Kunaenyo kadi, a kas kadagiti adu, nga awan sungbat dagiti kararagyo?

Makinkararag ti situtulok a denggen ti Dios?

Sal. 65:2; Ara. 10:34, 35: “O Managdengngeg iti kararag, kenka ti umayandanto dagiti amin a lasag.” “Ti Dios saan a mangidumduma, no di ket uray ania a nasion ti tao nga agbuteng ken agaramid ti kinalinteg makaay-ayo kenkuana.” (Ti pakipagilian ti maysa, ti kolor ti kudilna, ti kasasaad ti pagbiagna awan balbalena iti dayta. Ngem ti motibo ti puso ken wagas a panagbiag ti maysa isut’ nasken.)

Luc. 11:2: “No agkararagkayo, kunayo, ‘Ama, madaydayaw koma ti naganmo.’” (Naiturong aya iti Ama dagiti kararagyo, daydiay a Jehova ti kunaen ti Biblia a naganna? Wenno, imbes ketdi, “sasanto” aya ti pagkarkararaganyo?)

Juan 14:6, 14: “Ni Jesus kunana kenkuana: ‘Siak ti dalan ken ti kinapudno ken ti biag. Awan ti umay ken Ama no di magna kaniak. No adda aniaman a dawatenyonto iti naganko, dayta ti aramidekto.’” (Agkarkararagkayo met laeng iti nagan ni Jesu-Kristo, a bigbigenyo a bilang managbasolkayo ket masapul ti panangibabaetna kadakayo?)

1 Juan 5:14: “Daytoy ti adda kadatayo a panagtalek kenkuana, a no adda aniaman a dawatentayo a mayannurot iti pagayatanna, isu denggennatayo.” (Tapno maaddaankayo iti kasta a panagtalek, nupay kasta, masapul nga ammuenyo pay nga umuna ti pagayatan ti Dios. Sayonto siguraduen a dagiti dawatyo ket maitunos iti dayta.)

1 Ped. 3:12: “Dagiti mata ni Jehova sikikitada kadagiti nalinteg, ket dagiti pagdengngegna sititimudda kadagiti ararawda; ngem ti rupa ni Jehova ket maibusor kadagiti agaramid iti dakes.” (Inasikasoyo met laengen aya ti mangadal iti sasawen ni Jehova baeten iti Saona no ania ti nalinteg ken no ania ti dakes?)

1 Juan 3:22: “Isuamin a dawatentayo awatentayo kenkuana, ta salsalimetmetantayo ti bilbilinna ket ar-aramidentayo ti  bambanag a makaay-ayo kadagiti matana.” (Talaga kadi a tartarigagayanyo nga ay-aywen ti Dios, ket sipipingetkayo aya a mangtungpal kadagidiay bilinna a datin nga ammoyo?)

Isa. 55:6, 7: “Sapulenyo ni Jehova, dakayo nga umili, ita ta masarakan pay. Umawagkayo kenkuana ita ta asideg pay. Ti managdakdakes bay-anna koma ti dalanna, ken ti tao a saan a nalinteg ti pampanunotna; ket agsubli koma ken ni Jehova, ket isu kaasiannanto, ken iti Diostayo, ta isu pakawanennanto iti nawadwad.” (Gapu iti asina, aw-awisen ni Jehova uray dagidiay nagaramid kadagiti dakes tapno agkararagda koma kenkuana. Ngem, tapno anamongan ti Dios ida, masapul a sipapasnekda a pagbabawian dagiti dakes a dalan ken pampanunotda ket baliwandan ti turongenda.)

Aniat’ gapuna a di awaten ti Dios ti karkararag ti maysa a tao?

Mat. 6:5: “Intono agkararagkayo, saankay a kas kadagiti managinsisingpet; ta isuda ayatenda ti agkararag a sitatakder kadagiti sinagoga ken kadagiti pagsulian ti nalawa a daldalan tapno makita dagiti tattao. Pudno kunak kadakayo, Inawatda a naan-anay ti gunggonadan.” (Kasta met ti Lucas 18:9-14)

Mat. 6:7: “Iti panagkararagyo, dikay ulit-uliten ti isu met la nga isu a banag, a kas ti aramiden dagiti umili iti nasnasion, a panunotenda a maipangagdanto gapu kadagiti adu a sasaoda.”

Prov. 28:9: “Ti di mangyallingag iti lapayagna iti panangdengngegna iti linteg [ti Dios]—uray pay ti kararagna makarimon.”

Mic. 3:4: “Iti dayta a panawen umawagdanto ken Jehova, ngem saannanto a sungbatan ida. Ilingednanto ti rupana kadakuada iti dayta a panawen, a kas mayanatup iti panagaramidda iti dakes kadagiti gapuananda.”

Sant. 4:3: “Agdawatkayo, ket kaskasdi a dikay umawat, ta saan a nasayaat ti panggepyo nga agdawat, ta raritenyo kadagiti tarigagayyo a maipaay iti dinederrep a ragsak.”

Isa. 42:8, Dy; Mat. 4:10, JB: “Siak ti Apo [“Yahweh,” JB; “Jehova,” NW]: dayta ti naganko. Ti dayagko diakto ited iti sabali, ket diak met ited ti dayawko iti kinitikitan a ladladawan.” “Agdaydayawka iti Apo a Diosmo [“Jehova a Diosmo,” NW], ket isu ti pagserbiamto laeng.” (Kasta met ti Salmo 115:4-8, wenno 113:4-8 maikadua a grupo dagiti numero idiay Dy) (Ti kararag maysa a porma ti panagdayaw. No agkararagkayo iti sanguanan dagiti kinitikitan a ladawan, wenno dagiti imahen, makaay-ayonto kadi dayta iti Dios?)

 Isa. 8:19: “Intono sawenda kadakayo nga umili: ‘Umumankayo kadagiti baglan wenno kadagiti mammuyon nga agarasaas ken agtanabutob,’ saan aya a rebbeng koma dagiti umili nga umumanda iti Diosda? Gapu kadagiti sibibiag umumanda aya kadagiti natay?”

Sant. 1:6, 7: “Agdawat koma a babaen ti pammati, nga awan ket ti panagduadua, ta ti managduadua umasping iti maysa a dalluyon ti baybay nga iduron ti angin ken agpallayog. Kinapudnona, saan koma a panunoten daydiay a tao nga addanto aniaman nga awatenna ken Jehova.”

Aniada a bambanag ti maitutop nga ikararag?

Mat. 6:9-13: “Dakayo, ngarud, agkararagkayo a kastoy: ‘[1] Amami nga adda iti langlangit, madaydayaw koma ti naganmo. [2] Umay koma ti pagariam. [3] Maaramid koma ti pagayatam, kas sadi langit, kasta met ditoy daga. [4] Itedmo kadakam ita ti taraonmi itoy nga aldaw; ket [5] pakawanennakami iti ut-utangmi, a kas met panamakawanmi kadagiti nakautang kadakami. Ket [6] dinakam iyeg iti pannakasulisog, no di ket isalakannakami iti daydiay nadangkes.’” (Paliiwenyo ta maipangpangruna ti nagan ti Dios ken ti panggepna.)

Sal. 25:4, 5: “Iparangmo kaniak ti daldalanmo, O Jehova; isurom kaniak ti dandanam. Iturongnak iti kinapudnom ket isuronak, ta sika ti Dios ti pannakaisalakanko.”

Luc. 11:13: “No dakayo, idinto a dakeskayo, ammoyo ti mangted iti nasayaat a sagsagut kadagiti annakyo, dinto aya nangnangruna ni Amayo a nailangitan a mangtedto ti nasantuan nga espiritu kadagiti agdawat kenkuana!”

1 Tes. 5:17, 18: “Agkararagkayo a di agressat. Mainaig iti isuamin a bambanag agyamankayo.”

Mat. 14:19, 20: “[Ni Jesus] innalana dagiti lima a tinapay ken dagiti dua nga ikan, ket, intangadna dagiti matana iti langit, binendisionanna ket, pinispisina dagiti tinapay, ket intedna kadagiti adalanna, ket dagiti adalanna intedda kadagiti umariwekwek. Ket nanganda amin ket nabsogda.”

Sant. 5:16: “Ikararagyo ti maysa ken maysa.”

Mat. 26:41: “Agpuyatkayo ken agkararagkayo a naynay, tapno dikay sumrek iti pannakasulisog.”

Fil. 4:6: “Dikay madanagan iti uray ania, no di ket kadagiti isuamin, maipakaammo koma ti dawdawatyo iti Dios gapu iti kararag ken araraw ken panagyaman.”

‘Makipagkararagka nga umuna kaniak, samonto ilawlawag ta mensahem’

Kunaenyo: ‘Maragsakanak a makaammo a dakayo apresiarenyo ti kinapateg ti kararag. Regular met nga agkarkararag dagiti Saksi ni Jehova. Ngem adda imbaga ni Jesus maipapan iti tiempo ken wagas a panagkararag a mabalin a kabbaro kadakayo. Ammoyo kadi a kinunana kadagiti adalanna a dida agkararag iti publiko ket makita dagiti adu sadanto kunaen a debosionadoda, a tattao a managkararag? . . . (Mat. 6:5)’ Sayonto inayon: ‘Paliiwenyo no aniat’ nangnangruna a pakaseknantayo ken no aniat’ yun-unatayo no agkararagtayo. Isu dayta ti umayko koma ilawlawag kadakayo. (Mat. 6:9, 10)’

Wenno: ‘Ammok a dagiti pannakabagi dagiti dadduma a relihion ar-aramidenda ti kasta. Ngem saan no kadagiti Saksi ni Jehova, ngamin ta binilin ni Jesus dagiti adalanna nga ileppasda ti panangasabada ngem iti sabali a wagas. Imbes a kinunana, “No sumrekkayo iti balay, umuna agkararagkayo,” paliiwenyo ti kinunana, sigun ditoy Mateo 10:12, 13. . . . Ket kitaenyo ditoy bersikulo 7 no ania ti masapul a pagsasaritaanda. . . . Kasano a matulongan dayta a Pagarian ti tattao a kas kaniak ken kadakayo? (Apoc. 21:4)’