Paset 5

Ti Nakaskasdaaw a Sagut ti Wayawaya nga Agpili

1, 2. Ania a nagsayaatan a sagut ti paset iti pannakabukeltayo?

TAPNO maawatantayo no apay a pinalubosan ti Dios ti panagsagaba ken no anianto ti aramidenna iti dayta, masapul nga apresiarentayo no kasano nga inaramidnatayo. Saannatay laeng a pinarsua nga addaan iti bagi ken utek. Pinarsuanatayo met nga addaan iti naisangsangayan a kualidad nga agpanunot ken makarikna.

² Maysa a kangrunaan a paset ti panagpanunot ken panagriknatayo isut’ wayawaya nga agpili. Wen, immula ti Dios kadatayo ti kapasidad a siwayawaya nga agpili. Pudno a daytat’ nagsayaatan a sagut a naggapu kenkuana.

No Kasano a Naaramidtayo

3-5. Apay nga apresiarentayo ti wayawaya nga agpili?

³ Amirisentayo no kasano a nairaman ti wayawaya nga agpili iti panangipalubos ti Dios iti panagsagaba. Iti pangrugian, panunotenyo daytoy: Apresiarenyo kadi no adda wayawayayo nga agpili no aniat’ aramiden ken sawenyo, no ania ti kanen ken ikawesyo, aniat’ trabaho nga aramidenyo, ken no sadino ken kasano ti panagbiagyo? Wenno tarigagayanyo ti mangidiktar kadakayo ti tunggal sao ken panagtignayyo iti tunggal kanito iti biagyo?

⁴ Awan ti normal a tao nga agtarigagay a matengngel a naan-anay ti biagna. Apay a saan? Gapu iti wagas a panangaramid ti Dios kadatayo. Ibaga ti Biblia kadatayo a pinarsua ti Dios ti tao a ‘kaladladawanna ken kaaspingna,’ ket ti maysa kadagiti kapasidad nga adda a mismo iti Dios isu ti wayawaya nga agpili. (Genesis 1:26; Deuteronomio 7:6) Idi pinarsuana dagiti tao, intedna dayta met laeng a nagsayaatan a kapasidad kadakuada​—ti sagut a wayawaya nga agpili. Dayta ti maysa a rason no apay a maupaytayo nga adipenen dagiti naulpit nga agtuturay.

⁵ Gapuna saan laeng a naiparna ti panagtarigagay iti wayawaya, ta ti Dios ket Dios iti wayawaya. Kunaen ti Biblia: “No sadino ti yan ti espiritu ni Jehova, idiay adda wayawaya.” (2 Corinto 3:17) Gapuna,  inikkannatayo ti Dios ti wayawaya nga agpili kas paset ti pannakabukeltayo. Yantangay ammona ti panagandar ti isip ken rikriknatayo, ammona a naragragsaktayo no adda wayawayatayo nga agpili.

6. Kasano ti panangparsua ti Dios iti utektayo nga agandar a maitunos iti wayawaya nga agpili?

⁶ Maikuyog iti sagut ti wayawaya nga agpili, nangted ti Dios iti abilidad nga agpanunot, mangtingiting kadagiti bambanag, mangaramid kadagiti pangngeddeng, ken mangilasin iti naimbag ken dakes. (Hebreo 5:14) Gapuna, ti wayawaya nga agpili isunto ti pakaibatayan ti nasaririt a panagpili. Saantay a naaramid a kas kadagiti awan panunotna a robot nga awanan bukodda a pagayatan. Ket ditay met naparsua nga agtignay sigun iti naisigud a rikna kas kadagiti animal. Imbes ketdi, ti nakaskasdaaw nga utektayo nadisenio nga agtrabaho a maitunos iti wayawayatayo nga agpili.

Ti Kasayaatan a Pangrugian

7, 8. Ania a nagsayaatan a pangrugian ti inted ti Dios iti immuna a nagannaktayo?

⁷ Tapno ipakita no kasano a maseknan ti Dios, naikkan dagiti immuna a nagannaktayo, da Adan ken Eva, a nairaman iti sagut a wayawaya nga agpili, kadagiti isuamin a banag a nainkalintegan a tarigagayan ti asinoman. Naisaadda iti maysa a dakkel, kasla minuyongan a paraiso. Addaandat’ material a kinawadwad. Naan-anay ti isip ken bagida, gapuna saanda a lumakay wenno agsakit wenno matay​—mabalinda koma ti agbiag nga agnanayon. Mabalin a maaddaanda koma kadagiti naan-anay nga annak a maaddaan met naragsak, agnanayon a masanguanan. Ket ti umad-adu a populasion maaddaan koma iti makapnek a trabaho a mamagbalin kamaudiananna iti intero a daga a maysa a paraiso.​—Genesis 1:26-30; 2:15.

⁸ Maipapan iti naipaay, isalaysay ti Biblia: “Ket ti Dios nakitana amin nga inaramidna ket, adtoy! nasayaatda unay.” (Genesis 1:31) Kuna met ti Biblia maipapan iti Dios: “Naan-anay dagiti ar-aramidna.” (Deuteronomio 32:4) Wen, inted ti Namarsua iti natauan a pamilia ti maysa a naan-anay a namunganayan. Awanen ti nasaysayaat ngem dayta. Anian a manangipateg unay a Dios!

Wayawaya iti Sidong dagiti Limitasion

9, 10. Apay a masapul a matimbeng a naimbag ti wayawaya nga agpili?

⁹ Nupay kasta, pinanggep aya ti Dios a ti wayawaya nga agpili awan limitasionna? Panunotenyo laengen ti maysa a siudad nga aduan ti lugan nga awan ti aniaman a linteg ti trapiko, a sadiay ti isuamin mabalinna ti agmaneho iti aniaman a direksion iti aniaman a kapartak. Kayatyo kadi ti agmaneho iti sidong dagita a kasasaad? Saan, daytat’ nagulo a trapiko ket sigurado nga agbanag iti adu nga aksidente.

¹⁰ Kasta met ti sagut ti Dios a wayawaya nga agpili. Ti awan limitasionna a wayawaya mabalin a kaipapananna ti gulo iti kagimongan. Masapul nga adda dagiti linteg a mangiwanwan iti ar-aramid ti tao. Kunaen ti Sao ti Dios: “Agtignaykayo kas siwayawaya a tattao, ket dikay usaren ti wayawayayo a pambar iti panangaramid iti kinadakes.” (1 Pedro 2:16, JB) Kayat ti Dios a matimbeng ti wayawaya nga agpili nga agpaay a pagimbagan ti isuamin. Saanna a pinanggep a maaddaantayo iti naan-anay a wayawaya, no di ket relatibo a wayawaya, nga iturayan ti linteg.

 Makin-linlinteg?

11. Makin-linlinteg ti nairanta a tungpalentayo?

¹¹ Makin-linlinteg ti nairanta a tungpalentayo? Kunaen ti sabali pay a paset ti teksto idiay 1 Pedro 2:16 (JB): “Dikay agpaadipen iti asinoman no di iti Dios.” Daytoy dina kaipapanan ti mangilupitlupit a panangadipen, no di ket, kaipapananna a naaramidtayo a karagragsakan no agpaituraytayo kadagiti linlinteg ti Dios. (Mateo 22:35-40) Dagiti linlintegna, mangipaayda iti kasaysayaatan a panangiwanwan ngem ti aniaman a linlinteg nga inaramid ti tao. “Siak ni Jehova a Diosmo, Daydiay mangisuro kenka a maipaay iti gunggonam, Daydiay mangisuro kenka iti dalan a papanam koma.”​—Isaias 48:17.

12. Ania ti wayawayatayo nga agpili iti las-ud dagiti linlinteg ti Dios?

¹² Maigiddato idi dayta, dagiti linlinteg ti Dios mangipaay iti ad-adu a wayawaya iti panagpili iti las-ud dagita a pagbeddengan. Daytoy agbanag iti kinanadumaduma ket pagbalinenna ti natauan a pamilia a makaay-ayo. Panunotenyo laengen dagiti nadumaduma a kita ti taraon, kawes, musika, arte, ken pagtaengan iti intero a lubong. Talaga a kaykayattayo ti maaddaan iti panagpili kadagita a banag imbes nga ikeddeng ti sabali a tao ti maipaay kadatayo.

13. Ania dagiti pisikal a linlinteg ti masapul a tungpalentayo nga agpaay a pagimbagantayo?

¹³ Gapuna naparsuatayo a karagragsakan no iturayannatayo dagiti linlinteg ti Dios maipaay iti natauan a kababalin. Umasping dayta iti panagpaituray iti pisikal a linlinteg ti Dios. Kas pangarigan, no ditay ikankano ti linteg ti grabidad ket tumapuaktayo iti maysa a nangato a lugar, madangrantayo wenno mataytayo. No ditay ikankano dagiti makin-uneg a linlinteg ti bagitayo ket isardengtayo ti mangan, uminum, wenno aganges, mataytayo.

14. Kasanot’ pannakaammotayo a saan a naparsua dagiti tao a sumina iti Dios?

¹⁴ No kasano a naparsuatayo a masapul nga agpaituray kadagiti pisikal a linlinteg ti Dios, naparsuatayo a masapul nga agpaituray kadagiti moral ken sosial a linlinteg ti Dios. (Mateo 4:4) Saan a naparsua dagiti tao a sumina iti Nangaramid kadakuada ket agballigida. Kunaen ni mammadto a Jeremias: “Saan nga agtaud iti tao a magna ti panangiturong kadagiti addangna. O Jehova, tubngarennak.” (Jeremias 10:23, 24) Gapuna iti isuamin a pamay-an naparsua dagiti tao nga agbiag iti sidong ti panangituray ti Dios, saan nga iti bukodda.

15. Makapadagsen aya koma dagiti linlinteg ti Dios kada Adan ken Eva?

¹⁵ Ti panagtulnog kadagiti linlinteg ti Dios saan met koma a makapadagsen kadagiti immuna a nagannaktayo. Imbes ketdi, daytat’ nagimbaganda koma ken ti intero a natauan a pamilia. No nagtalinaed koma ti immuna a paris iti las-ud ti linlinteg ti Dios, nasayaat koma ti isuamin. Iti kinapudnona, agbibiagtayo koma itan iti nagsayaatan a paraiso iti ragsak kas maysa a naayat, nagkaykaysa a natauan a pamilia! Awan koma ti kinadakes, panagsagaba, ken ipapatay

[Salsaludsod]

[Ladawan iti panid 11]

Inikkan ti Namarsua dagiti tao iti naan-anay a pangrugian

[Ladawan iti panid 12]

Kayatmo kadi ti agmaneho iti sidong iti nakaad-adu a lugan no awan dagiti linlinteg ti trapiko?