Sarangtenyo Dagiti Dakes nga Espiritu a Puersa
Kapitulo 12
Sarangtenyo Dagiti Dakes nga Espiritu a Puersa
1. Kasano’t panagtignay ni Jesus idi naipasango kadagiti dakes nga espiritu?
DI NAGBAYAG kalpasan ti bautismona, napan ni Jesu-Kristo iti let-ang ti Judea tapno agkararag ken agmennamenna. Pinadas sadiay ni Satanas a Diablo nga allukoyen a manglabsing iti linteg ti Dios. Nupay kasta, linaksid ni Jesus ti appan ti Diablo ket saan a natnag iti palab-ogna. Naipasango ni Jesus iti dadduma pay a dakes nga espiritu bayat ti ministeriona ditoy daga. Ngem, maulit-ulit a tinubngar ken sinarangetna ida.—Lucas 4:1-13; 8:26-34; 9:37-43.
2. Aniada a saludsod ti usigentayo?
2 Dagiti salaysay ti Biblia maipapan kadagidiay nga engkuentro paneknekanna kadatayo a talaga nga adda dagiti dakes nga espiritu. Padpadasenda nga iyaw-awan dagiti tattao. Nupay kasta, kabaelantay a sarangten dagitoy dakes nga espiritu. Ngem sadinot’ nagtaudan dagiti dakes nga espiritu? Apay a padpadasenda nga allilawen dagiti tattao? Ken ania dagiti pamay-anda a mangibanag kadagiti panggepda? Ti panangammo kadagiti sungbat dagiti saludsod a kas kadagitoy tulongannakay a mangsaranget kadagiti dakes nga espiritu.
DAGITI DAKES NGA ESPIRITU—TI NAGTAUDAN KEN PANGGEPDA
3. Kasano a timmaud ni Satanas a Diablo?
3 Nangaramid ni Jehova a Dios iti umariwekwek nga espiritu a parsua nabayag sakbay a pinarsuana ti tao. (Job 38:4, 7) Kas nailawlawag iti Kapitulo 6, tinarigagayan ti maysa kadagitoy nga anghel nga isu ti dayawen dagiti tao imbes a ni Jehova. Tapno maibanag dayta a panggep, sinupiat ken pinardaya daytoy dakes nga anghel ti Namarsua, nga imparipiripna pay ketdi iti immuna a babai nga ulbod ti Dios. Maitutop ngarud a maawagan daytoy a rebelioso nga espiritu a parsua iti Satanas (bumusbusor) a Diablo (mammardaya).—Genesis 3:1-5; Job 1:6.
4. Kasano a nagbasol ti sumagmamano nga anghel idi kaaldawan ni Noe?
4 Idi agangay, kimmappon ti dadduma nga anghel ken ni Satanas a Diablo. Idi kaaldawan ti nalinteg a lalaki a ni Noe, pinanawan ti sumagmamano kadagitoy ti akemda idiay langit sada naglasag tapno mapennek ti panaggartemda a makidenna kadagiti babbai ditoy daga. Awan duadua nga inimpluensiaan ni Satanas dagidiay nga anghel nga agsukir. Nagbanag dayta iti panagputotda kadagiti mestiso nga annak a naawagan Nephilim, a bin-ig a nararanggas. Idi inyeg ni Jehova ti dakkel a Layus, naikisap ti rinuker a sangatauan ken daytoy di gagangay a kaputotan dagiti nasukir nga anghel. Nalisian dagiti rebelioso nga anghel ti pannakadadael ta inuksobda ti nainlasagan a bagida sada nagsubli iti lubong dagiti espiritu. Ngem linapdan ti Dios dagitoy a sairo babaen ti panangipupokna kadakuada iti naespirituan a kasipngetan. (Genesis 6:1-7, 17; Judas 6) Nupay kasta, intultuloy ni Satanas, “nga agturay kadagiti sairo,” ken dagiti dakes nga anghelna ti iyaalsada. (Lucas 11:15) Aniat’ panggepda?
5. Aniat’ panggep ni Satanas ken dagiti sairona, ken aniat’ us-usarenda a pangsilo kadagiti tattao?
5 Ti dakes a panggep ni Satanas ken dagiti sairo isu ti panangitallikud kadagiti tattao ken Jehova a Dios. Gapuna, al-allilawen, butbutngen, ken rangranggasan dagitoy a managdakdakes dagiti tattao iti intero a pakasaritaan ti tao. (Apocalipsis 12:9) Pasingkedan dagiti agdama a pasamak a narungrungsot ita dagiti sairo ngem iti napalabas. Tapno masiluanda dagiti tattao, masansan nga usaren dagiti sairo ti amin a kita ti espiritismo. Kasano nga us-usaren dagiti sairo daytoy nga appan, ken kasanoyo a masalakniban ti bagiyo?
NO KASANO A PADPADASENDAKAY NGA IYAW-AWAN DAGITI DAKES NGA ESPIRITU
6. Ania ti espiritismo, ken ania dagiti sumagmamano a kita daytoy?
6 Ania ti espiritismo? Dayta ket pannakiuman kadagiti sairo, wenno dakes nga espiritu, direkta man wenno babaen ti maysa a medium (mannakiuman iti espiritu). Us-usaren dagiti sairo ti espiritismo a pangawis iti biktima a kas iti panagusar dagiti mangnganup iti appan. Ken no kasano nga agusar ti mangnganup iti nadumaduma nga appan tapno matnag dagiti ayup iti palab-ogna, iparparegta met dagiti dakes nga espiritu ti nadumaduma a kita ti espiritismo tapno makontrolda dagiti tao. (Idiligyo ti Salmo 119:110.) Karaman kadagitoy ti panagpadles, salamangka, panangipartaan, panagkulam, panagilabeg, pannakiuman kadagiti medium, ken pannakisao kadagiti natay.
7. Kasanot’ kasaknap ti espiritismo, ken apay nga agsaksaknap dayta uray kadagiti makunkuna a Kristiano a pagilian?
7 Agkurri ti appan, ta adu a tattao iti intero a lubong ti maallukoy ti espiritismo. Dagiti taga-away makiumanda kadagiti erbolario, ket dagiti mangop-opisina a taga-siudad agkonsultada kadagiti astrologo. Agsaksaknap ti espiritismo uray kadagiti makunkuna a Kristiano a pagilian. Ipakita ti panagsirarak nga idiay laengen Estados Unidos, agarup 30 a magasin nga addaan napagdadagup a sirkulasion a nasurok a 10,000,000 ti naglaon iti impormasion maipapan iti nadumaduma a kita ti espiritismo. Nasurok a 500 milion a doliar ti busbusbosen dagiti taga-Brazil kada tawen kadagiti bambanag a mausar iti espiritismo. Kaskasdi, 80 porsiento kadagidiay tumabtabuno kadagiti espiritistiko a gimong iti dayta a pagilian ket nabuniagan a Katoliko a makimismisa pay. Tangay makiramraman ti sumagmamano a klero iti espiritismo, adu a relihioso a tattao ti mangipagarup nga anamongan ti Dios ti pannakinamin iti dayta. Ngem kasta aya?
NO APAY A KONDENAREN TI BIBLIA TI PANNAKINAMIN ITI ESPIRITISMO
8. Aniat’ panangmatmat ti Kasuratan iti espiritismo?
8 No insuroda kadakayo a ti sumagmamano a kita ti espiritismo ket pamay-an ti pannakiuman kadagiti naimbag nga espiritu, mabalin a maklaatkayo a makaammo iti ibagbaga ti Biblia maipapan iti espiritismo. Naballaagan ti ili ni Jehova: “Dikay umamang kadagiti mannakiuman iti espiritu, ken dikay makiuman kadagiti propesional a mammadles kadagiti pasamak, ta mamulitankayo kadakuada.” (Levitico 19:31; 20:6, 27) Mamallaag ti libro ti Biblia nga Apocalipsis a ‘dagidiay mangan-annurot iti espiritismo’ agtungpaldanto iti “danaw a sumsumged iti apuy ken asupre. Daytoy kaipapananna ti maikadua [agnanayon] nga ipapatay.” (Apocalipsis 21:8; 22:15) Saan nga anamongan ni Jehova a Dios ti amin a kita ti espiritismo. (Deuteronomio 18:10-12) Apay a kasta?
9. Apay a maikunatayo a dagiti agdama-aldaw a mensahe a naggapu iti lubong dagiti espiritu ket saan a naggapu ken Jehova?
9 Nangibaon ni Jehova kadagiti naimbag nga espiritu, wenno nalilinteg nga anghel, tapno makisao iti sumagmamano a tattao sakbay a nakompleto ti Biblia. Sipud pannakakompletona, ipapaay ti Sao ti Dios ti panangiwanwan a kasapulan dagiti tao tapno makaay-ayo ti panagserbida ken Jehova. (2 Timoteo 3:16, 17; Hebreo 1:1, 2) Saanna a laksiden ti nasantuan a Saona babaen ti panangited iti mensahe kadagiti medium. Dagiti dakes nga espiritu ti paggapuan amin dagita nga agdama-aldaw a mensahe a naggapu iti lubong dagiti espiritu. Mabalin a mangituggod ti espiritismo iti panangriribuk dagiti sairo wenno ilulugan pay ketdi dagiti dakes nga espiritu. Gapuna, siaayat a pakdaarannatay ti Dios a di makinamin iti aniaman nga aramid a nainaig iti espiritismo. (Deuteronomio 18:14; Galacia 5:19-21) Maysa pay, no itultuloytay ti makiraman iti espiritismo kalpasan a naammuantayo ti panangmatmat ni Jehova iti dayta, dumasdasigtayo kadagiti rebelioso a dakes nga espiritu ken agbalin a kabkabusor ti Dios.—1 Samuel 15:23; 1 Cronicas 10:13, 14; Salmo 5:4.
10. Ania ti panagpadles, ket apay a rumbeng a liklikantay dayta?
10 Ti maysa a popular a kita ti espiritismo isu ti panagpadles—panangpadas a mangammo iti masakbayan wenno iti di ammo babaen ti tulong dagiti espiritu. Ti sumagmamano a kita ti panagpadles ket astrolohia, panangmatmat iti bola a kristal, panangipatarus kadagiti tagtagainep, panangipalad, ken panagpadles babaen ti panangaramat iti baraha. Adu ti agkuna a ti panagpadles ket awan dakesna a pagraragsakan, ngem ipakita ti Biblia nga agkanaig unay dagiti mammadles ken dagiti dakes nga espiritu. Kas pagarigan, dakamaten ti Aramid 16:16-19 ti “maysa a sairo iti panagpadles” a nangted iti maysa a babai iti pannakabalin iti “arte ti panagpadles.” Nupay kasta, napukaw ti abilidadna nga agipadles iti masanguanan idi naparuar ti sairo. Nalawag, ti panagpadles ket maysa nga appan nga us-usaren dagiti sairo tapno magargari dagiti tattao iti palab-ogda.
11. Kasano a mangituggod iti palab-og ti panangpadas a makisao kadagiti natay?
11 No agladladingitkayo gapu iti ipapatay ti patpatgenyo a kameng ti pamilia wenno ti nasinged a gayyem, mabalin a nalakakay a magargari iti maysa pay nga appan. Mabalin nga ikkannakay ti medium iti naisangsangayan nga impormasion wenno makisarita iti timek a kasla timek daydi pimmusay. Agannadkayo! Mangituggod iti palab-og ti panangpadas a makisao kadagiti natay. Apay? Agsipud ta saan a makasao dagiti natay. Nalabit malagipyo pay a sibabatad a kuna ti Sao ti Dios a no matay ti tao “agpulang iti dagana; iti dayta met la nga aldaw dagiti pampanunotna mapukawda.” Dagiti natay “dida ammo ti aniaman.” (Salmo 146:4; Eclesiastes 9:5, 10) Maysa pay, iti kinapudnona pagaammo a tultuladen dagiti sairo ti timek ti natay ken ikkanda ti medium iti impormasion maipapan iti pimmusay. (1 Samuel 28:3-19) Isu a “siasinoman a makiuman kadagiti natay” ket silsiluan dagiti dakes nga espiritu ken agtigtignay a maikaniwas iti pagayatan ni Jehova a Dios.—Deuteronomio 18:11, 12; Isaias 8:19.
NO SAANDAKAY A MAALLUKOY, RAUTENDAKAYO
12, 13. Aniat’ pammaneknek a saan nga agsardeng dagiti sairo a mangsulsulisog ken mangrirriribuk kadagiti tattao?
12 No umannurotkayo iti balakad ti Sao ti Dios maipanggep iti espiritismo, maliklikanyo ti appan dagiti sairo. (Idiligyo ti Salmo 141:9, 10; Roma 12:9.) Kayat kadi a sawen daytoy a sardengandakayon a siluan dagiti dakes nga espiritu? Saan a pulos! Kalpasan ti namitlo a panangsulisogna ken Jesus, “pimmanaw [ni Satanas] manipud kenkuana agingga iti sabali pay a mainugot a tiempo.” (Lucas 4:13) Kasta met, saan laeng nga allukoyen dagiti nasukir nga espiritu dagiti tattao no di ket rautenda pay ida.
13 Lagipenyo ti immun-una a panangusigtayo iti panangraut ni Satanas iti adipen ti Dios a ni Job. Pinukaw ti Diablo dagiti animal a tarakenna ken pinapatayna ti kaaduan kadagiti babaonenna. Pinapatay pay ketdi ni Satanas dagiti annak ni Job. Kalpasanna, pinakaptanna ni Job a mismo iti naut-ot a sakit. Ngem nagtalinaed ni Job a natarnaw iti Dios ket sibabaknang a naparaburan. (Job 1:7-19; 2:7, 8; 42:12) Sipud idin, pagbalbalinen dagiti sairo ti sumagmamano a tattao nga umel wenno bulsek ken agtultuloy a pagragsakanda a parigaten dagiti tattao. (Mateo 9:32, 33; 12:22; Marcos 5:2-5) Itatta, ipakita dagiti report a ramramesen dagiti sairo ti sumagmamano a tattao ken pagmauyongenda dagiti dadduma. Sugsugsoganda dagiti dadduma a pumatay ken agpakamatay, nga agpada a basol maibusor iti Dios. (Deuteronomio 5:17; 1 Juan 3:15) Nupay kasta, rinibu a tattao a dati a nasiluan dagitoy dakes nga espiritu ti nakalapsuten. Kasanoda a naaramidan daytoy? Naaramidanda dayta babaen ti panangalada kadagiti napateg nga addang.
NO KASANOT’ PANANGSARANGET KADAGITI DAKES NGA ESPIRITU
14. Maitunos iti ulidan dagiti Kristiano idiay Efeso idi umuna a siglo, kasanoyo a masaranget dagiti dakes nga espiritu?
14 Ania ti maysa a pamay-an a masarangetyo dagiti dakes nga espiritu ken masalaknibanyo ti bagiyo ken ti pamiliayo manipud kadagiti siloda? Nagaramid iti positibo nga addang dagiti Kristiano idiay Efeso idi umuna a siglo a nakinamin iti espiritismo sakbay a nagbalinda a manamati. Mabasatayo nga “adu kadagidiay nangan-annurot kadagiti arte ti panagsalamangka inyegda a pinagkaykaysa dagiti libroda ket pinuoranda ida iti sanguanan ti isuamin.” (Aramid 19:19) Uray no saankay a makinamnamin iti espiritismo, ibellengyo ti aniaman a nainaig iti espiritismo. Ramanen daytoy dagiti libro, magasin, video, paskil, naiplaka a musika, ken bambanag a mausar iti espiritismo. Karaman met dagiti idolo, anting-anting ken dadduma pay nga an-anib, ken sagsagut a naggapu kadagiti espiritista. (Deuteronomio 7:25, 26; 1 Corinto 10:21) Kas panangyilustrar: Idiay Thailand, nabayagen a rirriribuken dagiti sairo ti maysa a pagassawaan. Kalpasanna, imbellengda dagiti bambanag a nainaig iti espiritismo. Aniat’ resultana? Saan idan a rirriribuken dagiti sairo ket manipud idin pudno a rimmang-ayda iti naespirituan.
15. Iti panangsaranget kadagiti dakes nga espiritu, ania ti sabali pay a nasken nga addang?
15 Tapno masaranget dagiti dakes nga espiritu, ti sabali pay a nasken nga addang isu ti panangyaplikar iti balakad ni apostol Pablo nga ikawes ti naan-anay a naespirituan a kabal nga inted ti Dios. (Efeso 6:11-17) Masapul a patibkeren dagiti Kristiano ti depensada maibusor kadagiti dakes nga espiritu. Aniat’ ramanen daytoy nga addang? “Kangrunaan iti amin,” kinuna ni Pablo, “alaenyo ti dakkel a kalasag ti pammati, a babaen iti dayta mabalinanyonto a depdepen amin dagiti sumsumged a gayang daydiay nadangkes.” Kinapudnona, no natibtibker ti pammatiyo, ad-adda a masarangetyo dagiti dakes nga espiritu.—Mateo 17:14-20.
16. Kasanoyo a mapabileg ti pammatiyo?
16 Kasanoyo a mapatibker ti pammatiyo? Babaen ti agtultuloy a panagadal iti Biblia ken panangyaplikar ti balakadna iti biagyo. Ti kinatibker ti pammati ti maysa agpannuray kangrunaanna iti kalagda ti pundasionna—ti pannakaammo ti Dios. Dikay kadi umanamong a ti umiso a pannakaammo a nagun-od ken impapusoyo bayat ti panagadalyo iti Biblia ket pinabilegna ti pammatiyo? (Roma 10:10, 17) Gapuna, awan duadua a no itultuloyyo daytoy a panagadal ken iyugaliyo ti tumabuno kadagiti gimong dagiti Saksi ni Jehova, ad-adda a tumibker ti pammatiyo. (Roma 1:11, 12; Colosas 2:6, 7) Agbalin dayta a nalagda a sarikedked maibusor iti iraraut dagiti sairo.—1 Juan 5:5.
17. Aniada pay nga addang ti kasapulan iti panangsaranget kadagiti dakes nga espiritu?
17 Ania pay dagiti addang a mabalin nga aramiden ti maysa a tao a determinado a sumaranget kadagiti dakes nga espiritu? Kasapulan idi dagiti Kristiano a taga-Efeso ti salaknib gapu ta agnanaedda iti maysa a siudad a napno iti demonismo. Gapuna, kinuna ni Pablo kadakuada: “Itultuloyyo ti panagkarkararag iti isuamin a gundaway iti espiritu.” (Efeso 6:18) Tangay agbibiagtayo iti lubong a napno iti sairo, kasapulan ti sipapasnek a panangikararag iti pannalaknib ti Dios iti panangsaranget kadagiti dakes nga espiritu. (Mateo 6:13) Makatulong iti daytoy a banag ti naespirituan a tulong ken karkararag dagiti nadutokan a panglakayen iti kongregasion Kristiano.—Santiago 5:13-15.
ITULTULOYYO TI MAKIDANGADANG KADAGITI DAKES NGA ESPIRITU
18, 19. Aniat’ mabalin nga aramiden ti maysa a tao no isut’ riribuken manen dagiti sairo?
18 Nupay kasta, uray pay no ar-aramidendan dagitoy napateg nga addang, dagiti dadduma ket rirriribuken pay laeng dagiti dakes nga espiritu. Kas pagarigan, idiay Côte d’Ivoire, nakipagadal ti maysa a lalaki iti Biblia kadagiti Saksi ni Jehova ket dinadaelna amin nga anting-antingna. Di nagbayag, simmayaat ti irarang-ayna, indedikarna ti biagna ken Jehova, ken nabautisaran. Ngem kalpasan ti makalawas manipud iti bautismona, rinugian manen dagiti sairo a riribuken, ket imbaga kenkuana dagiti timek a panawanna ti baro a pammatina. No mapasamak daytoy kadakayo, kayatna kadi a sawen a saannakayon a salsalakniban ni Jehova? Saan.
19 Nupay adda iti perpekto a tao a ni Jesu-Kristo ti nadibinuan a pannalaknib, nangngegna ti timek ti dakes nga espiritu a parsua a ni Satanas a Diablo. Impakita ni Jesus no aniat’ aramiden iti kasta a kasasaad. Kinunana iti Diablo: “Pumanawka, Satanas!” (Mateo 4:3-10) Kasta met, diyo ikaskaso dagiti timek a naggapu iti lubong dagiti espiritu. Sarangtenyo dagiti dakes nga espiritu babaen ti panagpatulong ken Jehova. Wen, agkararagkayo a sipipigsa nga aramatenyo ti nagan ti Dios. Kuna ti Proverbio 18:10: “Ti nagan ni Jehova nabileg a sarikedked. Ti nalinteg agkamang kenkuana ket maisalakan.” Kasta ti inaramid ti Kristiano a lalaki a taga-Côte d’Ivoire, ket insardeng dagiti dakes nga espiritu ti panangriribukda kenkuana.—Salmo 124:8; 145:18.
20. Kas pananggupgop, aniat’ maaramidanyo tapno masaranget dagiti dakes nga espiritu?
20 Pinalubosan ni Jehova dagiti dakes nga espiritu nga agbiag, ngem ipakpakitana ti pannakabalinna, a maipaay nangruna iti ilina, ken maibumbunannag ti naganna iti intero a daga. (Exodo 9:16) No agtalinaedkay a nasinged iti Dios, di rumbeng a kabutengyo dagiti dakes nga espiritu. (Numeros 23:21, 23; Santiago 4:7, 8; 2 Pedro 2:9) Limitado ti pannakabalinda. Nadusada idi kaaldawan ni Noe, naitappuakda manipud langit iti tiempotayo, ken ur-urayenda itan ti kamaudianan a pannakaukom. (Judas 6; Apocalipsis 12:9; 20:1-3, 7-10, 14) Kinapudnona, kabutengda ti sumungsungad a pannakadadaelda. (Santiago 2:19) Isu a no padasendakay dagiti dakes nga espiritu nga allukoyen babaen man ti maysa a kita ti appan wenno rauten iti aniaman a pamay-an, kabaelanyo a sarangten ida. (2 Corinto 2:11) Idianyo amin a kita ti espiritismo, iyaplikaryo ti balakad ti Sao ti Dios, ken gun-odenyo ti anamong ni Jehova. Diyo itantantan daytoy, ta agpannuray ti biagyo iti panangsarangetyo kadagiti dakes nga espiritu!
SUBOKENYO TI PANNAKAAMMOYO
Kasano a padpadasen dagiti dakes nga espiritu nga iyaw-awan dagiti tattao?
Apay a kondenaren ti Biblia
ti espiritismo?
Kasano a makalapsut ti maysa a tao kadagiti dakes nga espiritu?
Apay nga itultuloyyo a sarangten dagiti dakes nga espiritu?
[Salsaludsod]
[Ladawan iti panid 110]
Kasanot’ panangmatmatyo iti amin a kita ti espiritismo?
