Namnamaentay kadi a rumsua dagiti apostata iti uneg ti Nakristianuan a kongregasion?

1 Tim. 4:1: “Ti napaltiingan nga ebkas nalawag ti panagkunana a kadagiti maud-udi nga aldaw dagiti dadduma suminadanto iti pammati, nga ipangagda dagiti napaltiingan nga ebkas a mangsulisog ken dagiti sursuro dagiti demonio.”

2 Tes. 2:3: “Dikayo paallilaw iti uray siasino iti uray aniaman, ta dinto umay [ti aldaw ni Jehova] no di pay umuna ti panaglikod ken maiparangarang ti tao ti basol, ti anak ti pannakapukaw.”

Sumagmamano a pagilasinan kadagiti apostata—

Ipamuspusanda a pasuroten dagiti sabali, gapuna maangay ti panagsisina

Ara. 20:30: “Kadakay met laeng addanto tumakder a tattao nga agsao kadagiti nakas-ang a banag tapno guyugoyenda dagiti adalan a sumurot kadakuada.”

 2 Ped. 2:1, 3: “Addanto dagiti ulbod a mannursuro iti tengngayo. Isuda a mismo mangiserrekdanto a sililimed kadagiti makadadael a sekta ket paglikudandanto uray ti apo a nanubbot kadakuada . . . Kasta met, iti kinaagum ken iti sasao a makaallilaw pagbalinendakayto a pagsapulan.”

Kunaenda a mamatida ken Kristo ngem tagtagilag-anenda ti trabaho a panangaskasaba ken panangisuro nga intudingna kadagiti pasurotna

Luc. 6:46: “Apay, ngarud, nga awagandak iti ‘Apo! Apo!’ ngem dikay aramiden ti ibagak?”

Mat. 28:19, 20: “Inkayo ngarud ket pagbalinenyo nga ad-adalan dagiti umili iti amin a nasnasion, a bautisaranyo ida . . . isursuroyo kadakuada nga aywananda dagiti isuamin a banag nga imbilinko kadakayo.”

Mat. 24:14: “Ket daytoy naimbag a damag ti pagarian maikaskasabanto iti amin a napagnaedan a daga tapno mangpaneknek kadagiti isuamin a nasion; ket iti kasta umayton ti panungpalan.”

Mabalin a kunaenda nga agserserbida iti Dios ngem laksidenda dagiti pannakabagina, ti makitkita nga organisasionna

Jud. 8, 11: “Dagitoy a lallaki, iti dardarepdepda, ket rugitanda ti lasag, ket umsienda ti agturay ken agbassawangda kadagiti natan-ok. Asida pay, ta . . . nadadaelda iti panagsupring ni Core!”

Num. 16:1-3, 11, 19-21: “Ni Core . . . timmakder . . . a kakanunongda dagiti dadduma nga annak ti Israel a duagasut ket limapulo a papangulo ti gimong . . . Naguummongda a nagtitipon iti maibusor kada Moises ken Aaron ket kinunada kadakuada: ‘Nalabes ti panagindadakkelyo, idinto a ti amin a gimong nasantuanda ket ni Jehova siaadda kadakuada. Apay, ngarud, nga ipangpangrunayo nga itatan-ok ti bagbagiyo iti gimong ni Jehova?’ . . . [Kinuna ni Moises:] ‘Sika ken amin a kaduam nagtitiponkayo a naummong a bumusor ken Jehova. No maipapan ken Aaron, siasino aya a pagdanengdenganyo a maibusor kenkuana?’ Idi a ni Core inummongna ti dagup ti gimong a maibusor kadakuada iti ruangan ti tolda ti gimong, ti dayag ni Jehova nagparang iti amin a gimong. Ket ni Jehova nakisao kada Moises ken Aaron, a kinunana: ‘Makilasinkayo iti daytoy a gimong, tapno ibusek ida iti apagdarikmat.’”

 Saanda laeng a panawan ti pudno a pammati no di ket inda pay “kabkabilen” dagiti dati a kakaduada, a kritikarenda ida iti publiko ken agusarda pay ti sabali a pamuspusan tapno maatipa ti trabahoda; dagiti pamuspusan ti kakasta nga apostata ket naisentro iti panangdadael, saan a panangpabileg

Mat. 24:45-51: “Siasino a talaga ti matalek ken naannad nga adipen nga inkabil ni apona nga agaywan iti sangakabbalayanna, tapno ikkanna ida ti taraon no iti umiso a tiempo? . . . Ngem no ti adipen a dakes kunaennanto iti pusona, ‘Ni apok mabayag pay nga umay,’ ket rugiannanto a kabkabilen dagiti padana nga adipen ken makipangan ken makiinom kadagiti managbartek, umayto ti apo daydiay nga adipen iti aldaw a dina panangur-uray ken iti oras a dina ipagpagarup, ket saplitennanto iti nakaro unay ket ipatonanto ti yanna a mairaman kadagiti managinsisingpet.”

2 Tim. 2:16-18: “Adaywam dagiti ubbaw a palpalawag a di mainugot iti nasantuan; ta lumanlandanto a lumanlan iti kinakillo, ket ti saoda agdadaelto a kasla iti gangrena. Kadakuada adda da Himeneo ken Fileto. Dagitoy a lallaki naisiasida iti kinapudno, a kunkunada a ti panagungar napalabasen; ket riribukenda ti pammati dagiti dadduma.”

Dagiti matalek a Kristiano awatenda ngata dagiti apostata iti nagtetengngaanda uray no iti personal wenno babaen ti panangbasada kadagiti literaturada?

2 Juan 9, 10: “Siasinoman a gumundaway ket saan nga agtalinaed iti sursuro ni Kristo awan ti Dios kenkuana. . . . No adda umay kadakayo ket saanna nga itugot daytoy a sursuro, dikay awaten iti balayyo ket dikay met kablaawan.”

Roma 16:17, 18: “Dawatek kadakayo, kakabsat, a kitaenyo dagiti adda a mangpataud kadagiti panagsisina ken pakaitibkolan a maisalungasingda iti sursuro nga inadalyo, ket umadayokayo koma kadakuada. . . . Gapu kadagiti nalinis ken nasayaat a palpalawag allilawenda ti puspuso dagiti nanengneng.”

Adda kadi pagdaksanna no ti maysa ket kayatna laeng a penken no ania ti kapanunotan dagiti apostata?

Prov. 11:9: “Ti apostata dadaelenna gapu iti ngiwatna ti padana a tao.”

Isa. 32:6: “Ti maag agsao a simamaag, ket ti pusona agaramidto  iti kinadangkes, tapno paaduenna ti apostasia ken mangibalikas iti allilaw a maibusor ken ni Jehova, tapno aramidenna nga awan agyan iti kararua ti mabisin, ken pagawanenna ti inumen ti mawaw a mismo.” (Idiligyo ti Isaias 65:13, 14.)

Kasanot’ kaseriosona ti apostasia?

2 Ped. 2:1: “Isuda a mismo mangiserrekdanto a sililimed kadagiti makadadael a sekta ket paglikudandanto uray ti apo a nanubbot kadakuada, nga ikuyogda met laeng kadakuada ti napardas a pannakapukawda.”

Job 13:16: “Ti apostata dinto umay iti sango [ti Dios].”

Heb. 6:4-6: “Ta saan a mabalin a dagiti nalawagan iti naminsan, ket naramananda ti sagut a nailangitan, ket naaramidda a mairaman iti nasantuan nga espiritu, ket naramananda ti naimbag a sao ti Dios ken dagiti pannakabalin ti sistema ti bambanag a mapasungad, ngem kalpasanna simminada [“nagapostasiada,” RS], a pabaruen ida iti panagbabawi, idinto ta inlansada manen a maipaay kadakuada ti Anak ti Dios ket isu imbabainda iti sanguanan dagiti amin a tattao.”