Paset 11

Mabukbukelen ti Pamuon ti Baro a Lubong

1, 2. Iti kaitungpalan ti padto ti Biblia, aniat’ mapaspasamaken iti imatangtayo?

TI PAY nakaskasdaaw isut’ kinapudno a ti pamuon ti baro a lubong ti Dios ket mabukbukelen, uray bayat ti pannakarbek ti daan a lubong ni Satanas. Iti imatangtayo a mismo, ur-urnongen ti Dios dagiti tao manipud kadagiti amin a nasion ket buklenna ida a pamuon iti baro a naindagaan a kagimongan a mangsukatto iti mabiiten iti nasinasina a lubong itatta. Iti Biblia, idiay 2 Pedro 3:13, daytoy a baro a kagimongan ket naawagan “maysa a baro a daga.”

² Kuna met ti padto ti Biblia: “Kadagiti maudi nga al-aldaw [ti tiempo a pagbibiagantayo ita] . . . , ket adu dagiti inilin-ili a mapanto ken agkuna: ‘Umaykayo, ket sumang-attayo iti bantay ni Jehova [ti pudno a panagdayaw kenkuana], . . . ket isuronatayonto kadagiti dalanna, ket magnatayonto kadagiti danana.’”​—Isaias 2:2-3.

3. (a) Kadagiti asino a natungpal ti padto ni Isaias? (b) Kasano a kinumentuan ti maudi a libro ti Biblia daytoy?

³ Matungtungpalen dayta a padto kadagidiay nga agpaituray iti ‘daldalan ti Dios ken magna kadagiti danana.’ Ti maudi a libro ti Biblia saritaenna daytoy internasional a kagimongan dagiti managayat-talna a tattao a kas “umariwekwek . . . a naggapuda kadagiti isuamin a nasion ken tribo ken il-ili ken pagsasao,” maysa a pudno a sangaglobo a panagkakabsat nga agserserbi a sangsangkamaysa iti Dios. Ket kuna pay ti Biblia: “Dagitoy isuda dagiti naggapu iti dakkel a rigat.” Kayatna a  sawen, makalasatdanto iti panungpalan daytoy dakes a sistema dagiti bambanag.​—Apocalipsis 7:9, 14; Mateo 24:3.

Maysa a Pudno nga Internasional a Panagkakabsat

4, 5. Apay a mabalin a mapasamak ti sangalubongan a panagkakabsat dagiti Saksi ni Jehova?

⁴ Minilion a Saksi ni Jehova ti sipapasnek a mangpadpadas nga agbiag a maitunos iti bilbilin ken daldalan ti Dios. Ti inanamada a biag nga agnanayon ket naiyangkla iti baro a lubong ti Dios. Babaen ti panagtulnogda nga inaldaw-aldaw kadagiti linlinteg ti Dios, ipakpakitada a situtulokda nga agpaituray iti wagas ti panangiturayna ita ken idiay baro a lubong. Iti sadinoman, aniaman ti nasion wenno rasada, tungpalenda ti isu met laeng a pagalagadan​—dagidiay impasdek ti Dios iti Saona. Daytat’ makagapu a pudno ti internasional a panagkakabsatda, maysa a baro a lubong a sosiedad nga inaramid ti Dios.​—Isaias 54:13; Mateo 22:37, 38; Juan 15:9, 14.

⁵ Saan nga ak-aklonen dagiti Saksi ni Jehova ti dayaw iti panagbalinda a maysa a naisangsangayan a sangaglobo nga agkakabsat. Ammoda a daytoy ket resulta ti nabileg nga espiritu ti Dios nga agtigtignay kadagiti tao nga agpaituray iti linlintegna. (Aramid 5:29, 32; Galacia 5:22, 23) Daytat’ inaramid ti Dios. Kas kinuna ni Jesus, “dagiti banag a saan a mabalin kadagiti tao mabalin iti Dios.” (Lucas 18:27) Gapuna ti Dios a nangaramid iti naandur nga uniberso isu daydiay mangaramid iti naandur a baro a lubong a sosiedad.

6. Apay a mabalin nga awagan ti panagkakabsat dagiti Saksi ni Jehova a moderno a datdatlag?

⁶ Gapuna, ti wagas ti panangituray ti Jehova idiay baro a lubong mabalin a makitan iti parparnuayenna a pamuon ti baro a lubong a mabukbukelen. Ket ti inaramidnan kadagiti Saksina, kayariganna, maysa a moderno a datdatlag. Apay? Agsipud ta naibangonna dagiti Saksi ni Jehova a maysa a pudno a sangalubongan nga agkakabsat, maysa a dinto pulos masinasina babaen kadagiti mangbingaybingay nga intereses ti nasion, rasa, wenno relihion. Nupay minilionen ti bilang dagiti Saksi ken agnanaedda iti nasurok a 200 a dagdaga, nareppetda iti maymaysa a di magessat a singgalut. Daytoy a sangalubongan a panagkakabsat, a naisangsangayan iti amin a historia, ket pudno a moderno a datdatlag​—aramid ti Dios.—​Isaias 43:10, 11, 21; Aramid 10:34, 35; Galacia 3:28.

Panangilasin iti Ili ti Dios

7. Sigun ken Jesus kasano a mailasin dagiti pudno nga adalanna?

⁷ Kasano pay a maikeddeng no asino ti tattao nga us-usaren ti Dios kas pamuon ti baro a lubongna? Bueno, asino ti mangtungtungpal kadagiti sasao ni Jesus idiay Juan 13:34, 35? Kinunana: “Maysa a bilin a baro ti itdek kadakayo, tapno agayan-ayatkayo iti maysa ken maysa; kas iti panagayatko kadakayo, kasta met agayan-ayatkay koma iti maysa ken maysa. Gapu itoy mailasindanto a dakayo ti adalak, no adda ayatyo iti maysa ken maysa.” Patien dagiti Saksi ni Jehova dagiti sasao ni Jesus ket agtignayda a maitunos kadagitoy. Kas isuro ti Sao ti Dios, ‘nasged ti panagayatda iti maysa ken maysa.’ (1 Pedro 4:8) “Ikawes[da] ti ayat, isu a singgalut ti naan-anay a panagkaykaysa.” (Colosas 3:14) Gapuna ti nainkabsatan nga ayat isu ti “kola” a mamagkaykaysa kadakuada iti sangalubongan.

8. Kasano pay nga ilasin ti 1 Juan 3:10-12 ti ili ti Dios?

⁸ Kasta met, kuna ti 1 Juan 3:10-12: “Iti daytoy maiparangarang dagiti annak ti Dios ken dagiti annak ti Diablo: Siasinoman a saan nga agaramid ti kinalinteg saan a nagtaud iti Dios, uray ti di agayat ken kabsatna. Ta daytoy ti damag a nangngegyo nanipud idi punganay, nga agayan-ayattayo koma; saan a kas ken ni Cain a nagtaud iti dakes ket pinatayna ni kabsatna.” Gapuna, ti ili ti Dios saan a naranggas, sangaglobo nga agkakabsat.

Sabali Pay Pakailasinan

9, 10. (a) Babaen iti ania a trabaho a mailasin dagiti adipen ti Dios iti maudi nga al-aldaw? (b) Kasano a tinungpal dagiti Saksi ni Jehova ti Mateo 24:14?

⁹ Adda pay sabali a pamay-an iti panangilasin  kadagiti adipen ti Dios. Iti padtona maipapan ti panungpalan ti lubong, imbaga ni Jesus dagiti adu a bambanag a mangtanda itoy a tiempo kas ti maudi nga al-aldaw. (Kitaenyo ti Paset 9.) Maysa a kangrunaan a paset daytoy a padto ket nadakamat kadagti sasaona idiay Mateo 24:14: “Daytoy naimbag a damag ti pagarian maikaskasabanto iti amin a napagnaedan a daga a maipaay a pammaneknek kadagiti amin a nasion; ket kalpasanna umayton ti panungpalan.”

¹⁰ Nakitatayo kadin a matungtungpal dayta a padto? Wen. Yantangay nangrugi ti maudi nga al-aldaw idi 1914, dagiti Saksi ni Jehova inkaskasabadan ti naimbag a damag ti Pagarian ti Dios iti isuamin a lubong iti wagas nga imbilin ni Jesus, kayatna a sawen, iti balbalay dagiti tao. (Mateo 10:7, 12; Aramid 20:20) Minilion a Saksi ti sumarungkar kadagiti tao iti tunggal nasion a makisarita kadakuada maipapan iti baro a lubong. Daytoy ti nangiturong ti pannakaawatyo itoy a broshur, ta ti trabaho dagiti Saksi ni Jehova iramanna ti panagimaldit ken panagiwaras kadagiti binilion a literatura maipapan iti Pagarian ti Dios. Adda kadi am-ammoyo a mangaskasaba iti Pagarian ti Dios kadagiti balaybalay iti intero a lubong? Ken ipakita ti Marcos 13:10 a daytoy a trabaho a panangikasaba ken panangisuro masapul a maaramid nga “umuna,” sakbay a dumteng ti panungpalan.

Panangsungbat ti Maikadua a Dakkel nga Isyu

11. Ania pay ti naibanag dagiti Saksi ni Jehova babaen ti panagpaiturayda iti Dios?

¹¹ Babaen iti panagpaituray iti linlinteg ken prinsipio ti Dios, adda pay maibanag dagiti Saksi ni Jehova. Ipakpakitada nga ulbod ni Satanas idi kinunana a saan nga agmatalek dagiti tao iti Dios no masuot, ket iti kasta sungsungbatanda ti maikadua a dakkel nga isyu, a mangiraman iti kinamatalek ti tao. (Job 2:1-5) Gapu ta maysada a sosiedad dagiti minilion a tao manipud iti amin a nasion, ipakita dagiti Saksi, kas maysa a bagi, ti kinasungdo iti turay ti Dios. Nupay imperpektoda, itandudoda ti dasig ti Dios iti isyu ti sapasap a kinasoberano, agpapan pay ti panangparigat ni Satanas.

12. Babaen iti pammatida, asino ti tultuladen dagiti Saksi?

¹² Itatta, dagitoy a minilion a Saksi ni Jehova inayonda pay ti pammaneknek iti dayta nakawatwatiwaten a linea dagiti dadduma a saksi idi napalabas a nangipakitan iti kinasungdoda iti Dios. Dadduma kadagidiay isu da Abel, Noe, Job, Abraham, Sara, Isaac, Jacob, Deborah, Ruth, David, ken Daniel, no dakamaten laeng dagiti sumagmamano. (Hebreo, kapitulo 11) Dagitoy, kas kunaen ti Biblia, ti ‘nagdakkel a kaadu dagiti saksi.’ (Hebreo 12:1) Dagitoy ken dagiti dadduma pay agraman dagiti adalan ni Jesus sinalimetmetanda ti kinatarnawda iti Dios. Ket ni Jesus a mismo nangipaay iti kadadakkelan nga ulidan babaen ti panangsalimetmetna iti naan-anay a kinatarnaw.

13. Ania dagiti pimmayso a sasao ni Jesus maipapan ken Satanas?

¹³ Daytoy paneknekanna a pudno ti kinuna ni Jesus kadagiti papangulo ti relihion maipapan ken Satanas: “Ngem ita agawaandak a papatayen, toy tao a nagsao kadakayo ti pudno a nangngegko iti Dios. . . . Kukuanakayo ti Diablo nga amayo, ket kayatyo nga aramiden dagiti kalikagum ni amayo. Isu nakapapatay nanipud idi damo, ket saan a nagtalinaed iti pudno, ta awan ti pudno kenkuana. No agsao ti ulbod, sawenna ti kababalinna met laeng, ta isu manangulbod ken ama ti kinaulbod.”​—Juan 8:40, 44.

Ania ti Piliyo?

14. Aniat’ mapaspasamaken iti pamuon ti baro a lubong?

¹⁴ Ti pamuon ti baro a lubong a bukbuklenen ti Dios iti internasional a sosiedad dagiti Saksi ni Jehova ti bumilbilegen. Tinawentawen ginasut a ribo a tattao ti mangus-usar iti wayawayada nga agpili, a naibatay iti umiso a pannakaammo, nga umawat iti turay ti Dios. Agbalinda a paset ti baro a lubong a sosiedad, a mangitantandudo iti dasig ti Dios iti isyu ti sapasap a kinasoberano, ket paneknekanda nga ulbod ni Satanas.

15. Ania a trabaho a pananglasinlasin ti ar-aramiden ni Jesus iti kaaldawantayo?

¹⁵ Babaen ti panangpili iti turay ti Dios, maisaadda  iti “makanawan” ni Kristo bayat a lasinlasinenna “dagiti karnero” manipud “kadagiti kalding.” Iti padtona maipapan iti maudi nga al-aldaw, impadto ni Jesus: “Maurnongto dagiti amin a nasion iti sanguananna, ket paglalasinennanto dagiti maysa ken maysa kadagiti tao, a kas iti pastor ilasinna dagiti karnero kadagiti kalding. Ket isaadnanto dagiti karnero iti makanawanna, ngem dagiti kalding iti makatigidna.” Dagiti karnero isu dagiti napakumbaba a tattao a makitimpuyog ken tumulong kadagiti kakabsat ni Kristo, nga agpaiturayda iti Dios. Dagiti kalding isu dagiti nasukir a tao a mangilaksid kadagiti kakabsat ni Kristo ket saanda nga itandudo ti turay ti Dios. Ania ti banagda? Kinuna ni Jesus: “Dagitoy [dagiti kalding] mapandanto iti agnanayon a pannakapukaw, ngem dagiti nalinteg [dagiti karnero] iti biag nga agnanayon.”​—Mateo 25:31-46.

16. Aniat’ masapul nga aramidenyo no kayatyo ti agbiag idiay umay a Paraiso?

¹⁶ Talaga, maseknan ti Dios kadatayo! Iti mabiiten ipaaynanton ti nakaragragsak a naindagaan a paraiso. Kayatyo kadi ti agbiag iti dayta a Paraiso? No kayatyo, ipakitayo ti panangapresiaryo kadagiti probision ni Jehova babaen ti panangammo kenkuana ken agtignay a maitunos iti naammuanyo. “Sapulenyo ni Jehova, ita ta masarakan pay. Umawagkayo kenkuana ita ta asideg pay. Ti managdakdakes bay-anna koma ti dalanna, ken ti tao a saan a nalinteg dagiti pampanunotna; ket agsubli koma ken Jehova, ket isu kaasiannanto.”​—Isaias 55:6, 7.

17. Apay nga awan koma ti tiempo a sayangentayo iti panangpili no asino ti pagserbiantayo?

¹⁷ Awan tiempo a sayangen. Asideg unayen ti panungpalan daytoy daan a sistema. Mamalakad ti Sao ti Dios: “Dikay ayaten ti lubong wenno dagiti bambanag nga adda ditoy lubong. No ti siasinoman a tao agayat iti lubong, ti ayat ti Ama awan kenkuana . . . Maysa pay, ti lubong aglabas, ken kasta met dagiti tarigagayna, ngem ti agaramid ti pagayatan ti Dios agtalinaed iti agnanayon.”​—1 Juan 2:15-17.

18. Ania a tignay ti mamagtalek kadakayo a manginanama nga agbiag idiay nakaskasdaaw a baro a lubong ti Dios?

¹⁸ Masansanayen ti ili ti Dios a maipaay iti biag nga agnanayon idiay baro a lubong. Masursurodan dagiti espiritual ken dadduma pay a laing a kasapulan a mamartuat iti paraiso. Paregtaendakayo a mangpili iti Dios kas Agturay ket tumulongkayo iti makaispal-biag a trabaho nga ar-aramidenna iti intero a daga ita. Makipagadal ti Biblia kadagiti Saksi ni Jehova, ket maammuanyonto ti Dios a pudno a maseknan kadakayo ken isu a mangipatingganto iti panagsagaba. Iti kastoy agbalinkayto met a paset ti pamuon ti baro a lubong. Ket agtalekkayo a magun-odyonto ti anamong ti Dios ken agbiag nga agnanayon dita nakaskasdaaw a baro a lubong.

[Salsaludsod]

[Ladawan iti panid 31]

Dagiti Saksi ni Jehova addaanda ti pudpudno nga internasional a panagkakabsat

 [Ladawan iti panid 32]

Mabukbukelen ti pamuon ti baro a lubong ti Dios