Paset 7

Aniat’ Nagbanagan ti Iyaalsa?

1-3. Kasano a pinaneknekan ti tiempo nga umiso ni Jehova?

NO MAIPAPAN ti isyu iti kalintegan ti Dios a mangituray, ania ti nagbanagan dagitoy amin nga adu a siglo a panagturay ti tao a naisina iti Dios? Napaneknekan kadi dagiti tao a nasaysayaat ti panangiturayda ngem ti Dios? No ipatotayo iti rekord ti panangilupitlupit ti tao iti padana a tao, talaga a saan.

² Idi linaksid ti immuna a nagannaktayo ti turay ti Dios, simmaruno ti didigra. Inyegda ti panagsagabada met laeng ken ti amin a natauan a pamilia a nagtaud kadakuada. Ket awan ti pabasolenda no di ti bagbagida met laeng. Kunaen ti Sao ti Dios: “Dakes ti inaramidda; isuda saanna ida nga annak, dayta ti pilawda.”​—Deuteronomio 32:5.

³ Impakitan ti historia ti kinaumiso ti pakdaar ti Dios kada Adan ken Eva a no laksidenda ti probision ti Dios, lumakayda ken kamaudiananna matayda. (Genesis 2:17; 3:19) Linaksidda ti turay ti Dios, ket idi agangay limmakayda ket natayda.

4. Apay a naipasngaytay amin nga imperpekto, nalaka nga agsakit ken matay?

⁴ Ti napasamak kalpasanna kadagiti amin nga annakda ket ilawlawag ti Roma 5:12: “Gapuna no  kasano ti iseserrek ti basol ditoy lubong gapu iti maymaysa a tao [ni Adan, ti ulo ti pamilia ti sangatauan], ken ti ipapatay gapu iti basol, ket iti kasta ti ipapatay immay kadagiti isuamin a tattao.” Gapuna idi immalsa dagiti immuna a nagannaktayo iti panangiwanwan ti Dios, nagbalinda a managbasol nga addaan depekto. Maitunos iti linlinteg ti genetics, ti laeng kinaimperpekto ti maiyallatiwda kadagiti annakda. Daytat’ makagapu no apay a naiyanaktayo amin nga addaan depekto, nalaka nga agsakit ken matay.

5, 6. Aniat’ impakita ti historia maipapan ti panangikagumaan ti tao a mangyeg ti pudpudno a talna ken irarang-ay?

⁵ Adu a siglon ti limmabas. Dimteng ken naglabasen dagiti imperio. Isuamin a kita ti mapanunot a gobierno ket napadasen. Kaskasdi, maulit-ulit a napasamak dagiti nakaam-amak a bambanag iti natauan a pamilia. Kalpasan ti innem a ribo a tawen, mabalin a pagarupen ti maysa a rimmang-ayen ti tao agingga a maipasdeknan ti talna, kinahustisia, ken kinawadwad iti isuamin a daga ket itan mabalin a mairuruamdan kadagiti pagimbagan iti kinaanus, panangngaasi, ken panagtitinnulong.

⁶ Nupay kasta, iti kinapudnona, agpayso ti kasunganina. Awan ti pinartuat ti tao a gobierno a nakaiyeg iti pudpudno a talna ken kinawadwad para kadagiti amin. Iti daytoy maika-20 a siglo laeng, nakitatayo ti naiplano a panangpapatay kadagiti minilion bayat ti Holocaust ken ti sapasap a panangpapatay kadagiti nasurok a 100 milion kadagiti gubgubat. Iti tiempotayo umariwekwek a tattao ti matutuok, mapappapatay, ken maibalbalud gapu iti kinapanatiko ken pagdudumaan iti politika.

Ti Kasasaad Itatta

7. Kasano a mailadawan ti kasasaad ti natauan a pamilia itatta?

⁷ Mainayon pay, amirisenyo ti intero a kasasaad ti natauan a pamilia itatta. Agraira ti krimen ken kinaranggas. Makaalis ti panagabuso ti droga. Nasaknap dagiti maiyakar a saksakit gapu iti sekso. Agsakit dagiti minilion a tattao iti nakabutbuteng a sakit ti AIDS. Matay dagiti pinullo a milion a tattao iti bisin wenno sakit iti tinawen, ket mammano laeng dagiti nakabakbaknang. Mulitan ken dadaelen dagiti tao ti daga. Iti isuamin a lugar narban ti biag ti pamilia ken ti naimbag a kababalin. Talaga, iparangarang ti biag itatta ti nakalkaldaang a panangituray ‘ti dios daytoy a lubong,’ ni Satanas. Ti iturayanna a lubong ket nalamiis, narungsot, ken nakaro ti kinakillona.​—2 Corinto 4:4.

8. Apay a ditay maibaga a pudno nga irarang-ay dagiti naaramidan ti tao?

⁸ Impalubos ti Dios ti umdas a tiempo kadagiti tattao tapno makagtengda iti kangitingitan ti sientipiko ken material nga irarang-ayda. Ngem pudno kadi nga irarang-ay dayta no ti bai ken pana nasukatanen kadagiti machine gun, tangke, pangbomba a jet, ken dagiti nuclear missiles? Irarang-ay kadi dayta no makapagbiahe dagiti tao idiay law-ang ngem dida makapagnaed nga agkaykaysa ditoy daga a sitatalna? Irarang-ay kadi no maamak dagiti  tao a magna kadagiti kalsada no rabii, wenno uray pay iti aldaw kadagiti dadduma a lugar?

No Aniat’ Impakitan ti Tiempo

9, 10. (a) Aniat’ nalawag nga impakita dagiti napalabas a siglo? (b) Apay saanto nga ikkaten ti Dios ti wayawaya nga agpili?

⁹ Impakita ti panangsubok iti tiempo a saan a maiturong ti tao ti addangna a sibaballigi a naisina iti turay ti Dios. No di agbiag no saan a mangan, uminum, ken aganges kasta met imposible a maiturayanna ti bagina. Nalawag ti ebidensia: Naaramidtayo nga agpannuray iti panangiwanwan ti Namarsuatayo kas no kasano a naparsuatayo nga agpannuray iti taraon, danum, ken angin.

¹⁰ Babaen ti panangipalubosna iti kinadakes, iti namimpinsan impakita ti Dios dagiti nakalkaldaang a resulta ti di umiso a panangusar iti wayawaya nga agpili. Ket ti wayawaya nga agpili nakapatpateg a sagut ta imbes nga ikkatenna dayta kadagiti tao, pinalugodan ti Dios ida a mangkita ti pagbanagan ti di umiso a panangusar iti dayta. Pudno ti sawen ti Sao ti Dios no kunana: “Saan nga agtaud iti tao a magna a mangiturong kadagiti addangna.” Napudno met no kunana: “Inturayan ti tao ti padana a tao maipaay iti pagdaksanna.”​—Jeremias 10:23; Eclesiastes 8:9.

11. Adda kadi aniaman a porma ti turay ti tao a nakaikkat iti panagsagaba?

¹¹ Ti panangpalubos ti Dios iti panagturay ti tao iti innem a ribo a tawen nalawag nga ipakitana a saan a kabaelan ti tao a gupden ti panagsagaba. Dina pay naaramid ti kasta. Kas pangarigan, idi kaaldawan ni Ari Salomon, buyogen ti amin a kinasirib, kinabaknang, ken pannakabalin, dina napalinteg dagiti pammarigat a resulta ti panagturay ti tao. (Eclesiastes 4:1-3) Umasping iti dayta, iti kaaldawantayo di kabaelan dagiti agtuturay ti lubong a pukawen ti panagsagaba, uray pay buyogen dagiti kaudian a rinang-ayan ti teknolohia. Dakdakes pay, impakita ti historia a dagiti tao a naisina iti turay ti Dios pinakaroda pay ti panagsagaba imbes a pukawenda dayta.

Nawatiwat a Panangmatmat ti Dios

12-14. Ania dagiti nawatiwat a gunggona a dumteng gapu iti panangipalubos ti Dios iti panagsagaba?

¹² Nasaem para kadatayo ti panangipalubos ti Dios iti panagsagaba. Ngem pinilina ti nawatiwat a panangmatmat, ta ammona dagiti pagimbagan iti kamaudiananna. Ti panangmatmat ti Dios gunggonaannanto dagiti parsuana, saan laeng nga iti sumagmamano a tawen wenno sumagmamano a ribo, no di ket iti minilmilion a tawen, wen, iti agnanayon.

¹³ No iti masanguanan rumsuanto pay ti maysa a di umisot’ panangusarna iti wayawaya nga agpili tapno agduadua iti wagas ti panangaramid ti Dios kadagiti bambanag, dinto masapul a maikkanto pay iti tiempo a mangpaneknek kadagiti panangmatmatna. Gaput ta pinalubosannan dagiti immalsa iti rinibribo a tawen, naipasdeken ti Dios ti legal a pagwadan a mabalin nga iyaplikar iti agnanayon iti sadinoman iti uniberso.

¹⁴ Gapu ta pinalubosan ni Jehova ti kinadakes ken panagsagaba iti daytoy a tiempo, dayta umdaston a mangpaneknek nga awan ti aniaman nga agballigi a di maitunos kenkuana. Maipakitanton nga awan panagduadua nga awan ti naisina a gakat dagiti tao wenno dagiti espiritu a parsua a makaiyeg iti manayon a gunggona. Gapuna, naan-anayton a nainkalintegan ti sipapartak a panangrumek ti Dios iti aniaman nga umalsa. “Dagiti nadangkes pukawennanto.”​—Salmo 145:20; Roma 3:4.

[Salsaludsod]

[Ladawan iti panid 15]

Kalpasan a pinili dagiti immuna a nagannaktayo ti panangilaksid iti Dios, kamaudiananna limmakaydan ken nataydan

[Dagiti Ladawan iti panid 16]

Ti turay ti tao a naisina iti Dios napaneknekan a makadidigra

[Credit Line]

Ladawan ti U.S. Coast Guard