Madadaelto aya ti lubong babaen iti apuy?

2 Ped. 3:7: “Gapu iti daydi met la a sao [ti Dios] ti langlangit ita ken ti daga naidulinda a maipaay iti apuy a maaywananda nga agingga iti aldaw ti pannakaukom ken ti pannakapukaw dagiti tattao a nadangkes.” (Paliiwenyo ta “dagiti tattao a nadangkes,” saan ket nga interamente a ti sangatauan, ti madadael. Kasta met, a ti bersikulo 6 nadakamatna ti pannakadadael daydi “lubong” idi aldaw ni Noe. Nadadael idi dagiti managdakdakes a tattao, ngem ti daga agraman managbuteng iti Dios a ni Noe ken ti sangakabbalayanna ket nagtalinaedda. Literalto kadi ti “apuy” inton umay ti aldaw a panangukom, wenno simbolo dayta ti naan-anay a pannakadadael? Anianto aya ti epekto ti literal nga apuy kadagidiay literal a nailangitan a parparsua a kas iti datin a nakabarbara nga init ken bitbituen? Para kadagiti ad-adu pay a salaysay maipapan kadagitoy a texto, kitaenyo ti panid 99, 100, iti paulo a “Daga.”)

Prov. 2:21, 22: “Dagiti nalinteg agtalinaeddanto ditoy daga, ket dagiti napnuan imbag agtaengdanto kenkuana. Ngem dagiti nadangkes, magudasdanto ditoy daga; ket dagiti nagulib, maparutdanto kenkuana.”

Asinot’ mangiturturay iti lubong—ti Dios wenno ni Satanas?

Dan. 4:35: “[Ti Kangatuan a Dios, ni Jehova] aramidenna kas pagayatanna iti buyot ti langlangit ken kadagiti agnaed iti daga. Ket awan ti manglapped iti imana wenno agkuna kenkuana, ‘Ania ti inar-aramidmo?’” (Umarngi dita, ti Jeremias 10:6, 7 tinukoyna ni Jehova a kas “Ari ti nasnasion” ngamin ta isu ti Katan-okan nga Ari, daydiay makabael ken mangsingirto kadagiti natauan nga ar-ari ken iti nasnasion nga inturturayanda. Bilang isu ti Namarsua iti daga, ni Jehova isut’ nainkalintegan  a Mangituray iti dayta; dina pulos inlusulos dayta a saad.)

Juan 14:30: “[Kinuna ni Jesus:] Umay ti agturay iti lubong. Ket awan ti kukuana kaniak.” (Nabatad a daytoy nga agturay saan a ni Jehova a Dios, a ti pagayatanna kanayon a sisusungdo nga ar-aramiden ni Jesus. Daytoy nga “agturay iti lubong” masapul nga isu “daydiay nadangkes,” ni Satanas a Diablo, a “ti isuamin a lubong adda” iti babaenna, kas nasao idiay 1 Juan 5:19. Nupay ti sangatauan ket agtataeng iti planeta a kukua ti Dios, ti lubong a buklen dagidiay saan a natulnog nga ad-adipen ni Jehova ket adda iti sidong ti panangtengngel ni Satanas yantangay agtultulnogda kenkuana. Dagidiay naimpusuan nga agpaspasakup iti turay ni Jehova saanda a paset dayta a lubong. Idiligyo ti 2 Corinto 4:4.)

Apoc. 13:2: “Daydi dragon [ni Satanas a Diablo] intedna iti animal ti pannakabalinna ken ti tronona ken dakkel a kinaturay.” (No idilig ti pannakadeskribir iti daytoy nga “animal” iti adda idiay Daniel 7 ipasimudaagna nga irepresentar dayta ti natauan a gobierno, saan la a maymaysa a kasta no di ket ti sangalubongan a napolitikaan a turay. Ti kinapudno a ni Satanas isut’ mangituray iti dayta isut’ maitunos iti Lucas 4:5-7, kasta met iti Apocalipsis 16:14, 16, nga iladawanna dagiti dinedemonio nga ebkas a kas mangiturturong kadagiti agtuturay iti intero a daga a makigubat iti Dios inton Armagedon. Ti panangituray ni Satanas iti lubong isut’ palpalugodan laeng ti Dios agingga a dumteng ti naituding a tiempo ti Dios a mangrisut iti isyu ti sapasap a kinasoberano.)

Apoc. 11:15: “Simmaruno ti dadakkel a timek idiay langit, a kunkunada: ‘Ti pagarian ti lubong nagbalin a kukua ni Apotayo [a Jehova] ken ni Kristona.’” (Idi napasamak daytoy idi 1914, nangrugin ti “maudi nga al-aldaw” ti agdama a dakes a sistema. Nagparang ti baro a pannakaiparangarang ti kinasoberano ni Jehova, iti daydi a tiempo baeten ti mismo nga Anakna kas Mesianiko nga Agturay. Din agbayag madadaelen ti nadangkes a lubong ket ni Satanas, a nadangkes nga espiritu a mangiturturay kenkuana, maibaludto iti mangliwengliweng nga abut, a dinan kabaelan nga impluensiaan ti sangatauan.)

Aniat’ panangmatmat dagiti pudno a Kristiano iti daytoy lubong ken kadagiti tattao a paset ti lubong?

Juan 15:19: “Dakayo [a pasurot ni Jesus] saankay a paset  ti lubong, no di ket pinilikayo iti lubong.” (No kasta dagiti pudno a Kristiano saanda a paset ti grupo ti natauan a sosiedad a naisina iti Dios. Tamingenda dagiti normal a natauan nga ar-aramid, ngem liklikanda dagiti kababalin, panagsasao ken ug-ugali toy lubong ken maisupadi kadagiti nalinteg a dana ni Jehova.) (Kitaenyo ti panid 249-255, kasta met ti 143-147.)

Sant. 4:4: “Makikamkamalala a babbai, dikay ammo aya a ti pannakigayyem iti lubong isu ti pannakibusor iti Dios? Daydiay, ngarud, agtarigagayto a gayyem ti lubong agbalin a kabusor ti Dios.” (Yantangay imperpekto dagiti Kristiano mabalin a mamulitanda no dadduma gaput’ pannakidinnada iti lubong. Ngem no balakadan ida ti Sao ti Dios, agbabawida ken korihirenda ti dandanada. Ngem, no adda man, gaput’ sipapakinakem a pangngeddengda, makitiponda iti lubong wenno tuladenda ti espirituna, ipakpakitada a saandan a pudpudno a Kristiano no di ket nagbalinda a paset ti lubong a bumusbusor iti Dios.)

Roma 13:1: “Paiturayan koma amin a kararua iti turturay a nangatngato, ta awan ti turay a saan nga agtaud iti Dios; dagiti agdama a turturay agtakderda kadagiti limitado a saadda babaen ti Dios.” (Dagidiay mangipangag itoy a balakad saanda a rebelde, a kasla ikagumaanda a ripuogen dagiti gobierno toy lubong. Agpasakopda iti autoridad dagiti napolitikaan a turturay, nga agtulnogda kadagita mientras ti bilbilin dagita nga agtuturay ket di maisungani kadagiti bilin ti Dios. Impakpakauna ken impadto ti Dios ti itataud dagita a gobierno. Agturayda, saan a gapu ta inted ti Dios ti pannakabalin kadakuada, no di ket gaput’ pammalubosna. Inton dumteng ti tiempona ikkatennanto met la ida.)

Gal. 6:10: “No maaddaantayo iti gundaway, aramidentayo ti naimbag kadagiti isuamin, ngem nangnangruna kadagidiay kapammatiantayo.” (No kasta, dagiti pudno a Kristiano dida medmedan ti agaramid iti naimbag kadagiti padada a tattao. Tuladenda ti Dios, a pataudenna ti init nga agpadpada para kadagiti nadangkes ken kadagiti naimbag.—Mat. 5:43-48.)

Mat. 5:14-16: “Dakayo ti silaw ti lubong. . . . Pagsilnagenyo ti silawyo iti sanguanan ti tattao, tapno makitada dagiti naimbag nga aramidyo ket dayawenda koma ni Amayo nga adda sadi langit.” (Tapno dagiti sabali ket idaydayawda ti Dios gapu iti aramid dagiti Kristiano, nabatad a masapul nga aktiboda a mangsaksi iti lubong no maipapan iti nagan ken panggep ti  Dios. Isu daytoy a trabaho ti ipangpangruna dagiti pudno a Kristiano.)

Aniat’ kayulogan dagiti agdama a kasasaad toy lubong?

Kitaenyo ti paulo a “Maudi nga Al-aldaw.”