Dagiti natay nga inapo ammoda ngata ti ar-aramiden dagiti nabiag ket dagitoy a natay nga inapo matulonganda ngata dagiti sibibiag?

Ecl. 9:5: “Dagiti sibibiag ammoda a mataydanto; ngem dagiti natay, dida ammo ti aniaman.”

Job 14:10, 21: “Ti naindagaan a tao matay, ket sadino ti yanna? Dagiti annakna a lallaki madaydayawda, ngem isu dina ammo.”

Sal. 49:10, 17-19: “Dagiti masirib a tao matayda, ti maag ken ti nakuneng mapukawda a padapada, ket ibatida ti sanikuada kadagiti sabali. . . . Intono matay awanto ti maipanawna;  ti dayagna dinto bumaba a sumurot kenkuana. . . . Mapanto laeng ti kararuana iti kaputotan ti dadakkelna. Didanto makita uray kaanoman ti lawag.”

Saan aya nga agpayso a ti taraon a maidaton iti altar wenno idiay tanem ket agtalinaed a di masagsagid? Dina aya ipasimudaag nga awan serbina daytoy kadagiti natay?

Kitaenyo met ti paulo nga “Espiritismo.”

Adda kadi panggapuantay nga agbuteng di la ket ta dangrandatayo dagiti natay nga inapotayo?

Ecl. 9:5, 6: “Ngem dagiti natay, . . . ti ayatda ken ti gurada ken ti imonda napukawen iti nabayag, ket isuda awanandan iti pannakaibiang nga agnanayon iti aniaman a naaramid iti baba ti init.”

Adda kadi naespirituan a paset ti maysa a tao nga agtultuloy nga agbiag uray no natay ti bagina?

Ezeq. 18:4: “Adtoy! Amin a kararua—kukuak ida. Kas ti kararua ti ama kasta met ti kararua ti anak a lalaki—kukuak ida. Ti kararua nga agbasbasol—isunto a mismo ti matay.” (Kasta met ti bersikulo 20)

Sal. 146:3, 4: “Dika agkammatalek kadagiti prinsipe, ken iti annak ti naindagaan a tao . . . Ti espirituna agpukaw, isu agpulang iti dagana; iti dayta met la nga aldaw ti pampanunotna mapukawda.”

Dagiti sientista ken siruhano awan natakuatanda a sipupuot, sibibiag a paset ti tattao nga agtultuloy a sibibiag kalpasan ti ipapatay ti bagi.

Kitaenyo met dagiti panid 169, 170, iti paulo nga “Ipapatay.”

Kaykayatyo kadi a raemen ken ayatendakayo dagiti annakyo ken appoyo mientras sibibiagkayo wenno ta agalagaddanto kadagiti ritual idiay tanemyo kalpasan ti ipapatayyo?

Efe. 6:2, 3: “‘Dayawem ni amam ken ni inam’; nga isu ti umuna a bilin nga adda karina: ‘Tapno naimbag ti lak-ammo ket atiddag ti biagmo iti rabaw ti daga.’” (Dagiti annak a nasanay kadagiti prinsipio ti Biblia ipakitada ti kasta a pammadayaw a mangted rag-o iti puspuso dagiti dadakkelda bayat a sibibiagda pay.)

 Prov. 23:22: “Ipangagmo ni amam a nagputot kenka, ken dika lalaisen ni inam intono bumaket.”

1 Tim. 5:4: “No adda balo nga adda annakna wenno appona, amuen koma dagitoy nga umuna nga ipakitada ti nadiosan a debosionda kadagiti kabbalayda met laeng ken panangliwliwada kadagiti nagannak kadakuada ken kadagiti apongda, ta daytoy makaay-ayo iti imatang ti Dios.”

No dagiti baglan kunaenda nga adda mensaheda manipud kadagiti natay, adino a talaga ti naggapuan dagitoy a mensahe?

Isa. 8:19: “Intono sawenda kadakayo a tattao: ‘Umumankayo kadagiti baglan wenno kadagiti mammuyon nga agarasaas ken agtanabutob,’ saan aya a rebbeng koma dagiti umili nga umumanda iti Diosda? Gapu kadagiti sibibiag umumanda aya kadagiti natay?” (Pakdaarannatay aya ti Dios maikontra iti dayta nga aramid no agpaypayso koma a makasaritatayo dagiti ay-ayatentayo?)

Ara. 16:16: “Ket naaramid nga idi mapmapankami iti disso a pagkararagan, sinabatnakami ti maysa a balasang nga adda espirituna, maysa a demonio a mammadles. Adu ti it-itedna kadagiti appona a masapulanna iti panagpadpadlesna.”

Kitaenyo met dagiti panid 134-136, iti paulo nga “Espiritismo.”

Siasino koma ti pangiturongantayo iti panagdaydayawtayo?

Luc. 4:8: “Ni Jesus kinunana kenkuana: ‘Adda a naisurat, “Agdayawkanto ken Jehova a Diosmo, ket is-isunto laeng ti pangipaayam ti nasagraduan a panagserbi.”’”

Juan 4:23, 24: “Ti oras umay, ket adda itan, a dagiti pudno nga agdaydayaw agdaydayawdanto iti Ama iti espiritu ken iti kinapudno, ta, kinaagpaysuanna, ni Ama sapulenna ti kakasta nga agdaydayaw kenkuana. Ti Dios maysa nga Espiritu, ket dagiti agdaydayaw kenkuana masapul nga agdaydayawda iti espiritu ken kinapudno.”

Ania ti namnama maipaay iti masanguanan a panagtitiponto dagiti kameng ti pamilia, agraman dagidiay natayen?

Juan 5:28, 29: “Dikay pagsiddaawan daytoy, ta umay ti  oras a dagiti amin nga adda kadagiti tanem a pakalaglagipan mangngegdanto ti timekna ket rumuardanto, dagiti nagaramid ti naimbag iti panagungar ti biag, dagiti nagaramid ti dakes iti panagungar ti pannakaukom.”