Kunaen kadi ti Biblia nga isuamin a maaddaan iti espiritu ti Dios ket ‘agsaoda iti dildila’?

1 Cor. 12:13, 30: “Ta gapu iti maymaysa nga espiritu datay amin nabautisarantayo iti maymaysa a bagi . . . Saanda nga agikut amin iti sagsagut ti panangagas, di ngamin? Saanda nga agsao amin iti dildila, di ngamin?” (Kasta met ti 1 Corinto 14:26)

1 Cor. 14:5: “Ita kayatko koma a dakay amin agsaokayo iti dildila, ngem kaykayatko nga agipadtokayo koma. Kinapudnona, daydiay agipadto dakdakkel ngem daydiay agsao iti dildila, malaksid, wenno agipatarus, tapno ti kongregasion mapabileg koma.”

Ti datdatlag a panagsao iti lenguahe a di pulos nga inadal ti maysa a tao pammaneknek ngata nga adda kenkuana ti nasantuan nga espiritu?

Ti abilidad nga “agsao iti dildila” mabalin ngata a saan nga iti pudno a Dios ti gubuayanna?

1 Juan 4:1: “Ay-ayatek, dikay patien dagiti amin a naipaltiing nga ebkas [“amin nga espiritu,” KJ, RS], no di ket suotenyo dagiti naipaltiing nga ebkas no nagtaudda iti Dios.” (Kitaenyo met ti Mateo 7:21-23; 2 Corinto 11:14, 15.)

Maibilang kadagidiay ‘agsasao iti dildila’ itatta isuda dagiti  Pentecostal ken Baptist, kasta met dagiti Romano Katoliko, Episcopalian, Methodist, Lutheran, ken Presbyterian. Kinuna ni Jesus a ti nasantuan nga espiritu ‘iturongnanto dagiti adalanna iti amin a kinapudno.’ (Juan 16:13) Dagiti ngata kameng dagitoy a relihion mamatida a dagidiay met sabsabali nga ‘agsasao iti dildila’ ket naiturongda iti ‘amin a kinapudno’? Kasano koma a kasta, idinto ta agsisimparatda met? Ania nga espiritu ti mamagsao kadakuada ‘iti dildila’?

Ti nagtipon a sarita ti Fountain Trust ken ti Church of England Evangelical Council inadmitarna: “Siaammokami a ti kasta met laeng a pasamak maangay iti sidong ti impluensia ti okultismo/demonismo.” (Gospel and Spirit, Abril 1977, impablaak ti Fountain Trust ken ti Church of England Evangelical Council, p. 12) Ti libro a Religious Movements in Contemporary America (edited by Irving I. Zaretsky and Mark P. Leone, quoting L. P. Gerlach) inreportna nga idiay Haiti ti ‘panagsao iti dildila’ agpadpada a mapaspasamak kadagiti Pentecostal ken iti Voodoo a relihion.—(Princeton, N.J.; 1974), p. 693; kitaenyo met ti 2 Tesalonica 2:9, 10.

 Ti mapaspasamak itatta a ‘panagsao iti dildila’ isu met la ngata ti mapaspasamak kadagidi Kristiano ti immuna a siglo?

Idi immuna a siglo, ti namilagruan a sagsagut ti espiritu, agraman abilidad nga ‘agsao iti dildila,’ pinasingkedanna a ti parabur ti Dios immalisen manipud iti Judio a sistema ti panagdaydayaw ket naited iti kaipaspasdek a Nakristianuan a kongregasion. (Heb. 2:2-4) Yantangay dayta a kalat ket naragpaten idi immuna a siglo, nesesita pay aya nga ulit-uliten a paneknekan dayta itatta?

Idi immuna a siglo, ti abilidad nga ‘agsao iti dildila’ pinapartakna ti internasional a trabaho a panangasaba nga imbilin ni Jesus nga aramiden dagiti pasurotna. (Ara. 1:8; 2:1-11; Mat. 28:19) Kasta kadi ti pangus-usaran itatta dagidiay addaan iti abilidad nga ‘agsao iti dildila’?

Idi immuna a siglo, no dagidi Kristiano inda ‘agsao iti dildila,’ ti sinaoda adda kaipapananna kadagidiay makatarus kadagita a lenguahe. (Ara. 2:4, 8) Itatta, saan kadi a masansan isut’ agam-amangaw nga irurugso dagiti di matartarusan a sasao?

Idi immuna a siglo, ipakita ti Biblia, dagiti kongregasion nabilinda a limitaranda ti ‘panagsao iti dildila’ kadagiti dua  wenno tallo a tattao a mabalin nga agsao no adda gimong; ket “agsisinnublatda” iti dayta, ngem no awan agipatarus agulimekda koma. (1 Cor. 14:27, 28, RS) Kasta kadi ti mapaspasamak itatta?

Kitaenyo met ti panid 140, 141, iti paulo nga “Espiritu.”

Ti nasantuan nga espiritu idirdirihirna ngata dagidiay addaan talunggading a manglab-aw kadagiti aramid a nailanad kadagiti Kasuratan?

2 Tim. 3:16, 17: “Amin a Kasuratan impaltiing ti Dios ket naimbag a pakasursuruan, pakababalawan, pakatinggaran, pakaadalan ti kinalinteg, tapno ti tao ti Dios naan-anay koma ti kinasigona, naan-anay a nakabalan iti isuamin nga aramid a naimbag.” (No adda agkuna nga isu agikut iti naipaltiing a mensahe ngem maikontra met kadagiti impalgak ti espiritu ti Dios baeten ken Jesus ken dagiti apostolna, posible ngata a pareho ti gubuayanda?)

Gal. 1:8: “Uray dakam met laeng wenno maysa nga anghel a naggapu idiay langit ikaskasabana koma kadakayo kas naimbag a damag ti maysa a banag [“a maiduma,” NE] a labes iti daydiay inkaskasabami kadakayo kas naimbag a damag, mailunod koma.”

Ti wagas ti panagbiag ti kamkameng dagiti organisasion a mangayon iti ‘panagsao iti dildila’ paneknekanna ngata nga adda kadakuada ti espiritu ti Dios?

Bilang maysa a grupo karkarna kadi ti panangiparangarangda iti bungbunga ti espiritu kas ti kinaemma ken panagteppel? Dagitoy a kababalin sidadaan kadi a maimatangan kadagidiay makigimgimong kadakuada?—Gal. 5:22, 23.

Talaga kadi a “saanda a paset ti lubong”? Maipuon itoy naipamaysa aya ti debosionda iti Pagarian ti Dios wenno makinamnaminda kadagiti napolitikaan a ganuat toy lubong? Dida kadi nakabasol iti panagibukbok ti dara no tiempo ti gubat? Bilang grupo nasayaat kadi ti damagda no maipapan iti panangliklik kadagiti imoral a kababalin toy lubong?—Juan 17:16; Isa. 2:4; 1 Tes. 4:3-8.

Dagiti pudno a Kristiano itatta mailasinda kadi gapu iti abilidadda nga ‘agsao iti dildila’?

Juan 13:35: “Gapu itoy malasindanto a dakayo dagiti adalak no adda ayatyo iti maysa ken maysa.”

 1 Cor. 13:1, 8: “No agsaoak koma iti dildila ti tattao ken dagiti anghel ngem awan ti ayatko, nagbalinak koma a kas bronse nga aguni wenno piangpiang nga umaweng. Ti ayat saan a maibos uray kaano. Ngem uray adda sagsagut ti pammadto, maiwaksidanto; uray adda dildila, agsardengdanto.”

Kinuna ni Jesus nga umapayto ti nasantuan nga espiritu kadagiti pasurotna ket isudanto ti saksina agingga iti ungto ti daga. (Ara. 1:8) Binilinna ida a pagbalinenda “nga ad-adalan dagiti umili iti amin a nasnasion.” (Mat. 28:19) Impadtona met a “daytoy naimbag a damag ti pagarian maikaskasabanto iti amin a napagnaedan a daga tapno mangpaneknek kadagiti isuamin a nasion.” (Mat. 24:14) Siasino itatta, ti ingrupo ken kas indibidual, a mangar-aramid iti daytoy? Kas maitunos iti imbaga ni Jesus, saan kadi a daytoy ti matmatantayo a kas ebidensia a dayta a grupo ket addaan iti nasantuan nga espiritu?

Agpatpatuloy kadi ti ‘panagsao iti dildila’ agingga nga umay daydiay “kinaan-anay”?

Natukoy idiay 1 Corinto 13:8 dagiti sumagmamano a namilagruan a sagsagut—pammadto, dildila, ken pannakaammo. Ti bersikulo 9 tinukoyna manen dagiti dua a sagsagut—pannakaammo ken pammadto—a kunkunana: “Ta ammotay ti dadduma a paset, ket padtuantay ti dadduma a paset.” (KJ) Wenno, sigun iti RS: “Ta di naan-anay ti pannakaammotayo ket di naan-anay ti pammadtotayo.” Sa kunaen ti bersikulo 10: “Ngem inton umay daydiay kinaan-anay, daydiay kinakurang mapukawto.” (KJ) Ti sao a “kinaan-anay” naipatarus manipud Griego a teʹlei·on, nga ipasimudaagna ti kinataengan, kinakompleto, wenno perpekto. Ti Ro, By, ken NW impatarusda ditoy kas “kompleto.” Paliiwenyo ta saan a daydiay sagut ti dildila ti nakuna a “di naan-anay,” “dadduma a paset,” wenno kurang. Ti “pammadto” ken “pannakaammo” ti nasao a kasta. Iti sabali a pannao, uray kadagidi a namilagruan a sagsagut, dagidi nagkauna a Kristiano addaanda laeng iti imperpekto wenno kurang a pannakaawat iti panggep ti Dios. Ngem inton dagita a padto ket matungpaldan, inton maibanagen ti panggep ti Dios, ngarud umayen “daydiay kinaan-anay,” wenno daydiay kompleto. No kasta, nabatad a dina salsalaysayen ditoy no kasanot’ kabayag ti panagtultuloy ti sagut ti dildila.

Nupay kasta, ipasimudaag ti Biblia no kasanot’ kapaut ti ‘sagut ti dildila’ a kas paset ti kapadasan dagiti Kristiano. Sigun  iti rekord, daytoy a sagut ken dadduma a sagsagut ti espiritu kankanayon a naiyalisda kadagiti tattao babaen iti pannangipatay iti im-ima dagiti apostol ni Jesu-Kristo wenno bayat ti kaaddada. (Ara. 2:4, 14, 17; 10:44-46; 19:6; kitaenyo met ti Ara. 8:14-18.) Gapuna, idi a natayen dagidiay indibidual nga immawat kadagita a sagut iti kasta a wagas, dagiti namilagruan a sagut a nagun-odanda babaen iti panagtignay ti espiritu ti Dios masapul met a nagpatinggadan. Ti kasta a panangmatmat maitunos iti nakairantaan dagita a sagut kas nailanad iti Hebreo 2:2-4.

Ti Marcos 16:17, 18 (KJ) dina aya ipakita a ti abilidad nga ‘agsao iti baro a dildila’ ket pakailasinan kadagiti mammati?

Paliiwenyo koma a dagitoy a bersikulo, saanda laeng a tuktukoyen ti ‘panagsao iti baro a dildila,’ no di pati panangpidut ti ul-uleg ken iyiinom ti makagamot. Amin kadi nga ‘agsao iti dildila’ parparegtaenda met dagitoy nga aramid?

Tapno maammuanyo dagiti rason no apay dagitoy a bersikulo ket saan nga akseptaren dagiti dadduma nga eskolar ti Biblia kitaenyo ti panid 319, 320, iti paulo a “Panangagas.”

‘Mamatikay kadi iti panagsao iti dildila?’

Kunaenyo: ‘Dagiti Saksi ni Jehova agsaoda kadagiti adu a lenguahe, ngem dikam makiramraman iti agam-amangaw a panagsao kadagiti “ganggannaet a dildila.” Ngem imtuodek man kadakayo, Mamatikay kadi a ti “panagsao iti dildila” a maar-aramid itatta ket pumada iti al-alagaden dagidi Kristiano idi immuna a siglo?’ Sayonto inayon: ‘Adtoy man dagiti pagdinniligan a natakuatak a makapainteres unay. (Nalabit usarenyo ti masarakan idiay  panid 109, 110.)’

Wenno: ‘Mamatikami a dagidi Kristiano idi immuna a siglo “nagsaoda iti dildila” ket daytoy ti nangpunno ti banag a kasapulanda unay idi. Ammoyo kadi no ania dagidi a kasapulanda?’ Sayonto inayon: (1) ‘Nagserbi daydi a pagilasinan a ti Dios inyalisnan ti paraburna manipud Judio a sistema ket intednan iti kaipaspasdek a Nakristianuan a kongregasion. (Heb. 2:2-4)’ (2) Daydi ti praktikal a pamuspusan a pangisaknap iti naimbag a damag iti intero a lubong iti ababa laeng a kanito. (Ara. 1:8)’