Apay nga adu a tattao ti awanan pammati?

Ti pammati isut’ bunga ti espiritu ti Dios, ket siaayat nga itden ti Dios ti espirituna kadagidiay mangbirok iti dayta. (Gal. 5:22; Luc. 11:13) Dagidiay ngarud awanan iti pammati saanda a birbiruken dayta nga espiritu, wenno birukenda man ngem gapu iti dakes a panggep wenno pagtukiadanda ti panagandar dayta kadagiti bibiagda. Adu a bambanag ti mangimpluensia iti daytoy:

Kinaawan ti umiso a pannakaammo iti Biblia: Ti Biblia ket bunga ti espiritu ti Dios, gapu ta impaltiing dayta ti Dios. (2 Tim. 3:16, 17; 2 Sam. 23:2) Ti di panangadal iti Biblia lapdanna ti irurusing ti pudno a pammati. Nupay adda Biblia dagiti miembro ti relihion, no ti naisuro kadakuada ket idea ti tattao imbes ket a Sao ti Dios, awanto ti pudno a pammatida iti Dios ken iti panggepna. Inton risutenda dagiti problemada, agtalekdanto nga ad-adda kadagiti bukodda nga idea ken ti kapanunotan ti sabsabali a tattao.—Idiligyo ti Mateo 15:3-9.

Naupayda iti ulbod a relihion: Adu ti naupay gaput’ panaginsisingpet dagiti simbaan ti Kakristianuan, a kunaenda nga isursuroda ti Sao ti Dios ngem dida met agbiag a maitunos iti isursuro ti Biblia. Dagiti dadduma simmursurotda iti di-Nakristianuan  a relihion, ngem nakitada dagiti dakes a bungbunga ti ar-aramidda wenno natakuatanda a dagiti patpatienda ket di met nakatulong kadakuada a nangrisut kadagiti problemada. Gapu ta awan umiso a pannakaammoda iti pudno a Dios, ti kakasta a tattao liklikanda amin a banag a nainaig iti relihion.—Idiligyo ti Roma 3:3, 4; Mateo 7:21-23.

Dida maawatan no apay ti Dios pinalubosanna ti kinadakes: Adu dagiti di makatarus no apay a ti Dios impalubosna ti kinadakes ket ngarud pabasolenda ti Dios gapu kadagiti amin a dakes a mapaspasamak. Dida mabigbig a ti pagannayasan ti tao nga agdakes ket saan a pagayatan ti Dios no di ket maigapu iti panagbasol ni Adan. (Roma 5:12) Mabalin a dida ammo ti kaadda ni Satanas a Diablo ken ti impluensiana kadagiti ganuat ti lubong, gapuna ipabasolda iti Dios dagidiay kinadakes nga iyus-usuat ni Satanas. (1 Juan 5:19; Apoc. 12:12) No bilang man ta ammoda dagitoy a banag, kunaenda a namayamay ti Dios nga agtignay, yantangay dida met maawatan a sibabatad ti kuestion maipapan iti sapasap a kinasoberano ket dida matarusan ti kinapudno a ti kinaanus ti Dios agingga ita ket nangted iti tiempo tapno awatenda ti di kaikarian a gundaway a maisalakan. (Roma 2:4; 2 Ped. 3:9) Kasta met, dida pay mabigbig a ti Dios adda tiempo nga intudingna a panangdadaelto nga agnanayon kadagiti agaramid iti kinadakes.—Apoc. 22:10-12; 11:18; Hab. 2:3.

Dagiti biagda inturayan dagiti nainlasagan a tarigagay ken panangmatmat: Kaaduanna, dagidiay awanan napudpudno a pammati impamaysada ti tiempoda para kadagiti sabali a paginteresan. Dagiti dadduma kunaenda a mamatida iti Biblia ngem dida talaga nga inadal dayta wenno dida inut-utob a sipapasnek ti binasada, dagiti makagapu iti kasta ken no kasano a maiyaplikar dayta iti inaldaw a panagbiagda. (Idiligyo ti 1 Cronicas 28:9.) No dadduma, dida tinaraonan ti adda a pammatida no di ket pinalubosanda dagiti banag a nakillo a nangituray iti pagannayasan ti pusoda ket iti kasta immadayodan iti Dios ken iti dandanana.—Heb. 3:12.

Kasano a ti maysa magun-odanna ti pammati?

Roma 10:17: “Ti pammati surotenna ti banag a nangngeg.” (Idiligyo ti Aramid 17:11, 12; Juan 4:39-42; 2 Cronicas 9:5-8. Ti maysa ammuenna koma nga umuna no aniat’ kunaen ti Biblia, sananto pabilgen ti kombiksionna no usigenna ti Biblia a siaannad tapno isu ket kombinsido iti kinamapagtalkan ti Biblia.)

 Roma 10:10: “Ta buyogen ti puso no mamati ti tao.” (No pagmennamennaanna dagita tapno bumileg ti panangipategna maipasagepsepto ti bambanag idiay simboliko a pusona.)

Bumileg ti pammati no ti maysa agtignay sigun kadagiti kari ti Dios sananto makita ti ebidensia ti pamendision ti Dios kadagidiay gapuananna.—Kitaenyo ti Salmo 106:9-12.

Pangarigan: Nalabit adda gayyemyo a kastoy ti makunayo maipapan kenkuana: ‘Talkek dayta a tao. Siguradok a tungpalenna ti saona; ket ammok a no adda problemak, umaynakto tulongan.’ Ti kasta a tao saan nga idi kalmanyo la a naam-ammo, saan kadi? Isu ket nabayagyon a kinataktakunaynay, a pinaneknekanna nga isu ket naynay a mapagpannurayan. Kasta met no iti relihioso a pammati. Tapno maaddaankay iti pammati, masapulyo ti naunday a tiempo a mangam-ammo ken Jehova ken ti wagas a panangtamingnat’ bambanag.

Pammati iti kaadda ti Dios

Kitaenyo ti pinanid 113-119, iti paulo a “Dios.”

Pammati iti kaadda ti nalinteg a baro a sistema ti bambanag

No ti maysa ket kabesadona ti rekord dagiti pannakilangen ni Jehova kadagiti adipenna, tuladennanto ti panangmatmat ni Josue, a nagkuna: “Ammuenyo iti amin a pusoyo ken amin a kararuayo nga awan ti uray maysa a nagkurang kadagiti amin a naimbag a ni Jehova a Diosyo insaona a maipanggep kadakayo. Isuda amin natungpalda kadakayo. Awan ti nagkurang kadakuada uray maysa.”—Jos. 23:14.

Ti karkari ti Biblia maipapan iti napabaro a salun-at, panagungar kadagiti natay, kdp., napasingkedan gapu kadagiti milagro a gapuanan ni Jesu-Kristo. Saan a sarsarita laeng dagitoy. Basaenyo ti pakasaritaan dagiti Ebanghelio ket makitayo a ti pammaneknek ket naglaon kadagiti kinaapaghushusto ti historia. Nainaganan dagiti lugar sigun iti geograpia; naited ti nagnagan dagidi agdama nga agtuturay; naitalimeng ti pammaneknek ti nasursurok ngem maysa a nakasaksi. Ti panagmennamenna iti daytoy nga ebidensia papigsaenna ti pammatiyo iti karkari ti Biblia.

Inkayo kadagiti Kingdom Hall dagiti Saksi ni Jehova ken kadagiti kombensionda, ket makitayonto a mismo ti ebidensia a ti pannakaipakat ti balakad ti Biblia baliwanna ti kabibiag ti tattao, a pagbalinenna ti tattao a mapiar ken nalintegda iti moral, a dagiti umili nga aggapu iti amin a rasa ken pakipagilian  mabalinda ti agbiag ken agtitinnunos a buyogen ti espiritu ti pudpudno a panagkikinnabsatan.

Nesesita aya ti ar-aramid no ti maysa ket addaan pammati?

Sant. 2:17, 18, 21, 22, 26: “Ti pammati, no awan ar-aramidna, isu ti pammati a natay. Ngem kunaento ti sabali: ‘Sika adda pammatim, ket siak adda ar-aramidko. Ipakitam kaniak ti pammatim nga awan ar-aramidna, ket siak gapu iti ar-aramidko ipakitakto kenka ti pammatik.’ Saan aya a naibilang a nalinteg ni amatayo nga Abraham gapu iti ar-aramidna idi indatonna ti anakna iti rabaw ti altar? Makitamon a ti pammatina napakuyogan iti ar-aramid ket gapu iti ar-aramid ti pammatina naaramid a naan-anay. Ta kas iti bagi a no maisina iti kararua natay, kasta met ti pammati nga awan ar-aramidna natay.”

Pangarigan: Ti maysa a baro mabalin nga armenna ti maysa a balasang, a kunaenna nga isu ket ay-ayatenna. Ngem no di met ibaga ti baro nga ikasarna ti balasang, ipakpakitana aya a naan-anay ti panagayatna? Kasta met, ti ar-aramid mangipakita iti kinaagpaypayso ti pammati ken ayattayo. No ditay agtulnog iti Dios ditay taltalaga nga ay-ayaten wenno mamatitay man iti kinalinteg ti dandanana. (1 Juan 5:3, 4) Ngem ditay maullo ti pannakaisalakan uray no aniada nga ar-aramid ti iyusuattayo. Ti agnanayon a biag sagut ti Dios baeten ken Jesu-Kristo, saan a bayad para iti ar-aramidtayo.—Efe. 2:8, 9.