Paset 6

No Apay a Pinalubosan ti Dios ti Panagsagaba

1, 2. Kasano a dinadael ti immuna a nagannaktayo ti nagsayaatan a pangrugian nga inted ti Dios kadakuada?

ANIAT’ napasamak a dakes? Aniat’ napasamak a nangdadael iti nagsayaatan a pangrugian nga inted ti Dios iti immuna a nagannaktayo idiay Paraiso ti Eden? Apay, a nagraira ti kinadakes ken panagsagaba iti rinibribo a tawen, imbes a ti talna ken panagtutunos iti Paraiso?

 ² Ti rason ket di umiso ti panangusar da Adan ken Eva iti wayawayada nga agpili. Saanda nga inamiris ti kinapudno a saanda a naparsua nga agballigi a naisina iti Dios ken iti linlintegna. Inkeddengda ti sumina iti Dios, a pampanunotenda a daytoy parang-ayenna ti panagbiagda. Gapuna linab-awanda ti intuding-Dios a pagpatinggaan ti wayawayada nga agpili.​—Genesis, kapitulo 3.

Ti Isyu iti Sapasap a Soberania

3-5. Apay a saan a basta dinadael koma ti Dios da Adan ken Eva ken nangrugi manen?

³ Apay a saan a basta dinadadael koma ti Dios da Adan ken Eva ket nangrugi manen iti sabali a natauan a paris? Agsipud ta ti sapasap a soberaniana, ti di mayallatiw iti sabali a kalinteganna a mangituray, nakarit.

⁴ Ti saludsod ket: Asino ti addaan ti kalintegan a mangituray, ken makin-turay ti umiso? Ti kinamannakabalin-aminna ken ti kina-Namarsuana kadagiti amin a parparsua ti mangipaay ti kalintegan iti Dios a mangituray kadakuada. Yantangay isut’ nasirib kadagiti amin, ti turayna ti kasayaatan para kadagiti amin a parparsua. Ngem ita nakariten ti turay ti Dios. Kasta met, adda kadi aniaman a dakes iti pinarsuana​—ti tao? Amirisentayonto no kasano a nairaman ti parikut a kinatarnaw ti tao.

⁵ Babaen ti isisina ti tao iti Dios, adda pay rimsua a sabali a parikut: Mabalin kadi a nasaysayaat ti kasasaad ti tao no saan nga iturayan ti Dios ida? Talaga nga ammo ti Dios ti sungbat, ngem tapno sigurado a maammuan ti tao ti sungbat pinalubosanna ida iti tartarigagayanda a naan-anay a wayawaya. Pinilida dayta a dalan a bukbukodda, gapuna impalubos ti Dios dayta.

6, 7. Apay nga impalubos ti Dios ti naan-anay a wayawaya kadagiti tao iti nakawatwatiwat a tiempo?

⁶ Babaen ti panangipalubosna iti umdas a tiempo kadagiti tao nga ageksperimento iti naan-anay a wayawaya, risuten ti Dios a namimpinsan no nasaysayaat ti kasasaad dagiti tao no iturayan ti Dios ida wenno agwaywayasda. Ket ti impalubos ti Dios a tiempo masapul a nawatiwat tapno palubosanna dagiti tao a makagteng iti ibilangda a kangitingitan ti naaramidanda iti politika, industria, siensia, ken medisina.

⁷ Ngarud, pinalubosan ti Dios ti tao a mangituray iti bagina agingga iti kaaldawantayo tapno ipakitana nga awan ti panagduadua no ti panangituray ti tao nga awan pannakibiangna ket agballigi. Gapuna mabalin a pilien ti tao ti kinamanangaasi ken kinaranggas, ti ayat ken gura, ti kinalinteg ken kinakillo. Ngem naipasango met kadagiti pagbanagan ti pilina: kinaimbag ken talna wenno kinadakes ken panagsagaba.

Iyaalsa dagiti Espiritu a Parparsua

8, 9. (a) Kasano a rimsua ti iyaalsa iti yan dagiti espiritu? (b) Asino pay malaksid kada Adan ken Eva ti inimpluensiaan ni Satanas nga umalsa?

⁸ Adda pay sabali a banag nga amirisentayo. Saan laeng a dagiti immuna a nagannaktayo ti umalsanto iti turay ti Dios. Ngem asino pay dagiti sibibiag idi a tiempo? Dagiti espiritu a parparsua. Sakbay a pinarsua ti Dios dagiti tao, pinarsuana ti nangatngato a kita ti biag, dagiti adu nga anghel, nga agbiag idiay langit. Dagitoy naparsuada met nga addaan wayawaya nga agpili ken masapul met nga agpaiturayda iti turay ti Dios.​—Job 38:7; Salmo 104:4; Apocalipsis 5:11.

 ⁹ Ipakita ti Biblia a rimsua ti immuna nga iyaalsa iti lugar dagiti espiritu. Maysa nga espiritu a parsua tinarigagayanna ti naan-anay a wayawaya. Tarigagayanna pay nga agdayaw dagiti tao kenkuana. (Mateo 4:8, 9) Daytoy a managalsa nga espiritu inimpluensiaanna da Adan ken Eva nga umalsa, a siuulbod a kunkunaenna nga adda naimbag nga ilimlimed ti Dios kadakuada. (Genesis 3:1-5) Gapuna isut’ naawagan Diablo (Manangpardaya) ken Satanas (Bumusbusor). Kamaudiananna, inawisna ti dadduma nga espiritu a parparsua nga umalsa. Dagitoy naawaganda a dagiti demonio.​—Deuteronomio 32:17; Apocalipsis 12:9; 16:14.

10. Aniat’ nagbanagan ti iyaalsa dagiti tao ken dagiti espiritu a parparsua?

¹⁰ Babaen ti iyaalsada iti Dios, naipasango dagiti tao iti impluensia ni Satanas ken dagiti demoniona. Daytat’ makagapu no apay nga awagan ti Biblia ni Satanas a “ti dios daytoy sistema dagiti bambanag,” a “nangbulsek ti is-isip dagiti di mammati.” Gapuna, kunaen ti Sao ti Dios a “ti isuamin a lubong adda iti pannakabalin ti managdakdakes.” Inawagan a mismo ni Jesus ni Satanas a “ti agturay daytoy a lubong.”​—2 Corinto 4:4; 1 Juan 5:19; Juan 12:31.

Dua nga Isyu

11. Maipapan iti ania a sabali pay nga isyu a kinarit ni Satanas ti Dios?

¹¹ Nangibangon pay ni Satanas ti sabali nga isyu a nangkarit iti Dios. Kaiyariganna, namabasol a nagbiddut ti Dios iti wagas ti panangparsuana kadagiti tao ket awan ti agtarigagay a mangaramid iti umiso no daytoy ket maparigat. Kinapudnona, kinunana a no masubokda ilunodda pay ti Dios. (Job 2:1-5) Iti kastoy pinagduaduaan ni Satanas ti kinatarnaw ti natauan a parsua.

12-14. Kasano nga ipalgak ti tiempo ti kinapudno maipapan kadagita dua nga isyu nga imbangon ni Satanas?

¹² Ngarud, impalubos ti Dios ti umdas a tiempo kadagiti nasaririt a parparsua tapno makita no kasano a marisut daytoy nga isyu agraman ti isyu ti kinasoberano ti Dios. (Idiligyo ti Exodo 9:16.) Dagiti paspasamak iti historia ti tao ipalgakna ti kinapudno maipapan kadagitoy dua nga isyu.

¹³ Umuna, aniat’ ipalgak ti tiempo maipapan iti isyu ti sapasap a kinasoberano, ti kinaumiso ti turay ti Dios? Nasaysayaat kadi ti panangituray dagiti tao iti bagida ngem ti panangituray ti Dios? Adda kadi aniaman a panangituray ti tao a naisina iti Dios a makaipaay iti naragsak a lubong nga awan ti gubat, krimen, ken panangirurumen? Adda kadi aniaman a makapukaw iti kinapanglaw ken makaipaay iti kinawadwad para kadagiti amin? Adda kadi aniaman a makaparmek iti sakit, panaglakay, ken ipapatay? Nairanta ti turay ti Dios a mangaramid kadagita amin.​—Genesis 1:26-31.

¹⁴ No maipapan iti maikadua nga isyu, aniat’ ipalgak ti tiempo maipapan iti pateg ti natauan a parsua? Biddut kadi ti wagas ti panangparsua ti Dios kadagiti tao? Adda kadi asinoman kadakuada a mangaramid iti umiso iti sidong ti pannakasubok? Adda kadi asinoman a tao nga agtarigagay iti turay ti Dios imbes a ti agwaywayas a turay ti tao?

[Salsaludsod]

[Ladawan iti panid 13]

Impalubos ti Dios ti tiempo kadagiti tao a makagtengda iti katan-okan nga ar-aramidda

[Credit Line]

Shuttle: Naibatay iti ladawan ti NASA