Ania dagidiay patien dagiti Saksi ni Jehova a pakaigidiatanda kadagiti sabsabali a relihion?

(1) Biblia: Mamati dagiti Saksi ni Jehova a ti intero a Biblia isut’ naipaltiing a Sao ti Dios ket, imbes nga alagadenda ti maysa a kredo a naibatay iti natauan a tradision, annurotenda ti Biblia a kas pagalagadan ti isuamin a patpatienda.

(2) Dios: Ni Jehova ti pagdaydayawanda kas maymaysa a pudno a Dios ket situtulokda nga agsao kadagiti sabsabali maipapan  kenkuana ken kadagiti naayat a panggepna para iti sangatauan. Siasinoman a mangpaneknek ken Jehova iti publiko masansan a mailasin kas kameng ti maymaysa a grupo—“Dagiti Saksi ni Jehova.”

(3) Jesu-Kristo: Saanda a patien a ni Jesu-Kristo ket paset ti Trinidad, no di ket, kas sawen ti Biblia, isu ti Anak ti Dios, ti inauna kadagiti pinarsua ti Dios; nga isu ket datin nga adda sakbay a timmao ket ti biagna manipud langit naiyalis iti aanakan ti maysa a birhen, a ni Maria; a ti perpekto a natauan a biagna nga impaayna a kas daton isut’ mangted pannakaisalakan nga agturong iti agnanayon a biag kadagidiay mangalagad iti pammati; a ni Kristo siaaktibo nga agturturayen kas Ari, nga addaan inted-Dios nga autoridad a mangituray iti intero a daga nanipud 1914.

(4) Pagarian ti Dios: Mamatida a ti Pagarian ti Dios isut’ kakaisuna a namnama ti sangatauan; a dayta ket pudpudno a gobierno; a dandaninan dadaelen ti agdama a dakes a sistema ti bambanag, agraman amin a natauan a gobierno, ken mamataudto iti baro a sistema a pagnaedan ti kinalinteg.

(5) Nailangitan a biag: Mamatida a 144,000 a napulotan iti espiritu a Kristiano makiramandanto ken Kristo idiay nailangitan a Pagarianna, nga agturayda kas ar-ari a kakaduana. Dida mamati a ti langit isut’ gunggona dagiti amin a “naimbag.”

(6) Ti daga: Mamatida a matungpalto daydi orihinal a panggep ti Dios para iti daga; a ti daga mapnonto kadagiti agdaydayaw ken Jehova ket tagiragsakendanto ti agnanayon a biag a buyogen ti natauan a kinaperpekto; nga uray pay dagiti natay agungardanto tapno maramananda dagitoy a bendision.

(7) Ipapatay: Mamatida a dagiti natay awan a pulos puotda; nga awan marikriknada a rigat wenno ragsak iti naespirituan a lugar; awandan malaksid idiay lagip ti Dios, gapuna a ti namnamada para iti masanguanan a biag agpannuray iti pannakapagungarda kadagiti natay.

(8) Dagiti maudi nga aldaw: Mamatida nga agbibiagtay itan, nanipud 1914, kadagiti maudi nga aldaw daytoy nadangkes a sistema ti bambanag; a dadduma kadagidiay nakaimatang kadagiti pasamak idi 1914 maimatangandanto met ti naan-anay a pannakadadael ti agdama a dakes a lubong; a dagiti managayat iti kinalinteg makalasatdanto nga agturong iti nadalusan a daga.

(9) Dida makinamin iti lubong: Sirereggetda a mangipamuspusan iti dida pannakipaset iti lubong, a kas kinuna ni  Jesus nga aramiden dagiti pasurotna. Ipakitada ti napudno a Nakristianuan a panagayatda kadagiti kaarubada, ngem dida rumaman kadagiti politika wenno gubgubat ti aniaman a nasion. Ipaayda dagiti namaterialan a kasapulan dagiti pamiliada ngem liklikanda ti napalalo a panagbirok toy lubong kadagiti namaterialan a bambanag ken personal a dayaw ken ti nakaro a panagragragsak ti lubong.

(10) Panangyaplikar iti pammalakad ti Biblia: Mamatida a nasken nga iyaplikar ti pammalakad ti Sao ti Dios iti inaldaw a panagbiag itan—idiay eskuelaan, iti balay, idiay negosio, idiay kongregasionda. Uray pay no ania ti naglabas a kabibiag ti maysa a tao mabalinnat’ kumameng kas maysa a Saksi ni Jehova no la ket ta pagpanawannan dagidi ugalina a kondenaren ti Sao ti Dios ket iyaplikarna ti nadiosan a pammalakadna. Ngem no kalpasanna ket iyugalina ti pannakikamalala, pannakiabig, homoseksualidad, panagabuso iti droga, panagbarbartek, panagulbod wenno panagtakaw isu ket mailaksid manipud iti organisasion.

(Ti kakkalpas a listaan dakamatenna ti sumagmamano kadagiti kangrunaan a pammati dagiti Saksi ni Jehova ngem saan a dagita laeng ti nakaigidiatanda kadagiti dadduma a grupo. Dagiti Nainkasuratan a pakaibatayan dagitoy a pammati ket masarakan ida babaen ti panangusar iti indese daytoy a libro.)

Relihion kadi ti America dagiti Saksi ni Jehova?

Itandudoda ti Pagarian ti Dios, saan ket a ti napolitikaan, ekonomika wenno sosial a sistema ti aniaman a nasion daytoy daan a lubong.

Pudno a ti moderno a historia dagiti Saksi ni Jehova ket nangrugi idiay Estados Unidos. Ti kaadda ti sangalubongan a hedkuarterda sadiay isut’ namagbalin a posible ti panagimprentada ken panagipatulodda kadagiti literatura ti Biblia kadagiti kaaduan a paset ti lubong. Awan nasion nga ad-adda a paboran dagiti Saksi; dagiti Saksi addada kadagiti isuamin a nasnasion, ket masarakan dagiti opisinada kadagiti adu a paset ti daga tapno maaywanan ti trabahoda kadagita a deppaar.

Amirisenyo: Ni Jesus kas Judio nayanak idiay Palestina, ngem ti Kinakristiano saan a relihion ti Palestina, di ngamin? Ti lugar a nakayanakan ni Jesus kas tao saan nga isut’ kangrunaan a banag nga amirisen. Ti insuro ni Jesus namunganay ken Amana, ni Jehova a Dios, isu nga awan idumdumana a tattao iti isuamin a nasnasion.—Juan 14:10; Ara. 10:34, 35.

 Kasanot’ pannakapataud ti gastos iti trabaho dagiti Saksi ni Jehova?

Babaen kadagiti boluntario a kontribusion, a kas met lat’ inaramid dagidi immuna a Kristiano. (2 Cor. 8:12; 9:7) Saanda nga agkolekta kadagiti gimongda; dida pulos agur-or ti kuarta manipud publiko. Dagiti kontribusion nga agpaay kadagiti literatura ti Biblia tumulongda laeng iti panagimprenta ken panangikoreo kadagita.

Saan a masuelduan dagiti Saksi iti inda panagbalaybalay wenno iti panagitukonda kadagiti literatura ti Biblia kadagiti lansangan. Ti ayatda iti Dios ken iti kaarubada ti manggutugot kadakuada a mangipakaammo kadagiti probision ti Dios para iti sangatauan.

Ti Watch Tower Bible and Tract Society of Pennsylvania, a maysa a legal a relihioso a korporasion nga us-usaren dagiti Saksi ni Jehova, nabuangay idi 1884 sigun iti Nonprofit Corporation Law ti Commonwealth of Pennsylvania, E.U.A. No kasta, sigun iti linteg saan a mabalin, ken talaga a saan, a ganuat a pagganansiaan, no kasta awan ti indibidual a personal a makaganansia baeten iti daytoy a Sosiedad. Kunaen ti charter ti Sosiedad: “Di ranta [ti Sosiedad] ti agganansia wenno agtubo iti kuarta, naiparparna wenno inranta, para kadagiti miembrona, direktorna wenno dagiti opisialna.”

Dagiti Saksi ni Jehova maysada aya a sekta wenno kulto?

Dagiti dadduma kunada a ti sekta ket maysa a grupo a simmina manipud iti naipasdek a relihion. Dagiti dadduma iyaplikarda dayta a termino iti grupo a sumursurot iti maysa a natauan a lider wenno maestro. Dayta a termino masansan a maar-aramat a panglais. Dagiti Saksi ni Jehova saanda a rimmusing manipud iti uray ania nga iglesia no di ket iramanda amin a tattao a naggapu iti amin a kita ti kabibiag ken iti nadumaduma a relihioso a naglikudanda. Awan tao a sursurotenda, no di ket ni Jesu-Kristo ti liderda.

Ti kulto ket maysa a relihion a makuna a saan nga orthodox wenno mangipaganetget iti panagdebosion sigun iti naipasdek a ritual. Adu dagiti kulto a sumursurot iti natauan a lider ket masansan a dagiti pasurotda isinsinada ti grupoda manipud kagimongan. Ti pagrukodan maipapan iti gagangay nga alagaden, nupay kasta, isu koma ti Sao ti Dios, ket dagiti Saksi ni Jehova  alagadenda a sieestrikto ti Biblia. Ti panagdaydayawda ket maysa a wagas ti panagbiag, saan a ritual a panagdebosion. Dida sumursurot iti tao ket dida met isinsina ti bagbagida manipud kagimongan. Agbibiagda ken agtartrabahoda iti mismo a nagtetengngaan ti kaaduan.

Kasanot’ kabayagnan ti relihion dagiti Saksi ni Jehova?

Sigun iti Biblia, ti linea dagiti saksi ni Jehova nangrugi ken matalek nga Abel. Kuna ti Hebreo 11:4–12:1: “Gapu iti pammati ni Abel indiayana iti Dios ti maysa a daton a nasaysayaat ngem ni Cain . . . Gapu iti pammati ni Noe, idi a naikkan iti nadibinuan a pakdaar maipapan iti bambanag a di pay makita idi, impakitana ti nadiosan a panagbuteng . . . Gapu iti pammati ni Abraham, idi a naayaban, tapno mapan iti maysa a disso nga awatennanto a kas tawid nagtulnog . . . Gapu iti pammati ni Moises, idi nataenganen, nagmadi a napanaganan ti anak daydi anak a babai ni Faraon, a pinilina nga impangpangruna ti makipagsagaba iti rigat kadagiti tattao ti Dios ngem ti makiranud kadagiti aglabas a ragragsak ti basol . . . Gapuna, datayo met, idinto nga adda iti aglawlaw kadatayo ti kasta unay nagdakkel nga ulep dagiti saksi, iwagsaktayo ti amin a pakadagsenan ken ti basol a manglawlaw a silalaka kadatayo, ket tarayentayo koma a siibtur ti tarayen a naikabil iti sanguanantayo.”

No maipapan ken Jesu-Kristo, kunaen ti Biblia: “Dagitoy ti bambanag a kuna ni Amen, ti matalek ken pudno a saksi, ti punganay ti pinarsua ti Dios.” Makinsaksi kenkuana? Imbagana a mismo nga impakaammona ti nagan ni Amana. Isut’ kangrunaan a saksi ni Jehova.—Apoc. 3:14; Juan 17:6.

Makapainteres, ta adda dagidi Judio nga inimtuodda no dagiti aramid ni Jesus idi ket inrepresentarda ti maysa a “baro a sursuro.” (Mar. 1:27) Kalpasanna, adda dagidi Griego nga impapanda a ni apostol Pablo ket mangiserserrek iti “baro a sursuro.” (Ara. 17:19, 20) Kabbaro daydi no iti lapayag dagidiay makangkangngeg iti dayta, ngem ti importante a ta daydi isut’ kinapudno, maitunos a naan-anay iti Sao ti Dios.

Ti moderno a historia dagiti Saksi ni Jehova nangrugi idi naporma ti maysa a grupo a panagadal iti Biblia idiay Allegheny, Pennsylvania, E.U.A., kalpasan ti 1870. Idi damo Estudiante ti Biblia laeng ti awagda kadakuada, ngem idi 1931 inakoda ti Nainkasuratan a nagan a Saksi ni Jehova. Ti sursuroda ken  al-alagadenda saan a kabbaro no di ket pannakaisubli dayta ti immuna a siglo a Kinakristiano.

Mamati kadi dagiti Saksi ni Jehova a ti relihionda isu laeng ti maymaysa nga umiso a relihion?

Ti Biblia dina anamongan ti moderno a panangmatmat nga adu dagiti maakseptar a wagas ti panagdaydayaw iti Dios. Ibaga ti Efeso 4:5 nga adda “maysa nga Apo, maysa a pammati.” Kinuna ni Jesus: “Nailet ti ruangan ken akikid ti dalan a mangiturong iti biag, ket natakkon dagiti makasarak kenkuana. . . . Saan a ti tunggal maysa nga agkuna kaniak, ‘Apo, Apo,’ sumrekto iti pagarian ti langlangit, no di ket ti mangaramid ti pagayatan ni Amak nga adda iti langlangit.”—Mat. 7:13, 14, 21; kitaenyo met ti 1 Corinto 1:10.

Maulit-ulit a dagiti Kasuratan dakamatenda ti gupgop dagiti pudno a Nakristianuan a sursuro a kas “ti kinapudno,” ket ti Kinakristiano masao kas “dana ti kinapudno.” (1 Tim. 3:15; 2 Juan 1; 2 Ped. 2:2) Yantangay dagiti Saksi ni Jehova ket ibatayda amin a pammatida, dagiti pagalagadanda iti kababalin, ken wagas ti organisasionda iti Biblia, ti pammatida iti Biblia a mismo kas Sao ti Dios ikkanna ida ti panagtalek a ti ik-ikutanda ket talaga nga isut’ kinapudno. No kasta ti sasaadenda saan a kinapalangguad no di ket iparangarangda ti panagkompiansada a ti Biblia isut’ umiso a pagalagadan tapno marukod ti relihion ti maysa a tao. Saanda nga agimbubukodan no di ket sigagagarda a mangiburay iti pammatida kadagiti sabali.

Saan aya a Biblia met laeng ti sursuroten dagiti dadduma a relihion?

Adda met ketdi pangus-usaran dagiti dadduma iti Biblia. Ngem talaga kadi nga isursuroda ken al-alagadenda ti linaonna? Amirisenyo: (1) Kaaduan kadagiti patarusda iti Biblia inikkatda ti nagan ti pudno a Dios iti rinibribo a daras. (2) Ti Trinidad a doktrina, nga isut’ ideada maipapan iti Dios a mismo, binulodda manipud kadagiti pagano ket pinatanorda agingga iti agdama a pormana adu a siglo kalpasan ti pannakakompleto ti Biblia. (3) Ti panamatida iti di ipapatay ti natauan a kararua a kas pangibatayanda iti panagtultuloy ti biag saan a naala manipud Biblia; namuon dayta iti kadaanan a Babilonia. (4) Ti tema ti panangaskasaba ni Jesus isu ti Pagarian ti Dios ket imbaonna dagiti adalanna tapno ikasabada dayta kadagiti sabsabali; ngem dagiti simbaan itatta mammanoda a dakamaten dayta a Pagarian ket dagiti miembroda dida as-asikasuen ti  panangikaskasaba iti “daytoy naimbag a damag ti pagarian.” (Mat. 24:14) (5) Kinuna ni Jesus a dagiti pudno a pasurotna silalaka ida a malasin gapu iti managsakripisio a panagayatda iti maysa ken maysa. Pudno kadi a kasta dagiti relihion ti Kakristianuan no aggugubat ti nasnasion? (6) Kunaen ti Biblia a dagiti adalan ni Kristo saanda a paset ti lubong, ket mamakdaar nga asinoman a mayat a makigayyem iti lubong pagbalbalinenna ti bagina a kabusor ti Dios; ngem dagiti iglesia ti Kakristianuan ken dagiti kamengda nagpalalo ti pannakinaminda kadagiti napolitikaan a ganuat ti nasnasion. (Sant. 4:4) Gapu ta kasta ti rekordda, sipupudno kadi a makuna a talaga nga al-alagadenda ti Biblia?

Kasano a makagteng dagiti Saksi ni Jehova iti kasta a panangilawlawagda iti Biblia?

Ti kangrunaan a makagapu a ta talaga a patien dagiti Saksi a ti Biblia isut’ Sao ti Dios ket ti linaonna agpaay a pakasursuruantayo. (2 Tim. 3:16, 17; Roma 15:4; 1 Cor. 10:11) Gapuna dida agusar kadagiti argumento ti pilosopia tapno palikawkawanda dagidiay nabatad nga ebkas ti kinapudno wenno inda ketdi ikalkalintegan ti kabibiag dagidiay tattao a nangtallikud kadagiti moral a pagalagadan ti Biblia.

No ipatuldoda ti kayulogan dagiti simboliko a lenguahe idiay Biblia, palubosanda a ti Biblia ti mismo a mangilawlawag iti dayta, imbes nga itedda dagiti teoriada no aniat’ kayulogan dagita. (1 Cor. 2:13) Dagiti pangripiripan kadagiti kaipapanan dagiti simboliko a termino isudat’ masansan a masarakan kadagiti sabali a paset ti Biblia. (Kas pangarigan, kitaenyo ti Apocalipsis 21:1; sa, maipapan iti kaipapanan ti “baybay,” basaenyo ti Isaias 57:20. Tapno mailasin “ti Kordero” a tuktukoyenna idiay Apocalipsis 14:1, kitaenyo ti Juan 1:29 ken 1 Pedro 1:19.)

No kadagiti kaitungpalan ti padto, iyaplikarda ti kinuna ni Jesus a kasapulan ti panagsiglat kadagiti pasamak a maiyataday kadagiti naipadto. (Luc. 21:29-31; idiligyo ti 2 Pedro 1:16-19.) Sitatallugodda a nangipatuldo kadagidiay a paspasamak sada impakita no aniat’ ipasimudaag ti Biblia a kaipapanan dagita.

Kinuna ni Jesus nga isu maaddaanto ditoy daga iti “matalek ken naannad nga adipen” (dagiti napulotan a pasurotna a mamatmatan kas maysa a grupo), a baeten dayta nga ahensia ipaayna ti naespirituan a taraon kadagidiay mangbukel iti sangakabbalayan ti pammati. (Mat. 24:45-47) Bigbigen dagiti  Saksi ni Jehova dayta nga urnos. Kas met kadagidi immuna a siglo a Kristiano, minatmatanda ti manarawidwid a bagi dayta a klase “adipen” a nangrisut kadagiti narikut a problema—saan nga agpannuray iti natauan a sirib, no di ket sukimatenda ti pannakaammoda iti Sao ti Dios ken ti pannakilanglangenna kadagiti adipenna, ken iti tulong ti espiritu ti Dios, nga isut’ sireregget nga ikarkararagda.—Ara. 15:1-29; 16:4, 5.

Apay a kadagiti panaglabas ti tawtawen adda panagbaliwbaliw ti sursuro dagiti Saksi ni Jehova?

Ipakita ti Biblia a tulongan ni Jehova dagiti adipenna a mangtarus iti panggepna iti progresibo a wagas. (Prov. 4:18; Juan 16:12) Gapuna, dagidi mammadto a nadibinuan ti pannakapaltiingda a nangisurat iti paspaset ti Biblia dida natarusan ti kayulogan ti amin nga insuratda. (Dan. 12:8, 9; 1 Ped. 1:10-12) Dagidi apostol ni Jesu-Kristo nabigbigda a nagadut’ dida natartarusan idi tiempoda. (Ara. 1:6, 7; 1 Cor. 13:9-12) Ipakita ti Biblia nga addanto dakkel nga iwawadwad ti pannakaammo iti kinapudno bayat ti “panawen ti panungpalan.” (Dan. 12:4) Ti iwawadwad ti pannakaammo masansan a kasapulan ti panagbalbaliw ti panagpampanunot ti maysa a tao. Dagiti Saksi ni Jehova sipapakumbaba nga agtulokda a mangaramid ti kakasta a panagbalbaliw.

Apay a mangaskasaba dagiti Saksi ni Jehova iti binalaybalay?

Ni Jesus impadtona daytoy a trabaho itoy kaaldawantayo: “Daytoy naimbag a damag ti pagarian maikaskasabanto iti amin a napagnaedan a daga tapno mangpaneknek iti isuamin a nasion; ket iti kasta umayton ti panungpalan.” Insurona met kadagiti pasurotna: “Inkayo . . . pagbalinenyo nga ad-adalan dagiti umili iti isuamin a nasnasion.”—Mat. 24:14; 28:19.

Idi imbaon ni Jesus dagidi immuna nga adalanna, binilinna ida a mapanda kadagiti pagtaengan ti tattao. (Mat. 10:7, 11-13) Ni apostol Pablo kinunana maipapan iti ministeriona: “Ta awan ti aniaman a makapalaing a binaybay-ak nga impakaammo kadakayo ken insurok kadakayo iti sanguanan ti tattao ken iti binalaybalay.”—Ara. 20:20, 21; kitaenyo ti Aramid 5:42.

Ti mensahe nga iwarwaragawag dagiti Saksi saklawenna dagiti biag ti tattao; kayatda a siguraduen nga awan tao a maliwayanda. (Sof. 2:2, 3) Ti isasarungkarda ket gutugoten ti ayat—umuna ayatda iti Dios, ken kasta met iti kaarubada.

 Kastoy ti napaliiwda idiay komperensia dagiti relihioso a lider idiay España: “Nalabit [dagiti simbaan] nakaro ti kinaliwayda no iti daydiay kangrunaan a trabaho dagiti Saksi—ti isasarungkar iti pagtaengan, nga isut’ inar-aramid idi dagiti apostol iti daydi immuna nga iglesia. Idinto ta dagiti simbaan, iti namin-adun nga okasion, ti la mangbangbangon kadagiti templo ti ar-aramidenda, a batingtingenda dagiti kampanada tapno maatrakarda dagiti umili ken ti panangasabada idiay laeng uneg ti paggigimonganda, [dagiti Saksi] sursurotenda ti apostoliko a wagas a panagbalaybalay ken panangusar iti amin nga okasion tapno mangasabada.”—El Catholicismo, Bogotá, Colombia, Setiembre 14, 1975, p. 14.

Ngem apay a dagiti Saksi ulit-ulitenda a sarungkaran uray ti balbalay dagidiay dida kapammatian?

Dida ipilit ti mensaheda iti siasinoman. Ngem ammoda nga adda dagidiay umalis-alis iti pagtaenganda ken adda panagbalbaliw ti sirkumstansia ti tattao. Ita nalabit di masango ti maysa a tao ti umimdeng; iti sabali a panawen nalabit siraragsakto nga agdengngeg. Ti maysa a kameng ti sangakabbalayan nalabit saan nga interesado, ngem dagidiay dadduma a kameng nalabit interesadoda. Agbalbaliw met uray dagiti tattao a mismo; dagiti serioso a problema iti biagda mabalin nga isut’ mangtignay kadakuada tapno agriingda kadagiti naespirituan a kasapulanda.—Kitaenyo met ti Isaias 6:8, 11, 12.

Apay a maidadanes ken marabrabak dagiti Saksi ni Jehova?

Kinuna ni Jesus: “No ti lubong guraennakayo, ammoyo a ginuranak nga immun-una ngem dakayo. No pasetnakayo koma ti lubong, ayaten koma ti lubong ti kukuana. Ita gapu ta saankayo a paset ti lubong, no di ket pinilikayo iti lubong, gapu itoy guraennakay ti lubong.” (Juan 15:18, 19; kitaenyo met ti 1 Pedro 4:3, 4.) Ipakita ti Biblia a ti intero a lubong adda iti sidong ti panangtengngel ni Satanas; isut’ kangrunaan a mangsugsugsog iti pannakaidadanes.—1 Juan 5:19; Apoc. 12:17.

Imbaga met ni Jesus kadagiti adalanna: “Kaguradakayto dagiti amin a tao gapu iti naganko.” (Mar. 13:13) Ti sao a “nagan” ditoy kaipapananna daydiay opisial a saad ni Jesus, kas Mesianiko nga Ari. Umapay ti pannakaidadanes gapu ta dagiti Saksi ni Jehova yun-unada dagiti bilin ni Jesus imbes a dagiti bilin ti aniaman a naindagaan nga agtuturay.

‘Apay a dikay koma tumulong a mamagbalin iti lubong (ti komunidad) a nasaysayaat a lugar a pagyanan?’

Kunaenyo: ‘Nabatad a napateg kadakayo dagiti kasasaad iti komunidad, ket kastada met kaniak. Damagek man, Ania a problema ti kunayo a masapul nga asikasuen nga umuna?’ Sayonto inayon: ‘Apay a kunayo a dayta ket nasken unay? . . . Nabatad, a ti madagdagus a panagtigay iti dayta a kaso ket makapalaing, ngem siguro umanamongkayo a ti pannakaparang-ay a kayattayo ket daytay agpaut. Dayta a panangrisut ti punteria dagiti Saksi ni Jehova. (Ilawlawagyo no kasanotay a tultulongan dagiti tattao a mangyaplikar kadagiti prinsipio ti Biblia kadagiti kabibiagda tapno madanon ti puon ken gapu ti problema ti intunggal tao; kasta met, no anianto ti aramiden ti Pagarian ti Dios, ken no apay a risutennanto a permanente daytoy ti problema.)’

Wenno: ‘(Kalpasan a nadakamat ti dadduma a punto ditoy ngato . . . ) Dadduma a tattao tumulongda iti irarang-ay ti komunidad babaen ti panangtedda ti kuarta; dagiti dadduma iboluntarioda dagiti serbisioda. Dagiti Saksi ni Jehova aramidenda nga agpadpada dagita. Ilawlawagko kadakayo.’ Sayonto inayon: (1) ‘No agbalin a Saksi ni Jehova ti maysa a tao masapul a sitatallugod a bayadanna ti buisna; dayta a kuarta usarento ti gobierno para kadagiti serbisio nga ipaayna.’ (2) ‘Ad-adu pay ngem dayta ti aramidenmi, sarungkaranmi dagiti tattao kadagiti balayda, ket itukonmi ti panagadalda ti Biblia nga awan bayadna kadakuada. Inton masursurodan ti nailanad iti Biblia, mabalindan nga iyaplikar dagiti prinsipio ti Biblia ket iti kasta matamingdan dagiti problemada.’

Wenno: ‘Maragsakannak ta insaludsodyo dayta. Adu dagidiay pulos a di mangdamdamag no ania ti maitultulong dagiti Saksi agpaay iti komunidad. Nabatad a saan la a maymaysa a wagas ti itutulong.’ Sayonto inayon: (1) ‘Dagiti dadduma mangipasdekda kadagiti institusion—dagiti ospital, pagtaengan dagiti lallakay, pakatulongan dagiti drug addicts, kdp. Dagiti met dadduma agboluntarioda a sumarungkar iti balbalay dagiti umili ket itukonda ti maitutop a tulong a kabaelanda. Daytat’ ar-aramiden dagiti Saksi ni Jehova.’ (2) ‘Adda maysa a pamuspusan a makitami a mangbalbaliw iti intero a panangmatmat ti tao iti biagna, ket dayta isu ti pannakaammo no aniat’ kunaen  ti Biblia kas napudno a panggep iti biag ken no aniat’ adda iti masanguanan.’

Wenno: ‘Apresiarek ti panangiyimtuodyo iti dayta. Tarigagayantayo a rumang-ay koma dagiti kasasaad, saan kadi? Imtuodek man kadakayo, Aniat’ makunayo iti inaramid a mismo ni Jesu-Kristo? Kunayo kadi a praktikal ti wagas a panangtultulongna kadagiti tattao? . . . Tarigagayanmi a suroten ti ulidanna.’

‘Dagiti Kristiano saksida koma ni Jesus, saan ket a ken Jehova’

Kunaenyo: ‘Nasayaat a punto dayta inruaryo. Ket husto ti kunayo a rebbengentayo ti mangsaksi ken Jesus. Dayta ti gapuna a ti papel ni Jesus no iti panggep ti Dios ket maipagpaganetget kadagiti publikasionmi. (Mabalin kayatyo ti agusar ti baro a libro wenno magasin a mangidemostra itoy.) Ngem adtoy man ti banag a mabalin a kabbaro kadakayo. (Apoc. 1:5) . . . Asino ti makin “Matalek a Saksi” ken Jesus? (Juan 5:43; 17:6) . . . Indiaya ni Jesus ti ulidan a surotentayo, di ngamin? . . . Apay a nasken unay nga ammuentayo nga agpadpada ni Jesus ken ti Amana? (Juan 17:3)’