Apay a delikado unay no maaringantayo iti espiritu ti lubong?

1 Juan 5:19: “Ti isuamin a lubong adda iti babaen daydiay nadangkes.” (Ni Satanas ti nangpatanor iti espiritu a nangdominar iti pampanunot ken ti ar-aramid ti sangatauan a saan a naanamongan nga ad-adipen ni Jehova. Espiritu daytoy ti kinaagum  ken kinatangsit nga agraira unay gapuna nayasping iti angin nga ang-angsen ti tattao. Agannadtay unay koma di la ket ta tumuloktay iti pannakabalin ni Satanas babaen ti panangipalubostayo iti dayta nga espiritu a mangimpluensia iti kabibiagtayo.)

Apoc. 12:9: “Naigarangugong daydi dakkel a dragon, daydi uleg a kadaanan, nga isu ti managan ti Diablo ken Satanas, isu a mangallilaw iti isuamin a napagnaedan a daga; naitapuak itoy daga ket dagiti anghelna naitapuakda a naikanunong kenkuana.” (Nanipud pay pannakapasamak daytoy, idi a nayanak ti Pagarian idi 1914, kimmaro unay ti impluensia ni Satanas ken dagiti demoniona no iti sangatauan. Ti espirituna insungsongna ti tattao iti ar-aramid a nakaro a kinaagum ken kinaranggas. Dagidiay agtartarigagay nga agserbi ken Jehova isudat’ nangnangruna a mapilit a makipaset koma iti lubong, nga aramidenda koma ti ar-aramiden dagiti kaaduan ket idianda koma ti pudno a panagdaydayaw.)

Ania dagiti sumagmamano a kadawyan ti espiritu ti lubong nga isuda komat’ annadantayo?

1 Cor. 2:12: “Ita inawattayo, saan a ti espiritu ti lubong, no di ti espiritu a kukua ti Dios, tapno maammuantayo ti bambanag a naparaburan nga inted ti Dios kadatayo.” (No ti espiritu ti lubong rumamot iti pampanunot ken tartarigagay ti maysa a tao, ti bungana makitanton sigun iti tigtignayna a mangiparangarang iti dayta nga espiritu. No kasta, ti isisina manipud espiritu ti lubong kalikagumanna, saan laeng a ti panangliklik kadagiti di Nakristianuan nga ar-aramid ken panaglablabes, no di ket daydiay panangparot koma iti dayta babaen iti panangpatanor kadagiti kababalin a mangiparangarang iti espiritu ti Dios ken ti napudno a panagayat iti dandanana. Laglagipenyo koma daytoy bayat nga amirisenyo dagiti sumaganad a pannakaiparangarang ti espiritu ti lubong.)

Panangaramid iti kayat nga aramiden ti maysa, a dina ikabkabilangan ti pagayatan ti Dios

Indagadag ni Satanas ken Eva nga agdesidir a bukbukodna no ania ti naimbag ken dakes. (Gen. 3:3-5; kas panangidilig kitaenyo ti Proverbio 3:5, 6.) Dagiti adu a mangtultulad ken Eva dida ammo ti pagayatan ti Dios para iti sangatauan, ket dida met interesado a mangammo iti dayta. Basta “aramidenda daydiay kaykayatda,” kas kunada. Dagidiay makaammo kadagiti kalikagum ti Dios ket ikagumaanda ti tumunos dita, masapul nga agannadda di la ket ta ti espiritu ti lubong ituggodna ida a sipapakinakem a mangiwaksi iti pammalakad ti Sao ti Dios iti  daydiay mabalin a matmatanda a kas “bassit unay.”—Luc. 16:10; kitaenyo met ti “Panagwaywayas.”

Panagtignay a sitatangsit sigun kadagiti rumsua a situasion

Ni Satanas isut’ damo a nangipalubos a ti aglablabes a panangitan-okna iti bagina isut’ nangdadael iti pusona. (Idiligyo ti Ezequiel 28:17; Proverbio 16:5.) Ti kinatangsit isut’ puersa a mangbingaybingay iti lubong a pagturturayanna, nga isut’ panggapuan ti tattao a mangipapan iti bagbagida a nasaysayaat ngem dagiti dadduma a rasa, nasnasion, grupo ti pagsasao ken ekonomiko a kasasaad. Uray dagiti agserserbi iti Dios nalabit kasapulanda met a paruten ti kakasta a rikriknada. Masapul met nga agannadda di la ket ta ti kinatangsit ti mamagbalin a dadakkel a parikut kadagidiay babassit a bambanag, wenno tuben iti panangbigbigda iti bukodda a kamali ken panangawatda iti balakad ket iti kasta paglainganda koma ti adu a naayat a tulong nga ipapaay ni Jehova baeten iti organisasionna.—Roma 12:3; 1 Ped. 5:5.

Panangiparangarang iti kababalin a managalsa no kadagiti agturay

Ti yaalsa nangrugi ken Satanas, a ti naganna kaipapananna ti “Sumupsuppiat.” Gaput’ ibubusorna ken Jehova, ni Nimrod, a ti naganna kayatna a sawen “Umalsatayo,” indemostrana nga isu ket anak ni Satanas. Ti panangliklik iti dayta nga espiritu isunto ti mangtuben kadagidiay agbuteng iti Dios iti inda ibubusor kadagiti agturay ditoy lubong (Roma 13:1); isunto ti tumulong kadagiti ubbing nga agpasakop iti turay dagiti dadakkelda (Col. 3:20); isunto ti mangsaluad kadatayo a makisimpatia kadagiti apostata, isuda a di mangraem kadagidiay inikkan ni Jehova iti responsabilidad iti makitkita nga organisasionna.—Jud. 11; Heb. 13:17.

Sipepegges nga itutulok kadagiti tarigagay ti managbasol a lasag

Ti impluensia daytoy isut’ makitkita ken mangmangngeg uray sadino. Masapul ti naynay a panagannad iti daytoy. (1 Juan 2:16; Efe. 4:17, 19; Gal. 5:19-21) Ti panagpampanunot ken tartarigagay nga agturong kadagiti mas grabe pay a pannakaipalnaad daytoy mabalin a maiparangarang iti panagsasao ti maysa, dagiti panagang-angawna, dagiti liriko ti musika a dengdenggenna, ti kita ti panagsalsalana, wenno iti panagbuybuyana kadagidiay mangigunamgunam iti imoral a sekso. Daytoy a paset ti espiritu ti lubong agminar met iti panagabuso iti  droga, panagbarbartek, pannakikamalala, pannakiabig, ken ti homosexualidad. Agminar met dayta no ti maysa ket di nainkasuratan, nupay legal, nga idiborsiona ti asawana sa man mangalat’ sabali.—Mal. 2:16.

Panangipalubos iti biag ti maysa a dominaran ti tarigagay a tagikuaen dagidiay makitkitana

Kasta ti tarigagay a pinatanor ni Satanas ken Eva, a sinugsoganna nga agaramid ti banag a nangdadael iti relasionna iti Dios. (Gen. 3:6; 1 Juan 2:16) Sibibileg nga inlaksid ni Jesus ti kasta a sulisog. (Mat. 4:8-10) Dagidiay agtartarigagay a mangay-ayo ken Jehova masapul nga agannadda tapno dida palubosan ti komersial a lubong a mangpatanor iti kasta nga espiritu kadakuada. Adu a leddaang ken naespirituan a pannakarba ti ibungana kadagidiay pasiluan iti dayta.—Mat. 13:22; 1 Tim. 6:7-10.

Panangipasindayag kadagiti sanikua ken kadagiti naragpat ti maysa

Uray daytoy nga aramid “naggapu [met] iti lubong” ket masapul a pagpanawan dagidiay agbalin nga ad-adipen ti Dios. (1 Juan 2:16) Kinatangsit ti ramutna dayta ket, imbes a mapabileg ti kinanaespirituan dagiti sabali, maiparupa ketdi kadakuada dagiti material a pangar-arit ken dagiti sirmata ti nailubongan a raragpaten.—Roma 15:2.

Panangitulok iti emosion ti maysa nga agsao a sikakas-ang ken agtignay a siraranggas

Dagitoy isuda ti “ar-aramid ti lasag” a masapul a labanan dagiti adu a tattao. Buyogen ti napudno a pammati ken iti tulong ti espiritu ti Dios mabalinda a parmeken ti lubong imbes ketdi a palubosanda ti espirituna a mangdominar kadakuada.—Gal. 5:19, 20, 22, 23; Efe. 4:31; 1 Cor. 13:8-13; 1 Juan 5:4.

Dagiti kabaelan nga aramiden ti tao isut’ pangnamnamaan ken pagdandanagan ti maysa

Ti talaga a napateg iti maysa a linalasag a tao isu daydiay makitana ken maarikapna. Ti pangnamnamaanna ken pagdandanaganna naisentro iti karkari ken pammutbuteng ti sabali a tattao. Isu agpannuray kadagiti natauan nga agtuturay a tumulong kenkuana santo maupay no napaay dagita. (Sal. 146:3, 4; Isa. 8:12, 13) Kenkuana, daytoy lattan ti addan a biag. Dagiti pammutbuteng ni patay silalaka a mangadipen kenkuana. (Kas panangidilig, kitaenyo ti Mateo 10:28; Hebreo 2: 14, 15.) Ngem adda baro a puersa a mangtignay iti is-isip dagidiay makaam-ammo ken Jehova, a punnuenda ti is-isip ken puspusoda kadagiti karina, ken ammoda ti dumawat ti tulong kenkuana tunggal adda kasapulanda.—Efe. 4:23, 24; Sal. 46:1; 68:19.

Panangipaay iti tattao ken bambanag ti dayaw a kukua ti Dios

“Ti dios daytoy a sistema ti bambanag,” ni Satanas a Diablo, parparegtaenna amin a kita ti ar-aramid a mangiyaw-awan iti inted-Dios a pagannayasan tapno agdayaw. (2 Cor. 4:4) Adda dagiti agtuturay a naibilangda kas didiosen. (Ara. 12:21-23) Minilmilion dagiti agrukrukbab kadagiti idolo. Minilmilion pay dagidiay mangdaydayaw kadagiti artista ken dagiti nalaing a managay-ayam. Masansan nga adda rambak a pangdayaw kadagiti indibidual a tattao. Gagangay unay daytoy nga espiritu gapuna a dagidiay talaga a mangay-ayat ken Jehova ken agtarigagay a mangipaay kenkuana iti naipamaysa a debosion masapul nga annadanda ti impluensia dayta iti inaldaw.