Purgatorio
Kayuloganna: “Sigun iti pannursuro ti Iglesia [Katolika Romana], ti estado, lugar, wenno kasasaad idiay sumuno a lubong . . . a sadiay dagiti kararua dagiti natay nga immawat ti grasia, ngem dida pay nawayawayaan iti isuamin a kinaimperpekto, ikaroda dagidiay basolda a mabalin a pakawanen wenno para iti temporario a pannakadusa gapu kadagiti basol a mapakawan ken dagiti basol a mortal a datin a napakawan ket, iti kasta, magugoranda sakbay a sumrekda idiay langit.” (New Catholic Encyclopedia, 1967, Tomo XI, p. 1034) Saan a pannursuro ti Biblia daytoy.
Aniat’ nakaibatayan ti sursuro a purgatorio?
Kalpasan ti panangrepasona kadagiti sinao dagiti mannurat a Katoliko maipapan kadagiti texto kas iti 2 Maccabees 12:39-45, Mateo 12:32, ken 1 Corinto 3:10-15, bigbigen a kastoy ti New Catholic Encyclopedia (1967, Tomo XI, p. 1034): “Kalpasan ti pannakaanagna, ti Katoliko a doktrina maipapan iti purgatorio naibatay iti tradision, saan ket nga iti Nasantuan a Kasuratan.”
“Ti simbaan nagpannuray iti tradision a mangsuportar iti kaadda ti disso a nagbaetan ti langit ken ti impierno.”—U.S. Catholic, Marso 1981, p. 7.
No maipapan iti kasasaad ti purgatorio, aniat’ makuna dagiti pannakangiwat a Katoliko?
“Adut’ mangipapan a ti naan-anay a panagsagaba idiay purgatorio isut’ pannakarikna iti temporario a pannakaitantan ti ipapan idiay gloria, nupay ti gagangay a pammati, kas mainayon ditoy, isu ti kaadda ti positibo a pannusa . . . Sigun iti Iglesia Latina kaaduan nga insursuroda a daytoy a rigat ket mapasaran babaen iti pudpudno nga apuy. Daytoy, nupay kasta, ket saan a nesesita no iti intay panamati iti purgatorio. Saan pay ket a sigurado dayta. . . . Uray pay kas pangarigan ilaksidtay ti idea maipapan iti panagsagaba iti apuy, kas kadagiti teologo iti Dumaya, agannadtay koma a ditay laksiden amin a kita ti panagsagaba idiay purgatorio. Kaskasdi nga adda idiay dagiti napudno a rigat, leddaang, saem, pannakaibabain ti konsiensia, ken dadduma a naespirituan a leddaang a mabalin a mangibunga iti pudpudno a saem iti kararua. . . . Masapul met a laglagipentay, numan pay kasta, nga uray no agsagsagaba dagitoy a kararua addaanda met iti dakkel a rag-o gapu ta sigurado ti pannakaisalakanda.”—New Catholic Encyclopedia (1967), Tomo XI, p. 1036, 1037.
“Ti mapaspasamak idiay purgatorio ket mabalin a pugpugtuan ti uray siasino.”—U.S. Catholic, Marso 1981, p. 9.
Agbiag kadi ti kararua kalpasan ti ipapatay ti bagi?
Ezeq. 18:4, Dy: “Ti kararua [Hebreo, neʹphesh; “tao,” JB; “daydiay,” NAB, “kararua,” Kx] nga agbasol, isunto ti matay.”
Sant. 5:20, JB: “Siasinoman a mamagbabawi iti maysa a managbasol iti dakes a dalanna isalakannanto iti ipapatay ti maysa a kararua ket abbongannanto dagiti adu unay a basbasol.” (Italics added.) (Paliiwenyo ta dakamatenna ti ipapatay ti kararua.)
Para kadagiti kanayonan a detalye, kitaenyo ti paulo nga “Ipapatay” ken “Kararua.”
Adda kadi pay kanayonan a pannusa kalpasan ti ipapatay ti maysa?
Roma 6:7, NAB: “Ti tao a natayen adda a naluk-atanen iti basol.” (Kx: “Ti basol dinan singiren ti tao a natay.”)
Maragsakan kadi dagiti natay gapu ta sitatalekda iti inda panangnamnama iti pannakaisalakan?
Ecl. 9:5, JB: “Dagiti sibibiag ammoda a mataydanto, dagiti natay dida ammo ti aniaman.”
Isa. 38:18, JB: “Ti Sheol dinaka [Yahweh] mabalin a dayawen, ni patay dinaka rambakan; dagiti umulog iti abut dida mabalin nga inanamaen ti kinamatalekmo.” (Kasano ngarud nga “addaanda met iti dakkel a rag-o gapu ta sigurado ti pannakaisalakanda”?)
Sigun iti Biblia, kasano ti pannakagugor ti basbasol?
1 Juan 1:7, 9, JB: “No magnatayo iti lawag, kas isu [ti Dios] adda iti lawag, adda pannakikadkaduatayo iti maysa ken maysa, ket ti dara ni Jesus, nga Anakna, gugorannatayo iti amin a basol. . . . No ipudnotayo ti basbasoltayo, ti Dios a mapagtalkan ken nalinteg mamakawanto iti basbasoltayo ken gugorannatayo iti amin a kinakillo [“magugoranto amin nga aramidtayo a dakes,” Kx].”
Apoc. 1:5, JB: “[Ni] Jesu-Kristo ti . . . mangdungdungngo kadatayo ken nangugas kadatayo iti basbasoltayo gapu iti darana met laeng.”
