Talaga kadi a mabalin a kasarita ti maysa a tao ti “espiritu” ti natay nga ing-ingungotenna?

Ecl. 9:5, 6, 10: “Dagiti sibibiag ammoda a mataydanto; ngem dagiti natay dida ammo ti aniaman . . . Kasta met, ti ayatda ken ti gurada ken ti imonda napukawen iti nabayag, ket awanandan iti pannakabiang agingga iti panawen a di nakedngan iti aniaman a naaramid iti baba ti init. Ti aniaman a masarakan ta imam nga aramiden, isu ti aramidem iti kabaelam, ta awan ti aramid wenno gakat wenno pannakaammo wenno sirib idiay Sheol [ti tanem], ti lugar a papanam.”

Ezeq. 18:4, 20: “Ti kararua nga agbasbasol—isunto a mismo ti matay.” (Gapuna ti kararua saan a banag nga agtultuloy nga agbiag no matay ti bagi sa isunto ti kasarita dagiti nabiag kalpasanna.)

Sal. 146:4: “Ti espirituna agpukaw, isu agpulang iti dagana; iti dayta met la nga aldaw ti pampanunotna mapukawda.” (No makuna a ti espiritu ‘pinanawanna’ ti bagi, kaipapananna laeng daydiay a ti puersa ti biag ket simmardengen nga agtigtignay. Gapuna, kalpasan ti ipapatay ti tao, ti espirituna saan nga agbibiag a kas di namaterialan a biag a kabaelanna ti agpanunot ken mangigakat kadagiti planona a sisisina iti bagina. Saan a banag dayta a mabalin a kasarita dagiti sibibiag kalpasan ti ipapatay dayta a tao.)

Kitaenyo pay ti panid 169, 170, iti paulo nga “Ipapatay.”

Saan aya nga ipasimudaag ti Biblia a ni Ari Saul ket nakisarita ken mammadto a Samuel kalpasan ti ipapatay ni Samuel?

Masarakan dayta idiay 1 Samuel 28:3-20. Ipakita ti bersikulo 13, 14 a ni Saul dina mismo a nakita ni Samuel no di ket impapanna laeng gaput’ panangdeskribir daydi mangkukulam  a nagkuna a nakitana ni Samuel. Desperado unay ni Saul ket kayatna a patien a ni Samuel daydi ket ngarud isut’ nagpaallilaw. Kuna ti bersikulo 3 a natayen ni Samuel ket naitanemen. Dagiti texto a naadaw itayen ibatadda nga awan paset ni Samuel a sibibiag idiay sabali a lubong tapno kabaelanna koma ti makisarita ken Saul. Ti timek a naginkukuna nga isu ni Samuel ket maysa a manglimlimo.

Asino a talaga ti kasarsarita dagidiay agkalkalikagum a makiuman kadagiti natay?

Ti kinapudno maipapan iti kasasaad dagiti natay nabatad ti pannakaisaona idiay Biblia. Ngem asino idi ti nangallilaw kadagidi immuna nga agassawa no maipapan iti ipapatay? Kinontra ni Satanas ti pakdaar ti Dios a ti isusukir ket agturong ken patay. (Gen. 3:4; Apoc. 12:9) Idi agangay, wen, nabatad a natay ti tattao a kas impakdaar ti Dios. Asino ngarud, ti nakaawat, a nangimbento iti idea a di talaga a matay ti tao no di ket adda espirituna nga agtultuloy a sibibiag kalpasan ti ipapatay ti bagina? Ti kasta a panangallilaw maikanatad ken Satanas a Diablo, a dineskribir ni Jesus a kas “ama ti kinaulbod.” (Juan 8:44; kitaenyo pay ti 2 Tesalonica 2:9, 10.) Ti panamati a dagiti natay ket talaga a sibibiagda iti sabali a lubong satayto kasarita ida ket di nagimbagan ti sangatauan. Maisungani ketdi, kuna ti Apocalipsis 18:23 a, gapu kadagiti espiritistiko nga aramid ti Babilonia a Dakkel, “naallilaw dagiti isuamin a nasnasion.” Ti espiritistiko nga aramid a ‘pannakiuman kadagiti natay’ talaga nga isut’ sinasaur a panangallilaw a mangisaad iti tattao a makiuman kadagiti demonio (dagiti anghel a siaagum a bimmusor iti Dios) ket masansan nga agturong iti pannakangngeg ti maysa kadagiti naglaad a “timek” agraman panangparigat dagiti nadangkes nga espiritu kenkuana.

Adda kadi pagdaksanna ti panagpaagas ken panagpasalaknib kadagiti espiritu?

Gal. 5:19-21: “Addada a sipapatak dagiti aramid ti lasag, nga isuda ti pannakikamalala, kinarugit, nalulok a kababalin, panagrukbab kadagiti didiosen, panagalagad iti espiritismo . . . Ipakpakaunak kas iti imbagakon kadakayo idi damo, a dagiti agaramid kadagitoy saandanto a tawiden ti pagarian ti Dios.” (No dumawat ti maysa iti tulong ti espiritismo kaipapananna a patienna dagiti kinaulbod ni Satanas maipapan iti ipapatay; isut’ pabalbalakadan kadagidiay tattao nga adda bilegda a naggapu  ken Satanas agraman dagiti demoniona. Ti kasta a tao ibilbilangna ti bagina a kadua dagidiay sipapatak a kabusor ni Jehova a Dios. Imbes a pudno a makatulong, siasinoman nga agtultuloy iti kasta a kurso agsagaba ti agnanayon a pannakadangran.)

Luc. 9:24: “Uray siasino a mayat koma a mangisalakan iti kararuana [wenno, biagna] mapukawnanto; ngem uray siasino a mapukaw ti kararuana gapu kaniak [gapu ta isu ket pasurot ni Jesu-Kristo] maisalakannanto.” (No ti maysa ket sipapakinakem a supringenna ti nabatad pannakaisawangna a bilbilin ti Sao ti Dios tapno salaknibanna wenno igagana ti agdama a biagna, maikapisto iti namnama ti agnanayon a biag. Anian a kinamaag!)

2 Cor. 11:14, 15: “Ni Satanas a mismo pagbalbalinenna ti bagina a kasla anghel ti lawag. Saan ngarud a pakasdaawan a dagiti ministrona agparangda a kakasla ministro ti kinalinteg.” (Gapuna ditay koma maallilaw no dagiti espiritista ket makaipaayda ti temporario a pagimbagan.)

Kitaenyo pay ti panid 317-322, iti “Panangagas.”

Nainsiriban kadi ti iyuuman kadagiti espiritu tapno maadal no aniat’ masanguanan wenno tapno maisierto ti maysa ti panagballigina?

Isa. 8:19: “Intono sawenda kadakayo nga umili: ‘Umumankayo kadagiti baglan wenno kadagiti mammuyon nga agar-arasaas ken agtanabutob,’ saan aya a rebbeng koma dagiti umili nga umumanda iti Diosda?”

Lev. 19:31: “Dikay umamang kadagiti managbuyon nga espiritu, ket kadagiti mammadles dikay makiuman kadakuada, ta mamulitankayo kadakuada. Siak ni Jehova a Diosyo.”

2 Ar. 21:6: “[Ni Ari Manases] nagaramid iti panagsalamangka ken nagaramat iti kinabaglan ken nakipagaramid kadagiti agan-anito ken kadagiti managpadles. Nagaramid iti adu a dakes iti imatang ni Jehova, a panggargarina kenkuana nga agpungtot.” (Ti kasta nga espiritistiko nga ar-aramid isut’ idadawat ti tulong ken Satanas agraman kadagiti demoniona. Di mapilaw a daydi ket “dakes iti imatang ni Jehova,” ket isu dinusana a sikakaro ni Manases. Ngem idi a nagbabawi ken inidianna dagidi a dakes nga ar-aramid, isu ket binendisionan ni Jehova.)

 Aniat’ pagdaksanna ti panagay-ayam iti nainaig iti pammadles wenno panangibuksil iti banag a kasla signo a pagimbagan?

Deut. 18:10-12: “Awanto ti masarakan kenka uray maysa . . . a mangaramat iti panagpadpadles, maysa a managsalamangka wenno maysa a mammuyon wenno managanito, wenno maysa a managilabeg wenno mannakiuman kadagiti mangkukulam wenno maysa a mammadles wenno maysa a mannakiuman kadagiti natay. Ta siasinoman a mangaramid kadagitoy isu ti makarimon ken Jehova.” (Ti panagipadles isut’ panangibuksil kadagiti naitalimeng a pannakaammo wenno panagipadto kadagiti paspasamak, saan a maigapu iti panagsirarak, no di ket gaput’ panangiyulog kadagiti signo wenno gaput’ itutulong dagiti supernatural a bileg. Imparit ni Jehova dagita kadagiti adipenna. Apay? Amin dagitoy nga aramid ket pangawis iti pannakiuman wenno pannakalugan kadagiti narugit nga espiritu, wenno dagiti demonio. Ti iraraman iti kakasta a bambanag isut’ nakaro nga isusukir ken Jehova.)

Ara. 16:16-18: “Sinabatnakami ti maysa a balasang nga adda espirituna, maysa a demonio a mammadles. Adu ti it-itedna kadagiti appona a masapulanna iti panagpadpadlesna.” (Nabatad, asinoman a mangayat iti kinalinteg di makiuman iti kasta a gubuayan ti impormasion, serioso man ti gandatna wenno uray pagay-ayaman laeng. Idi a nauma ni Pablo iti panagik-ikkis ti balasang, binilinna a rummuar ti espiritu manipud kenkuana.)

Kabaelan kadi dagiti dakes nga espiritu ti agparang kas tao?

Idi panawen ni Noe, nagbalin a tao dagidi nasukir nga anghel. Aktual a nakiasawada ken nagputotda. (Gen. 6:1-4) Nupay kasta, idi a dimteng ti Layus, napilitan a nagsubli dagidi nga anghel idiay naespirituan a teritoria. Maipapan kadakuada, kuna ti Judas 6: “Dagidi anghel a saanda a tinaginayon daydi nakaikasigudanda a kasasaad no di ket pinanawanda daydi umiso a pagiananda inkabilna ida kadagiti agnanayon a pannakabalud iti yan ti nakaro a sipnget agingga iti panangukom ti naindaklan nga aldaw.” Saan laeng nga inikkat ti Dios ida kadagiti nailangitan a pribilehioda ken imbaludna ida iti nakaro a kinasipnget no maipapan kadagiti panggep ni Jehova, no di ket ti pannakaibaludda ipasimudaagna ti pannakatipedda. Manipud ania? Nabatad, tapno dida kabaelan ti agbagi a silalasag a makiasawa  kadagiti babbai, a kas inaramidda sakbay daydi Layus. Ireport ti Biblia a dagidi matalek nga anghel, a naibaon kas mensahero ti Dios, nagparangda a silalasag tapno mairingpasda ti annongda uray agingga idi immuna a siglo K.P. Ngem kalpasan daydi Layus, dagidi anghel a nangabuso kadagiti sagutda nailaksid kadakuada ti abilidad nga agparang a kas tao.

Ammuentay koma, nupay kasta, a dagiti demonio nabatad a kabaelanda a pakitaan ti tattao kadagiti sirmata, ket kasla agpayso ti makitkitada. Idi sinulisog ti Diablo ni Jesus, nabatad a kastat’ namuspusanna tapno maipakitana ken Jesus “dagiti isuamin a pagpagarian ti lubong ken ti dayagda.”—Mat. 4:8.

Kasano a maluk-atan ti maysa manipud impluensia dagiti espiritu?

Prov. 18:10: “Ti nagan ni Jehova nabileg a sarikedked. Ti nalinteg agkamang kenkuana ket maisalakan.” (Dina kaipapanan daytoy a ti panangusar iti personal a nagan ti Dios ket agserbi a kas anting-anting a mangpaksiat iti dakes. Ti “nagan” ni Jehova irepresentarna a mismo daydiay a Persona. Masalaknibantayo no isu ket ammuentayo ket agtalektayo a naan-anay kenkuana, no agtulnogtayo iti panangiturayna babaen ti panangipangagtayo iti bilbilinna. No kastoy ti aramidentayo, inton dumawattay ti tulong kenkuana, nga aramatentayo ti personal a naganna, itdenna ti pannalaknib nga inkarina idiay Saona.)

Mat. 6:9-13: “Dakayo, ngarud, agkararagkayo a kastoy: ‘ . . . Dinakam iyeg iti pannakasulisog, no di ket isalakannakami iti daydiay nadangkes.’” Agbalintay met a “managtalinaed iti panagkararag.” (Roma 12:12) (Ti Dios denggenna ti kasta a karkararag dagidiay agtarigagay nga umammo iti kinapudno ken agdayaw kenkuana iti wagas a pakaay-ayuanna.)

1 Cor. 10:21: “Saanyo a mabalin ti mairaman iti ‘panganan ni Jehova’ ken iti panganan dagiti sairo.” (Dagidiay agtarigagay iti pannakigayyem ken pannalaknib ni Jehova masapul a sinaanda ti amin nga espiritistiko a panaggigimong. Kas maitunos iti ulidan a nairekord idiay Aramid 19:19, nesesita met a dupraken wenno siuumiso nga iwaksi amin a bambanag nga ik-ikutan ti maysa a nainaig iti espiritismo.)

Sant. 4:7: “Paiturayankayo, ngarud, iti Dios; ngem makibakalkayo iti Diablo, ket isu agtalawto kadakayo.” (Tapno maaramidyo daytoy, gagetanyo nga adalen ti pagayatan ti Dios sayo ipakat dayta iti biagyo. Babaen ti panagayatyo iti Dios a  mangpabileg kadakayo a maibusor iti panagbuteng ti tao, sititibker nga idianyo ti iraraman kadagiti ugali a nainaig iti espiritismo wenno itutulok kadagiti ipaalagad ti espiritista.)

Masapul nga “ikawesyo ti amin a kabal a naggapu iti Dios” a kas nadeskribir idiay Efeso 6:10-18 ket regtaanyo a taginayonen a sibibileg amin dagita a kabal.