kadagiti parsuana?

 ⁵ Iladawan ti Biblia ni Jehova kas “nadungngo unay iti panagayat ken naasi.” (Santiago 5:11) Kunaenna a “ni Jehova ayatenna ti kinahustisia.” (Salmo 37:28; Isaias 61:8) Isu ket saan a managibales. Siaasi nga ay-aywananna dagiti parsuana ken ipapaayna kadakuada amin ti kasayaatan nga agpaay iti pagimbaganda. (Aramid 14:16, 17) Kasta ti ar-aramiden ni Jehova sipud pay idi nangrugi ti biag ditoy daga.

PERPEKTO A PANGRUGIAN

6. Kasano nga inyanninaw ti sumagmamano a sarsarita ti nagkauna a pakasaritaan ti sangatauan?

⁶ Naruamtay amin a makakita ken makarikna iti ut-ot ken panagsagaba. Isu a mabalin a narigat a panunoten ti tiempo nga awan ti panagsagaba, ngem kasta ti kasasaad iti rugi ti pakasaritaan ti tao. Ipasimudaag uray dagiti sarsarita ti sumagmamano a nasion ti kasta a naragsak a pangrugian. Iti Griego a mitolohia, ti umuna kadagiti “Lima a Panawen ti Tao” ket naawagan iti “Nabalitokan a Panawen.” Iti dayta a panawen, naragsak ti panagbiag dagiti tao, awan ti rigat, ut-ot, ken parparikut a kakuyog ti panaglakay. Kuna dagiti Insik a bayat ti panagturay ti pinarparbo a Duyaw nga Emperador (ni Huang-Ti), natalna ti panagbiag dagiti tao, a tagtagiragsakenda ti kappia uray iti nakaparsuaan ken kadagiti atap nga animal. Addaan amin dagiti Persiano, Egipcio, Tibetano, Peruano, ken Mexicano kadagiti sarsarita maipapan iti panawen ti kinaragsak ken kinaperpekto iti rugi ti pakasaritaan ti sangatauan.

7. Apay a pinarsua ti Dios ti daga ken ti sangatauan?

⁷ Iyan-anninaw laeng ti sarsarita dagiti nasion ti kadadaanan a naisurat a rekord ti pakasaritaan ti tao, ti Biblia. Ipakaammona kadatayo nga insaad ti Dios ti immuna a pagassawaan, da Adan ken Eva, iti maysa a paraiso a naawagan iti minuyongan ti Eden ket imbilinna kadakuada: “Agbungakayo ken agadukayo ket punnuenyo ti daga ken iturayanyo dayta.”  (Genesis 1:28) Perpekto idi dagiti immuna a nagannak kadatayo ken addaanda iti namnama a makakita iti intero a daga nga agbalin a paraiso a pagnaedan dagiti perpekto a tattao nga agbibiag iti manayon a talna ken kinaragsak. Dayta ti panggep ti Dios a nangparsua iti daga ken iti sangatauan.​—Isaias 45:18.

MAYSA A MAKADANGRAN A KARIT

8. Ania a bilin ti mainanama a tungpalen da Adan ken Eva, ngem aniat’ napasamak?

⁸ Tapno agtalinaedda iti pabor ti Dios, masapul a saan a mangan da Adan ken Eva iti bunga “ti kayo ti pannakaammo iti naimbag ken dakes.” (Genesis 2:16, 17) No tinungpalda la koma ti linteg ni Jehova, awan koma ti panagsagaba a mangdadael iti biag ti tao. Babaen ti panagtulnog iti bilin ti Dios, naipakitada koma ti panagayatda ken Jehova ken ti kinasungdoda kenkuana. (1 Juan 5:3) Ngem kas naammuantayo iti Kapitulo 6, saan a kasta ti napasamak. Iti panangsugsog ni Satanas, nangan ni Eva iti bunga dayta a kayo. Kalpasanna, nangan met ni Adan iti naiparit a bunga.

9. Ania nga isyu a pakainaigan ni Jehova ti pinataud ni Satanas?

⁹ Makitayo kadi ti kinaserioso ti napasamak? Binusor ni Satanas ti saad ni Jehova kas Kangatuan. Iti panangibagana a, “Saan a pudno a mataykayonto,” sinupiat ti Diablo ti sasao ti Dios a, “Mataykayonto a di bumurong.” Impasimudaag ti kanayonan a sasao ni Satanas a di kayat ni Jehova a maammuan da Adan ken Eva ti posibilidad nga agbalinda a kas iti Dios, iti kasta saanen a kasapulan nga Isu ti mangikeddeng iti naimbag ken dakes. Gapuna, kinarit ni Satanas ti kinalinteg ken kinaumiso ti saad ni Jehova kas Sapasap a Soberano.​—Genesis 2:17; 3:1-6.

10. Aniat’ imparipirip ni Satanas maipanggep kadagiti tattao?

¹⁰ Imparipirip met ni Satanas a Diablo nga agtalinaed laeng dagiti tattao a natulnog ken Jehova no la ket agpaay iti bukodda a pagimbagan ti panagtulnog iti Dios. Iti sabali a pannao, pinagduaduaanna ti kinatarnaw ti tao. Inkarit ni Satanas  nga awan ti tao a situtulok nga agtalinaed a nasungdo iti Dios. Silalawag a naipalgak daytoy a makadangran a karit ni Satanas iti salaysay ti Biblia maipapan ken Job, maysa a matalek nga adipen ni Jehova a naglak-am iti nakaro a suot iti panawen sakbay ti 1600 K.K.P. No basaenyo ti umuna a dua a kapitulo ti libro a Job, maawatanyo ti makagapu iti panagsagaba ti tao ken no apay nga ipalubos ti Dios dayta.

11. Ania a kita ti tao ni Job, ngem ania a pammadakes ti inaramid ni Satanas?

¹¹ Rinaut ni Satanas ni Job, “maysa a lalaki nga awan pakapilawanna ken nalinteg.” Umuna, pinagparang ni Satanas nga adda dakes a motibo ni Job babaen ti panagsaludsodna, “Agbuteng aya ni Job iti Dios nga awan kapapayanna?” Kalpasanna, sisisikap a pinardaya ti Diablo agpadpada ti Dios ken ni Job iti panangibagana a ginatang ni Jehova ti kinasungdo ni Job babaen ti panangsalaknib ken panangbendisionna kenkuana. “Ngem,” kinarit ni Satanas ni Jehova, “iyunnatmo ta imam ita, pangngaasim, ket sagidem amin nga adda kenkuana, ket kitaem no dinakanto ilunod nga iparupa.”​—Job 1:8-11.

12. (a) Aniada a saludsod ti masungbatan laeng no palubosan ti Dios ni Satanas a mangsuot ken Job? (b) Aniat’ nagbanagan ti pannakasuot ni Job?

¹² Agserserbi kadi ni Job ken Jehova gapu laeng kadagiti amin nga imbag nga aw-awatenna iti Dios? Agtalinaed ngata ni Job a natarnaw no masuot? Iti biang ni Jehova, adda kadi umdas a panagtalekna iti adipenna tapno palubosanna a masuot? Masungbatan dagitoy a saludsod no palubosan ni Jehova ni Satanas a mangipalak-am ken Job iti kakakaruan a suot. Ti kinamatalek ni Job iti sidong ti suot nga impalubos ti Dios, kas naisalaysay iti libro a Job, inalangonna a naan-anay ti kinalinteg ni Jehova ken ti kinatarnaw ti tao.​—Job 42:1, 2, 12.

13. Kasanotay a nairaman iti napasamak idiay Eden ken ni Job?

¹³ Nupay kasta, adda naun-uneg a kaipapanan ti napasamak idiay minuyongan ti Eden ken iti lalaki a ni Job. Iraman dagiti isyu a pinataud ni Satanas ti intero a sangatauan, pati datayo  itatta. Napardaya ti nagan ti Dios, ken nakarit ti kinasoberanona. Napagduaduaan ti kinalinteg ti parsua ti Dios, ti tao. Masapul a marisut dagitoy nga isyu.

NO KASANO A MARISUT DAGITI ISYU

14. No maipasango iti pammadakes, aniat’ mabalin nga aramiden ti tao a mapadpadakes?

¹⁴ Kas ilustrasion, ibagatayon a maysakay a naayat a naganak nga addaan sumagmamano nga annak iti maysa a naragsak a pamilia. Ipapantayon nga agiwarwaras ti maysa kadagiti kaarrubayo iti kinaulbod, a maysakay kano a dakes a naganak. No ngay ibaga ti kaarrubayo a saandakay nga ay-ayaten dagiti annakyo, nga aggigianda kadakayo gapu ta saanda nga ammo nga adda pay nasaysayaat, ket panawandakayo no adda makaipakita kadakuada iti nasaysayaat a kasasaad. ‘Minamaag!’ mabalin a kunayo. Wen, ngem kasanoyo a paneknekan? Mabalin a makapungtot dagiti dadduma a nagannak. Saan laeng  a mangparnuay iti kanayonan a parikut ti kasta a naranggas a tignay no di ket paneknekanna pay ti kinaulbod. Ti makapnek a pamay-an a panangtaming iti kasta a parikut isu ti panangipalubos iti mamadpadakes kadakayo a mangpasingked iti ipabpabasolna ken kadagiti annakyo a mangpaneknek a sipapasnek nga ay-ayatendakayo.

15. Kasanot’ panangtaming ni Jehova iti karit ni Satanas?

¹⁵ Ni Jehova ket kas iti naayat a naganak. Mayarig met da Adan ken Eva kadagiti annak, ket maibagay ni Satanas iti akem ti ulbod a kaarruba. Nainsiriban a saan a pinatay a dagus ti Dios da Satanas, Adan, ken Eva no di ket pinalubosanna dagitoy a managdakdakes nga agbiag pay bassit. Daytoy ti nangipalubos kadagiti immuna a nagannak kadatayo a mangirugi iti natauan a pamilia, ken inikkanna ti Diablo iti gundaway a mangpaneknek no pudno met laeng ti pammabasolna tapno marisut dagiti isyu. Nupay kasta, manipud pay idi damo, ammo ti Dios nga addanto dagiti tattao a nasungdo kenkuana ket iti kasta mangpaneknek nga ulbod ni Satanas. Anian a yamantayo ta agtultuloy a bembendisionan ken tultulongan ni Jehova dagidiay agayat kenkuana!​—2 Cronicas 16:9; Proverbio 15:3.

ANIAT’ NAPANEKNEKANEN?

16. Kasano a naipasidong ti lubong iti pannakabalin ni Satanas?

¹⁶ Iti gistay intero a pakasaritaan ti tao, nawaya ni Satanas a mangibanag kadagiti gakatna a mangituray iti sangatauan. Malaksid kadagiti dadduma pay a bambanag, im-impluensiaanna dagiti napolitikaan a pannakabalin ken itantandudona dagiti relihion a sisisikap a mangiturturong iti panagdayaw kenkuana imbes a ken ni Jehova. Iti kasta, nagbalin ti Diablo a “dios daytoy a sistema ti bambanag,” ken maawagan “ti agturay iti daytoy a lubong.” (2 Corinto 4:4; Juan 12:31) Kinapudnona, “ti intero a lubong adda iti pannakabalin daydiay nadangkes.” (1 Juan 5:19) Kayat kadi a sawen daytoy a napaneknekan ni Satanas ti karitna a mapagtallikudna amin a tao ken Jehova a Dios? Nalawag a saan! Bayat a palpalubosanna  ni Satanas nga agbiag, agtultuloy met nga itungtungpal ni Jehova ti panggepna. Ngarud, aniat’ ipalgak ti Biblia maipapan iti panangipalubos ti Dios iti kinadakes?

17. Aniat’ rumbeng a laglagipentayo maipanggep iti makagapu iti kinadakes ken panagsagaba?

¹⁷ Saan a gapuanan ni Jehova ti kinadakes ken panagsagaba. Tangay ni Satanas ti agturay iti daytoy a lubong ken ti dios daytoy a sistema ti bambanag, isu ken dagiti pasurotna ti manungsungbat iti agdama a kasasaad ti kagimongan ti tao ken amin a rigat a sagsagabaen ti sangatauan. Awan ti nainkalintegan a makaibaga a gapuanan ti Dios ti kasta a panagrigat.​—Roma 9:14.

18. Aniat’ pinaneknekan ti panangipalubos ni Jehova iti kinadakes ken panagsagaba maipanggep iti isisina iti Dios?

¹⁸ Paneknekan ti panangipalubos ni Jehova iti kinadakes ken panagsagaba a ti isisina iti Dios saan a nangyeg iti nasaysayaat a lubong. Di mailibak, namarkaan ti historia iti agsasaruno a didigra. Ti makagapu itoy a ta pinili dagiti tattao ti agwaywayas ken saanda a pudpudno nga ikankano ti sao ken pagayatan ti Dios. Idi sigugulib a sinurot ti nagkauna nga ili ni Jehova ken dagiti panguluenda “ti popular a dana” ken linaksidda ti saona, nakaam-amak ti nagbanaganna. Babaen ken Jeremias a propetana, kinuna ti Dios kadakuada: “Naibabain dagiti masirib. Nagkullayawda ket matiliwdanto. Adtoy! Linaksidda ti mismo a sao ni Jehova, ket ania a kita ti sirib ti adda kadakuada?” (Jeremias 8:5, 6, 9) Gaput’ saanda a panangannurot kadagiti pagalagadan ni Jehova, nagbalin ti sangatauan a kas maysa a barko nga awan timonna, a mayallo-allon iti nadawel a baybay.

19. Aniat’ mangpaneknek a saan a mapagtallikud ni Satanas amin a tao maibusor iti Dios?

¹⁹ Paneknekan met ti panangipalubos ti Dios iti kinadakes ken panagsagaba a saan a mapagtallikud ni Satanas amin a tao ken Jehova. Ipakita ti historia a kanayon nga adda dagiti tattao a nagtalinaed a matalek iti Dios uray pay ania a sulisog wenno rigat ti naglasatanda. Iti sinigsiglo, naiparangarang  ti pannakabalin ni Jehova maipuon kadagiti adipenna, ken naibunannag ti naganna iti intero a daga. (Exodo 9:16; 1 Samuel 12:22) Saritaen kadatayo ti Hebreo kapitulo 11 ti maipapan kadagiti agsasaruno a matalek a tattao, a pakairamanan da Abel, Enoc, Noe, Abraham, ken Moises. Iti Hebreo 12:1, naawaganda a ‘dakkel nga ulep dagiti saksi.’ Mapagwadanda iti natibker a pammati ken Jehova. Iti met moderno a panawen, adu ti nangisuko iti biagda gapu iti di marakrak a kinatarnawda iti Dios. Babaen ti pammati ken ayatda, naan-anay a pinaneknekan dagita a tattao a saan a mapagtallikud ni Satanas amin a tao maibusor iti Dios.

20. Maipanggep iti Dios ken iti sangatauan, aniat’ pinaneknekan ti panangipalubos ni Jehova iti kinadakes ken panagsagaba nga agtultuloy?

²⁰ Kamaudiananna, ti panangipalubos ni Jehova iti kinadakes ken panagsagaba nga agtultuloy paneknekanna a ti laeng Namarsua, a ni Jehova, ti makabael ken addaan kalintegan a mangituray iti sangatauan nga agpaay iti agnanayon a pagimbagan ken kinaragsakda. Iti sinigsiglo, napadasen ti sangatauan ti adu a porma ti gobierno. Ngem aniat’ nagbanaganna? Dagiti narikut a problema ken krisis a sangsanguen dagiti nasion itatta ket nawadwad a pammaneknek a pudno ti kuna ti Biblia a “ti tao inturayanna ti sabali iti pagdaksanna.” (Eclesiastes 8:9) Ni laeng Jehova ti makaisalakan kadatayo ken makabael a mangtungpal iti orihinal a panggepna. Kasanot’ panangaramidna iti daytoy, ken kaano?

21. Anianto ti mapasamak ken Satanas, ket siasinonto ti mausar a mangaramid iti daytoy?

²¹ Kalpasan la unay ti pannakatnag da Adan ken Eva iti palab-og ni Satanas, impakaammo ti Dios ti panggepna maipapan iti pamay-anna a mangisalakan. Kastoy ti kinuna ni Jehova maipanggep ken Satanas: “Pagginnuraenkayto iti babai, ken ti bin-im ken ti bin-ina. Sugatennanto ta ulom, ket sika sugatemto ti mukodna.” (Genesis 3:15) Impanamnama dagita a sasao a saan a mapalubosan ti Diablo a mangibanag kadagiti dakes nga aramidna iti agnanayon. Kas Ari iti Mesianiko a Pagarian, ti naikari a Bin-i, ni Jesu-Kristo, ‘sugatennanto ni Satanas  iti ulo.’ Wen, “iti mabiiten,” rumekento ni Jesus ti rebelde a ni Satanas!​—Roma 16:20.

ANIAT’ ARAMIDENYO?

22. (a) Ania dagiti saludsod a masapul a sanguenyo? (b) Nupay idasdas-al ni Satanas ti pungtotna kadagidiay matalek iti Dios, aniat’ masiguradoda?

²² Ita ta ammoyon dagiti nainaig nga isyu, siasino ti dasiganyo? Paneknekanyo kadi babaen ti tigtignayyo a nasungdokay ken Jehova? Tangay ammo ni Satanas nga ababan ti tiempona, aramidenna ti amin a kabaelanna a mangidas-al iti pungtotna kadagidiay mayat nga agtalinaed a natarnaw iti Dios. (Apocalipsis 12:12) Ngem mainanamayo ti tulong ti Dios agsipud ta “ammo ni Jehova no kasanona nga ispalen dagiti tattao nga addaan nadiosan a debosion manipud iti pannakasuot.” (2 Pedro 2:9) Dina ipalubos a masulisogkayo iti diyo kabaelan nga ibturan, ken mangaramid iti pamay-an tapno maibturanyo dagiti sulisog.​—1 Corinto 10:13.

23. Aniat’ mabalintay a padaanan a buyogen ti panagtalek?

²³ Buyogen ti panagtalek, padaanantayo ti panawen inton agtignay ti Ari a ni Jesu-Kristo maibusor ken Satanas ken kadagiti amin a sumurot kenkuana. (Apocalipsis 20:1-3) Pukawento ni Jesus amin dagidiay makingapuanan iti rigat ken riribuk a sagsagabaen ti sangatauan. Agingga iti dayta a tiempo, ti maysa kadagiti nasaem unay a kita ti panagsagaba isu ti ipapatay dagiti patpatgentayo. Basaenyo ti sumaganad a kapitulo tapno maammuanyo no aniat’ mapasamak kadakuada.

SUBOKENYO TI PANNAKAAMMOYO

Kasanot’ pannakaammotayo a saan a gapuanan ni Jehova ti panagsagaba ti tao?

Ania dagiti isyu a pinataud ni Satanas idiay Eden ken naibatad idi kaaldawan ni Job?

Aniat’ pinaneknekan ti panangipalubos ti Dios iti panagsagaba?

[Salsaludsod]