Paset 8

Matungtungpalen ti Panggep ti Dios

1, 2. Kasano a nangar-aramiden ti Dios ti probision a mangikkat iti panagsagaba?

TI PANANGITURAY dagiti managalsa a tao ken sairo ti nangilupitlupiten ti natauan a pamilia iti adun a siglo. Kaskasdi, di binaybay-an ti Dios nga agsagabatayo. Imbes ketdi, bayat dagitoy amin a siglo, isut’ mangar-aramid iti probision a mangwayawaya kadagiti tao manipud iti panangpetpet ti kinadakes ken panagsagaba.

² Idi tiempo ti iyaalsa idiay Eden, rinugian ti Dios nga impalgak ti panggepna a mangporma iti maysa a gobierno a mamagbalinto itoy a daga a paraiso a pagtaengan dagiti tao. (Genesis 3:15) Kamaudiananna, kas kangrunaan a pannakangiwat ti Dios, inaramid ni Jesus daytoy umay a gobierno ti Dios a tema ti panangisurona. Imbagana a daytat’ kakaisuna a namnama ti sangatauan.​—Daniel 2:44; Mateo 6:9, 10; 12:21.

3. Ania ti inyawag ni Jesus iti umay a gobierno a maipaay iti daga, ken apay?

³ Inawagan ni Jesus ti umay a gobierno ti Dios a “ti pagarian dagiti langlangit,” yantangay daytat’ agturay manipud langit. (Mateo 4:17) Inawaganna met dayta a “ti pagarian ti Dios,” yantangay ti Dios ti Mangaramidto iti dayta. (Lucas 17:20) Iti adun a siglo pinaltiingan ti Dios dagiti mannuratna a mangisurat kadagiti padto maipapan kadagidiay a mangbukelto iti dayta a gobierno ken no anianto ti ibanagna.

Baro nga Ari ti Daga

4, 5. Kasano nga impakita ti Dios a ni Jesus ti inanamonganna nga Ari?

⁴ Ni Jesus, iti dandani dua ribo a tawen a napalabasen, ti nangitungpal kadagiti adu a padpadto maipapan iti daydiay agbalinto nga Ari ti Pagarian ti Dios. Pinaneknekanna nga isut’ pinili ti Dios nga Agturay dayta nailangitan a gobierno a mangituray iti sangatauan. Kalpasan ti ipapatayna, pinagungar ti Dios ni Jesus nga agbiag idiay langit kas maysa a mannakabalin, imortal nga espiritu a parsua. Adut’ nakasaksi iti panagungarna.​—Aramid 4:10; 9:1-9; Roma 1:1-4; 1 Corinto 15:3-8.

⁵ Idin “nagtugaw [ni Jesus] iti makanawan ti Dios.” (Hebreo 10:12) Sadiay inurayna ti tiempo inton itden ti Dios ti pannakabalinna nga agtignay kas Ari ti nailangitan a Pagarian ti Dios. Daytoy tinungpalna ti padto idiay Salmo 110:1, a sadiay ibaga ti Dios kenkuana: “Agtugawka iti makanawanko agingga a mapagbanagko dagiti kabusormo a pagbatayam.”

6. Kasano nga impakita ni Jesus nga isut’ kualipikado nga agbalin nga Ari ti Pagarian ti Dios?

⁶ Bayat nga adda ditoy daga, impakita ni Jesus nga isut’ kualipikado nga agpaay iti kasta a saad. Nupay naidadanes, pinilina a taginayonen ti kinatarnawna iti Dios. Babaen ti panangaramidna iti kasta, impakitana a nagulbod ni Satanas idi kinunana nga awan ti tao a makapagtalinaed a matalek iti Dios iti sidong ti pannakasulisog. Ni Jesus, maysa a perpekto a tao, ti ‘maikadua nga Adan,’ impakitana a saan a nagbiddut ti Dios iti panangparsuana kadagiti perpekto a tao.​—1 Corinto 15:22, 45; Mateo 4:1-11.

7, 8. Ania dagiti naimbag a bambanag nga inaramid ni Jesus bayat nga adda ditoy daga, ket ania ti indemostrana?

⁷ Ania nga agturay ti nakaibanag iti kasta kaadu a pagimbagan a kas ti inaramid ni Jesus bayat ti sumagmamano a tawen a ministeriona? Napabileg babaen iti nasantuan nga espiritu ti Dios, pinaimbag ni Jesus dagiti masakit, pilay, bulsek, tuleng, umel. Pinagungarna pay dagiti natay! Impakitana iti bassit a pamay-an ti aramidennanto iti sangatauan iti kasaknap a sangaglobo inton agtugawen nga agari iti Pagarian.​—Mateo 15:30, 31; Lucas 7:11-16.

 ⁸ Adu a pagimbagan ti inaramid ni Jesus ditoy daga ta kinuna ti adalanna a ni Juan: “Ket adda pay adu a sabsabali nga inaramid ni Jesus, a no maisuratda koma a masaggaysa, pagarupek nga uray daytoy lubong saanna a malaon dagiti lukot ti pagbasaan a pakaisuratanda koma.”​—Juan 21:25. *

9. Apay nga umarak dagiti nasingpet-panagpuspusona a tao ken Jesus?

⁹ Ni Jesus naanus ken manangaasi, a kasta unay ti panagayatna kadagiti tao. Tinulonganna dagiti marigrigat ken malmaldaang, ngem dina insalsalumina dagidiay nabaknang wenno addaan saad. Dagiti nasingpet a tao impangagda ti naayat nga awis ni Jesus idi kinunana: “Umaykayo kaniak, dakayo amin nga agrigrigat ken madagdagsenan, ta paginanaenkayto. Alaenyo ti sangolko kadakayo ket agsursurokayo kaniak, ta siak naasiak ken napakumbaba ti panagpuspusok, ket makasarakkayto iti inana a maipaay kadagiti kararuayo. Ta ti sangolko nalaka ken nalag-an ti awitko.” (Mateo 11:28-30) Dagiti managbuteng-Dios a tao umarakda kenkuana ket inanamaenda ti panangiturayna.​—Juan 12:19.

Kadua nga Agtuturay

10, 11. Asino ti makiraman ken Jesus a mangituray iti daga?

¹⁰ No kasano a dagiti gobierno ti tao addaan kadagiti kadua nga administrador, kasta met ti nailangitan a Pagarian ti Dios. Dadduma malaksid ken Jesus makiramanda a mangituray iti daga, ta inkari ni Jesus kadagiti nasinged a kaduana a makipagturayda kenkuana kas ar-ari iti sangatauan.​—Juan 14:2, 3; Apocalipsis 5:10; 20:6.

¹¹ Gapuna, kadua ni Jesus, maysa a limitado a bilang dagiti tao ti mapagungar met iti nailangitan a biag. Dagitoy buklenda ti Pagarian ti Dios a mangiyegto iti agnanayon a bendision iti sangatauan. (2 Corinto 4:14; Apocalipsis 14:1-3) Gapuna iti adun a panawen, insaaden ni Jehova ti pamuon iti panangiturayna a mangiyegto iti agnanayon a bendision ti natauan a pamilia.

Agpatingganton ti Naisina a Turay

12, 13. Aniat’ nakasaganan nga aramiden ti Pagarian ti Dios?

¹² Iti daytoy a siglo nakibibiangen ti Dios kadagiti ar-aramid ditoy daga. Kas isalaysayto ti Paset 9 daytoy a broshur, ipakita ti padto ti Biblia a ti Pagarian ti Dios iti sidong ni Kristo ket naipasdeken idi 1914 ket itan nakasaganan a mangrebbek iti intero a sistema ni Satanas. Dayta a Pagarian sisasaganan nga “agturay iti tengnga dagiti kabusor [ni Kristo].”​—Salmo 110:2.

¹³ Maipapan itoy kunaen ti padto idiay Daniel 2:44: “Ket kadagiti al-aldaw dagita nga ar-ari [nga adda itatta] ti Dios ti langit mamangonto iti maysa a pagarian [idiay langit] a kaanoman dinto madadael  ket ti panagturayna dinto met maited iti sabali nga ili [turay ti tao dinto pulos mapalubosanen]. Ngem [ti Pagarian ti Dios] burakennanto ken ibusennanto amin dagitoy a pagpagarian ket isu agtalinaed iti agnanayon.”​—Revised Standard Version.

14. Ania ti dadduma a gunggona a dumtengto kas banag ti panagpatingga ti turay ti tao?

¹⁴ Inton naikkaten dagiti amin a panangituray a naisina iti Dios, agturayton a naan-anay ti Pagarian ti Dios ditoy daga. Ket gapu ta agturay ti Pagarian manipud langit, saanto a pulos a mamulitan ti tao. Ti panangituray maisaadto iti umiso a lugarna idi punganay, idiay langit, babaen iti Dios. Ket yantangay iturayan ti Dios ti isuamin a daga, awanto ti asinoman nga allilawen dagiti ulbod a relihion wenno ti dakes a natauan a pilosopia ken napolitikaan a teoria. Awanton ti mapalubosan a tumanor kadagidiay a banag.​—Mateo 7:15-23; Apocalipsis, kapitulo 17 agingga iti 19.

[Footnotes]

[Salsaludsod]

[Ladawan iti panid 18]

Bayat ti kaaddana ditoy daga inagasan ni Jesus dagiti masakit ken pinagungarna dagiti natay tapno ipakitana ti aramidennanto iti baro a lubong

[Ladawan iti panid 19]

Pukawento ti nailangitan a Pagarian ti Dios dagiti amin nga adda a porma ti turay a naisina kenkuana