Ti Dios, gaput’ dakkel nga asina, isalakannanto met la ngata amin a tattao?

Ipasimudaag kadi ti 2 Pedro 3:9 nga addanto ti sapasap a pannakaisalakan? Kunana: “Saan a namayamay ti Apo a maipapan iti karina kas iti panangibilang dagiti dadduma iti kinabayag,  no di ket agur-uray a siaanus gapu kadakayo, a dina kayat a mapukaw ti uray siasino [“dina kayat a madadael ti siasinoman,” TEV], no di ket agturongda koma amin iti panagbabawi.” (RS) Naasi a tarigagay ti Dios nga amin a kaputotan ni Adan ket agbabawida, ket sipaparabur a nangipaay iti probision tapno mapakawan ti basbasol dagidiay mayat nga agbabawi. Ngem dina piliten ti asinoman a mangakseptar iti dayta a probision. (Deut. 30:15-20) Adut’ agmadi iti dayta. Kasda la daydiay tao a malmalmes ket iwalinna daydiay salbabida nga impuruak kenkuana daydiay tao nga agtarigagay a tumulong. Laglagipenyo koma, nupay kasta, a saan nga idiay impierno nga apuy ti papanan dagidiay madi nga agbabawi. Kas ipakita ti 2 Pedro 3:9, dagidiay di agbabawi mapukawdanto, wenno ‘madadaeldanto.’ Ti bersikulo 7 (RS) tukoyenna met ti “pannakadadael ti tattao a nadangkes.” Awan ditoy ti nadakamat a sapasap a pannakaisalakan.—Kitaenyo met ti paulo nga “Impierno.”

Ti 1 Corinto 15:22 paneknekanna kadi nga amin a tattao inton agangay ket maisalakanda? Kunana: “Kas matayda amin ken Adan, kasta met mabiagdanto amin ken Kristo.” (RS) Kas naipakita kadagiti naglikmut a bersikulo, ti masalsalaysay ditoy isut’ panagungar. Siasinodanto ti mapagungar? Isuamin dagidiay natay a gapu iti basol ni Adan (kitaenyo ti bersikulo 21) ngem dida met personal a naaramid dagidiay sipapakinakem a panagsalungasing a nailanad idiay Hebreo 10:26-29. No kasano a ni Jesus nagungar manipud Hades (Ara. 2:31), kasta met a dagiti amin nga adda idiay Hades “mabiagdanto” babaen iti panagungar. (Apoc. 1:18; 20:13) Magun-oddanto amin aya dagitoy ti agnanayon a pannakaisalakan? Dayta a gundaway maluktanto kadakuada, ngem saan nga isuamin ket makaragpat iti dayta, kas ipasimudaag ti Juan 5:28, 29, a mangipakita a ti resulta kadagiti dadduma isunto ti nakaro a “pannakaukom.”

Dagidiay ngay texto a kas iti Tito 2:11, a mangtukoy ti “pannakaisalakan ti isuamin a tattao,” sigun iti patarus ti RS? Dagiti dadduma a texto, kas iti Juan 12:32, Roma 5:18, ken 1 Timoteo 2:3, 4, kasta met ti kapanunotanda sigun iti RS, KJ, NE, TEV, kdp. Dagiti Griego a sao a naipatarus kas “isuamin” ken “amin” sigun kadagitoy a bersikulo isuda dagiti inflected form ti sao a pas. Kas impakita ti Vine’s Expository Dictionary of New Testament Words (Londres, 1962, Tomo 1, p. 46), ti pas mabalin met a kaipapananna ti “tunggal kita wenno klase.” Gapuna, kadagiti bersikulo a nailanad ditoy ngato, imbes nga “isuamin,” mabalin met nga usaren ti ebkas a “tunggal kita”; wenno “amin a kita,” kas inaramid ti NW. Ania ngay ti umno—“isuamin” wenno ti kapanunotan nga iyulog ti  “amin a kita”? Bueno, ania a patarus ti maitunos kadagiti dadduma a paset ti Biblia? Daytoy naud-udi. Amirisenyo ti Aramid 10:34, 35; Apocalipsis 7:9, 10; 2 Tesalonica 1:9. (Laglagipenyo: Bigbigen met dagiti dadduma a managipatarus daytoy a sentido daytoy a Griego a sao, kas naipakita iti panangipatarusda iti Mateo 5:11—“isu amin a kita,” RS, TEV; “amin a kita,” NE; “amin a wagas,” KJ.)

Adda kadi dagiti texto a mangipiho nga addanto dagidiay di pulos maisalakan?

2 Tes. 1:9, RS: “Isuda madusadanto iti agnanayon a pannakapukaw ken pannakaisina iti sanguanan ti Apo ken ti dayag ti pannakabalinna.” (Italics added.)

Apoc. 21:8, RS: “No maipapan kadagiti natakrut, dagiti di mammati, dagiti nasabrak, dagiti mammapatay, dagiti mannakiabig, dagiti managanito, dagiti agrukbab kadagiti didiosen, ken isuamin a managulbod, ti bingayda addanto idiay danaw a sumsumged iti apuy ken asupre, nga isu ti ipapatay a maikadua.”

Mat. 7:13, 14, RS: “Sumrekkayo iti ruangan a nailet; ta akaba ti ruangan ken nalaka ti dalan, a mangiturong iti pakadadaelan, ket adu dagiti sumrek kenkuana. Ta nailet ti ruangan ken narigat ti dalan, a mangiturong iti biag, ket natakkon dagiti makasarak kenkuana.”

Apaman a naisalakan ti maysa, kankanayon kadi a naisalakanen?

Jud. 5, RS: “Tarigagayak ngarud nga ipalagip kadakayo, idinto nga ammoyon amin, nga isu a nangisalakan ti maysa nga ili idiay daga ti Egipto, kalpasanna pinukawna dagiti saan a namati.” (Italics added.)

Mat. 24:13, RS: “Ti agibtur agingga iti panungpalan maisalakanto.” (Ti ngarud ultimo a pannakaisalakan ti maysa saan a maikeddeng iti daydiay kanito nga isu ket mamatin ken Jesus.)

Fil. 2:12, RS: “Kas ti panagtulnogyo a kankanayon, kasta ita, saan laeng nga iti kaaddak no di ket nangnangruna pay iti kaawanko, turposenyo ti pannakaisalakanyo met laeng a buyogen ti buteng ken pigerger.” (Naisao daytoy kadagidiay “sasanto,” wenno dagidiay nasantuan, idiay Filipos, sigun iti Filipos 1:1. Indagadag ni Pablo kadakuada a dida koma unay agtaltalek no di ket bigbigenda a ti ultimo a pannakaisalakanda ket saan pay idi a sigurado.)

Heb. 10:26, 27, RS: “No agbasoltayo a sipapakinakem iti  kalpasan ti panangawattayo iti pannakaammo iti kinapudno, awanen ti mabalintayo nga idaton gapu iti basbasol, no di ket ti maysa a nakabutbuteng a panagur-uray iti pannakaukom, ken maysa a kinarungsot ti apuy a mangalun-unto iti kabkabusor.” (Ti Biblia ngarud dina anamongan ti idea nga uray ania a basol ti maaramidan kalpasan a ti maysa ket “naisalakan” dinanto mapukaw ti pannakaisalakanna. Paregtaenna ketdi ti kinamatalek. Kitaenyo met ti Hebreo 6:4-6, a naipakita nga uray no napulotan ti maysa iti nasantuan nga espiritu mabalin a mapukawna ti pannakaisalakanna.)

Malaksid iti pammati adda pay aya nasken tapno magun-od ti pannakaisalakan?

Efe. 2:8, 9, RS: “Gapu iti parabur [“di kaikarian a kinamanangaasi,” NW] naisalakankayo gapu iti pammati; ket daytoy saan a nagtaud kadakayo, sagut ti Dios dayta—saan nga aggapu iti ar-aramid, tapno awan siasinoman nga agpasindayaw.” (Ti intero a probision para iti pannakaisalakan isut’ ebkas ti di kaikarian a kinamanangaasi ti Dios. Awan pamuspusan a ti kaputotan ni Adan ket maisalakan a bukbukodna, uray pay kasanot’ kinasanto ti aramidna. Ti pannakaisalakan isut’ sagut ti Dios para kadagidiay mamati iti mangabbong-basol a pateg ti daton ti Anakna.)

Heb. 5:9, RS: “Isu [ni Jesus] ti nagbalin a gubuayan ti agnanayon a pannakaisalakan kadagiti isuamin nga agtulnog kenkuana.” (Italics added.) (Maikontra kadi daytoy iti daydiay nakuna a dagiti Kristiano ket ‘naisalakanda gapu iti pammati’? Saan a pulos. Ti kinatulnog idemostrana laeng a ti pammatida ket napudno.)

Sant. 2:14, 26, RS: “Ania ti magunggonana, kakabsat, no ti maysa a tao kunana nga adda pammatina ngem awan ar-aramidna? Mabalin aya dayta a pammati ti mangisalakan kenkuana? Ta kas iti bagi, a no maisina iti espiritu ket natay, kasta met ti pammati nga awanan ar-aramid natay.” (Ti maysa dina maullo ti pannakaisalakan babaen iti ar-aramidna. Ngem amin nga addaan napudno a pammati addaanto iti ar-aramid a maipakuyog iti dayta—ar-aramid ti kinatulnog kadagiti bilin ti Dios ken ni Kristo, ar-aramid a mangidemostra ti pammati ken ayatna. No awanan kakasta nga ar-aramid, natay ti pammatina.)

Ara. 16:30, 31, RS: “‘Appo, ania ti rebbengko nga aramiden tapno maisalakanak?’ Ket kinunada [Pablo ken Silas], ‘Mamatika ken Apo Jesus, ket maisalakankanto, sika ken ti sangakabbalayam.’”  (No pudno a namati daydiay a tao ken ti sangakabbalayanna, saandanto aya nga agtignay a maitunos iti pinatida? Siempre.)

‘Naisalakanakon’

Kunaenyo: ‘Maragsakanak a makaammo iti dayta, ta kaipapananna dayta a mamatikayo ken Jesu-Kristo. Ti trabaho a pakiramramanak isut’ imbilin ni Jesus kadagiti pasurotna, nga isu ti panangipakaammo kadagiti sabali ti pannakaipasdek ti Pagarianna. (Mat. 24:14)’ Sayonto inayon: (1) ‘Ania dayta a Pagarian? Tinto yaayna, aniat’ kaipapananna iti lubong? (Dan. 2:44)’ (2) ‘Aniadantot’ kasasaad ditoy daga iti sidong dayta a nailangitan a gobierno? (Sal. 37:11; Apoc. 21:3, 4)’

Wenno: ‘No kasta apresiarenyo ti sinao ni apostol Pedro, ditoy Aramid 4:12, saan kadi? . . . Inutobyo kadin no siasino ti nangited kadatayo iti nagan ni Jesus tapno mamatitay kenkuana?’ Sayonto inayon: (1) ‘Ni Jesus a mismo ti mangibaga kadatayo. (Juan 17:3)’ (2) ‘Paliiwenyo ta kinuna ni Jesus nga impakaammona ti nagan ni Amana. (Juan 17:6) Ania ti personal a naganna? Ania a bambanag ti umapay dita panunotyo? (Ex. 3:15; 34:5-7)’

‘Naisalakankay kadin?’

Kunaenyo: ‘Agingga itoy a kanito, naisalakanak. Kunak dayta ngamin siaammoak iti balakad ti Biblia a ditay koma agtalek unay iti bukodtay a takder. Kabesadoyo kadi daytoy a texto? (1 Cor. 10:12)’ Sayonto inayon: ‘Apay a kasta? Kadagidiay nabalbaliwan a naiyanak ken manginanamada iti nailangitan a biag (Heb. 3:1), insurat ni apostol Pablo . . . (Heb. 3:12-14) Mapabilegtay ti pammatitayo no bumilegtay iti pannakaammo iti Sao ti Dios.’

Wenno: ‘Mabalinko a sungbatan dayta babaen iti simple a panagkuna ti, Wen. Ngem nadamagyo kadin a saan laeng a maymaysa a pannakaisalakan ti sasawen ti Biblia? Kas pangarigan, inamirisyo kadin ti kaipapanan ti Apocalipsis 7:9, 10, 14? . . . No kasta, addanto tattao a maisalakan iti um-umay a dakkel a rigat tapno agtaengdanto a mismo ditoy daga. (Mat. 5:5)’

 ‘Akseptarenyo kadi ni Jesus bilang personal a Mangisalakan kadakayo’

Kitaenyo ti panid 195, iti paulo a “Jesu-Kristo.”

‘Kunkunaenyo a 144,000 laeng ti maisalakan’

Kunaenyo: ‘Maragsakanak ta inruaryo dayta tapno maibagak kadakayo ti taltalaga a pammatimi. Ti pannakaisalakan silulukat kadagiti mangidemostra iti pudno a pammatida iti probision nga inted ti Dios baeten ken Jesus. Ngem ti Biblia kunaenna a 144,000 laeng ti mapantot’ langit a kadua ni Kristo. Nabasayo kadin dayta idiay Bibliayo? . . . Masarakan dayta ditoy Apocalipsis 14:1, 3.’ Sayonto inayon: (1) ‘Aniantot’ aramidenda idiay langit? (Apoc. 20:6)’ (2) ‘Nabatad nga addanto dagidiay iturayanda. Siasinoda ngata dagita? . . . (Mat. 5:5; 6:10)’