Ti Nakaskasdaaw a Baro a Lubong nga Aramiden ti Dios
Paset 10
Ti Nakaskasdaaw a Baro a Lubong nga Aramiden ti Dios
1, 2. Anianto ti mapasamak kalpasan ti mangdalus a gubat ti Armagedon?
KALPASAN ti mangdalus a gubat ti Dios nga Armagedon, aniat’ mapasamaken? Mangruginton ti maysa a nadayag a baro a panawen. Dagiti nakalasat iti Armagedon, a nangpanekneken iti kinasungdoda iti turay ti Dios, sumrekdanton iti baro a lubong. Anian a nakaragragsakto dayta a baro a panawen iti historia bayat a dagiti nakaskasdaaw a gunggona agayusda manipud iti Dios nga agturong iti natauan a pamilia!
2 Iti sidong ti panangiturong ti Pagarian ti Dios, dagiti nakalasat rugiandanton a parnuayen ti maysa a paraiso. Dagiti bilegda maipamaysanton iti saan nga inaagum a panggep a manggunggonanto kadagiti isuamin a sibibiag. Ti daga mangruginton a mapagbalin a maysa a napintas, natalna, makapnek a pagtaengan ti sangatauan.
Ti Kinalinteg Sukatanna ti Kinadakes
3. Ania a giddato a pannakabang-ar ti mariknanto kalpasan la unay ti Armagedon?
3 Amin daytoy maaramidto babaen ti pannakadadael ti lubong ni Satanas. Awanton dagiti mangbingaybingay nga ulbod a relihion, sistema ti kagimongan, wenno gobgobierno. Awanton ti propaganda ni Satanas a mangallilaw kadagiti tao; amin nga ahensia a mangpatpataud iti dayta mapukawto a maikanunong iti sistema ni Satanas. Panunotenyo laengen: ti intero a makasabidong nga aglawlaw iti lubong ni Satanas napukawen! Anian a pannakabang-arto dayta!
4. Iladawanyo dagiti panagbalbaliw a maaramidto iti panangisuro.
4 Iti kasta masukatanton dagiti makadangran a pampanunot ti turay ti tao iti makapabileg a sursuro nga agtaud iti Dios. “Ket amin dagiti annakmo masursuruandanto ken Jehova.” (Isaias 54:13) Babaen itoy a nagsayaatan a pannursuro iti tinawentawen, “ti daga pudno a mapnonto iti pannakaammo ken Jehova a kas dagiti dandanum saknapanda ti baybay.” (Isaias 11:9) Dinto adalenen dagiti tao ti dakes, no di ket “dagiti agtaeng iti nabunga a daga sursuruendanto ti kinalinteg.” (Isaias 26:9) Dagiti makapabileg a pampanunot ken tigtignay isunto ti inaldaw-aldaw a wagas dagiti tao.—Aramid 17:31; Filipos 4:8.
5. Anianto ti mapasamak kadagiti amin a kinadakes ken dagiti nadangkes a tattao?
5 Gapuna, awanton ti pammapatay, kinaranggas, panangrames, panagtakaw, wenno sabsabali pay a krimen. Awanton ti agsagaba gapu iti dakes nga ar-aramid dagiti sabsabali. Kunaen ti Proverbio 10:30: “Ti nalinteg dinto maisina iti agnanayon; ngem ti nadangkes dinto agtalinaed ditoy daga.”
Maisublin ti Naan-anay a Salun-at
6, 7. (a) Ania a nakalkaldaang a kinapudno ti ipatingganto ti turay ti Pagarian? (b) Kasano nga impakita ni Jesus daytoy idi adda pay ditoy daga?
6 Idiay baro a lubong, mapukawto dagiti amin a dakes nga epekto ti immuna nga iyaalsa. Kas pangarigan, ti turay ti Pagarian pukawennanto ti sakit ken panaglakay. Itatta, uray no nasalun-atka, ti nakalkaldaang a kinapudno ket lumakayka, kumudrep ti panagkitam, mapusi dagiti ngipenmo, agtulengka, agkuretret ti kudilmo, pumalya dagiti organo ti bagim, agingga a mataykan kamaudiananna.
7 Nupay kasta, dagidiay makapaleddaang a resulta a natawidtayo iti immuna a nagannaktayo mapalabasdanton. Malagipyo kadi ti inaramid ni Jesus maipapan iti salun-at idi adda pay ditoy daga? Isalaysay ti Biblia: “Immadani kenkuana dagiti umariwekwek, a nangikuyogda kadagiti pilay, singkol, bulsek, umel, ken adu pay a sabali a masakit, ket inkabilda ida iti sakaanan ni Jesus, ket pinaimbagna ida; iti kasta ti bunggoy nasnasdaawda idi nakitada a dagidi umel agsasaodan ket dagiti pilay magmagnadan ket dagiti bulsek makakitadan.”—Mateo 15:30, 31.
8, 9. Iladawanyo ti dumtengto a ragsak idiay baro a lubong no maisublinton ti naan-anay a salun-at.
8 Anian a nagdakkelto a ragsak ti dumteng idiay baro a lubong bayat a mapukawto dagiti amin nga an-anayen! Ti panagsagaba gapu iti nakapuy a salun-at dinto mangtutuoken kadatayo. “Awanton ti agkuna: ‘Masakitak.’” “Iti kasta maluktanton dagiti mata ti bulsek, ken dagiti lapayag ti tuleng maluktandanto. Iti kasta aglagtonto ti pilay a kas maysa nga ugsa, ken ti dila ti umel agkantanto a buyogen iti rag-o.”—Isaias 33:24; 35:5, 6.
9 Saan kadi a makaparagsak ti mariing iti tunggal agsapa ket mabigbigyo a tagtagiragsakenyon ti kinasalun-at? Saan kadi a makaparagsak kadagiti lallakayen a maammuan a naisublin ti pigsada iti kinaagtutubo ket agbalindanton a naan-anay kas iti tinagiragsak idi da Adan ken Eva? Ti kari ti Biblia ket: “Ti lasagna nasalsalibukagto ngem ti lasag ti maysa nga ubing; isu agsublinto iti al-aldaw ti kinaubingna.” (Job 33:25) Anian a ragsak ti mangibellengton kadagidiay nga anteojos, hearing aid, sarukod, wheelchair, ken dagiti ag-agas! Dagiti ospital, doktor, ken dentista dinto masapulen.
10. Anianto ti mapasamak iti ipapatay?
10 Dagiti tao a mangtagiragsak iti kasta a nabileg a salun-at didanto tarigagayan ti matay. Ket saandanto a matay, ta ti sangatauan dinto tenglenen ti natawid a kinaimperpekto ken ipapatay. Ni Kristo “masapul nga agari agingga a naikabilen ti Dios dagiti amin a kabusorna a pagbatayan dagiti saksakana. Ta ti maudi a kabusor, ni patay mapukawton.” “Ti sagut ti Dios isu ti biag nga agnanayon.”—1 Corinto 15:25, 26; Roma 6:23; kitaenyo met ti Isaias 25:8.
11. Kasano ti pananggupgop ti Apocalipsis kadagiti gunggona iti baro a lubong?
11 Kas panggupgop kadagiti gunggona nga agayusto manipud iti maseknan a Dios nga agturong iti natauan a pamilia idiay Paraiso, kunaen ti maudi a libro iti Biblia: “Ket [ti Dios] punasennanto ti amin a lulua kadagiti matada, ket awanton ni patay, ket awanto metten ti sangsangit wenno sasaibbek wenno rigrigat. Dagiti immuna a bambanag napalabasdan.”—Apocalipsis 21:3, 4.
Agsubli dagiti Natay
12. Kasano nga impakita ni Jesus ti inted-Dios a pannakabalinna a mamagungar?
12 Saan laeng nga inagasan ni Jesus dagiti masakit ken pinapagnana dagiti pilay. Pinagungarna met dagiti tao manipud iti tanem. Iti kasta impakitana ti nakaskasdaaw a pannakabalinna nga inted ti Dios a mamagungar. Malagipyo kadi ti okasion idi dimteng ni Jesus iti balay ti maysa a lalaki a natay ti balasangna? Kinuna ni Jesus iti natay a balasang: “Balasang, tumakderka!” Ket aniat’ resultana? “Ket dagus a ti balasang timmakder ket nagna.” Idi nakitada dayta, “napagtalnada a dagus iti dakkel a siddaaw.” Kasta unay ti ragsakda!—Marcos 5:41, 42; kitaenyo met ti Lucas 7:11-16; Juan 11:1-45.
13. Aniada a kita dagiti tao ti mapagungarto?
13 Idiay baro a lubong, “addanto panagungar dagiti nalinteg ken dagiti nakillo.” (Aramid 24:15) Iti dayta a tiempo usarento ni Jesus ti inted-Dios a pannakabalinna a mamagungar kadagiti natay agsipud ta, kas kinunana, “Siak ti panagungar ken ti biag. Ti mamati kaniak, uray no matay agbiagto pay.” (Juan 11:25) Kinunana pay: “Amin dagiti adda iti pakalaglagipan a tanem [iti pananglagip ti Dios] mangngegdanto ti timekna [ni Jesus] ket rummuardanto.”—Juan 5:28, 29.
14. Agsipud ta awanton ti ipapatay, aniada dagiti bambanag a mapukawton?
14 Dakkelto ti rag-o iti isuamin a daga inton agsasaruno dagiti grupo dagiti tao nga agungar a makikadua kadagiti inay-ayatda! Awanton ti benneg a nakailistaan dagiti natnatay iti diario a mangpaleddaang kadagiti nakalasat. Imbes ketdi, addanto ti kasungani a listaan: anunsio dagiti kabbaro a napagungar a mangyeg rag-o kadagidiay inay-ayatda. Gapuna awanton dagiti pompon, dagiti puneraria, crematorium, wenno sementerio!
Pudpudno a Natalna a Lubong
15. Kasano a matungpalto a naan-anay ti padto ni Mikias?
15 Maibanagton ti pudpudno a talna iti isuamin a kasasaad ti biag. Dagiti gubat, manangkiwkiw ti gubat, ken panangpanday ti armas napalabasdanton. Apay? Agsipud ta mapukawton ti panagimbubukodan ti nasion, tribo, ken rasa. Iti kasta, naan-anayton a “saanda nga itag-ay ti kampilanda a maibusor iti nasion, ket didanto met adalenen ti pannakigubat uray kaano.”—Mikias 4:3.
16. Kasano a talaga a pasardengento ti Dios dagiti gubgubat?
16 Kasla makapakellaat daytoy gapu iti manangibukbok ti dara a historia ti tao iti kanayon a gubat. Ngem naaramid dayta gapu ta nagpaituray ti sangatauan iti tao ken sairo. Iti baro a lubong, iti sidong ti turay ti Pagarian, kastoyto ti mapasamak: “Umaykayo, imatanganyo dagiti ar-aramid ni Jehova . . . Pasardengenna dagiti gubat inggana iti ungto ti daga. Rungrungduenna ti bai ti pana, ket gupdenna a mamimpinsan ti gayang; puoranna dagiti luglugan [ti gubat] iti apuy.”—Salmo 46:8, 9.
17, 18. Idiay baro a lubong, anianto ti relasion ti tao ken dagiti animal?
17 Agkapianto metten ti tao ken animal, a kas idi addada idiay Eden. (Genesis 1:28; 2:19) Kuna ti Dios: “Ket iti dayta nga aldaw mangaramidakto iti maysa a tulag a maipaay kadakuada kadagiti an-animal ti tay-ak, ken kadagiti tumatayab iti tangatang ken kadagiti agkarayam ti daga, ket . . . pagiddaekto ida a sitatalged.”—Oseas 2:18.
18 Kasanonto kasaknap dayta a talna? “Ti lobo makipagnaedto iti kordero, ket ti leopardo makikaiddanto iti urbon a kalding, ket ti urbon ti baka ken ti urbon ti leon ken ti napalukmeg agkakaiddadanto; ket ti maysa nga ubing a bassit idalannanto ida.” Saanto a pulos a pagamkan dagiti animal ti tao wenno dagiti padada nga animal. Uray “ti leon manganto iti garami a kas iti baka a lalaki”!—Isaias 11:6-9; 65:25.
Napagbalin a Paraiso ti Daga
19. Ania ti pagbalinanto ti daga?
19 Ti intero a daga mapagbalinto a maysa a paraiso a pagtaengan ti sangatauan. Daytat’ makagapu no apay a maikari ni Jesus iti lalaki a namati kenkuana: “Makipagtaengkanto kaniak idiay Paraiso.” Kuna ti Biblia: “Ti let-ang ken ti namaga a daga naragsakdanto, ket ti tay-ak a langalang agragrag-onto ket agsabongto kas iti rosa. . . . Ta iti let-ang pumsuakto dagiti dandanum, ken barbaresbes iti tay-ak a langalang.”—Lucas 23:43; Isaias 35:1, 6.
20. Apay a saanto a saplitenen ti bisin ti sangatauan?
20 Iti sidong ti Pagarian ti Dios, saanton a sapliten ti bisin dagiti minilion. “Addanto kinaruay ti bukel iti daga; iti tapaw dagiti bambantay margaayandanto.” “Ti kayo iti away mangtedto iti bungana, ket ti daga mangtedto ti rang-ayna, ket sitatalgeddanto iti dagada.”—Salmo 72:16; Ezequiel 34:27.
21. Anianto ti mapasamak kadagiti walang, kalkalapaw, ken dakes a sangakaarrubaan?
21 Awanton ti kinapanglaw, dagiti walang a tattao, dagiti kalkalapaw, wenno dagiti sangakaarrubaan a nalapunos iti krimen. “Ket bangonendanto dagiti balbalay ken agtaengdanto kadakuada; ket agmuladanto kadagiti kaubasan ket kanendanto ti bungada. Isuda didanto mangbangon ket sabali ti agnaed; didanto agmula ket sabali ti mangan.” “Ngem agtugawto, tunggal maysa a tao iti sirok ti kayona nga ubas ken iti sirok ti kayona nga higos, ket awanto ti mangpabuteng kadakuada.”—Isaias 65:21, 22; Mikias 4:4.
22. Kasano nga iladawan ti Biblia dagiti bendision iti turay ti Dios?
22 Mabendisionanto dagiti tao kadagitoy amin a bambanag, ken ad-adu pay, idiay Paraiso. Kuna ti Salmo 145:16: “Ukradem ta imam [ti Dios] ket pennekem ti tarigagay dagiti isuamin a nabiag.” Di ngarud pakasdaawan a kunaen ti padto ti Biblia: “Dagiti naemma tawidendanto ti daga, ket maay-ayatandanto iti kinaruay ti talna. . . . Ti sililinteg tawidennanto ti daga, ket agtaengto kenkuana nga agnanayon.”—Salmo 37:11, 29.
Panangpukaw iti Napalabas
23. Kasanonto ti panangpukaw ti Pagarian ti Dios kadagiti amin a panagsagaba a napadasantayo?
23 Ti turay ti Pagarian ti Dios pukawennanto dagiti amin a dadael a naaramid iti natauan a pamilia iti napalabas nga innem a ribo a tawen. Dagiti pagrag-oan iti dayta a tiempo ringbawannanto ti aniaman a panagsagaba a napadasan dagiti tao. Dinton masinga ti biag babaen iti aniaman a dakes a pakalaglagipan iti napalabas a panagsagaba. Dagitinto makapabileg a pampanunot ken ar-aramid iti inaldaw-aldaw a panagbiag dagiti tao in-inutennanto a pukawen dagiti nakalkaldaang a pakalaglagipan.
24, 25. (a) Ania ti impadto ni Isaias a mapasamakto? (b) Apay a masiguradotayo a malipatanton dagiti pakalaglagipan iti napalabas a panagsagaba?
24 Ti maseknan a Dios iwaragawagna: “Mamarsuaak kadagiti baro a langlangit [maysa a baro a nailangitan a gobierno a mangituray iti sangatauan] ken baro a daga [maysa a nalinteg a kagimongan ti tao]; ket dagiti immuna a bambanag didanto malagipen, didanto mapanunoten. Ngem agragsakkayo ken agrag-okayo iti agnanayon iti daydiay a parsuaek.” “Ti isuamin a daga aginana, ket natalna. Tumpuar dagiti tao nga agkankanta.”—Isaias 65:17, 18; 14:7.
25 Gapuna babaen iti Pagarianna, naan-anayto a pukawen ti Dios ti dakes a kasasaad a nagtalinaed a nakapapauten. Iti agnanayon ipakitananto ti kasta unay a panangipategna kadatayo babaen ti panangibukbokna kadagiti bendision a manglapunos iti aniaman a pannakadangrantayo iti napalabastayo. Dagiti napalabas a panagrigrigattayo malipatandanton, no lagipentayto pay ida.
26. Apay a subadannatayo ti Dios maipaay iti aniaman a napalabas a panagsagaba?
26 Kasta ti panangsubadto ti Dios kadatayo iti panagsagaba nga inibturantayo ditoy lubong. Ammona a saantay a basol ti pannakaipasngaytayo nga imperpekto, ta natawidtayo ti kinaimperpekto kadagiti immuna a nagannaktayo. Saantay a basol ti pannakaipasngay iti lubong ni Satanas, ta no nagmatalek koma da Adan ken Eva, naipasngaytay koma iti maysa a paraiso. Gapuna buyogen ti dakkel a panangaasina saanna laeng a pukawen ti dakes a napalabas a nangsaplit kadatayo.
27. Ania dagiti padto a nakaskasdaawto ti pannakatungpalda idiay baro a lubong?
27 Iti baro a lubong, mapadasanto ti sangatauan ti wayawaya a naipadto idiay Roma 8:21, 22: “Ti sangaparsuaan maluk-atanto met manipud ti pannakaadipen iti panagrupsa ket maaddaanda ti nadayag a wayawaya dagiti annak ti Dios. Ta ammotayo a ti sangaparsuaan agsasaibbekda ken agrigrigatda a sangsangkamaysa agingga ita.” Makitanto ngarud dagiti tao ti naan-anay a kaitungpalan ti kararag nga: “Umay koma ti pagariam. Maaramid koma ti pagayatam, kas sadi langit, kasta met ditoy daga.” (Mateo 6:10) Dagiti nakaskasdaaw a kasasaad idiay Paraiso a daga iparangarangnanto dagiti kasasaad idiay langit.
[Salsaludsod]
[Dagiti Ladawan iti panid 23]
Idiay baro a lubong, agsublinto ti bileg dagiti lallakay iti kinaubing
[Ladawan iti panid 24]
Amin a saksakit ken kinabaldado mapukawton idiay baro a lubong
[Ladawan iti panid 25]
Idiay baro a lubong, mapagungarto pay uray dagiti natay
[Ladawan iti panid 26]
‘Didanto adalenen ti pannakigubat uray kaano’
[Dagiti Ladawan iti panidv27]
Naan-anayton nga agkapia dagiti tao ken dagiti animal idiay Paraiso
[Ladawan iti panid 27]
‘Ukradento ti Dios ti imana ket pennekenna ti tarigagay dagiti isuamin a nabiag’
[Ladawan iti panid 28]
Ad-adunto pay ngem basta pukawen ti Pagarian ti Dios ti amin a panagsagaba nga inibturantayo
