Aniada a padto ti nairekord iti Biblia a natungpalen?

Ti sumagmamano a pangarigan isudat’ mabasa kadagiti paulo a “Biblia,” “Dagiti Maudi nga Aldaw,” ken “Dagiti Petsa,” ken kasta met ti libro nga “All Scripture Is Inspired of God and Beneficial,” pp. 343-346.

Ania dagiti sumagmamano a karkarna a padto ti Biblia a di pay natungpal?

1 Tes. 5:3: “Intono sasawenda: ‘Talna ken talged!’ isunto metten ti iyaayna kadakuada ti kellaat a pannakadadael kas iti panagpasikal a mapasamak ti masikog; ket didanto makalisi.”

Apoc. 17:16: “Dagiti sangapulo a sara a nakitam, ken ti atap nga animal, guraendanto ti balangkantis [Babilonia a Dakkel] ket pagwalangwalangendanto a lamolamo, ket sidaendanto ti lasagna ket puorandanto a naan-anay iti apuy.”

Ezeq. 38:14-19: “Kunam ken Gog, ‘Kastoy ti kuna ti Soberano nga Apo Jehova: “Iti dayta nga aldaw intono ti ilik [a naespirituan] nga Israel agnaed a sitatalged dikanto aya maammuan? Ket umaykanto manipud iti dissom, a rummuar kadagiti kaadaywan a paspaset iti amianan, sika ken adu nga il-ili a maikuyog kenka . . .” “Ket mapasamakto iti dayta nga aldaw, intono ni Gog umayto a maibusor iti daga ti Israel,” kuna ti Soberano nga Apo Jehova, “a ti pungtotko sumgedto. Ket iti imunko, iti apuy ti pungtotko, agsaoakto.”’”

Dan. 2:44: “[Ti impasdek ti Dios] a pagarian . . . burakennanto ken ibusennanto amin dagitoy a [natauan a] pagpagarian, ket isu agtalinaedto agingga iti panawen a di nakedngan.”

Ezeq. 38:23: “Talaga a padayagekto ti bagik met laeng ket pasantuekto ti bagik met laeng ket agpakaammoakto iti imatang ti adu a nasnasion; ket maammuandanto a siak ni Jehova.”

Apoc. 20:1-3: “Nakitak ti maysa nga anghel a bumaba nanipud langit nga adda kenkuana daydi tulbek ti mangliwengliweng nga abut ken ti maysa a dakkel a kawar iti imana. Ket tiniliwna daydi dragon, daydi uleg a kadaanan, nga isu ti Diablo ken Satanas, ket pinarautanna iti bayat ti sangaribo a tawen. Ket isu inggarangugongna iti abut a mangliwengliweng ket inrikepanna ken sinelioanna, tapno dina allilawenen ti nasnasion agingga iti naturpos dagiti sangaribo a tawen. Inton maturpos dagitoy masapul a maluk-atan iti bassit a kanito.”

 Juan 5:28, 29: “Dikay pagsiddaawan daytoy, ta umay ti oras a dagiti amin nga adda kadagiti tanem a pakalaglagipan mangngegdanto ti timekna ket rummuardanto, dagiti nagaramid ti naimbag iti panagungar ti biag, dagiti nagaramid ti dakes iti panagungar ti pannakaukom.”

Apoc. 21:3, 4: “Nangngegko ti maysa a dakkel a timek a naggapu iti trono nga agkunkuna: ‘Adtoy! Ti tabernakulo ti Dios adda iti sangatauan, ket isu makipagnaedto kadakuada, ket isudanto dagiti tattaona. Ket ti Dios met laeng addanto kadakuada. Ket punasennanto ti amin a lulua kadagiti matada, ket awanton ni patay, ket awanto metten ti sasaibbek wenno sangsangit wenno rigrigat. Dagidi immuna a bambanag napalabasdan.’”

1 Cor. 15:24-28: “Kalpasanna, umay ti panungpalan, intono iyawatna ti pagarian iti Dios ken Ama . . . Intono dagiti isuamin a banag paiturayandan kenkuana, no kasta uray ti Anak met laeng paiturayanton iti Daydiay nangikabil iti babaen ti panagturayna kadagiti isuamin a banag, tapno ti Dios isu koma amin kadagiti isuamin.”

Apay a dagiti Kristiano interesadoda koma unay kadagiti pammadto ti Biblia?

Mat. 24:42: “Agsalukagkayo, ngarud, ta dikay ammo no ania nga aldaw ti iyaayto ti Apoyo.”

2 Ped. 1:19-21: “Naaddaankami ti natibtibker a sao ti padto [kas imbanag ti pannakapasamak ti panagbalbaliw ti langa idi ni Jesus]; ket nasayaat ti aramidenyo no addakay a siimdeng kenkuana . . . Ta uray kaanoman awan ti padto a naggapu iti nakem ti tao, no di ket ti tattao a pinaltiingan ti nasantuan nga espiritu nagsaoda iti biang ti Dios.”

Prov. 4:18: “Ti dana dagidiay nalinteg kas iti naraniag a lawag a rumaniag a rumaniag agingga iti napaypayso nga aldaw.”

Mat. 4:4: “Saan laeng a ti tinapay ti pagbiagto ti tao, no di ket ti isuamin a sao a rummuar iti ngiwat ni Jehova.” (Ramanen dayta dagiti engrande a propetiko a karina.)

2 Tim. 3:16: “Amin a Kasuratan impaltiing ti Dios ket naimbag a pakasursuruan, pakababalawan, pakatinggaran, pakaadalan iti kinalinteg.” (Ti intero ngarud a naisurat a Sao ti Dios maiparbeng nga adalentayo a siinget.)

‘Napalalo unay ti panangigunamgunamyo iti padto. Ti laeng nasken isut’ panangakseptartay ken Kristo kas Mangisalakan kadatayo ken ti panangannurottayo iti naimbag a Nakristianuan a panagbiag’

Kunaenyo: ‘Talaga a nasken ti panangbigbigtayo iti paset ni Jesu-Kristo. Ngem naammuanyo kadi a ti maysa a gapu no apay dagiti Judio ket dida inakseptar ni Jesus a ta dida impangag a naan-anay ti padto?’ Sayonto inayon: (1) ‘Dagiti padto idiay Hebreo a Kasuratan impakpakaunada no inton-ano ti panagparang ti Mesias (Kristo) ken no aniantot’ aramidenna. Ngem dagidi Judio kaaduannat’ di nangipangpangag iti kinuna dagidiay a padto. Adda bukodda nga idea no anianto ti aramiden ti Mesias, ket iti kasta inlaksidda ti Anak ti Dios.’ Kitaenyo ti panid 221, iti baba ti “Jesu-Kristo.”)’ (2) ‘Agbibiagtayo itatta bayat ti tiempo a nangrugin ni Kristo nga agturay kas nailangitan nga Ari ket paglalasinenna ti tattao iti amin a nasnasion, iti dasig ti biag wenno pannakadadael. (Mat. 25:31-33, 46) Ngem kaaduan a tattao sabali ti inda paspasungaden.’

Wenno: ‘Umanamongak a nasken ti panagbalintayo a naimbag a Kristiano. Ngem naimbagak kadi a Kristiano no tungpalek dagiti dadduma nga imbaga ni Jesus ngem diak ikankano daydiay kunana nga iyun-unak iti panagbiagko? . . . Paliiwenyo ti kunana sigun ditoy Mateo 6:33.’ Sayonto inayon: ‘Saannatay aya nga insuro ni Jesus a mangikararag iti dayta a Pagarian, nga immun-una pay dayta ngem ti idadawattayo ti pammakawan gaput’ panamatitay kenkuana a kas Manangisalakan? (Mat. 6:9-12)’