Nainkasuratan kadi ti ritual ti pannakikappia, agraman ti panagkompesar (iti lapayag ti maysa a padi), kas isursuro ti Iglesia Katolika?

Ti wagas a panangawagda iti padi

Kastoy ti tradisional a balikas nga us-usarenda: “Kaasiannak, Padre, ta nakabasolak. Adda [napalabas a tiempon] nanipud naudi a Panagkompesarko.”—U.S. Catholic magazine, Oktubre 1982, p. 6.

Mat. 23:1, 9, JB: “Nagsao ni Jesus, . . . ‘Awan ti naganenyo ti amayo itoy rabaw ti daga, ta maymaysa ti Amayo, isu nga adda sadi langit.’”

Basbasol a mapakawan

“Insursuro a kanayon ti Simbaan nga amin a basol, uray  kasanot’ kagrabena, mapakawan.”—The Catholic Encyclopedia (addaan nihil obstat ken imprimatur), ni R. C. Broderick (Nashville, Tenn.; 1976), p. 554.

Heb. 10:26, JB: “No, iti kalpasan ti panangawattayo iti kinapudno, agbasoltayo a sipapakinakem, awanen ti mabalintayo nga idaton gapu iti basbasol.”

Mar. 3:29, JB: “No adda siasinoman nga agtabbaaw iti Espiritu Santo awanto ti pakawanna uray no kaanoman: isu makabasol iti agnanayon a basol.”

Ti panangipakita iti panagbabawi

Masansan a balakadan ti padi daydiay nagkompensar a lualuenna ti sumagmamano nga “Amami” ken “Ave Maria.”

Mat. 6:7, JB: “Iti panagkararagyo dikay agtanamitim [kayatna a sawen, awan kapapayanna a panangulit-ulit] a kas ti aramiden dagiti pagano, ta panunotenda a maipangagdanto gapu kadagiti adu a sasaoda.”

Mat. 6:9-12, JB: “Agkararagkayo ngarud a kastoy: ‘Amami sadi langit, . . . pakawanennakami kadagiti utangmi.’” (Awan a pulos naibilin iti Biblia nga agkararagtayo ken Maria wenno ipadalan ti kararag kenkuana. Kitaenyo pay ti Filipos 4:6; kasta met dagiti panid 221, 222, iti sidong ti “Maria.”)

Roma 12:19, JB: “Ti ayatyo awan koma ti panaginkukunana, no di ket sipapasnek koma a tarigagayan ti naimbag iti dakes.”

Saan aya nga imbilin ni Jesus kadagiti apostolna a mamakawanda iti basbasol?

Juan 20:21-23, JB: “‘Kas iti panangibaon kaniak ni Ama, kasta met ti panangibaonko kadakayo.’ Ket idi nasaona daytoy sinang-awanna ida ket kunana: ‘Awatenyo ti Espiritu Santo. Kadagiti pamakawananyo iti basbasol, mapakawan kadakuada; kadagiti pangigawidanyo, maigawidda.’”

Kasanot’ pannakaawat ken panangiyaplikar dagiti apostol itoy? Awan nairekord iti Biblia uray naminsan la koma a ti maysa nga apostol ket immimdeng iti pribada a panagkompesar sana pinakawan dayta. Nupay kasta, nailanad iti Biblia dagiti annongen tapno ti maysa ket pakawanen ti Dios. Dagiti apostol, babaen iti panangidalan ti nasantuan nga espiritu, mailasinda no an-annuroten met laeng dagiti indibidual dagita nga annongen ket gapu iti dayta ibagada a pinakawanen ti Dios ida wenno dina pinakawan ida. Kas pangarigan, kitaenyo ti Aramid 5:1-11, kasta met ti 1 Corinto 5:1-5 ken 2 Corinto 2:6-8.

Kitaenyo pay ti paulo nga “Apostoliko a Panagsasagadsad.”

 Nagduduma ti panangmatmat dagiti eskolar no iti punganay ti panagkompesar

The Catholic Encyclopedia, ni R. C. Broderick, kunana: “Ti panagkompesar isut’ naakseptaren a wagas nanipud idi maikapat a siglo.”—P. 58.

Kuna ti New Catholic Encyclopedia: “Adu nga agkakatawenan a historiador, agpadpada a Katoliko ken Protestante, ti agkuna a dagiti panagkompesar ket namunganayda kadagiti sursuro dagiti simbaan ti Irlanda, Wales, ken Britania, a dagiti Sakramento, agraman Penitensia, ket inwayat a masansan daydiay apo ti monasterio ken dagiti monghe sadiay. Idi a ti panagkompesar agraman ti publiko ken pribada a naespirituan a pannakaidirihir isun ti pagtuladanda, naiyintroduser ngarud kadagiti membro ti maulit-ulit a panagkompesar ken ti panangipudno iti debosion. . . . Idi laeng maika-11 a siglo a mapakawanen dagiti nalimed a basbasol apaman a maikompesar dagitoy ken sakbay pay ti panagpenitensia.”—(1967), Tomo XI, p. 75.

Kuna ni historiador A. H. Sayce: “Dagiti texto ti ritual ipakitada a ti publiko ken pribada a panagkompesar ket maal-alagad idi idiay Babilonia. Kinapudnona, kasla immun-una ken mas popular pay ti pribada a panagkompesar.”—The Religions of Ancient Egypt and Babylonia (Edinburgh, 1902), p. 497.

Aniat’ pammati dagiti Saksi ni Jehova no maipapan iti panagkompesar?

Panangikompesar iti pammati babaen iti panangipudno iti publiko

Roma 10:9, 10: “No ipudnom iti publiko dayta ‘sao dita ngiwatmo,’ a ni Jesus isu ti Apo, ket alagadem ti pammati dita pusom a ti Dios pinagungarna kadagiti natay, maisalakankanto. Ta buyogen ti puso ti maysa alagadenna ti pammati a maipaay iti kinalinteg, ngem buyogen ti ngiwat ti maysa agipudno iti publiko a maipaay iti pannakaisalakan.”

Mat. 10:32, 33: “Tunggal maysa, ngarud, a mangipudno iti pannakikaykaysana kaniak [ni Jesu-Kristo] iti sanguanan ti tattao, ipudnokto met ti pannakikaykaysak kenkuana iti sanguanan ni Amak nga adda iti langlangit; ngem uray siasino nga aglikudto kaniak iti sanguanan ti tattao, isu paglikudakto met iti sanguanan ni Amak nga adda iti langlangit.”

 No ti maysa ket agbasol iti Dios

Mat. 6:6-12: “Inton agkararagka, sumrekka iti pribada a siledmo ket, inton nairikepen ti ruangan, agkararagka ken Amam nga adda iti nalimed . . . ‘Amami nga adda iti langlangit, madaydayaw koma ti naganmo . . . pakawanennakami iti ut-utangmi, a kas met panamakawanmi kadagiti nakautang kadakami.’”

Sal. 32:5: “Impudnok met laeng kenka [iti Dios] ti basolko, ket ti kinadakesko diak inlinged. Kinunak: ‘Ipudnokto dagiti salungasingko ken Jehova.’ Ket sika pinakawanmo ti kinakas-ang ti basbasolko.”

1 Juan 2:1: “No addanto siasinoman a makabasol, addaantayo iti tumulong a mangibaet iti Ama, ni Jesu-Kristo, isu a nalinteg.”

No ti maysa ket nakabasol iti padana a tao wenno nakabasolda kenkuana

Mat. 5:23, 24: “No, ngarud, agidatdatagka ti datonmo iti altar ket idiay malagipmo a ni kabsatmo adda aniaman kenkuana a maibusor kenka, panawam sadiay ti datonmo iti sanguanan ti altar, ket pumanawka; makikappiaka pay nga umuna ken kabsatmo, ket kalpasanna, inton nakasublikan, igayatmon ti datonmo.”

Mat. 18:15: “No ni kabsatmo makabasol kenka, inka ibaga kenkuana ti basolna a dakdakayo.”

Luc. 17:3: “No makabasol ni kabsatmo babalawem, ket no agbabawi pakawanem.”

Efe. 4:32: “Agkikinnaasikayo, agdidinnungngokayo, agpipinnakawankayo a kas met ti Dios pinakawannakayo gapu ken Kristo.”

No ti maysa ket nairaman iti serioso a basol ket tarigagayanna ti naespirituan a tulong

Sant. 5:14-16: “Adda kadi ti masakit [iti naespirituan] kadakayo? Paayabanna koma dagiti panglakayen ti kongregasion, ket ikararaganda koma, a sapsapuanda ti lana iti nagan ni Jehova. Ket ti kararag ti pammati paimbagennanto ti masakit, ket isu paungarento ni Jehova. Ket no nakaaramid iti basbasol, mapakawanto kenkuana [babaen iti Dios]. Ipudnoyo ngarud a silalatak ti basbasolyo iti maysa ken maysa ket ikararagyo ti maysa ken maysa, tapno maagasankayo.”

Prov. 28:13: “Ti mangabbong kadagiti salungasingna dinto  rumang-ay, ngem ti mangipudno ken mangbaybay-an kadakuada maragpatnanto ti kaasi.”

Ania ngay no dagiti agbasbasol ket dida agpatulong?

Gal. 6:1: “Kakabsat, no ti maysa a tao masukalan iti uray ania a panagsalungasing uray sakbay a mabigbigna dayta, dakayo nga addaan naespirituan a kualipikasion bagbagaanyo dayta babaen ti espiritu ti kinatakneng, a kitaem ta bagim, di la ket ta masulisogka.”

1 Tim. 5:20: “Babalawem iti sanguanan dagiti isuamin [kayatna a sawen, dagidiay makaammo a personal iti dayta a kaso] dagidiay agbasbasol, tapno dagiti dadduma adda met butengda.”

1 Cor. 5:11-13: “Dikay makikadkadua iti uray siasino a managanan kabsat no isu mannakikamalala wenno naagum wenno agrukbab iti ladladawan wenno managsao ti dakes wenno managbartek wenno estapador, uray makipangan kenkuana, saan. . . . ‘Ikkatenyo ngarud daydiay tao a dakes iti tengngayo.’”