Napudno kadi a gobierno ti Pagarian ti Dios?

Wenno, imbes ketdi, maysa a kasasaad kadagiti puso ti tattao?

Luc. 17:21, KJ: “Ket didanto met kunkuna, Adtoy! wenno, adda idiay! ta, adtoy, ti pagarian ti Dios adda iti unegyo [kasta met ti TEV, Dy; ngem “adda kadakayo,” KJ margin, NE, JB; “iti nagtetengngaanyo,” RS; “adda iti nagtetengngaanyo,” NW].” (Paliiwenyo ta kas naipakita idiay bersikulo 20, dagidi Fariseo ti kasarsarita ni Jesus, a kinondenarna a kas managinsisingpet, gapuna dina kayat a sawen idi a ti Pagarian adda idiay puspusoda. Ngem ti Pagarian nga isut’ inrepresentar ni Jesu-Kristo adda idi iti tengngada. Gapuna kuna ti The Emphatic Diaglott: “Ti naarian a kinangayed ti Dios adda kadakayo.”)

Aktual kadi a kunaen ti Biblia a ti Pagarian ti Dios ket maysa a gobierno?

Isa. 9:6, 7, RS: “Ta nayanak ti maysa nga ubing kadatayo, maysa nga anak a lalaki ti naited kadatayo; ket ti gobierno [kasta met ti KJ, AT, Dy; “panangsakop,” JB, NE; “naarian a turay,” NW] maiparabawto iti abagana, ket ti naganna maawaganto iti ‘Nakaskasdaaw a Mamagbaga, Mannakabalin a Dios, Agnanayon nga Ama, Prinsipe ti Kappia.’ Ti idadakkel ti gobiernona ken ti kappia awanto ti inggana.”

Asinoda dagiti agturay iti Pagarian?

Apoc. 15:3: “Dadakkel ken nakaskasdaawda dagiti aramidmo, Jehova a Dios, a Mannakabalin amin. Nalinteg ken pudno ti daldalanmo, Ari ti kinaagnanayon.”

Dan. 7:13, 14: “Immay babaen ti ul-ulep ti langlangit ti maysa a kasla anak ti tao [ni Jesu-Kristo; kitaenyo ti Marcos 14:61, 62]; ket dimteng iti Dati a Lakay [ni Jehova a Dios], ket isu inyasidegda iti saklang Daydiay. Ket isu [ni Jesu-Kristo] naikkan ti panagturay ken dayag ken Pagarian, tapno amin nga il-ili, nasnasion ken pagsasao agserbida koma kenkuana.”

Apoc. 5:9, 10: “Ta napapatayka [Jesu-Kristo] idi ket nagatangmo a maipaay iti Dios babaen ti daram met laeng dagiti tattao ti amin a tribo ken dila ken ili ken nasion, ket pinagbalinmo ida a maipaay iti Diostayo a pagarian ken papadi, ket agturayda kas ar-ari iti rabaw ti daga.” (Idiay Apocalipsis 14:1-3 nasao nga agdagup iti 144,000 dagidiay “nasubbot itoy  daga” nga agturay a kadua ti Kordero idiay nailangitan a Bantay Sion.)

Anianto ti epekto daytoy a Pagarian no kadagiti natauan a gobierno?

Dan. 2:44: “Ket iti al-aldaw dagita nga ar-ari ti Dios ti langit mamangonto iti maysa a pagarian a kaanoman dinto madadael. Ket ti pagarian a mismo dinto met maited iti sabali nga ili. Burakennanto ken ibusennanto amin dagitoy a pagpagarian, ket isu a mismo agtalinaedto iti panawen a di nakedngan.”

Sal. 2:8, 9: “Agkiddawka kaniak, ket siak itedkonto ti nasnasion a maipaay a tawidmo, ket dagiti kaungtuan a paset ti daga a kukuam. Rumekemto ida iti pang-or a landok, burakemto ida a kasla banga ti agdamdamili.”

Anianto ti magapuanan ti Pagarian ti Dios?

Idaydayawnanto ti nagan ni Jehova ken itandudona ti kinasoberanona

Mat. 6:9, 10: “Dakayo, ngarud, agkararagkayo a kastoy: ‘Amami nga adda iti langlangit, madaydayaw koma ti naganmo. Umay koma ti pagariam.’” (Ditoy ti pannakadaydayaw ti nagan ti Dios nainaig unay iti yaay ti Pagarianna.)

Ezeq. 38:23: “Talaga a padayagekto ti bagik met laeng ken pasantuekto ti bagik met laeng ket agpakaammoakto iti imatang dagiti adu a nasnasion; ket maammuandanto a siak ni Jehova.” (Ti nagan ti Dios madalusanto manipud iti amin a pannakatabbaawna; maibilangto a kas nasantuan ken maikari iti pannakaraem, ket amin a sibibiag tattaodanto a situtulok a mangitandudo iti kinasoberano ni Jehova, a tagiragsakenda nga aramiden ti pagayatanna. Ti kappia ken pagimbagan ti intero nga uniberso agpannuray iti pannakaidaydayaw ti nagan ni Jehova.)

Panungpalenna ti naipalubos a panangituray ni Satanas iti lubong

Apoc. 20:2, 3: “[Ti nailangitan nga Ari, ni Jesu-Kristo] tiniliwna daydi dragon, daydi uleg a kadaanan, nga isu ti Diablo ken Satanas, ket pinarautanna iti bayat ti sangaribo a tawen. Ket isu inggarangugongna iti abut a mangliwengliweng ket inrikepanna ken sinelioanna ti rabawna, tapno dina allilawenen ti nasnasion agingga iti maturpos dagiti sangaribo a tawen. Inton maturpos daytoy masapul a maluk-atan iti bassit a kanito.”  (Iti kasta ti sangatauan maluk-atan manipud impluensia ni Satanas nga isut’ namarigat iti kabibiag dagiti tattao nga agtarigagay nga agaramid iti nalinteg. Awanton ti sinasairo nga impluensia a nangituggod iti nakaro a kinakas-ang ken ti dinedemonio nga impluensia a nangpunno iti kabibiag dagiti adu iti panagbutbuteng.)

Pagkaykaysaenna amin a parsua nga agdaydayaw iti maymaysa a pudno a Dios

Apoc. 5:13; 15:3, 4: “Ket isuamin a naparsua idiay langit ken iti rabaw ti daga ken iti uneg ti daga ken iti baybay, ken dagiti isuamin nga adda kadakuada, nangngegko ida nga agkunkuna: ‘Bendision ken dayaw ken dayag ken pannakabalin ti adda koma iti daydiay agtugtugaw iti trono [ni Jehova a Dios] ken iti Kordero [ni Jesu-Kristo] iti awan inggana.’” “Dadakkel ken nakaskasdaawda dagiti aramidmo, Jehova a Dios, a Mannakabalin amin. Nalinteg ken pudno ti daldalanmo, Ari ti kinaagnanayon. Siasino ti di agbutengto kenka, Jehova, ken saan a mangidaydayawto iti naganmo, ta siksika laeng ti nasungdo? Ta isuamin a nasnasion umaydanto ket agdaydayawdanto iti sanguanam, ta dagiti nalinteg a bilinmo naiparangarangda.”

Yegnanto ti sangatauan iti daydiay natunos a relasionda iti Dios

Roma 8:19-21: “Ta ti nasged a tarigagay ti sangaparsuaan [sangatauan] ur-urayenna ti pannakaiparangarang dagiti annak ti Dios [ti ebidensia a dagidiay nagungar para iti nailangitan a biag a kadua ni Jesu-Kristo ket nangrugidan nga agtignay kas agtuturay]. Ta ti sangaparsuaan pinaiturayan iti kinaubbaw, saan a ti nakemna no di gapu iti daydi nangituray kenkuana, a siinanama a ti met laeng sangaparsuaan [ti sangatauan a sapasap] maluk-atanto iti pannakaadipen ti panagrupsa a maipaay iti nadayag a wayawaya dagiti annak ti Dios.”

Luk-atanna ti sangatauan manipud amin a pamutbuteng ti gubat

Sal. 46:8, 9: “Umaykayo, dakayo a tattao, imatanganyo ti ar-aramid ni Jehova, no kasanona nga insaad dagiti nakaskasdaaw a pasamak ditoy daga. Pasardengenna ti gubgubat inggana iti ungto ti daga.”

Isa. 2:4: “Pandayendanto ti kamkampilanda a pagbalinen a dingding ti arado ket ti pikpikada pandayendanto a komkompay. Ti maysa a nasion saananto nga itag-ay ti kampilan a  maibusor iti nasion, ket didanto met adalenen iti pannakigubat uray kaano.”

Dalusanna toy daga kadagiti nakillo nga agtuturay ken panangirurumen

Sal. 110:5: “Ni Jehova a mismo dita makanawanmo danarennanto ti ar-ari iti aldaw ti pungtotna.”

Sal. 72:12-14: “Ta [ti Mesianiko nga Ari ni Jehova] ispalennanto ti makasapul intono umkis, ken ti napanglaw ken siasinoman nga awan umarayat kenkuana. Mangngaasinto kadagiti napanglaw ken makasapul ket dagiti kararua dagiti makasapul isalakannanto. Subbotennanto dagiti kararuada manipud panangirurumen ken iti kinaranggas, ket napategto ti darada iti matmatana.”

Mangipaay ti nawadwad a taraon para iti sangatauan

Sal. 72:16: “Addanto ti kinaruay ti bukel iti daga; iti tapaw ti bambantay margaayandanto.”

Isa. 25:6: “Iti daytoy a bantay [idiay nailangitan a Bantay Sion, ti sentro ti Pagarian ti Dios, maipaayto dagiti kasapulan dagiti naindagaan a sakopna] ni Jehova ti buybuyot talaga nga agaramidto kadagiti amin nga inilin-ili iti maysa a rambak dagiti nalukmeg a bambanag, maysa a rambak ti ar-arak iti rabaw dagiti aributed, dagiti nalukmeg a banag a napno iti pata, dagiti arak a nadalusan a naimbag kadagiti aributed.”

Ikkatenna amin a kita ti saksakit ken an-anayen

Luc. 7:22; 9:11: “Inkayo, saritaenyo ken Juan ti bambanag a nakitayo ken nangngegyo: dagiti bulsek makakitada, dagiti pilay magnada, dagiti agkukutel nadalusanda ket dagiti tuleng makangngegda, dagiti natay nagungarda, dagiti napanglaw naikasaba kadakuada ti naimbag a damag.” “[Ni Jesu-Kristo] inawatna ida a siaasi ken kinasaona ida ti maipapan iti pagarian ti Dios, ket inagasanna dagiti makasapul ti pannakaagas.” (Iti kasta indemostra ni Jesus ti aramidennanto iti sangatauan kas nailangitan nga Ari.)

Mangipaay ti maikanatad a pagtaengan para kadagiti isuamin

Isa. 65:21, 22: “Isuda talaga a bangonendanto ti balbalay ken agtaengdanto kadakuada; ket talaga nga agmuladanto kadagiti kaubasan ket kanendanto ti bungada. Isuda didanto  mangbangon ket sabali ti agnaed; didanto agmula ket sabali ti mangan.”

Ipanamnamana nga adda makapnek a trabaho para kadagiti isuamin

Isa. 65:23: “Isuda didanto agtrabaho iti ubbaw, didanto agpasngay a maipaay iti didigra; ta isuda ti kapuonan ti binendisionan ni Jehova, ken ti putotda makiadda kadakuada.”

Garantisaranna ti kinatalged, kinaawan pagpeggadan ti maysa a tao wenno ti sanikuana

Mik. 4:4: “Agtugawdanto tunggal maysa a tao iti sirok ti kayona nga ubas ken iti sirok ti kayona nga igos, ket awanto ti mangpabuteng kadakuada; ta ti mismo a ngiwat ni Jehova ti buybuyot sinaona.”

Sal. 37:10, 11: “Ta bassit pay a darikmat, ket ti nadangkes maawanton; ket talaga a mingmingamto a sigaganetget ti ayanna, ket awanton. Ngem dagiti naemma a mismo tawidendanto ti daga, ket talaga a maay-ayatandanto iti kinaruay ti talna.”

Taginayonennanto ti kinahustisia ken kinalinteg

2 Ped. 3:13: “Kas mayannurot iti karina datayo ur-urayentayo ti babbaro a langlangit ken ti maysa a daga a baro, isuda a pagtaengan ti kinalinteg.”

Isa. 11:3-5: “[Ti Mesianiko nga Ari] saanto a mangukom a kas iti makita dagiti matana, ken saan met a mangbabalaw a kas iti mangngeg dagiti lapayagna. Ket ukomennanto dagiti napanglaw a buyogen ti kinalinteg, ken mangbabalaw a sililinteg a maipaay kadagiti napakumbaba ditoy daga. . . . Ket ti kinalinteg isunto ti barikes ti siketna, ket ti kinamatalek isunto ti barikes ti lumona.”

Saluadanna ti sangatauan iti didigra a partuaten dagiti natural a puersa

Mar. 4:37-41: “Ket dimmuko ti maysa a dakkel a bagio, ket dagiti dalluyon agdarisonda idi barangay, iti kasta matintinepen. . . . Idi a [ni Jesus] nakariing tinubngarna ti angin ket kinunana iti baybay: ‘Agulimekka! Agtalnaka!’ Ket nagtalna ti angin, ket immay ti dakkel a linak. . . . Ket isuda naaddaanda iti dakkel a buteng, ket kunkunada iti maysa ken maysa: ‘Asino a talaga daytoy, nga uray ti angin ken ti baybay agtulnogda kenkuana?’” (Indemostra ngarud ni Kristo ti pannakabalin nga  ipakatnanto kas nailangitan nga Ari kadagita a natural nga elemento.)

Pagungarenna dagiti natay

Juan 5:28, 29: “Dikay pagsiddaawan daytoy, ta umay ti oras a dagiti amin nga adda kadagiti pakalaglagipan a tanem mangngegdanto ti timekna [timek ni Kristo nga Ari] ket rumuardanto.”

Apoc. 20:12: “Nakitak dagiti natay, dadakkel ken babassit, a nagtatakder iti sanguanan di trono, ket nabistrad dagiti pagbasaan. Ngem nabistrad ti sabali a pagbasaan; isu ti pagbasaan ti biag. Ket dagiti natay naukomda iti bambanag a naisurat kadagiti pagbasaan kas mayannurot kadagiti aramidda [inaramidda kalpasan ti panagungarda; idiligyo ti Roma 6:7].”

Ikkatenna amin nga ipapatay a maipuon iti tinawid a basol ken Adan

Isa. 25:8: “Isu inalimonna nga agnanayon ni patay, ket ni Jehova a Soberano nga Apo talaga a punasennanto dagiti lulua iti isuamin a ruprupa.”

Apoc. 21:4: “Punasennanto ti amin a lulua kadagiti matada, ket awanton ni patay, ket awanto metten ti sasaibbek wenno sangsangit wenno rigrigat. Ti immuna a bambanag napalabasdan.”

Mangipaay iti lubong nga agiinnayat a sipupudno ti maysa ken maysa

Juan 13:35: “Gapu itoy mailasinto amin a dakayo dagiti adalak [iti kasta agngayangayda a makikadua ken Jesus idiay nailangitan a Pagarian wenno agbalin a naindagaan a sakopna], no adda ayatyo iti maysa ken maysa.”

Pagkakappiaenna dagiti animal ken tattao

Isa. 11:6-9: “Ti lobo makipagnaedto iti kordero, ket ti leopardo makikaiddanto iti urbon a kalding, ket ti urbon a baka ken ti urbon ti leon ken ti napalukmeg agkakaiddadanto; ket ti maysa nga ubing a bassit idalannanto ida. Ket ti baka ken ti uso agarabdanto; dagiti urbonda agkakaiddadanto. Ket ti leon manganto iti garami a kas iti baka a lalaki. Ket ti ubing nga agsuso agay-ayamto iti abut ti uleg; ket ti kapuspusot nga ubing ikautnanto ti imana iti rukib ti karasaen. Didanto mangranggas wenno mangdadael iti amin a bantayko a nasantuan.” (Kasta met ti Isaias 65:25)

 Ose. 2:18: “Iti dayta nga aldaw mangaramidakto iti maysa a tulag a maipaay kadakuada kadagiti atap nga animal ti tay-ak ken kadagiti tumatayab ti tangatang ken kadagiti agkarayam ti daga, . . . ket pagiddaekto ida a sitatalged.”

Pagbalinenna a Paraiso ti daga

Luc. 23:43: “Pudno kunak kenka ita nga aldaw, Makipagiankanto kaniak idiay Paraiso.”

Sal. 98:7-9: “Agdaranudor koma ti baybay ken amin a linaonna, ti nabunga a daga ken amin nga agnaed kenkuana. Dagiti karayan pagsipatenda koma dagiti imada; ti bambantay agkantada koma nga agtitimpuyog gapu ti rag-o iti sanguanan ni Jehova, ta umay a mangukom itoy daga. Ukomennanto a sililinteg toy nabunga a daga ken sikakanatad ti inilin-ili.”

Idiligyo ti Genesis 1:28; 2:15; Isaias 55:11.

Kaano a mangrugi ti panagturay ti Pagarian ti Dios?

Idi ngata immuna a siglo?

Col. 1:1, 2, 13: “Ni Pablo, apostol ni Kristo Jesus, ken ni kabsat Timoteo gapu iti nakem ti Dios isuratda kadagidiay nasantuan [dagidiay makipagtawid iti nailangitan a Pagarian] . . . [Ti Dios] isu a nangluk-at kadatayo iti pannakabalin ti sipnget ket inyallatiwnatayo iti pagarian ti dungdunguenna nga Anak.” (Ni Kristo, no kasta, talaga a nangrugin a mangituray iti Nakristianuan a kongregasion idi immuna a siglo sakbay ti pannakaisurat daytoy, ngem ti pannakaipasdek ti Pagarian a mangituray iti intero a daga ket masanguanan pay la idi.)

1 Cor. 4:8: “Dakayo a lallaki napnekkayon, kasta kadi? Bimmaknangkayon, kasta kadi? Nakapagarikayon nga awankami, kasta kadi? Ket sapay koma ta agarikayo tapno makipagarikami met kadakayo.” (Nabatad a babbabalawen ni apostol Pablo ida yantangay kamali idi ti panangmatmatda.)

Apoc. 12:10, 12: “Ita immayen ti pannakaisalakan ken ti pannakabalin ken ti pagarian ti Diostayo ken ti panagturay ni Kristona, ta ti mangidardarum iti kakabsattayo naitapuaken, daydiay mangidardarum kadakuada iti sanguanan ti Diostayo bayat ti aldaw ken rabii! Gapuna agragrag-okayo, dakayo a langlangit ken dakayo nga agnaed kadakuada! Asikayo pay daga ken baybay, ta ti Diablo immulog kadakayo, nga addaan dakkel a pungtot, nga ammona a bassiten ti tiempona.” (Ti  pannakaipasdek ti Pagarian ti Dios ket nainaig ditoy iti pannakaitapuak ni Satanas manipud langit. Saan a napasamak daytoy idi tiempo ti yaalsada idiay Eden, kas ipakita ti Job kapitulo 1, 2. Ti Apocalipsis nairekord idi 96 K.P., ket ti Apocalipsis 1:1 ipakitana a dagiti pasamak ket maangaydanto iti masanguanan.)

Santo la ngata agturay ti Pagarian ti Dios kalpasan ti pannakakumberte ti lubong?

Sal. 110:1, 2: “Ni Jehova kunana iti Apok [a Jesu-Kristo]: ‘Agtugawka iti makanawanko agingga iti mapagbanagko ti kabkabusormo a pagbatayam.’ Ni Jehova ibaonnanto ti sarukod ti bilegmo manipud Sion a kunkunana: ‘Agturayka iti tengnga ti kabkabusormo.’” (No kasta adda dagiti kabusorna a masapul a parmekenna; saan nga isuamin ket agpasakop iti turayna.)

Mat. 25:31-46: “Ngem intono ti Anak ti tao [ni Jesu-Kristo] umayto agraman iti dayagna, ken amin dagiti anghel maikuyog kenkuana, isu ti panagtugawnanto iti trono ti gloriana. Ket iti sanguananna maurnongto dagiti isuamin a nasion, ket paglalasinennanto dagiti maysa ken maysa, a kas iti pastor ilasinna dagiti karnero kadagiti kalding. . . . Ket dagitoy [di nangipaay iti ayat kadagiti napulotan a kakabsatna] mapandanto iti agnanayon a pannakaguped, ngem dagiti nalinteg iti biag nga agnanayon.” (Nabatad, a saan nga isuamin a sangatauan ket makumberte sakbay nga agtugaw ni Kristo iti tronona; saan nga isuamin ket agbalinto a nalinteg.)

Ipasimudaag kadi ti Biblia no inton-ano ti panangrugi ti Pagarian nga agturay?

Kitaenyo ti panid 337-339, iti sidong ti paulo a “Dagiti Petsa” ken ti panid 224-229, iti baba “Dagiti Maudi nga Aldaw.”

‘Diak maur-uray daytan’

Kunaenyo: ‘Ngem addanto latta makaur-uray iti dayta, di ngamin? . . . Adda ngata makaammo no ania a kaputotan ti makaur-uray iti dayta? Dagidi mismo nga apostol ni Jesus kayatda idi a maammuan dayta, ket ti insungbatna kadakuada napateg unay kadatayo itatta.’ (Mat. 24:3-14; Luc. 21:29-32)’

Wenno: ‘Kadawyan ti kasta a panangmatmat. Ngem dagiti  Saksi ni Jehova nabileg ti pammatida, sigun iti Biblia, a ti Pagarian ti Dios agturturayen idiay langit ket adda kadatayo a mangipakita no kayattayo ti agtultuloy nga agbiag ditoy daga iti sidong ti nalinteg a gobierno ti Dios wenno saan. Dayta ti gapuna nga immaykay sinarungkaran itatta. Paliiwenyo man ti naisao ditoy Mateo 25:31-33.’