Ti karkarna a rikna a kasla kabesadoyo dagiti kabbaro a gagayyem ken luglugar paneknekanna kadi a pudno ti reinkarnasion?

Napagkamalianyo kadin ti maysa a tao a sibibiag a kas isu ti sabali a tao nga agdama met laeng a sibibiag? Adun ti nakapasar ti kasta. Apay? Ngamin ta dadduma a tattao ket agpapareho ti tigtignayda wenno agkakarupada pay ketdi. Gapuna ti rikna a kasla am-ammoyo ti maysa a tao uray diyo met dati nga am-ammo dina paneknekan nga aggayyemkayon a sigud iti dati a biag, saan kadi?

Apay a ti maysa a balay wenno maysa nga ili ket kasla kabesadoyo uray no dikay pay pulos a napnapan sadiay?  Gapu aya ta nagnaedkayo sadiay iti dati a panagbiagyo? Adu dagiti balay nga agpapareho ti pannakadisenioda. Adda dagiti muebles nga uray agaadayo dagiti siudad a nangaramid kadagita ket agpapareho ti padronda. Ket saan aya a pudno a dagiti buya dagiti agaadayo a luglugar ket dandani agpapadada? Gapuna, uray awan reinkarnasion, ti riknayo a kasla kabesadoyo dagita ket nakaaawat.

Dagiti lagipyo a kabibiag iti sabali a tiempo ken iti sabali a lugar, a lumtuad babaen iti hipnotismo, paneknekanna kadi ti reinkarnasion?

Babaen iti hipnotismo adu nga impormasion a sidudulin iti utek ti mabalin a lumtuad. Dagiti hipnotista mabalinda a kutkoten ti subconscious memory. Ngem kasano a naidulin sadiay dagita a memoria? Nalabit adda libro a nabasayo, nakabuyakayo iti sine wenno naadalyo dayta idiay telebision. No insaadyo ti bagiyo a kasla dakayo daydiay madamayo a buybuyaen, nalabit nagsayaat ti pannakaimulana kadakayo, a kasla dakayo ti makinkapadasan iti dayta. Ti banag nga inaramidyo mabalin a nabayag unayen ket nalipatanyon, ngem babaen iti hipnotismo mabalin a malagipyo dayta a kapadasan ket kunayo la no “sabali a biag” ti malaglagipyo. Kaskasdi, a no pudno koma a kasta, di koma amin a tattao ket adda kasta a malagipda? Ngem saan nga amin ket kasta. Makapainteres nga ammuen nga umad-adu a dagup dagiti korte suprema ti estado idiay Estados Unidos dagiti di mangakseptar kadagiti testimonia a rimsua babaen iti hipnotismo. Idi 1980 indeklara ti Korte Suprema ti Minnesota a “ti kalalaingan a testimonia dagiti experto ipasimudaagna nga awan experto a makakeddeng no ti memoria a kutkoten ti hipnotismo, wenno aniaman a paset dayta a memoria, ket kinapudno, kinaulbod wenno pinutar—a dagiti kawaw ket napullatan kadagiti arapaap. Ti kakasta a resulta saan a mapagtalkan sigun iti siensia ket di hushusto.” (State v. Mack, 292 N.W.2d 764) Ti impluensia dagiti singasing nga aramiden ti hipnotista iti daydiay mahipnotismo ket banag a mangapektar iti di kinamatalek daytoy.

Ti Biblia naglaon kadi ti ebidensia iti panamati ti reinkarnasion?

Ti Mateo 17:12, 13 ipasimudaagna kadi ti panamati iti reinkarnasion?

Mat. 17:12, 13: “[Kuna ni Jesus:] ‘Immayen ni Elias ket isu dida nailasin no di ket inaramidda kenkuana ti amin a kinayatda.  Kasta met ti Anak ti tao agsagabanto kadagiti imada.’ Idin dagiti adalan naawatanda a ni Juan Bautista ti kinunana kadakuada.”

Kayatna kadi a sawen daytoy a ni Juan Bautista isu met laeng ni Elias a nareinkarnado? Idi nga inimtuod dagiti Judio a papadi ken Juan, “Sika ni Elias?” kinunana, “Saan a siak.” (Juan 1:21) Ania, no kasta, ti kayat a sawen ni Jesus? Kas impadto daydi anghel ni Jehova, ni Juan napan nga immun-una ngem ti Mesias ni Jehova a buyogen “ti espiritu ken pannakabalin ni Elias, tapno pasublienna ti puspuso dagiti amma kadagiti annak ken dagiti nasungit iti kinasirib dagiti nalinteg, tapno isaganaanna ti sidadaan nga ili a maipaay ken Jehova.” (Luc. 1:17) No kasta ni Juan Bautista tungtungpalenna ti padto babaen ti panangaramidna iti trabaho a kas inaramid idi ni mammadto nga Elias.—Mal. 4:5, 6.

Reinkarnasion ngata ti ipasimudaag ti salaysay idiay Juan 9:1, 2?

Juan 9:1, 2: “Idi a limmabas [ni Jesus] nakitana ti maysa a tao a bulsek nanipud idi pannakayanakna. Ket dagiti adalanna inimtuodda kenkuana: ‘Mannursuro, asino ti nakabasol, daytoy a tao wenno dagiti dadakkelna, iti kasta nayanak a bulsek?’”

Posible ngata a dagitoy nga adalan ket naaringanda iti pammati dagiti Judio a Fariseo, isuda a nagkuna a “dagiti laeng kararua ti tattao a naimbag ti maiyalis kadagiti sabali a bagi”? (Wars of the Jews, Josephus, Libro II, kap. VIII, par. 14) Mabalbalin a saan, yantangay ti saludsodda dina ipasimudaag nga impapanda a ‘naimbag a tao’ daydi. Ad-adda ketdi a yantangay adalan ida ni Jesus namatida kadagiti Kasuratan ket ammoda a ti kararua matay. Kaskasdi, a yantangay ti maladaga idiay aanakan ket adda biagna ken nainaw iti basol, nalabit pinampanunotda no ti kasta a di pay nayanak nga ubing ket nagbasolen, a nagbanag iti panagbulsekna. Numan pay kasta, ti sungbat nga inted ni Jesus dina suportaran ti reinkarnasion wenno uray ti idea a ti ubing nga adda pay laeng iti aanakan ni inana ket nakaaramiden ti basol sakbay ti pannakayanakna. Insungbat a mismo ni Jesus: “Saan a nagbasol daytoy a tao wenno uray dagiti dadakkelna.” (Juan 9:3) Ammo ni Jesus a yantangay annaknatayo ni Adan addada tinawidtayo a natauan a depekto ken imperpeksion. Tapno maitan-okna ti Dios iti dayta a situasion, inagasan ni Jesus daydi bulsek.

 Ti pannursuro ti Biblia maipapan iti kararua ken ipapatay itulokna aya ti kaadda ti reinkarnasion?

Ti Genesis 2:7 kunana: “Ni Jehova a Dios binukelna ti tao iti tapuk ti daga ket impuyotna iti agongna ti anges ti biag, ket ti tao nagbalin a kararua a sibibiag.” Paliiwenyo ta ti tao a mismo isu ti kararua; ti kararua saan nga imaterial, a nailasin ken naisalsalumina iti bagi. “Ti kararua nga agbasbasol—isu a mismo ti matay.” (Ezeq. 18:4, 20) Ket ti tao a natay makunkuna a “natay a kararua.” (Num. 6:6) No matayen, “ti espirituna agpukaw, isu agpulang iti dagana; iti dayta met la nga aldaw ti pampanunotna mapukawda.” (Sal. 146:4) No kasta, no ti maysa matay, matay daydiay kompleto a persona; awanen ti banag nga agtalinaed a sibibiag nga umalis iti sabali a bagi. (Para iti kanayonanna a detalye kitaenyo dagiti paulo a “Kararua” ken “Ipapatay.”)

Ecl. 3:19: “Adda mapasamak kadagiti annak ti tattao ket adda mapasamak kadagiti animal, ket adda maymaysa a mapasamak kadakuada. Kas ti pannakatay ti maysa, kasta ti pannakatay ti sabali.” (Kas mapasamak iti tao, no matay ti animal awan pasetna nga agtultuloy a sibibiag. Awan banag a mapasaranna manen ti agbiag iti sabali a bagi.)

Ecl. 9:10: “Aniaman a masarakan ta imam nga aramiden, isu ti aramidem iti kabaelam, ta awan ti aramid wenno gakat wenno pannakaammo wenno sirib idiay Sheol, ti lugar a papanam.” (Saan a sabali a bagi ti papanan ti natay no di ket idiay Sheol, ti pakadagdagupan a tanem ti sangatauan.)

 Kasanot’ kadakkel ti gidiat ti reinkarnasion ken ti namnama nga ipapaay ti Biblia?

Reinkarnasion: Sigun itoy a pammati, no matay ti tao umalis ti kararuana, ti ‘pudpudno a kinaisuna,’ iti nasaysayaat a panagbiag no isu ket naimbag ken maitutop ti dati a panagbiagna, ngem nalabit umalis ti biagna iti animal no ti rekordna ket dimmakes imbes nga immimbag. Tunggal baro a pannakayanak, sigun iti pammatida, isublina dayta nga indibidual ditoy a sistema ti bambanag, tapno sarangtennanto dagiti kanayonan pay a panagsagsagaba agingga a matay iti kamaudiananna. Ti rikos daytoy a napabaro a pannakayanak matmatanda a bale awan inggana. Kasta kadi a masanguanan ti talaga nga agur-uray kadakayo? Dadduma dagiti mamati a ti laeng wagas a pangliklikan amin iti daytoy isut’ panangguped iti amin a panagtarigagay iti bambanag a makaay-ayo kadagiti sentido.  Aniat’ kayatda a liklikan? Daydiay deskribiren ti dadduma a kas awan puotna a panagbiag.

Biblia: Sigun iti Biblia, ti kararua isu daydiay kompleto a persona. Uray pay no ti maysa ket nagar-aramid iti dakes kadagiti napalabas, no isu ket agbabawi ken balbaliwanna dagiti danana, isut’ pakawanento ni Jehova a Dios. (Sal. 103:12, 13) No matay ti maysa a tao, awan pasetna nga agtultuloy nga agbiag. Ti ipapatay kasla nargaan, awan tagtagainepna a pannaturog. Addanto panagungar dagiti natay. Saan a reinkarnasion daytoy no di ti pannakaisubli met laeng dayta a personalidad. (Ara. 24:15) Para kadagiti kaaduan, ti panagungarda isunto ti panagbiag ditoy daga. Mapasamakto dayta kalpasan a pagnguduen ti Dios daytoy agdama a dakes a sistema. Ti sakit, panagsagaba, ken uray ti inkapilitan nga ipapatay, napalabasdanton. (Dan. 2:44; Apoc. 21:3, 4) Ti kadi kasta a namnama ket maysa a banag a kayatyo nga ad-adda pay nga adalen, nga usigenyo dagiti makagapu ti inkay panagtalek iti dayta?

‘Mamatiak iti reinkarnasion’

Kunaenyo: ‘Manginanamakayo nga inton agangay agresultanto iti naim-imbag a panagbiagyo, saan kadi? . . . Aniat’ makunayo, kayatyo kadi ti agbiag iti lubong a kas iti nadakamat ditoy Apocalipsis 21:1-5?’

Wenno: ‘Apresiarek ti panangibagayo kaniak iti dayta. Imtuodek man, sigud kadi a kastat’ pammatiyo? . . . Ania ti gapuna a nagpanawanyo dagidi dati a patpatienyo?’ (Sayonto usaren dagidiay idea a masarakan iti  panid 374.)

Wenno: ‘Naragsakanak a nakisarsarita kadagiti dadduma a kasta met ti pammatida. Imtuodek man, Apay a kunayo a kasapulan ti reinkarnasion?’ Sayonto inayon: (1) Malagipyo kadi amin a detalye dagiti immuna a panagbiag a patienyo a linasatyo? . . . Ngem nesesita dayta no ti maysa kayatna a korihiren dagiti dati a kamalina ken tapno isut’ rumang-ay, saan kadi?’ (2) No kunaenna a kinamanangaasi dayta no malipatantayo, iyimtuodyo: ‘Bentahetay ngata iti inaldaw a panagbiagtayo no managlilipattayo? Ngarud, no malipatantayo ti tunggal sumurok kumurang a 70 a tawen a naadaltayo, makatulongto aya dayta iti irarang-aytayo?’ (3) No kunaenna  a dagidiay laeng tattao a naim-imbag ti mapabaro a mayanak a kas tattao, iyimtuodyo: ‘Apay, ngarud, a dagiti kasasaad ditoy lubong ket kumarkaroda met?’ . . . Ipakita ti Biblia no kasano a maragpat ti pudpudno nga irarang-ay no iti kaaldawantayo. (Dan. 2:44)’