Kasano a mailasin dagiti pudno a mammadto manipud kadagidiay ulbod?

Dagiti pudno a mammadto ilatakda ti pammatida ken Jesus, ngem ad-adu pay ti kasapulan ngem ti panangakoda a mangaskasabada iti naganna

1 Juan 4:1-3: “Suotenyo dagiti naipaltiing nga ebkas no nagtaudda iti Dios, ta adu dagiti ulbod a mammadto a rimmuar ditoy lubong. Daytoy ti pakaammuanyo ti naipaltiing nga ebkas manipud iti Dios: Isuamin a naipaltiing nga ebkas a mangipudno a ni Jesu-Kristo immay a naglasag nagtaud iti Dios, ngem amin a naipaltiing nga ebkas a di mangipudno ken Jesus saan a nagtaud iti Dios.”

Mat. 7:21-23: “Saan a ti tunggal maysa nga agkuna kaniak, ‘Apo, Apo,’ sumrekto iti pagarian ti langlangit, no di ket ti mangaramid ti pagayatan ni Amak nga adda iti langlangit. Adunto dagiti agkuna kaniak iti daydiay nga aldaw, ‘Apo, Apo, saankami aya a nagipadto iti naganmo . . . ?’ Ket siak ipalgakkonto kadakuada: Uray kaano dikayo naam-ammo! Umadayokayo kaniak, dakayo nga agar-aramid ti dakes.”

Dagiti pudno a mammadto agsaoda iti nagan ti Dios, ngem di umdas ti panagkuna laeng a ti maysa ket ireprepresentarna ti Dios

Deut. 18:18-20: “Mamangonakto kadakuada iti mammadto nga aggapu kadagiti kakabsatda, a kas kenka [kas ken Moises]; ket ikabilkonto ti sasaok iti ngiwatna, ket sawennanto kadakuada amin ti ibilinkonto kenkuana. Ket maaramidto nga ti siasinoman a dinto mangipangag iti sasaok a sawennanto iti naganko, isingirkonto iti daydiay. Nupay kasta, ti mammadto a mangyebkasto iti sao a sikukuspag iti naganko a diak imbilin kenkuana a sawenna wenno sawennanto iti nagan ti sabsabali a didios, dayta met la a mammadto matayto.” (Idiligyo ti Jeremias 14:14; 28:11, 15.)

Kinuna ni Jesus: “Awan ti aramidek a sisiak; no di ket kas iti insuro kaniak ni Ama dagitoy ti sawek.” (Juan 8:28) Kinunana pay: “Immayak iti nagan ni Amak.” (Juan 5:43) Kinuna pay met ni Jesus: “Ti agsao a kabukbukodanna sapulenna ti bukodna a dayaw.”—Juan 7:18.

No adda dagiti indibidual wenno organisasion nga agkuna a mangirepresentar iti Dios ngem agkitakitda met a mangusar iti personal a nagan ti Dios, ket imbes ketdi iyugalida nga iyebkas ti bukodda nga opinion, maragpatda ngata daytoy nasken unay a kualipikasion ti pudno a mammadto?

 Ti abilidad nga agaramid iti “dadakkel a pagilasinan” wenno “dagiti milagro” saan nga isut’ mangpaneknek iti pudno a mammadto

Mat. 24:24: “Tumakderto dagiti ulbod a Kristo ken dagiti ulbod a mammadto ket mangipakitadanto iti dadakkel a pagilasinan [“dagiti milagro,” TEV] ken datdatlag tapno mangisiasida koma, no mabalin, uray pay kadagiti napili.”

2 Tes. 2:9, 10: “Ti kaadda daydiay nadangkes mayalubog iti panangaramid ni Satanas a mapakuyogan iti amin a nabileg nga aramid ken ulbod a pagilasinan ken dagiti datdatlag ken ti amin a nakillo a panangallilaw a maipaay kadagidiay mapukaw, a kas dusa agsipud ta dida inawat ti ayat ti kinapudno a maipaay koma a pakaisalakananda.”

Iti kasinnumbangirna, nangipakita ni Moises kadagiti milagro gaput’ panangidirihir ni Jehova. (Ex. 4:1-9) Ni Jehova inikkanna met ni Jesus iti pannakabalin nga agaramid kadagiti milagro. (Ara. 2:22) Ngem ad-adda pay ngem dagiti milagro ti mangpaneknek a pudpudno nga imbaon ti Dios ida.

 Ti ipadto dagiti pudno a mammadto mapasamakto, ngem dida ammo no inton-ano wenno kasanonto ti pannakaangayna

Dan. 12:9: “Inka iti dalanmo, Daniel, ta ti sasao maripkanda ken matimbrean agingga iti panawen ti panungpalan.”

1 Ped. 1:10, 11: “Dagiti mammadto . . . sinuksukimatda no ania wenno kasano ti tiempo nga imbaga ti espiritu nga adda idi kadakuada maipapan ken Kristo idi impakpakaunana a sinaksian ti tutuok a maipaay ken Kristo ken dagiti dayag a sumarunonto kadakuada.”

1 Cor. 13:9, 10: “Ta ammotay ti dadduma a paset ket padtuantay ti dadduma a paset; ngem inton umay daydiay kinaan-anay, daydiay kinakurang mapukawto.”

Prov. 4:18: “Ti dana dagidiay nalinteg kas iti nalawag a raniag a rumaniag a rumaniag agingga iti napaypayso nga aldaw.”

Dagidi apostol ken immuna a Kristiano a disipulo addaanda met idi kadagiti di umno nga inanamaen, ngem ti Biblia dina imbilang ida a kas “ulbod a mammadto.”—Kitaenyo ti Lucas 19:11; Juan 21:22, 23; Aramid 1:6, 7.

Ni Natan a mammadto pinaregtana ni Ari David nga ituloyna ti adda iti pusona maipapan iti pannakabangon ti balay a pagdaydayawan ken Jehova. Ngem kalpasan dayta imbaga ni Jehova ken Natan nga ilawlawagna ken David a saan a ni  David ti mangbangonto iti dayta. Ni Jehova dina inlaksid ni Natan gapu iti sinaona nga immun-una no di ket intultuloyna nga inusar ni Natan gapu ta sipapakumbabana a kinorihir dayta a banag idi nga imbatad kenkuana ni Jehova dayta.—1 Cron. 17:1-4, 15.

Dagiti isawang ti pudno a mammadto parang-ayenna ti pudno a panagdaydayaw ket maitunosda iti naipalgak a pagayatan ti Dios

Deut. 13:1-4: “No tumakder kenka ti maysa a mammadto wenno managparparmata iti darepdep ket ikkannaka iti tanda wenno datdatlag, ket ti tanda wenno datdatlag maaramid isu a nagsawanna kenka, a kunana, ‘Intan ala sumurot iti sabsabali a didios, a dika pay naam-ammuan, ket agserbita kadakuada,’ dikanto italtalek ti sasao dayta a mammadto wenno dayta a managparparmata iti darepdep, ta ni Jehova a Diosyo suotennakayo tapno maammuan no dakayo ayatenyo ni Jehova a Diosyo iti isuamin a pusoyo ken iti isuamin a kararuayo. Dakayo sumurotkayto ken Jehova a Diosyo, ket agamangakayo kenkuana, ket salimetmetanyo ti bilbilinna, ket agtulnogkayo iti timekna, ket agserbikayo kenkuana, ket kumpetkayo kenkuana.”

Yantangay kunaen ti Biblia a “ti gayyem ti lubong” agbalin a kabusor ti Dios, dagiti klero a mangidagdagadag kadagiti miembroda a makinaminda kadagiti ganuat ti lubong parparang-ayenda ngata ti pudno a panagdaydayaw? (Sant. 4:4; 1 Juan 2:15-17) Kuna ti pudno a Dios a dagiti nasion “maammuandanto a siak ni Jehova,” ken kuna ti Biblia a ti Dios mangalanto kadagiti nasion ti “maysa nga ili a maipaay iti naganna,” ngem dagidiay relihion a mangtagtagibassit iti personal a nagan ti Dios tumuntunosda ngata iti naipalgak a pagayatan ti Dios? (Ezeq. 38:23; Ara. 15:14) Insuro ni Jesus dagiti pasurotna a kararagenda ti Pagarian ti Dios, ket pakdaarannatay ti Biblia a ditay agtalek iti naindagaan a tattao, ngarud dagiti klero wenno politikal nga organisasion a mangidagadag kadagiti umili nga agtalekda iti natauan a panangituray pudnoda kadi a mammadto?—Mat. 6:9, 10; Sal. 146:3-6; idiligyo ti Apocalipsis 16:13, 14.

 Dagiti pudno a mammadto ken dagiti ulbod mabigbig babaen iti bungbunga ti kabibiagda ken kabibiag dagiti sumursurot kadakuada

Mat. 7:15-20: “Agaluadkayo kadagiti ulbod a mammadto nga umayda kadakayo a nakakawes a kasla karnero, ngem iti unegda  luboda a narawet. Mailasinyonto ida gapu iti bungbungada. . . . Tunggal kayo a nasayaat mangted bungbunga a nasayaat, ngem ti kayo a dakes mangted bungbunga a dakes . . . Talaga, ngarud, malasinyonto ida gapu iti bungbungada.”

Aniat’ kita ti kabibiagda? “Dagiti aramid ti lasag . . . isuda ti pannakikamalala, kinarugit, nalulok a kababalin, idolatria, panagalagad iti espiritismo, guranggura, ringringgor, im-imon, panagpungpungtot, panagsususik, panagsisina, panangilkillo ti pammati, ap-apal, panagbarbartek, panagragragsak nga aglablabes, ken bambanag nga umas-asping kadagitoy. . . . Dagiti agaramid kadagitoy saandanto a tawiden ti pagarian ti Dios. Iti kasinnumbangirna, ti bungbunga ti espiritu [ti Dios] isu ti ayat, rag-o, talna, mabayag a panagitured, kinamanangaasi, kinaimbag, pammati, kinaemma, panagteppel.”—Gal. 5:19-23; kitaenyo met ti 2 Pedro 2:1-3.

Di met adda aya nagerraduan dagiti Saksi ni Jehova no iti pannursuroda?

Di kunaen dagiti Saksi ni Jehova a napaltiinganda a mammadto. Nagerradoda no dadduma. Kas kadagidi apostol ni Jesu-Kristo, no dadduma adda di umiso nga inanamaenda.—Luc. 19:11; Ara. 1:6.

Dagiti Kasuratan mangtedda kadagiti panniempo no maipapan iti kaadda ni Kristo, gapuna inadalda a siinget dagitoy. (Luc. 21:24; Dan. 4:10-17) Diniskribir met ni Jesus ti aduan paset a pagilasinan a nainaig iti kaitungpalan dagiti padto maipapan iti panawen a mangitudo no ania a kaputotan ti makaur-uray iti panungpalan ti dakes a sistema ti bambanag a kukua ni Satanas. (Luc. 21:7-36) Impatuldo dagiti Saksi ni Jehova dagiti ebidensia ti kaitungpalan ti pagilasinan. Pudno a dagiti Saksi nagkamalida no iti pannakaawatda iti maangay kadagiti dadduma a periodo ti panawen, ngem dida nagkamali tapno pukawenda koma ti pammatida wenno nakaturogda no iti kaitungpalan ti pangpanggep ni Jehova. Nagtultuloyda a nangipangpangruna iti pammalakad ni Jesus: “Agsalukagkayo, ta dikay ammo no ania nga aldaw ti iyaayto ti Apoyo.”—Mat. 24:42.

Dagidiay punto de bistada a masapul a makorihir ket menor laeng no maidilig kadagiti nagpapateg a kinapudno manipud Biblia a natarusanda ken impablaakda. Dagitoy ti sumagmamano: Ni Jehova ti pudpudno a Dios. Ni Jesu-Kristo saan a paset ti Trinidad no di ket isu ti bugbugtong nga Anak ti Dios. Ti pannakaaon manipud basol magun-odan laeng baeten iti panamati iti subbot a daton ni Kristo. Ti nasantuan nga espiritu  saan a persona no di ket aktibo a puersa ni Jehova, ket ti bungbungana masapul a makita sigun iti kabibiag dagiti pudno nga agdaydayaw. Ti natauan a kararua saan nga imortal, a kas kunaen dagidi pagano idi ugma; matay ti kararua, ket ti namnama iti masanguanan a biag agpannuray iti panagungar. Impalubos ti Dios ti kinadakes gapu iti isyu ti sapasap a kinasoberano. Ti Pagarian ti Dios isut’ kakaisuna a namnama ti sangatauan. Nanipud 1914 agbibiagtayon kadagiti maudi nga aldaw ti sangalubongan a dakes a sistema ti bambanag. 144,000 laeng a matalek a Kristiano dagiti kaduanto ni Kristo idiay langit a kas ar-ari ken papadi, idinto ta dagiti dadduma a matalek a tattao umawatdanto ti agnanayon a biag iti Paraiso a daga.

Ti sabali pay nga amirisen no kadagiti pannursuro dagiti Saksi ni Jehova isu daytoy: Dagiti sursuroda naparang-ayna ngata ti moral dagiti umili? Dagidiay umannurot iti sursuroda karkarnada ngata iti pagilianda gaput’ kinamapagpiaranda? Ti sangapamiliaanda immimbag ngata gaput’ panangiyaplikarda kadagitoy a sursuro? Kinuna ni Jesus a dagiti disipulona nalakada a malasin gaput’ panagiinnayatda. (Juan 13:35) Karkarna kadi daytoy a kababalin no kadagiti Saksi ni Jehova? Bay-anmi a dagiti pudno a pasamak ti agsao.

‘Ti ministromi kunana a dagiti Saksi ni Jehova ulbodda a mammadto’

Kunaenyo: ‘Imtuodek man, Adda aya impakitana kenka a texto ti Biblia a mangdeskribir iti pammatimi wenno aramidmi ket kunaenna sadiay nga ulbod a mammadto ti kakasta a tattao? . . . Kayatko nga ipakita kenka no kasanot’ panangdeskribir ti Biblia kadagiti ulbod a mammadto? (Sayonto usaren dagiti punto a nabalabala kadagiti immuna a  panid 432-437.)’

Wenno: ‘Masapul nga adda piho nga ebidensia a mangpaneknek iti kasta a grabe a pammabasol. Adda kadi nadakamat ti ministroyo nga espesipiko nga ehemplo? (No dakamaten ti bumalay dagiti makuna a “pammadto” a di met naangay, usarenyo ti adda idiay segundario a paulo a masarakan idiay  panid 435, ken manipud  baba ti panid 436 ingganat’ ngato ti 437.)’

Wenno: ‘No adda mangakusar kadakayo iti kasta siguro kayatyo met nga ilawlawag ti dasigyo wenno ti punto de bistayo, saan kadi? . . . Gapuna di la mabalin a luktak ti Biblia tapno ipakitak kadakayo daytoy . . . ?’