No iwaksi ti tattao dagiti estandarte ti Biblia, talaga kadi a magun-odda ti wayawaya?

Roma 6:16, 23: “Dikay ammo aya nga iti pangidatonanyo a situtulnog iti bagbagiyo met laeng a kas ad-adipen, isu dayta ti mangadipen kadakayo yantangay agtultulnogkayo kenkuana, uray iti basol tapno ipatay wenno uray iti kinatulnog a maipaay iti kinalinteg? . . . Dagiti supapak ti basol isu ni patay, ngem ti sagut nga ited ti Dios isu ti biag nga agnanayon ken Jesu-Kristo nga Apotayo.”

Gal. 6:7-9: “Dikay koma maallilaw: ti Dios saan a marabrabak. Ta ti aniaman nga imulanto ti maysa a tao, apitennanto met; ta ti agmula a maipaay iti lasagna, iti lasag apitennanto ti panagrupsa, ngem dayta agmula a maipaay iti espiritu, iti espiritu apitennanto ti biag nga agnanayon. Ditay ngarud mabannog iti panagaramid iti naimbag.”

Sexual a moralidad: “Ti mannakiabig agbasol ti makadadael iti bagina met laeng.” (1 Cor. 6:18) “Ti makikamalala iti maysa a babai . . . kayatna a dadaelen ti kararuana met laeng.” (Prov. 6:32) (No maipapan iti homosexualidad, kitaenyo ti Roma 1:24-27.) (Dagiti maiparit a sexual nga aramid, no iti dayta a kanito, kasla naganas. Ngem parnuayenda dagiti makarimon a saksakit, ilimlimed a sikog, aborsion, imun, nariribuk a konsiensia, pannakaaburido ti emosion, ken ti sigurado a panangkondenar ti Dios, a kenkuana agpannuray ti namnamatayo nga agbiag iti masanguanan.)

 Dagiti materialistiko a ganuat: “Dagiti agpanggep a bumaknang matnagda iti maysa a pannakasulisog ken ti maysa a silo ken kadagiti adu a tarigagay a minamaag ken makaranggas, a mangipalned iti tattao iti pannakarba ken pannakapukaw. Ta ti ayat iti kuarta isu ti maysa a ramut ti isuamin a kita ti dakes, nga idi inaguman dagiti dadduma nayaw-awanda iti pammati ket nasalputda iti adu a ladladingit.” (1 Tim. 6:9, 10) “Kunakto iti kararuak: ‘Kararua, adu dagiti gameng nga indulinmo a maisagana iti adu a tawen; aginanaka, manganka, uminumka, agragsakka.’ Ngem kinuna kenkuana ti Dios, ‘Nakuneng, ita a rabii masublian a dawaten kenka ti kararuam. Dagiti adda nga insaganam asinonto ti agtagikua kadakuada?’ Kastoy ti agurnong ti gamgameng a maisagana kenkuana ngem saan a nabaknang iti Dios.” (Luc. 12:19-21) (Dagiti material a sanikua dida mangted ti napaut a kinaragsak. Dagiti ganuat nga agpabaknang masansan a pataudenda dagiti pamilia a naleddaang, naperdi a salun-at, naespirituan a pannakapukaw.)

Panaglablabes iti arak: “Siasino ti addaan ay-ayen? Siasino ti addaan ladingit? Siasino ti addaan ringringgor? Siasino ti addaan asog? Siasino ti addaan sugat nga awan gapgapuna? Siasino ti addaan labbasit dagiti matana? Dagiti agtalinaed a napaut iti arak, dagiti mangbirok iti naggampor nga arak. Panungpalanna kumagat a kasla uleg, ket sumippit a kas karasaen.” (Prov. 23:29, 30, 32) (Ti panaginum no iti damo kasla tumulong iti maysa a manglipat kadagiti problemana, ngem saan a dayta ti mangrisut kadagita. Inton maunawanen, addanto pay laeng dagidiay problemana, masansan nanayonan pay ketdi. No sobra, ti arak dadaelenna ti dayaw ti maysa a tao, ti salun-atna, ti sangapamiliaanna, ti relasionna iti Dios.)

Panagabuso iti droga: Kitaenyo ti panid 119-126, iti paulo a “Dagiti Droga.”

Dakes a Pannakikadkadua: No adda barkada nga agkuna kenka nga ammoda ti pangalaan ti adu a kuarta a di kasapulan ti adu a bannog, sumurotkanto aya kadakuada? “Dika makikuyog iti dalan kadakuada. Tenglem ta sakam iti desdesda. Ta ti saksakada agtarayda iti dakes, ket agdarasda a mangibuyat iti dara.” (Prov. 1:10-19) No ti maysa a tao ket di agdaydayaw ken Jehova ngem kasla nasingpet met, matmatanyonto aya a kas maikanatad a gayyem? Ni Siquem anak  idi ti maysa a panguluen dagiti Canaanita ket, kuna ti Biblia, nga “isu idi ti kadayawan unay iti balay ni amana,” ngem “innalana [ni Dina] ket nakiidda kenkuana ket pinarukmana.” (Gen. 34:1, 2, 19) Adda ngata balbalena kadakayo no dagiti dadduma ket dida patien dagiti kinapudno a naadalyo manipud Sao ti Dios? “Saankayo a maallilaw. Dagiti dakes a pannakikadkadua dadaelenda dagiti nasayaat a kababalin.” (1 Cor. 15:33) Kasanot’ rikna ni Jehova no pilienyo a gagayyemyo dagidiay di mangay-ayat kenkuana? Ti pannakangiwat ni Jehova kinunana iti maysa nga Ari ti Juda a kastat’ inaramidna: “Gapu itoy a banag ti pungtot nga aggapu iti sango ni Jehova umapay kenka.”—2 Cron. 19:1, 2.

Asino ti nangidagadag iti tattao a siwayawayada koma nga agikeddeng a dida ikankano ti bilbilin ti Dios?

Gen. 3:1-5: “Itan ti uleg [nga us-usaren ni Satanas a pannakangiwatna; kitaenyo ti Apocalipsis 12:9] . . . kinunana iti babai: ‘Pudno aya a kinuna ti Dios a saankay a mangan iti amin a kayo iti minuyongan?’ Ket ti babai kinunana iti uleg: ‘Kadagiti bunga ti kaykayo iti minuyongan maipalubos a mangankami. Ngem iti bunga ti kayo nga adda iti tengnga ti minuyongan, kinuna ti Dios, “Dikayto kanen, ken uray sagiden di la ket ta mataykayo.”’ Ket ti uleg kinunana iti babai: ‘Saan a pudno a mataykayonto. Ta ti Dios ammona nga iti aldaw a pananganyo iti dayta dagiti matayo maluktandanto ket kaslakayton iti Dios, a makaammo ti naimbag ken dakes.’”

Ania nga espiritu ti mangtigtignay iti maysa no dina ikankano ti pagayatan ti Dios tapno mapnekna dagiti personal a tarigagayna?

Efe. 2:1-3: “Pinagbiagnakayo ti Dios idinto a nataykayon gapu kadagiti panagsalungasing ken basbasol, a nagnaanyo idi naminsan kas iti ugali daytoy a sistema ti bambanag daytoy a lubong [a ni Satanas ti agturay], kas mayannurot iti mangituray ti pannakabalin ti angin, ti espiritu nga ita agaramid kadagiti annak ti kinasukir. Wen, nga iti tengnga dagitoy datay met amin idi naminsan nagbiagtay iti derderrep ti lasagtayo, a tungpalentay dagiti tarigagay ti lasag ken ti pampanunot, ket iti nakayanakan annaknatayo idi ti pungtot a kas iti sabsabali.”

 Ania dagiti agwaywayas a panangmatmat a nasken a liklikan dagidiay agtarigagay nga agserbi iti Dios?

Prov. 16:18: “Ti kinatangsit umun-una ngem ti pannakadadael, ket ti napalangguad nga espiritu kasakbayan ti pannakatnag.”

Prov. 5:12: “Makunamto: ‘Anian a pananggurak idi ti sursuro ken toy pusok linaisna ti pammabalaw!’” (Ti kasta a panangmatmat ituggodna ti maysa kadagiti grabe a problema, kas ipakita ti kontexto daytoy.)

Num. 16:3: “Ket naguummongda a nagtitipon iti maibusor kada Moises ken Aaron [isuda nga ar-aramaten ni Jehova kas mangaywan iti ilina] ket kinunada kadakuada: ‘Nalabes ti panagindadakkelyo, idinto a ti amin a gimong nasantuanda tunggal maysa kadakuada ket ni Jehova siaadda kadakuada. Apayapay ngarud nga ipangpangrunayo nga itantan-ok ti bagbagiyo iti gimong ni Jehova?’”

Jud. 16: “Dagitoy a lallaki isuda dagiti managtanabutob, naagal no iti kabibiagda, a sursurotenda dagiti bukodda a tarigagay, ket ti ngiwatda sawenna ti sasao a naparammag, nga iparparangda ti pammasablogda iti tattao gapu iti magunggonada.”

3 Juan 9: “Ni Diotrefes, nga agumanna ti nagunggundaway ngem kadagiti dadduma, saannakam nga awaten a buyogen ti pammadayaw.”

Prov. 18:1: “Ti suminsina birukenna ti inaagum a tarigagayna; ket karungsotna ti amin a natarnaw a kinasirib.”

Sant. 4:13-15: “Kitaenyo ita, dakayo nga agsasao: ‘Ita nga aldaw wenno inton bigat inkamto iti maysa a siudad ket agnaedkamto idiay iti makatawen, ket agtagilakokamto ket makagunggonakamto,’ idinto a dikay ammo ti maaramidto no bigat. Ta kaslakay alibungubong nga iti apagbiit agparang ket agpukaw. Imbes ketdi, rebbengyo koma a sawen: ‘No kayat ni Jehova, agbiagkaminto ket aramidenminto daytoy wenno daydiay.’”

No ti tarigagay ti maysa nga agwaywayas ket agturong iti inna panangtulad iti lubong nga adda iti ruar ti Nakristianuan a kongregasion, asino ti pagpaspasakopanna? Ket kasanot’ panangmatmat ti Dios itoy?

1 Juan 2:15; 5:19: “Dikay ayaten ti lubong wenno ti bambanag  nga adda ditoy lubong. No ti siasinoman a tao agayat iti lubong, ti ayat ti Ama awan kenkuana.” “Ti isuamin a lubong adda iti babaen daydiay nadangkes.”

Sant. 4:4: “Daydiay, ngarud, agtarigagayto a gayyem ti lubong agbalin a kabusor ti Dios.”