Kapitulo 18

Pagbalinenyo a Kalat ti Agserbi iti Dios iti Agnanayon

1, 2. Aniat’ makalikaguman malaksid iti pannakagun-od iti pannakaammo ti Dios?

ILADAWANYO ti bagiyo nga agtaktakder iti sanguanan ti nakakandado a ruangan nga agturong iti maysa a siled a naglaon iti adu a gameng. Ipapantayon nga inted ti maysa nga autorisado a tao ti tulbek kadakayo ket imbagana a makaammokayon kadagitoy nga agkakapateg a bambanag. Awan imbag nga ited kadakayo dayta a tulbek malaksid no usarenyo. Kasta met, masapul nga usarenyo ti pannakaammo tapno adda magunggonayo iti dayta.

² Pudno daytoy nangnangruna iti pannakaammo ti Dios. Kinapudnona, ti umiso a pannakaammo ken Jehova a Dios ken ni Jesu-Kristo kaipapananna ti biag nga agnanayon. (Juan 17:3) Ngem, saan a matungpal dayta a namnama babaen laeng ti pannakagun-od iti pannakaammo. No kasano nga usarenyo ti napateg a tulbek, nasken nga iyaplikaryo ti pannakaammo ti Dios iti biagyo. Kinuna ni Jesus a dagidiay mangar-aramid iti pagayatan ti Dios “makastrek[danto] iti pagarian.” Addaan dagiti kasta a tattao iti pribilehio nga agserbi iti Dios iti agnanayon!​—Mateo 7:21; 1 Juan 2:17.

3. Aniat’ pagayatan ti Dios para kadatayo?

³ No naammuanyon ti pagayatan ti Dios, nasken nga aramidenyo dayta. Iti panagkunayo, ania ngatat’ pagayatan ti Dios para kadakayo? Mabalin a gupgopen dayta kadagitoy a sasao: Tuladenyo ni Jesus. Kunaen kadatayo ti 1 Pedro 2:21: “Naayabankayo  iti daytoy a kurso, agsipud ta uray ni Kristo nagsagaba a maipaay kadakayo, a nangibati kadakayo iti maysa a pagwadan tapno surotenyo a sisisinged dagiti addangna.” No kasta, tapno maaramidyo ti pagayatan ti Dios, masapul nga ikagumaanyo a suroten a naimbag ti ulidan ni Jesus. Kasta ti panangusaryo iti pannakaammo ti Dios.

NO KASANO NGA INUSAR NI JESUS TI PANNAKAAMMO TI DIOS

4. Apay nga adut’ ammo ni Jesus maipapan ken Jehova, ken kasanona nga inusar daytoy a pannakaammo?

⁴ Ad-adu ti pannakaammo ni Jesu-Kristo maipapan iti Dios ngem kadagiti dadduma. Nakipagnaed ken nakipagtrabaho ken ni Jehova a Dios idiay langit iti naunday a panawen sakbay nga immay ditoy daga. (Colosas 1:15, 16) Ket aniat’ inaramid ni Jesus iti dayta a pannakaammo? Saan a napnek iti pannakagun-od laeng iti dayta. Nagbiag ni Jesus a mayannurot iti dayta. Dayta ti gapuna a naasi, naanus, ken naayat iti pannakilangenna kadagiti tattao. No kasta, tinulad ni Jesus ti nailangitan nga Amana ken nagtignay a maitunos iti pannakaammona iti daldalan ken personalidad ni Jehova.​—Juan 8:23, 28, 29, 38; 1 Juan 4:8.

5. Apay a nagpabautisar ni Jesus, ken kasanona a tinungpal ti kaipapanan ti bautismona?

⁵ Ti pannakaammo nga adda ken Jesus ti nangtignay met kenkuana a mangaramid iti nagpateg nga addang. Manipud Galilea, napan idiay Karayan Jordan a nangbautisaran ni Juan kenkuana. (Mateo 3:13-15) Aniat’ insimbolo ti bautismo ni Jesus? Kas maysa a Judio, isu ket nayanak iti maysa a nasion a dedikado iti Dios. No kasta, dedikadon ni Jesus manipud pay pannakayanakna. (Exodo 19:5, 6) Babaen ti panagpabautisarna, indatagna ti bagina ken Jehova tapno aramidenna ti pagayatan ti Dios para kenkuana iti daydi a tiempo. (Hebreo 10:5, 7) Ket tinungpal ni Jesus ti kaipapanan ti bautismona. Inggaedna ti nagserbi ken Jehova, nga inranudna ti pannakaammo ti Dios kadagiti tattao iti amin a gundaway. Pagragsakan ni Jesus nga aramiden ti pagayatan ti Dios, nga imbilangna pay ketdi daytoy a kas taraonna.​—Juan 4:34.

6. Iti ania a pamay-an a pinaglikudan ni Jesus ti bagina?

⁶ Naan-anay a naawatan ni Jesus a dakkel ti kalikaguman ti  panangaramid iti pagayatan ni Jehova​—a mangkalikagum pay ketdi iti biagna. Nupay kasta, pinaglikudan ni Jesus ti bagina, nga inyud-udina dagiti personal a kasapulanna. Kanayon nga inyun-unana ti panangaramid iti pagayatan ti Dios. Iti daytoy a banag, kasanotay a matulad ti naan-anay nga ulidan ni Jesus?

DAGITI ADDANG A MANGITURONG ITI BIAG NGA AGNANAYON

7. Ania dagiti sumagmamano nga addang a masapul nga aramiden ti maysa tapno kualipikado a mabautisaran?

⁷ Saan a kas ken Jesus, imperpektotayo ket satay la makagteng iti bautismo no naaramidtayon ti dadduma a napateg nga addang. Mangrugi daytoy iti panangipapuso iti umiso a pannakaammo maipapan ken Jehova a Dios ken ni Jesu-Kristo. Ti panangaramid iti dayta tignayennatay a mangalagad iti pammati ken maaddaan iti nasged nga ayat iti Dios. (Mateo 22:37-40; Roma 10:17; Hebreo 11:6) Ti iyaannurot kadagiti linteg, prinsipio, ken pagalagadan ti Dios rumbeng a tignayennatay nga agbabawi, a mangyebkas iti nadiosan a ladingit gapu kadagiti napalabas a basoltayo. Mangiturong daytoy iti pannakakomberte, kayatna a sawen, panagbaw-ing ken panangtallikud iti aniaman a dakes a dana a sinurottayo idi awanantay pay iti pannakaammo ti Dios. (Aramid 3:19) Kinapudnona, no sililimed nga agar-aramidtay pay laeng iti basol imbes nga aramidentayo ti nalinteg, saantay pay a pudpudno a nagbaw-ing, ket ditay maallilaw ti Dios. Ammo ni Jehova amin a kinamanaginsisingpet.​—Lucas 12:2, 3.

8. Aniat’ rumbeng nga aramidenyo no tarigagayanyo ti makiraman iti trabaho a panangikasaba iti Pagarian?

⁸ Ita ta gumunggun-odkayon iti pannakaammo ti Dios, saan kadi a maitutop a personal nga usigenyo dagiti naespirituan a bambanag? Nalabit magagarankay a mangibaga kadagiti kakabagian, gagayyem, ken dadduma pay maipapan iti maad-adalyo. Kinapudnona, mabalin nga ar-aramidenyon daytoy, kas iti panangiranud ni Jesus iti naimbag a damag kadagiti sabsabali iti impormal a kasasaad. (Lucas 10:38, 39; Juan 4:6-15) Ita mabalin a kayatyo a nayonan ti ar-aramidenyo. Maragsakan dagiti Kristiano a panglakayen a makisarita kadakayo tapno  matinong no kualipikado ken kabaelanyon ti makiraman kadagiti Saksi ni Jehova iti regular a trabaho a panangikasaba iti Pagarian. No kualipikadokayon, iyurnos dagiti panglakayen ti pannakikuyogyo iti maysa a Saksi iti ministerio. Sinurot dagiti adalan ni Jesus dagiti instruksionna tapno maitungpal ti ministerioda iti naurnos a pamay-an. (Marcos 6:7, 30; Lucas 10:1) Magunggonaankay met iti umasping a tulong bayat a makiramramankayo iti panangisaknap iti mensahe ti Pagarian iti binalaybalay ken iti dadduma pay a pamay-an.​—Aramid 20:20, 21.

9. Kasanot’ panagdedikar ti maysa a tao iti Dios, ken kasano nga apektaran ti dedikasion ti biagna?

⁹ Ti panangikasaba iti naimbag a damag iti amin a kita ti tattao iti teritoria ti kongregasion ket maysa a pamay-an ti panangbirok kadagidiay tattao nga agduyos iti kinalinteg ken maysa kadagiti nasayaat nga aramid a mangipaneknek nga adda pammatiyo. (Aramid 10:34, 35; Santiago 2:17, 18, 26) Ti regular nga itatabuno kadagiti Nakristianuan a gimong ken napnuan kaipapanan a pannakiraman iti trabaho a panangasaba ipakitana met a nagbabawi ken nagbaw-ingkayon ket determinadokay itan nga agbiag a mayannurot iti pannakaammo ti Dios. Aniat’ sumaruno a mayanatup nga addang? Isu ti panagdedikar ken Jehova a Dios. Kayat a sawen daytoy nga iti naimpusuan a kararag, ibagayo iti Dios a situtulok ken naimpusuan nga ipaayyo ti biagyo kenkuana a mangaramid iti pagayatanna. Kasta ti panangidedikar iti bagiyo ken Jehova ken panangawat iti naasi a sangol ni Jesu-Kristo.​—Mateo 11:29, 30.

BAUTISMO​—NO ANIAT’ KAIPAPANANNA KADAKAYO

10. Apay a rumbeng nga agpabautisarkayo kalpasan nga indedikaryo ti bagiyo ken Jehova?

¹⁰ Sigun ken Jesus, masapul a mabautisaran amin dagidiay agbalin nga adalanna. (Mateo 28:19, 20) Apay a nasken daytoy kalpasan ti panagdedikaryo iti Dios? Tangay indedikaryon ti bagiyo ken Jehova, ammona nga isut’ ay-ayatenyo. Ngem awan duadua a kayatyo ti mangaramid iti kanayonan nga addang tapno maammuan ti sabsabali nga ay-ayatenyo ti Dios. Bueno, ikkannakay ti bautismo iti gundaway a mangipakaammo iti publiko a nagdedikarkayon ken Jehova a Dios.​—Roma 10:9, 10.

11. Aniat’ kaipapanan ti bautismo?

 ¹¹ Napnuan iti simboliko a kaipapanan ti bautismo. No naitaneb, wenno “naitanem[kayo],” iti danum, arigna nataykayon iti sigud a wagas ti panagbiagyo. Iti irurukuasyo iti danum, kas man la rimkuaskayo iti baro a panagbiag, nga iturturong ti pagayatan ti Dios, saan a ti pagayatanyo. Siempre, di kayat a sawen dayta a saankayon nga agbiddut, ta imperpektotay amin ket ngarud, inaldaw nga agbasoltayo. Nupay kasta, kas dedikado, bautisado nga adipen ni Jehova, simrekkayon iti naisangsangayan a relasion kenkuana. Gapu iti panagbabawi ken sipapakumbaba a panagpabautisaryo, madadaan ni Jehova a mangpakawan kadagiti basolyo maibatay iti daton a subbot ni Jesus. No kasta, mangiturong ti bautismo iti nadalus a konsiensia iti sanguanan ti Dios.​—1 Pedro 3:21.

12. Aniat’ kaipapanan ti pannakabautisar (a) “iti nagan ti Ama”? (b) ‘iti nagan ti Anak’? (c) ‘iti nagan ti nasantuan nga espiritu’?

¹² Binilin ni Jesus dagiti pasurotna a bautisaran dagiti baro nga adalan “iti nagan ti Ama ken ti Anak ken ti nasantuan nga espiritu.” (Mateo 28:19) Aniat’ kayat a sawen ni Jesus? Ti pannakabautisar “iti nagan ti Ama” ipasimudaagna a ti tao a mabautisaran naimpusuan nga awatenna ni Jehova a Dios kas Namarsua ken maikari a Soberano ti uniberso. (Salmo 36:9; 83:18; Eclesiastes 12:1) Ti pannakabautisar ‘iti nagan ti Anak’ kaipapananna a bigbigen ti indibidual ni Jesu-Kristo​—ken nangnangruna ti datonna a subbot​—kas ti kakaisuna a pakaisalakanan nga impaay ti Dios. (Aramid 4:12) Ti pannakabautisar ‘iti nagan ti nasantuan nga espiritu’ ipamatmatna a bigbigen ti kandidato iti bautismo ti nasantuan nga espiritu, wenno aktibo a puersa, ni Jehova kas instrumento ti Dios a mangibanag kadagiti panggepna ken mangpabileg kadagiti adipenna a mangaramid iti nalinteg a pagayatanna a kadua ti organisasionna nga iturturong ti espiritu.​—Genesis 1:2; Salmo 104:30; Juan 14:26; 2 Pedro 1:21.

NAKASAGANAKAY KADIN NGA AGPABAUTISAR?

13, 14. Apay a di rumbeng a maamaktayo nga agserbi ken Jehova a Dios?

¹³ Tangay napnuan kaipapanan ti bautismo ken dayta ti kapapatgan  a pagteng iti biag ti maysa a tao, maysa kadi dayta nga addang a rumbeng a kaamakyo? Saan a pulos! Nupay di rumbeng a laglag-anen ti pangngeddeng nga agpabautisar, awan duadua a dayta ti kasisiriban a desision a mabalinyo nga aramiden.

¹⁴ Ti bautismo paneknekanna a kayatyo ti agserbi ken Jehova a Dios. Panunotenyo dagiti tattao a kapulpulapolyo. Uray kaskasano, saan kadi nga adda apo a pagserserbian ti tunggal maysa kadakuada? Agpapaadipen dagiti dadduma iti kinabaknang. (Mateo 6:24) Kasta unay ti kinapasnek dagiti dadduma iti karerada wenno ti la pagimbaganda ti pampanunotenda babaen ti panangipangruna iti panangpennek kadagiti bukodda a tarigagay iti biag. Adda met dagiti agserserbi kadagiti ulbod a didiosen. Ngem piniliyo ti agserbi iti pudno a Dios, ni Jehova. Awanen sabali a makaipakita iti kasta unay a kinaimbag, asi, ken ayat. Padpadayawan ti Dios dagiti tao iti addaan panggep a trabaho a mangiturong kadakuada iti pannakaisalakan. Gunggonaanna dagiti adipenna iti biag nga agnanayon. Nalawag, awan ti rumbeng a pagamkanyo iti panangsurot iti ulidan ni Jesus ken panangipaay iti biagyo ken Jehova. Kinapudnona, dayta laeng ti makaay-ayo iti Dios ken naan-anay a nainkalintegan [nga aramiden].​—1 Ar-ari 18:21.

15. Ania dagiti kadawyan a lapped iti bautismo?

¹⁵ Nupay kasta, saankay nga agpabautisar gapu ta adda mangpilpilit kadakayo. Maysa dayta a personal a banag iti nagbaetanyo ken Jehova. (Galacia 6:4) Bayat a rumangrang-aykayo iti naespirituan, mabalin a naisaludsodyon: “Ania ti makalapped kaniak nga agpabautisar?” (Aramid 8:35, 36) Mabalinyo nga isaludsod iti bagiyo, ‘Ti kadi ibubusor ti pamiliak ti manglaplapped kaniak? Makiramramanak pay la kadi iti di-nainkasuratan wenno dakes nga aramid? Maamakak kadi amangan ta guraendak dagiti kalugarak?’ Dagitoy ti sumagmamano a banag nga usigen, ngem realistiko a tingitingenyo ida.

16. Kasanokay a magunggonaan iti panagserbi ken Jehova?

¹⁶ Saan a realistiko a tingitingen ti mapukaw a di panunoten dagiti gunggona iti panagserbi ken Jehova. Kas pagarigan, usigenyo ti maipapan iti ibubusor ti pamilia. Inkari ni Jesus nga uray no mapukawan dagiti adalanna kadagiti kabagian  gapu iti panangsurotda kenkuana, maaddaanda iti dakdakkel a naespirituan a pamilia. (Marcos 10:29, 30) Madadaan dagitoy a kapammatian a mangipakita iti nainkabsatan nga ayatda kadakayo, a tulongandakayo a mangibtur iti pannakaidadanes, ken andingayendakayo iti dalan nga agturong iti biag. (1 Pedro 5:9) Matulongandakayo a nangnangruna dagiti panglakayen iti kongregasion a mangsaranget kadagiti parikut ken mangparmek a sibaballigi iti dadduma pay a karit. (Santiago 5:14-16) No maipapan iti pannakapukaw iti pabor daytoy a lubong, nasayaat no isaludsodyo iti bagiyo, ‘Adda kadi pay pumada iti pannakagun-od iti anamong ti Namarsua iti uniberso, a mangparag-o kenkuana gapu iti wagas ti panagbiag a pinilik?’​—Proverbio 27:11.

PANAGBIAG A MAYANNUROT ITI DEDIKASION KEN BAUTISMOYO

17. Apay a rumbeng a matmatanyo ti bautismo kas maysa a pangrugian imbes a pagpatinggaan?

¹⁷ Nasken a laglagipenyo a ti bautismo ket saan nga isu ti pagpatinggaan ti naespirituan nga irarang-ayyo. Pangrugian laeng dayta ti tungpal-biag a panagserbi iti Dios kas maysa nga ordinado a ministro ken maysa kadagiti Saksi ni Jehova. Nupay nagpateg ti bautismo, saan a garantia dayta ti pannakaisalakan. Saan a kinuna ni Jesus: ‘Maisalakan ti tunggal maysa a nabautisaran.’ Kinunana ketdi: “Ti nakapagibtur agingga iti panungpalan isunto ti maisalakan.” (Mateo 24:13) Gapuna, nasken a birokenyo nga umuna ti Pagarian ti Dios babaen ti panangipangruna iti dayta iti biagyo.​—Mateo 6:25-34.

18. Kalpasan ti bautismo, ania dagiti kalat a mabalinyo a ragpaten?

¹⁸ Tapno makapagibturkayo iti panagserbi ken Jehova, kayatyo la ketdi ti mangaramid kadagiti naespirituan a kalat. Ti maysa a makagunggona a kalat isu ti panangparang-ay iti pannakaammoyo iti Dios babaen ti regular a personal a panagadal iti Saona. Iplanoyo ti inaldaw a panagbasa iti Biblia. (Salmo 1:1, 2) Regular a tumabunokayo kadagiti Nakristianuan a gimong, ta ti panaglalangen a masarakanyo sadiay mapabilegnakayo iti naespirituan. Iti biangyo, apay a diyo pagbalinen a kalat ti panagkomento kadagiti gimong iti kongregasion ket iti kasta maidaydayaw  ni Jehova ken mapabilegyo dagiti dadduma? (Roma 1:11, 12) Ti maysa pay a kalat isu ti panangpasayaat kadagiti kararagyo.​—Lucas 11:2-4.

19. Matulongannakayo ti nasantuan nga espiritu a mangiparangarang kadagiti ania a galad?

¹⁹ Tapno makapagbiagkayo a mayannurot iti kaipapanan ti bautismoyo, nasken a kanayon nga annadanyo ti ar-aramidenyo, a palubosanyo ti nasantuan nga espiritu ti Dios a mangpataud kadakayo kadagiti galad a kas iti ayat, rag-o, talna, mabayag a panagitured, kinamanangngaasi, kinaimbag, pammati, kinaalumamay, ken panagteppel. (Galacia 5:22, 23; 2 Pedro 3:11) Laglagipenyo, ited ni Jehova ti nasantuan nga espirituna kadagiti amin nga agdawat iti dayta ken agtulnog kenkuana kas matalek nga ad-adipenna. (Lucas 11:13; Aramid 5:32) Isu nga agkararagkayo iti Dios a dumawat iti espirituna ken kiddawenyo ti tulongna iti panangiparangarang kadagiti galad a makaay-ayo kenkuana. Ad-adda a maiparangarang dagiti kasta a galad iti panagsasao ken kababalinyo bayat nga agpapaidalankayo iti espiritu ti Dios. Siempre, ikagkagumaan ti tunggal maysa iti kongregasion Kristiano a patanoren “ti baro a personalidad” tapno ad-adda a matuladna ni Kristo. (Colosas 3:9-14) Maipaspasango ti tunggal maysa kadatayo iti nadumaduma a karit iti panangaramid iti daytoy gapu ta nagduduma ti tukad ti irarang-aytayo iti naespirituan. Tangay imperpektokayo, masapul a pagreggetanyo a tuladen ti personalidad ni Kristo. Ngem dikay koma maupay iti daytoy a banag, ta posible dayta babaen iti tulong ti Dios.

20. Kadagiti ania a pamay-an a matuladyo ni Jesus iti ministerio?

²⁰ Karaman koma kadagiti naespirituan a kalatyo ti ad-adda a panangtulad iti naragsak nga ulidan ni Jesus. (Hebreo 12:1-3) Impategna ti ministerio. Ngarud, no addaankay iti pribilehio a makiraman iti trabaho a panangikasaba iti Pagarian, diyo koma ipalubos nga agbalin dayta a rutina laeng. Maragsakankay koma a mangisuro kadagiti sabsabali maipapan iti Pagarian ti Dios kas iti inaramid ni Jesus. Iyaplikaryo ti instruksion nga ipapaay ti kongregasion a tumulong kadakayo a rumang-ay kas mannursuro. Ken manamnamayo a mapabilegnakay ni Jehova a mangitungpal iti ministerioyo.​—1 Corinto 9:19-23.

21. (a) Kasanot’ pannakaammotayo nga ipatpateg ni Jehova dagiti matalek a bautisado a tattao? (b) Aniat’ mangipakita a napateg ti bautismo iti pannakaisalakantayo inton iwayat ti Dios ti panangukomna iti daytoy dakes a sistema ti bambanag?

 ²¹ Napateg unay iti Dios ti dedikado, bautisado a tao a simamatalek a mangikagkagumaan a mangsurot ken Jesus. Suksukimaten ni Jehova ti amin a binilion a natauan a puso ken ammona a manmano dagiti kasta a tattao. Ibilangna ida a gameng, “makaay-ayo a bambanag.” (Haggeo 2:7) Ipakita dagiti padto ti Biblia a matmatan ti Dios dagiti kasta a tattao kas namarkaan a maisalakan inton iwayatna ti panangukomna iti daytoy dakes a sistema ti bambanag iti saanen a mabayag. (Ezequiel 9:1-6; Malakias 3:16, 18) Maysakay kadi a “siuumiso a maikari iti agnanayon a biag”? (Aramid 13:48) Sipapasnek kadi a tarigagayanyo ti mamarkaan kas maysa nga agserserbi iti Dios? Ti dedikasion ken bautismo ket paset dayta a marka, ken nasken dagitoy iti pannakaisalakan.

22. Aniat’ manamnama ti “dakkel a bunggoy” iti masanguanan?

²² Kalpasan ti sangalubongan a Layus, rimmuar iti daong ni Noe ken ti pamiliana nga agturong iti nadalusanen a daga. Kasta met itatta, “maysa a dakkel a bunggoy” a mangyap-aplikar iti pannakaammo ti Dios iti biagda ken addaan anamong ni Jehova ti mangnamnama a makalasat iti panungpalan daytoy dakes a sistema ti bambanag ken mangtagiragsak iti biag nga agnanayon iti maysa a daga a permanenten a nadalusan. (Apocalipsis 7:9, 14) Anianto ti kasasaad ti biag [sadiay]?

SUBOKENYO TI PANNAKAAMMOYO

Kasanot’ kayat ni Jehova a panangusaryo iti pannakaammoyo kenkuana?

Ania dagiti sumagmamano nga addang a mangiturong iti bautismo?

Apay a ti bautismo ket saan a pagpatinggaan no di ket pangrugian?

Kasanotay a makapagbiag a mayannurot iti dedikasion ken bautismotayo?

[Salsaludsod]

 [Ladawan iti panid 172]

Nagdedikarkay kadin iti Dios babaen ti kararag?

 [Dagiti Ladawan iti panid 174]

Ania ti makalapped kadakayo nga agpabautisar?