Paset 4

Ipakaammo ti Dios Dagiti Panggepna Kadatayo

1, 2. Kasanot’ pannakaammotayo a mangipaay ti Dios kadagiti sungbat kadagiti sipapasnek nga agimtuod?

ITI kinapudnona ti maysa a naayat a Dios ipalgakna dagiti panggepna kadagiti napasnek a mangsapul kenkuana. Pudno a mangipaay kadagiti agimtuod a tattao kadagiti sungbat dagiti saludsod a kas iti apay a pinalubosanna ti panagsagaba.

² Kunaen ti Biblia: “No isu [ti Dios] sapulem, isu masarakamto.” “Adda maysa a Dios sadi langit a Mangipalgak kadagiti palimed.” “Awanto ti aramiden ni Soberano nga Apo Jehova a dinto maipalgak ti palimedna kadagiti adipenna, dagiti mammadto.”​—1 Cronicas 28:9; Daniel 2:28; Amos 3:7.

Sadino ti Yan dagiti Sungbat?

3. Sadinot’ pakasarakantayo no apay a pinalubosan ti Dios ti panagsagaba?

³ Dagiti sungbat kadagiti saludsod a kas ti apay a pinalubosan ti Dios ti panagsagaba ken aniantot’ aramidenna iti dayta ket masarakan iti rekord nga impaltiingna nga agpaay a pakagunggonaantayo. Dayta a rekord isu ti Saona, ti Nasantuan a Biblia. “Amin a Sursurat nga impaltiing ti Dios isuda ti naimbag a pakasursuruan, pakatinggaran, pakababalawan, ken pakaadalan iti kinalinteg, tapno ti tao ti Dios naan-anay koma ket masursuruan a naimbag nga agaramid iti nasayaat.”​—2 Timoteo 3:16, 17.

4, 5. Aniat’ mamagbalin iti Biblia a naisangsangayan a libro?

⁴ Ti Biblia ket pudno a naisangsangayan a libro. Addaan ti umiso unay a rekord iti historia ti tao ken saklawenna pay uray ti labes ti panamarsua kadagiti tao. Maitunos met iti kaudian a pannakaammo, ta dagiti padtona mainaigda kadagiti pasamak iti tiempotayo ken kasta met iti asidegen a masanguanan.

⁵ Awanen ti sabali a libro nga addaan ti kasta a pakabigbigan iti kinaumiso ti historia. Kas pangarigan, adda laeng sumagmamano a manuskrito dagiti kadaanan a klasikal a mannurat. Ngem addada adu a manuskrito, a dadduma ti paspaset ken dadduma ti kompleto a Biblia: nga agarup 6,000 iti Hebreo a Kasuratan (ti 39 a liblibro iti “Daan a Tulag”) ken agarup 13,000 iti Kristiano a Griego a Kasuratan (ti 27 a liblibro iti “Baro a Tulag”).

6. Apay a masiguradotayo a ti Biblia itatta ket kapareho met laeng ti Biblia idi impaltiing ti Dios dayta?

⁶ Ti Mannakabalin-amin a Dios, a nangipaltiing ti Biblia, intalimengna ti kinatarnaw ti tekstona kadagidiay a kopia ti manuskrito. Gapuna ti Bibliatayo itatta ket kapareho a mismo ti orihinal a naipaltiing a sursurat. Ti sabali pay a banag a tumulong kadatayo a mangapresiar iti daytoy ket dadduma a kopia ti manuskrito iti Kristiano a Griego a Kasuratan agedaddat’ kurang a sangagasut a tawen manipud pannakaisurat dagiti orihinal a surat. Dagiti sumagmamano a kopia ti manuskrito dagiti kadaanan a sekular a mannurat nga adda pay laeng ita mammano a napetsaanda iti uray sumagmamano laeng a siglo manipud iti orihinal nga autor.

Sagut ti Dios

7. Kasanot’ kasaknap ti nakaiwarasan ti Biblia?

⁷ Ti Biblia isu ti kasasaknapan ti pannakaiwarasna a libro iti historia. Agarup tallo a bilion a kopia ti naimaldit. Awanen ti sabali a libro nga asideg iti dayta a bilang. Ket ti Biblia wenno paspaset dayta naipatarusen iti agarup 2,000 a pagsasao. Gapuna, mapattapatta a 98 porsiento iti populasion ti planetatayo mabalin a mabasanan ti Biblia.

8-10. Ania dagiti dadduma a rason no apay a rumbeng a sukimatentayo ti Biblia?

 ⁸ Talaga a ti libro a mangaklon a nagtaud iti Dios ken addaan kadagiti isuamin a pammaneknek iti kinaagpaypaysona iti ruar ken iti linaonna a mismo ket maiparbeng iti panangsukimattayo. * Dayta ilawlawagna ti panggep iti biag, ti kaipapanan dagiti kasasaad ti lubong, ken no ania ti ipaay ti masanguanan. Awanen ti sabali a libro a makaaramid iti dayta.

⁹ Wen, ti Biblia isut’ pakisawan ti Dios iti natauan a pamilia. Inturongna ti pannakaisuratna babaen iti aktibo a puersana, wenno espirituna, nga agarup 40 a lallaki ti nangisurat. Gapuna nakisao ti Dios kadatayo babaen iti Saona, ti Nasantuan a Biblia. Nagsurat ni apostol Pablo: “Idi inawatyo ti sao ti Dios, a nangngeganyo kadakami, inawatyo dayta, saan a kas la sao dagiti tao, no di ket, kas pudno a sao ti Dios.”​—1 Tesalonica 2:13.

¹⁰ Ni Abraham Lincoln, ti maika-16 a presidente ti Estados Unidos, inawaganna ti Biblia a “ti kasayaatan pay laeng a sagut ti Dios iti tao . . . Ngem no awan dayta ditay mailasin ti naimbag manipud iti dakes.” Ngarud, ania ti ibaga daytoy nagsayaatan a sagut kadatayo maipapan ti no kasano a nangrugi ti panagsagaba, apay a pinalubosan ti Dios dayta, ken anianto ti aramidenna iti dayta?

[Footnotes]

[Salsaludsod]

[Ladawan iti panid 10]

Ti Biblia, impaltiing ti Dios, isut’ pakisawanna iti natauan a pamilia