Apay a nakaro unay ti kinadakes?

Saan a basol ti Dios dayta. Intedna iti tao ti perpekto a pangrugian, ngem di inkankano ti tattao dagiti alagaden ti Dios ket isudat’ nangikeddeng no aniat’ naimbag ken dakes. (Deut. 32:4, 5; Ecl. 7:29; Gen. 3:5, 6) Gapu itoy nagpaiturayda iti impluensia dagiti nadangkes a puersa a nabilbileg ngem tao.—Efe. 6:11, 12.

1 Juan 5:19: “Ti isuamin a lubong adda iti babaen daydiay nadangkes.”

Apoc. 12:7-12: “Adda gubat idi sadi langit . . . daydi dragon ken dagiti anghelna nakikabilda ngem dida nangabak, ket di met masarakan daydi dissoda sadi langit. Ket naigarangugong daydi dakkel a dragon, daydi uleg a kadaanan, nga isu ti managan Diablo ken Satanas, isu a mangallilaw iti isuamin a napagnaedan a daga, naitapuak ditoy daga, ket dagidi anghelna naitapuakda a naikanunong kenkuana. . . . ‘Gapuna agrag-okayo, dakayo a langlangit ken dakayo nga agnaed kadakuada! Asikayo pay daga ken baybay, ta ti Diablo immulog kadakayo nga addaan dakkel a pungtot, nga ammona a bassiten ti tiempona.’” (Daytoy kimmaro a rigat ti lubong napasamak nanipud iti pannakaitapuak ni Satanas manipud langit kalpasan ti pannakaipasngay ti Pagarian. Kitaenyo ti bersikulo 10.)

  2 Tim. 3:1-5: “Ammuem daytoy a kadagiti maudi nga aldaw umaydanto dagiti napeggad a panawen a narigat a pakilangenan. Ta dagiti tattao agayatdanto iti bagbagida, managayatda iti pirak, managpasindayaw, napalangguad, managtabbaaw, nasukir kadagiti dadakkelda, awan panagyamanda, saanda a nasungdo, awananda iti ayat a nakayanakan, narigatda a katultulag, manangpardaya, awan panagteppelda, nauyongda, awan ayatda iti naimbag, mangliliput, nasubeg, natangsit, managayat iti ragragsak a nangnangruna ngem iti panagayatda iti Dios, addaanda ti langa ti nadiosan a debosion ngem libakenda ti pannakabalin dayta.” (Daytoy ti bunga ti sinigsiglo a panagapostasia manipud pudno a panagdaydayaw. Timmanor dagitoy a kasasaad yantangay dagidiay agkunkuna a relihiosoda ket dida inkankano ti talaga a sasawen ti Sao ti Dios. Inlibakda ti pannakabalin a maipaay iti kinaimbag a patanoren koma ti pudpudno a nadiosan a debosion no iti biag ti maysa.)

  Apay nga ipalubos ti Dios dayta?

 No dadduma agparang kadatayo a ti kasayaatan a maaramid isu koma daydiay pannakaikisap dagiti amin a managdakdakes. Il-iliwentayo ti panagngudo ti kinadakes, ngem kaskasdi a sumagmamano la a tawen a napasarantayo dayta no maidilig iti kinabayagen ti kinadakes. Kasano ngata ti panagrikna ni Jehova a Dios? Iti rinibribo a tawen isu ket pinabasol ti tattao, inlunodda pay gapu kadagiti dakes a kasasaad nga inibturanda. Ngem saan nga isu ti namartuat kadagitoy, no di ket ni Satanas ken ti tattao a nadangkes. Ni Jehova kabaelanna a dadaelen dagiti nadangkes. Sigurado nga addada naimbag a rason no apay isu ket nagtepteppel. No ti wagas a panangtaming ni Jehova iti dayta a situasion ket naiduma iti daydiay wagastayo, masdaawtayo aya? Nawadwadwad ti kapadasanna ngem iti tao, ket nalawlawa ti panangmatmatna iti situasion ngem iti asinoman a tao.—Idiligyo ti Isaias 55:8, 9; Ezequiel 33:17.

Awan koma ti kinadakes no di inikkan ti Dios dagiti intelihente a parsuana iti siwayawaya a nakem. Ngem ti Dios inikkannatayo iti kapasidad nga agpili nga agtulnog kenkuana gapu ta isu ket ay-ayatentayo wenno agsukirtayo. (Deut. 30:19, 20; Jos. 24:15) Kaykayattay koma kadi no saan a kasta? No datayo ket nagannak, naragragsaktay kadi no agtulnog dagiti annaktayo gapu ta ay-ayatendatayo wenno gapu ta pilitentay ida nga agtulnog? Pinilit koma aya ti Dios ni Adan a nagtulnog? Talaga kadi a naragragsaktayo no agbibiagtayo iti lubong  nga inkapilitan nga agtulnogtayo iti Dios? Sakbay a dadaelen ti Dios daytoy dakes a sistema, it-itdenna ti gundaway iti tattao nga ipakitada no talaga met laeng a kayatda ti makitunos iti nalinteg a bilbilinna wenno saan. Inton dumteng ti naituding a tiempona, sigurado a dadaelennanton dagiti nadangkes.—2 Tes. 1:9, 10.

Nainsiriban nga impalubosna ti panawen tapno marisut dagiti nasken nga isyu: (1) Ti kinalinteg ken kinaumiso ti panangituray ni Jehova isut’ nakuestionaran idiay Eden. (Gen. 2:16, 17; 3:1-5) (2) Nakuestionaran ti kinatarnaw dagiti amin nga adipen ti Dios idiay langit ken ditoy daga. (Job 1:6-11; 2:1-5; Luc. 22:31) Mabalin koma a dagdagus a dinadael ti Dios dagidi rebelde (da Satanas, Adan, ken Eva), ngem dina koma rinisut ti parikut dayta. Ti kinamaingel saan nga isut’ mamagbalin a nalinteg iti gandat ti maysa. Dagiti isyu a napartuat ket moralda nga isyu. Ti panangipalubos ti Dios iti panawen, saan a tapno paneknekanna ti aniaman a punto iti bagina, no di ket tapno palugodanna amin a parparsua nga addaan siwayawaya a nakem a makitada ti dakes a bunga a pinataud ti yaalsa iti kinaturay ti Dios, kasta met a nangipaay iti oportunidad tapno iparangda no adino a personal ti dasiganda no kadagitoy napateg a kuestion. Inton marisuten dagitoy nga isyu, saanton a pulos a mapalubosan ti siasinoman a mangriribuk iti kinatalna. Ti nasayaat nga urnos, ti kinatunos ken ti paglaingan ti intero nga uniberso agpannuray iti pannakasantipikar ti nagan ni Jehova, ti naimpusuan a panangdayaw kenkuana dagiti amin nga intelihente a parsua. (Kitaenyo met ti panid 389, 390, iti paulo a “Satanas a Diablo.”)

Pangarigan: No adda tao a nangpadakes kadakayo iti imatang ti intero a pagilian a dakayo inabusoyo ti saadyo kas ulo ti pamilia, a dagiti annakyo naim-imbagda koma no makapagdesisionda a bukbukodda, ket amin kano nga annakyo ket agtultulnogda kadakayo, saan a gapu ta ay-ayatendakayo, no di ket gapu kadagiti ipapaayyo a namaterialan a bambanag kadakuada, aniat’ kasayaatan a wagas a pangrisut iti dayta a parikut? No paltoganyo dayta a mamadpadakes marisut ngatan ti problema iti is-isip dagiti umili? Imbes ketdi, anian a nagsayaat a pangsungbat koma no pinalubosanyo dagiti annakyo nga agbalin a saksiyo tapno ipaneknekda a dakayo ket nalinteg ken naayat nga ulo ti pamilia ken ipakitada a makikabkabbalayda kadakayo gaput’ panagayatda kadakayo! No adda man sumagmamano kadagiti annakyo ti mamati iti dayta a kabusoryo, ket panawanda ti balayyo ket dadaelenda ti kabibiagda gaput’ panangtuladda  ti sabali a kabibiag, ad-addanto a daytat’ pakabigbigan dagiti nasingpet a managpaliiw a dagiti annakyo nasaysayaat komat’ kasasaadda no inkankanoda ti panangidalanyo.

Adda kadi ti nagimbaganna kadatayo ti panangipalubos ti Dios iti kinadakes agingga iti agdama a panawen?

2 Ped. 3:9: “Ni Jehova saan a namayamay a maipapan iti karina, kas iti panangibilang dagiti dadduma iti kinabayag, no di ket agur-uray a siaanus gapu kadatayo a dina kayat a mapukaw iti uray siasino no di ket agturongda koma amin iti panagbabawi.” (Yantangay ti kinaanusna ket binennatna agingga iti kaaldawantayo, addaantayo iti gundaway a mangipakita a datayo ket nagbabawitayo ket, imbes a datayo ti mangeddeng ti naimbag ken dakes, kayattayo ti agpannuray iti nalinteg a panangituray ni Jehova.)

Roma 9:14-24: “Ania, ngarud, ti sawentayo? Adda aya kinakillo iti biang ti Dios? Ni kaanoman! . . . No ti Dios, idinto a kayatna nga ipakita ti pungtotna ken ipakaammo ti pannakabalinna, ituredna a buyogen ti nabayag a panagitured dagiti basihas ti pungtot a maipaay a pakapukawan [kayatna a sawen, impalubosna ti kaadda dagiti managdakdakkes a tattao iti naunday a panawen], tapno ipakaammona met dagiti kinabaknang ti dayagna kadagiti basihas ti asi, nga insaganana idi a maipaay iti dayag [kayatna a sawen, aramatenna dayta a tiempo a mangipaay ti asi kadagidiay kaasianna a maitunos iti panggepna], kadatayo, nga inayabanna met, saan laeng a kadagiti Judio no di ket kadagiti pay nasion, ania ngay?” (No kasta intantan ti Dios ti pannakadadael dagiti nadangkes tapno mapalubosan ti tiempo a panangpilina kadagiti tattao nga ipadayagna a kadua ni Kristo kas kameng ti nailangitan a Pagarian. Ti panangaramid ti Dios iti kasta nakasauran kadi ti siasinoman? Saan; paset ti urnos ni Jehova dayta a pakabendisionan dagiti amin a kita ti tattao a maparaburanto iti gundaway nga agbiag nga agnanayon iti paraiso a daga. Idiligyo ti Salmo 37:10, 11.)

‘Apay nga ipalpalubos ti Dios ti kasta a kinadakes?’

Kunaenyo: ‘Nagsayaat ti saludsodyo. Adu a matalek nga  adipen ti Dios ti mariribukan gaput’ kinadakes a nanglikmut kadakuada. (Hab. 1:3, 13)’ Sayonto inayon: (1) ‘Saan a gapu ta indiperente ti Dios. Impasiguradona kadatayo nga adda inkeddengna a panawen a panangsingirnanto kadagiti nadangkes. (Hab. 2:3)’ (2) ‘Ngem aniat’ makalikaguman kadatayo tapno maisalakantayto inton dumteng dayta a tiempo? (Hab. 2:4b; Sof. 2:3)’

Wenno: ‘Maragsakanak ta insaludsodyo dayta. Adu a nasingpet pusona a tattao ti mariribukan gapu iti dayta. Addaanak kadagiti makatulong nga impormasion a mangsungbat iti saludsodyo. (Sayonto basaen a dua ti impormasion idiay  panid 90-92.)

‘Gapu ta nabayagen, diak la mamati a baliwan pay ti Dios ti agdama a kasasaad’

Kunaenyo: ‘Maragsakanak man ta mamatikayo iti Dios. Talaga a nagadu ti kinadakes, ket nabayagen a kasta. Ngem inamirisyo kadin daytoy . . . ? (Usarenyo ti impormasion idiay  parapo 1 idiay panid 340, maipapan ti kabayag ti tiempo a panangibtur ti Dios iti dayta.)’

Wenno: ‘Sigurado nga umanamongkayo kaniak no kunaek nga asinoman a makabael a mamangon iti balay talaga a kabaelanna met a dalusan dayta. . . . Yantangay pinarsua ti Dios daytoy daga, saan a narigat kenkuana a dalusan dayta. Apay a naunday unay a panawen ti impalubosna? Natakuatak a makapnek unay daytoy a sungbat. Mabalinyo nga ibaga ti kapanunotanyo. (Sayonto basaen a dua ti material idiay  panid 90-92.)’