Nasayaat kadi ti pakasarsaritaan dagiti selebrasion ti birthday a nadakamat iti Biblia? Adda laeng dua a nadakamat ti Biblia a kakasta a selebrasion:

Gen. 40:20-22: “Ket naaramid nga iti maikatlo nga aldaw isu ti aldaw a nakayanakan ni Faraon, ket isu nagdaya . . . Ket insublina ti panguluen dagiti mamakpakan iti annongna . . . Ngem pinabitayna ti panguluen dagiti agtintinapay.”

Mat. 14:6-10: “Ngem idi a marambakan ti aldaw a pannakayanak ni Herodes, ti anak a babai ni Herodias nagsala iti tengnga ket pinaayatna ni Herodes gapuna nga inkarina nga insapata nga itednanto kenkuana ti amin a dawatenna. Ket isu, gapu ta immuna nga insuro ni inana, kunana: ‘Itdem kaniak ditoy iti maysa a pinggan ti ulo ni Juan a Bautista.’ . . . Ket nangibaon ket pinaputolanna ni Juan iti pagbaludan.”

Amin a nailanad idiay Biblia ket adda gapuna. (2 Tim. 3:16, 17) Ammo dagiti Saksi ni Jehova a salaysayen ti Biblia ti di nasayaat a pakasarsaritaan dagiti selebrasion ti birthday ket ngarud dida makiraman kadagita.

Kasano a minatmatan dagidi immuna a Kristiano ken dagidi Judio a nagbiag iti panawen ti Biblia dagiti selebrasion ti birthday?

“Ti idea maipapan iti pannakarambak ti birthday adayo kadagiti kapanunotan dagiti Kristiano iti daydi a panawen.”—The History of the Christian Religion and Church, During the Three First Centuries (New York, 1848), Augustus Neander (impatarus ni Henry John Rose), p. 190.

“Dagidi naud-udi a Hebreo minatmatanda ti selebrasion dagiti birthday a kas panagrukbab iti ladladawan, panangmatmat a nawadwad ti pannakapasingkedna gapu kadagiti kadawyan a panagrambak a napaliiwda kadagidi a kaaldawanda.”—The Imperial Bible-Dictionary (Londres, 1874), inyurnos ni Patrick Fairbairn, Tomo I, p. 225.

Ania ti puon dagiti kaaduan a kustombre a nainaig iti pannakarambak ti birthday?

“Dagiti nagduduma a kustombre a panangrambak ti tattao iti birthday ket nawatiwat ti historiada. Dagiti puonda nainaig iti salamangka ken relihion. Ti ugali a panangabrasa, pannangted kadagiti regalo ken panagselebrar—buyogen kadagiti nakasindi a kandela—idi ugma ket nairanta a mangsalaknib iti daydiay  ag-birthday manipud kadagiti demonio ken tapno sigurado ti kinatalgedna iti sumuno a tawen. . . . Uray agingga idi maika-4 a siglo inidian ti Kinakristiano dagiti selebrasion ti birthday yantangay pagano nga ugali dayta.”—Schwäbische Zeitung (magazine supplement Zeit und Welt), Abril 3/4, 1981, p. 4.

“Namati dagiti Griego a tunggal tao adda espiritu a manalaknib kenkuana wenno daemon a mangsaluad kenkuana apaman a naipasngay ken mangbantay kenkuana bayat ti panagbiagna. Daytoy nga espiritu adda karkarna a relasionna iti dayta dios a naituding iti kaaldawan ti pannakayanak dayta a tao. Namati met dagiti Romano iti daytoy. . . . Nagtitinnawidan daytoy kadagiti pammati ti tao ket pumada daytoy iti pammatida iti para bantay nga anghel, ti nimpa a diosa ken ti santo a patron. . . . Ti kustombre a panangitugkel kadagiti nakasindi a kandela kadagiti cake nangrugi kadagiti Griego. . . . Dagiti honey cakes a nagtimbukel kas iti bulan a sikakandela naidatonda kadagiti altar ti templo [ni Artemis]. . . . Dagiti kandela a pang-birthday, sigun kadagiti lallakay, ket adda naisangsangayan a salamangkada a patganda dagiti dawat. . . . Dagiti nakasindi a kandela ken apuy a pagsakripisio adda karkarna a kaipapananda nanipud pay namangon ti tao kadagiti altar ti didiosenna. Dagiti kandela a pang-birthday ket pangdayaw ken kas pagyaman iti ag-birthday nga ubing ket mangted dayta iti suerte. . . . Dagiti pangkablaaw ken dawdawat agpaay iti kinaragsak ti ag-birthday ket nakaiyugalian daytoy a panagrambak. . . . Idi damo namuon daytoy nga idea manipud iti salamangka. . . . Dagiti kablaaw iti birthday ket mabalin a pagimbagan wenno pagdaksan yantangay ti maysa a tao as-asideg iti lubong dagiti espiritu iti dayta nga aldaw.”—The Lore of Birthdays (Nueva York, 1952), Ralph and Adelin Linton, pp. 8, 18-20.

Ti makapabileg a panaguummong dagiti pamilia ken gagayyem tapno mangan, uminom, ken agragragsak no iti sabali nga okasion ket maipalubos

Ecl. 3:12, 13: “Awan ti aniaman a naim-imbag a maipaay kadakuada ngem ti panagrag-o ken ti panagaramidda ti naimbag bayat ti panagbiagda; ket kasta met a tunggal tao mangan koma ken uminom ken agrag-o iti amin a pagbannoganna. Isu ti sagut ti Dios.”

Kitaenyo met ti 1 Corinto 10:31.