Pammaregta

Kayuloganna: Banag a makapabileg, mangted namnama. Amin a tao kasapulandat’ pammaregta. Mabalin a kasapulan dayta ti panangipaay ti personal a tulong wenno panangyebkas ti apresasion. Masansan ramanenna ti panangbadang iti maysa tapno masarangetna ti narikut a situasion wenno panangsalaysay kadagiti rason tapno adda talekna iti nasaysayaat a masanguanan. Itden ti Biblia dagiti kasayaatan a pagibatayan iti kasta a pammaregta, ket dagiti texto ditoy baba makatulongda no ibasa kadagidiay sisasango iti nagduduma a situasion. No dadduma nawadwad ti magapuanan babaen laeng iti pannakisimpatiatayo.—Roma 12:15.

Para kadagidiay masubsubok gaput’ SAKIT—

Apoc. 21:4, 5: “‘[Ti Dios] punasennanto ti amin a lulua kadagiti matada, ket awanton ni patay, ket awanto metten ti sasaibbek wenno sangsangit wenno rigrigat. Dagiti immuna a bambanag napalabasdan.’ Ket Daydiay situtugaw idi trono kinunana: ‘Adtoy! Pagbalinek a babbaro dagiti isuamin a bambanag.’ Kasta met, kinunana: ‘Isuratmo, ta dagitoy a sasao papatien ken napudnoda.’”

Mat. 9:35: “Ni Jesus linawlawna dagiti amin nga il-ili ken purpurok, a nangisursuro . . . ken nangikaskasaba ti naimbag a damag ti pagarian ket pinapaimbagna amin a sakit ken amin a kita ti an-anayen.” (Idi a pinagtiponna ti panangagas ken ti panangikasaba iti Pagarian, inted ni Jesus ti nakaskasdaaw a pamatapatan iti innanto aramiden para ti sangatauan kabayatan ti Milenio a Turayna.)

2 Cor. 4:13, 16: “Mamatikami met . . . Gapuna saankam a maupay, ngem uray ti tao a makinruar [ti pisikal a bagitayo] kumapoy la a kumapoy, ti tao a makin-uneg mapabaro [wenno maikkan ti kabbaro a bileg] nga inaldaw.” (Mabalin a kumapkapoytayo no iti pisikal a wagas. Ngem no iti naespirituan  mapabpabarotayo bayat nga itultuloytayo ti agtaraon kadagiti napateg a karkari ti Dios.)

Kitaenyo met ti Lucas 7:20-23.

Para kadagidiay napukawdat’ ay-ayatenda gapu ken PATAY—

Isa. 25:8, 9: “Alimonennanto nga agnanayon ni patay, ket ni Soberano nga Apo a Jehova talaga a punasennanto dagiti lua kadagiti isuamin a ruprupa. . . . Ket maisaonto a talaga iti dayta nga aldaw: ‘Adtoy! Daytoy ti Diostayo. Isu ti inur-uraytayo, ket isalakannatayto. Isu daytoy ni Jehova. Isu ti inur-uraytayo. Agrag-otayo ken agragsaktayo iti panangisalakanna.’”

Juan 5:28, 29: “Dikay pagsiddaawan daytoy, ta umay ti oras a dagiti amin nga adda kadagiti pakalaglagipan a tanem mangngegdanto ti timekna ket rumuardanto, dagiti nagaramid ti naimbag iti panagungar ti biag, dagiti nagaramid ti dakes iti panagungar ti pannakaukom.”

Juan 11:25, 26: “Kuna kenkuana ni Jesus: ‘Siak ti panagungar ken ti biag. Ti mangalagad ti pammati kaniak, uray no matay, agbiagto pay; ket siasinoman nga agbiag ken mangalagad ti pammati kaniak saanto a matay a pulos. Patiem daytoy?’”

Sal. 146:5, 9: “Naragsak daydiay . . . a ti inanamana adda ken Jehova a Diosna. . . . Saranayenna dagiti ulila ken balo.” (Uray itan maseknan unay ti Dios kadagiti natayan.)

Kitaenyo met ti Lucas 7:11-16; 8:49-56.

Para kadagidiay MAIDADDADANES gaput’ panagaramidda iti pagayatan ti Dios—

Sal. 27:10: “No da ama ken ina baybay-andak, ni ngad Jehova a mismo pidutennakto.”

1 Ped. 4:16: “Ngem no agsagaba kas Kristiano, saan koma nga agbain, no di ket dayawenna koma ti Dios itoy a nagan.”

Prov. 27:11: “Anakko, agsiribka, ket paragsakem toy pusok, tapno masungbatak ti mangumsi kaniak.” (Babaen iti kinamatalek masungbatantayo ti ulbod a pammabasol ni Satanas nga awanto kano ti agserbi iti Dios no lasatenna ti nakaro a rigat.)

Mat. 5:10-12: “Naragsak dagiti maidadanes a maipuon iti  kinalinteg, ta kukuada ti pagarian ti langlangit. Naragsakkayo intono lalaisendakayo ket idadanesdakayo ket pagsawandakayo ti amin a kita ti dakes gapu kaniak nga agulbodda. Agragsakkayo ken agrag-okayo, ta ti gunggonayo dakkel iti langlangit; ta kasta met ti panangidadanesda kadagidi mammadto a nagbiag nga immun-una ngem dakayo.”

Ara. 5:41, 42: “[Dagidi apostol], ngarud, pimmanawda a siraragsak, iti sanguanan ti Sanhedrin ta naibilangda a maikari a nagsagaba a nakababain gapu iti naganna. Ket inaldaw-aldaw iti templo ken iti binalaybalay dida namingga a manursuro ken mangikaskasaba iti naimbag a damag maipapan ti Kristo, a ni Jesus.”

Fil. 1:27-29: “Isuna laeng a ti panagbibiagyo maikari koma iti naimbag a damag ni Kristo . . . nga awan ket ti kabutengyo gapu kadagiti kabusoryo. Daytoy isu kadakuada ti pagilasinan ti pannakapukaw, ngem kadakayo ti pannakaisalakan; ket daytoy iti biang ti Dios, ta maipuon ken Kristo maited daytoy a gundaway kadakayo, saan laeng a ti pammati kenkuana, no di ket ti panagsagaba met gapu kenkuana.”

Dagidiay maup-upay gaput’ PANNAKAIRURUMEN—

Sal. 37:10, 11: “Ta bassit pay a darikmat, ket ti nadangkes maawanton; ket mingmingamto a sigaganetget ti ayanna, ket awanton. Ngem dagiti naemma a mismo tawidendanto ti daga, ket maay-ayatandanto iti kinaruay ti talna.”

Isa. 9:6, 7: “Ta nayanak ti maysa nga ubing kadatayo, maysa nga anak a lalaki ti naited kadatayo; ket ti panangituray maiparabawto iti abagana. Ket ti naganna maawaganto iti Nakaskasdaaw a Mamagbaga, Mannakabalin a Dios, Agnanayon nga Ama, Prinsipe ti Kappia. Ti idadakkel ti panangiturayna ken ti kappia awanto ti inggana, iti trono ni David ken iti pagarianna tapno bangonenna ken salimetmetanna babaen iti kinahustisia ken babaen iti kinalinteg, manipud ita ken iti panawen a di nakedngan. Ti mismo a regta ni Jehova ti buybuyot ti mangaramidto iti daytoy.”

Dan. 2:44: “Iti al-aldaw dagita nga ar-ari ti Dios ti langit mamangonto iti maysa a pagarian a kaanoman dinto madadael. Ket ti pagarian a mismo dinto met maited iti sabali nga ili. Burakennanto ken ibusennanto amin dagitoy a pagpagarian, ket isunto a mismo ti agtalinaed iti panawen a di nakedngan.”

Kitaenyo met ti Isaias 32:1, 2; 2 Pedro 3:13.

 Para kadagidiay marigatan gaput’ PROBLEMA TI PANAGBIAG—

Isa. 65:21, 22: “Isuda talaga a bangonendanto ti balbalay ket agtaengdanto kadakuada; ket talaga nga agmuladanto kadagiti kaubasan ket kanendanto ti bungada. Isuda didanto mangbangon ket sabali ti agnaed; didanto agmula ket sabali ti mangan. . . . Dagiti pinilik agragsakdanto iti mabayag iti aramid ti im-imada.”

Sal. 72:8, 16: “[Ti Mesianiko nga Ari] addanto met pagturayanna manipud baybay agingga iti baybay ken manipud idiay Karayan inggana iti pungpungto ti daga. Addanto kinaruay ti bukel iti daga; iti tapaw ti bambantay ti bungada margaayandanto.”

Mat. 6:33: “Itultuloyyo, ngarud, a biruken nga umuna ti pagarian ken ti kinalintegna, ket isuamin dagitoy a bambanag [material a kaskasapulan ti panagbiag] mainayondanto kadakayo.”

Roma 8:35, 38, 39: “Siasino ti mangisinanto kadatayo iti ayat ni Kristo? Tinto ladingit wenno rigat wenno pannakaidadanes wenno bisin wenno kinalamolamo wenno peggad wenno kampilan? Ta diak duaduaen nga uray ni patay wenno biag wenno dagiti anghel wenno dagiti pagturayan wenno bambanag nga agdama wenno bambanag nga umayto wenno dagiti pannakabalin wenno ti nangato wenno ti nababa wenno uray aniaman a sabsabali a parsua didatay mabalinto nga isina iti ayat ti Dios nga adda ken Kristo Jesus nga Apotayo.”

Kitaenyo met ti Hebreo 13:5, 6.

Para kadagidiay maup-upay gapu kadagiti PAGKURANGANDA—

Sal. 34:18: “Ni Jehova adda iti asideg kadagiti sitatarumpingay ti pusoda; ket isalakanna dagiti sibabawi ti espirituda.”

Sal. 103:13, 14: “Kas panangaasi ti maysa nga ama kadagiti annakna, kasta ti panangaasi ni Jehova kadagiti agbuteng kenkuana. Ta ammona ti pannakasukogtayo, a malagipna a datayo tapoktayo.”

Neh. 9:17: “Sika ti maysa a Dios a nadadaan a mamakawan, naparabur ken manangaasi, natanang nga agpungtot ken nawadwad iti naayat a kinamanangaasi.”

2 Ped. 3:9, 15: “Saan a namayamay ni Jehova a maipapan iti karina, kas iti panangibilang dagiti dadduma iti kinabayag,  no di ket agur-uray a siaanus gapu kadakayo a dina kayat a mapukaw ti uray siasino no di ket agturongda koma amin iti panagbabawi. Mainayon pay, ibilangyo a ti atiddog a panagitured ni Apotayo isu ti pakaisalakanan.”