Apay a nagadu dagiti relihion?

Maysa a kabbaro a panagsirarak ti nangikeddeng nga addada 10 a kangrunaan a relihion ken agarup 10,000 a sekta. Iti daytoy a dagup, agarup 6,000 ti masarakan idiay Africa, 1,200 idiay Estados Unidos, ket ginasgasut kadagiti dadduma a dagdaga.

Adut’ makagapu iti itatanor dagiti baro a grupo dagiti relihion. Adda dagiti nagkuna a dagiti nadumaduma a relihion irepresentarda ti naggigidiat a dandana a panangidatag iti narelihiosuan a kinapudno. Ngem no dagiti pannursuro ken al-alagadenda ket idilig iti Biblia, rumsua ketdi nga aggigidiat dagiti relihion gapu ta dagiti umili nagbalinda a paspasurot ti tattao imbes nga immimdengda koma iti Dios. Makapainteres pay, ta kaaduanna, dagiti pannursuro nga ik-ikutanda nga agpapada, ngem maisungani iti Biblia, ket namunganayda iti kadaanan a Babilonia. (Kitaenyo ti panid 52, 53, iti paulo a “Dakkel a Babilonia.”)

Asino ti nangisungsong iti kasta a panagsisimparat dagiti relihion? Itudo ti Biblia a ni Satanas a Diablo isu “ti dios daytoy sistema ti bambanag.” (2 Cor. 4:4) Pakdaarannatayo a ti “bambanag nga idaton ti nasnasion idatonda ida kadagiti demonio, a saan nga iti Dios.” (1 Cor. 10:20) Anian a nagpateg, no kasta, a siguraduentayo nga agdaydayawtayo iti pudno a  Dios, ti Namarsua iti langit ken daga, ken kasta met a ti panagdaydayawtayo ket makaay-ayo kenkuana!

Dagiti amin a relihion akseptaren aya ti Dios?

Oc. 10:6, 7: “Dagiti annak ti Israel inaramidda manen daydi a dakes iti imatang ni Jehova, ket nagserbida kadagiti Baal ken ti ladladawan ni Astarot ken iti didios ti Siria ken iti didios ti Sidon ken iti didios ti Moab ken iti didios dagiti annak ni Ammon ken iti didios dagiti Filisteo. Ket indianda ni Jehova ket dida nagserbi idi kenkuana. Gapu itoy ti pungtot ni Jehova simged a maibusor iti Israel.” (No ti maysa ket agdaydayaw iti aniaman a banag wenno persona a malaksid iti pudno a Dios, a Namarsua iti langit ken daga, nabatad a ti porma ti panagdaydayawna saan nga akseptaren ni Jehova.)

Mar. 7:6, 7: “[Ni Jesus] kinunana kadakuada [a Judio a Fariseo ken dagiti eskriba]: ‘Naimbag ti panangipadto ni Isaias ti maipapan kadakayo a managinsisingpet, kas iti naisurat, “Daytoy nga umili dayawennak kadagiti bibigda, ngem ti pusoda adda iti adayo kaniak. Ngem barengbareng ti panagdayawda kaniak, ta isursuroda a kas pagalagadanda ti bilbilin ti tattao.”’” (Uray pay no siasino ti kunkunaen ti maysa a grupo a daydayawenda, no salsalimetmetanda dagiti doktrina ti tattao imbes a ti napaltiingan a Sao ti Dios, barengbareng ti panagdaydayawda.)

Roma 10:2, 3: “Ta paneknekak ida nga adda regtada a maipapan iti Dios; ngem saan a kas mayannurot iti umiso a pannakaammo; ta, idinto a dida ammo ti kinalinteg ti Dios ket idinto nga agawaanda nga isaad ti bukodda a kinalinteg, saanda a nagtulnog iti kinalinteg ti Dios.” (Mabalin nga ik-ikutan dagiti umili ti naisurat a Sao ti Dios ngem awan met ti umiso a pannakaammoda iti linaonna gapu ta di umno ti pannakaisuroda. Mabalin a ti kunada naregtada a maipaay iti Dios ngem dida met talaga nga ar-aramiden daydiay kalkalikagumanna kadakuada. Dinto makaay-ayo iti Dios ti panagdaydayawda, di ngamin?)

Pudno aya nga adda kinaimbag iti amin a relihion?

Kaaduan a relihion isuroda a saantay koma nga agul-ulbod wenno agtaktakaw, ken dadduma pay. Ngem umdas kadi daytan? Maragsakankayto aya nga uminum iti sangabaso a nasabidongan a danum gapu la ngamin ta impasiguradoda kadakayo a kaaduan nga in-inumenyo ket danum?

2 Cor. 11:14, 15: “Ni Satanas a mismo pagbalbalinenna ti  bagina a kasla anghel ti lawag. Saan ngarud a pakasdaawan a dagiti ministrona agparangda a kakasla ministro ti kinalinteg.” (Mapakdaarantay ditoy a saan nga amin a namunganay ken Satanas ket agparang a kasla nakabutbuteng. Maysa kadagiti kangrunaan a wagas a pangallilawna iti sangatauan isut’ nagduduma a kita ti ulbod a relihion, a dadduma kadagita kalupkopanna ti kasla nalinteg a langa.)

2 Tim. 3:2, 5: “Dagiti tattao . . . adda langada a nadiosan a debosion ngem libakenda ti pannakabalin daytoy; umadayoka met kadagitoy.” (Uray pay no aniat’ panagpamarangda a kasla ay-ayatenda ti Dios, no dagita kakaduayo nga agdaydayaw ket dida met sipapasnek nga iyaplikar ti Saona kadagiti biagda, paregtaennakayo ti Biblia a sumina iti kakasta a timpuyog.)

Mayanatup kadi a panawanyo ti relihion dagiti dadakkelyo?

No ti insursuro dagiti nagannak kadatayo ket talaga a naggapu iti Biblia, masapul a salimetmetantay koma dayta. Uray pay no maadaltayo a dagiti narelihiosuan nga ar-aramid ken pampammatida ket di maitunos iti Sao ti Dios, masapul a raementayo dagiti dadakkeltayo. Ngem kasano ngay no naadalyo nga adda ugali dagiti dadakkelyo a makadangran iti salun-at ken mangpaababa iti biagyo? Tuladenyonto aya ida, wenno siraraem nga iramanyo kadakuada ti naadalyo? Umarngi dita, ti pannakaammo iti kinapudno ti Biblia mangted iti responsabilidad. No adda pannakabalinna, iburaytay kadagiti pamiliatayo dagiti naadaltayo. Kaskasdi, masapul nga agdesidirtayo: Talaga kadi nga ay-ayatentayo ti Dios? Talaga kadi a kayattayo ti agtulnog iti Anak ti Dios? No aramidentay ti kasta nalabit kasapulanto a panawantayo ti relihion dagiti dadakkeltayo tapno abrasaentay ti pudno a panagdaydayaw. Sigurado a di maikanatad no dakdakkel ti debosiontayo kadagiti nagannak kadatayo ngem ti panagayattayo iti Dios ken ni Kristo, di ngamin? Kinuna ni Jesus: “Ti agayat iti ama wenno ina a nangnangruna ngem siak saan a maikari kaniak; ket ti agayat iti anak a lalaki wenno babai a nangnangruna ngem siak saan a maikari kaniak.”—Mat. 10:37.

Jos. 24:14: “Ita ngarud agbutengkayo ken Jehova ket agserbikayo kenkuana iti kinadalus ken kinapudno, ket ikkatenyo ti didios isuda a dagidi ammayo nagserbianda iti ballasiw ti Karayan ken sadi Egipto, ket agserbikayo ken Jehova.” (Kaipapananna daydi a pagpanawanda ti relihion dagidi ammada, saan kadi? Tapno akseptaren ni Jehova ti serbisioda, masapul  idi nga iwaksida dagiti imahen nga inus-usar daydi relihionda ket dalusanda ti puspusoda tapno didan tarigagayan dagita a bambanag.)

1 Ped. 1:18, 19: “Ammoyo a nasubbotkayo iti barengbareng a panagbiagyo nga impatawid kadakayo dagidi ammayo, saan a naaramat dagiti agrupsa, a kas iti pirak ken balitok. No di gapu iti napateg a dara, daydi dara ni Kristo a kas ti maysa a kordero nga awan ti pagdaksanna ken tulawna.” (No kasta, dagidi nagkauna a Kristiano inwaksida dagiti tradision dagidi ammada a di makaited kadakuada ti biag nga agnanayon. Ti panagyamanda iti daton ni Kristo isut’ nangpagagar kadakuada a mangiwaksi iti aniaman a mamagbalin iti kabibiagda a barengbareng, nga awan talaga a kayuloganna gapu ta dida met indaydayaw ti Dios. Ditay kadi a maaddaan met koma iti kasta a panangmatmat?)

Aniat’ panangmatmat ti Biblia iti panagkakappon ti pammati?

Kasano idit’ panangmatmat ni Jesus kadagiti relihioso a lider a nagpamarang a nalinteg ngem imbabainda met ti Dios? “Ni Jesus kinunana kadakuada: ‘No ti Dios koma ti amayo, ayatendak koma, ta immayak ken naggapuak iti Dios. Ta saanak nga immay a naknakemko laeng, ngem Isu imbaonnak. . . . Kukuanakayo ti Diablo nga amayo, ket kayatyo nga aramiden dagiti kalikagum ni amayo. Isu nakapapatay nanipud idi damo, ket saan a nagtalinaed iti pudno, ta awan ti pudno kenkuana. No agsao ti ulbod, sawenna ti kababalinna met laeng, ta isu manangulbod ket ama ti kinaulbod. Ngem siak, iti sabali a dasig, agsipud ta sawek ti kinapudno, didak patien. . . . Gapu iti daytoy dakayo dikay agdengngeg, ta saankayo a nagtaud iti Dios.’”—Juan 8:42-47.

Panangipakita ngata iti kinasungdo iti Dios ken kadagiti nalinteg nga estandartena no dagiti adipenna ket inda abrasaen iti relihioso a panagkikinnabsat dagidiay mangal-alagad wenno mangkonkonsintir iti bambanag a konkondenaren ti Dios? “Dikay makikadua iti uray siasino a managanan kabsat no isu mannakiabig wenno naagum wenno agrukbab iti ladladawan wenno managbartek wenno nagaramugam, iti kasta a tao uray makipangan kenkuana, saan. . . . Uray dagiti mannakiabig, uray dagiti agrukbab iti ladladawan, uray dagiti mannakikamalala, uray dagiti lallaki a maipaay iti di nainkasigudan a pangpanggep, uray dagiti lallaki a makidinna iti lallaki, uray dagiti mannanakaw, uray dagiti naagum, uray dagiti managbartek,  uray dagiti managtabbaaw, uray dagiti managpaanak saandanto a tawiden ti pagarian ti Dios.” (1 Cor. 5:11; 6:9, 10) “Daydiay . . . agtarigagayto a gayyem ti lubong agbalin a kabusor ti Dios.” (Sant. 4:4) “O dakayo nga agayat ken Jehova, guraenyo ti dakes. Isu salaknibanna dagiti kararua dagidiay nasungdona.”—Sal. 97:10.

2 Cor. 6:14-17: “Saankay a makikadua iti sangol dagiti saan a mammati. Ta ania ti pakikaduaan ti kinalinteg ken iti kinakillo? Ta ania ti pakikaduaan ti kinalinteg ken iti kinakillo? Wenno ania ti pagkaduaan ti silaw ken ti sipnget? Mainayon pay, ania ti pakikappiaan ni Kristo ken Belial? Wenno ania ti pakaibiangan ti mammati iti saan a mammati? Ket ania ti pakainugotan ti templo ti Dios kadagiti idolo? . . . ‘“Gapuna pumanawkayo iti nagtengngaanda, ket suminakayo,” kuna ni Jehova, “ket saanyo a sagiden ti aniaman a di nadalus”’; ‘“ket siak awatenkayto.”’”

Apoc. 18:4, 5: “Nangngegko ti sabali a timek a naggapu sadi langit a kunkunana: ‘Rummuarkay kenkuana, tattaok, tapno dikay mairaman iti basbasolna, ken tapno saanyo nga awaten dagiti saplitna. Ta ti basbasolna nakagtengda sadi langit, ket ti Dios linagipna dagiti kinadangkesna.’” (Para kadagiti detalye, kitaenyo ti paulo a “Dakkel a Babilonia.”)

 Nesesita kadi ti ikakamang iti organisado a relihion?

Kaaduan a relihioso nga organisasion nagpataudda ti dakes a bungbunga. Ti dakes saan a daydiay kinaorganisado dagiti grupo. Ngem adu dagidiay nangpanuynoy kadagiti porma ti panagdayaw a naibatay kadagiti ulbod a pannursuro ket ritual ti kaaduan nga al-alagadenda imbes a mangtedda koma ti napudpudno a naespirituan a giya; inabusoda dagiti organisasion tapno matengngelda dagiti biag dagiti umili para kadagiti inaagum a gandatda; naseknanda unay kadagiti panagkolekta iti kuarta ken dagiti naranga a simsimbaan imbes a kadagidiay naespirituan ti pategda; dagiti miembroda masansan a managinsisingpetda. Nabatad a daydiay agayat iti kinalinteg dina kayat ti makimiembro iti kasta nga organisasion. Ngem ti pudno a relihion makapabang-ar ti pannakaigidiatna kadagita. Kaskasdi, tapno matungpalna dagiti kalikagum ti Biblia, masapul nga organisado dayta.

Heb. 10:24, 25: “Agpipinnanunottayo a maipaay iti pannakaparegtatayo iti ayat ken iti naimbag nga ar-aramid, a ditay baybay-an dagiti panaggigimongtayo, kas iti kadawyan dagiti  dadduma, no di ket agbibinnalakadtayo, ket nangnangruna gapu ta makitayo nga umas-asideg ti aldaw.” (Tapno matungpal daytoy a Nainkasuratan a bilin, masapul nga adda dagiti Nakristianuan a gimong a tabunuantayo a naynay. Ti kasta nga urnos paregtaennatayo a mangiyebkas ti ayat kadagiti sabsabali, a di bagitay laeng ti pakaseknantayo.)

1 Cor. 1:10: “Dawatek ngarud kadakayo, kakabsat, gapu iti nagan ni Apotayo a Jesu-Kristo a sawenyo amin koma ti maymaysa a banag, ket awan koma dagiti panaglalasin kadakayo, no di ket naan-anay koma ti panagtitimpuyogyo iti maymaysa a panunot ken maymaysa a panagrikna.” (Ti kasta a panagkaykaysa di maragpat no dagiti indibidual ket dida aggigimong, a mangsagrap iti agpapada a naespirituan a pagtaraon, ken raemen ti ahensia a naaramat a mangipaay iti kasta nga instruksion. Kitaenyo met ti Juan 17:20, 21.)

1 Ped. 2:17: “Ayatenyo ti intero a timpuyog dagiti kakabsat.” (Saklawenna laeng aya dayta dagidiay agkakadua nga aggigimong iti maysa a partikular a pagtaengan? Pulos a saan; internasional a panagkakabsat daytoy, sigun iti Galacia 2:8, 9; 1 Cor. 16:19.)

Mat. 24:14: “Daytoy naimbag a damag ti pagarian maikaskasabanto iti amin a napagnaedan a daga tapno mangpaneknek kadagiti isuamin a nasion; ket iti kasta umayton ti panungpalan.” (Tapno amin a nasnasion ket magundawayanda a denggen ti naimbag a damag, masapul a mairingpas ti panangasaba iti naurnos a wagas, buyogen ti maitutop a pannakaaywan. Ti panagayatda iti Dios ken iti padada a tao isut’ nanggutugot kadagiti tattao iti intero a daga tapno pagkaykaysaenda ti pigsada a mangiringpas iti daytoy a trabaho.)

Kitaenyo met ti paulo nga “Organisasion.”

 Ti panangayat iti pada a tao isu laeng aya ti nasken?

Di pagduaduaan, ti kasta nga ayat ket nasken. (Roma 13:8-10) Ngem ti panagbalin a Kristiano ad-adut’ saklawenna ngem ti mangaasika laeng kadagiti kaaruba. Imbaga ni Jesus a dagiti pudno nga adalanna mailasindanto unay gapu iti ayatda iti maysa ken maysa, para kadagiti kapammatianda. (Juan 13:35) Ti kinanasken dayta ket naulit-ulit nga inggunamgunam ti Biblia. (Gal. 6:10; 1 Ped. 4:8; 1 Juan 3:14, 16, 17) Nupay kasta, impakita ni Jesus a napatpateg pay ti panagayattayo iti Dios a mismo, a maipakita babaen iti panagtulnogtayo kadagiti  bilinna. (Mat. 22:35-38; 1 Juan 5:3) Tapno maiparangarangtay ti kasta nga ayat, masapul nga adalentayo ken iyaplikartayo ti Sao ti Dios ket makigimongtayo kadagiti padatayo nga ad-adipen ti Dios maipaay iti panagdaydayaw.

Ti kaadda ti personal a relasiontay iti Dios isu kadi ti talaga a nasken?

Sigurado a nasken dayta. Ti ritual laeng nga itatabuno kadagiti relihioso a gimong saanna a masandian dayta. Ngem masapul nga agannadtayo. Apay? Idi immuna a siglo, adda dagiti umili nga impagarupda nga adda naimbag a relasionda iti Dios ngem impakita ni Jesus a nagkamali dagitoy. (Juan 8:41-44) Insurat ni apostol Pablo nga adda dagidiay kasla nakaregregta no iti pammatida ket nabatad nga impagarupda a naimbag ti relasionda iti Dios ngem dida met a talaga a naawatan no ania ti kalikaguman ti Dios tapno magun-odda ti anamongna.—Roma 10:2-4.

Adda ngata naimbag a personal a relasiontayo iti Dios no tagtagibassitentay met ti bilbilinna? Maysa kadagitoy isu ti regular a pannakigimongtayo kadagiti kapammatiantayo.—Heb. 10:24, 25.

 No personal a basaentay ti Biblia, umdas kadi daytan?

Pudno nga adu a tattao ti makaadal iti nawadwad no personal a basaenda ti Biblia. No ti motiboda isut’ panangadalda iti kinapudno maipapan iti Dios ken ti pangpanggepna, makomendaran unay ti ar-aramidenda. (Ara. 17:11) Ngem, no napudnotayo iti bagbagitayo, maibuksilantay ngata ti naan-anay nga anag ti Biblia no awan mangtulong kadatayo? Ti Biblia saritaenna maipapan iti maysa a lalaki a nangato ti saadna ngem sipapakumbaba a binigbigna a masapulna ti tulong tapno maawatanna ti naipadto iti Biblia. Ti nangtulong kenkuana isut’ maysa a kameng ti Nakristianuan a kongregasion.—Ara. 8:26-38; idiligyo dagiti dadduma pay a pannakadakamat ken Felipe idiay Aramid 6:1-6; 8:5-17.

Wen, no ti maysa a tao basaenna ti Biblia ngem dina met iyaplikar dayta iti biagna, awan serbina kenkuana. No patienna dayta santo agtignay a maitunos iti dayta, isu ket mapanto makitimpuyog kadagiti adipen ti Dios kadagiti regular a gimongda. (Heb. 10:24, 25) Makiramanto met kadakuada a mangiburay iti “naimbag a damag” kadagiti sabsabali.—1 Cor. 9:16; Mar. 13:10; Mat. 28:19, 20.

   Kasano a maamuan ti maysa no ania a relihion ti umiso?

(1) Aniat’ nakaibatayan dagiti sursuro dayta a relihion? Namunganayda ngata iti Dios, wenno kaaduanna ket sursuro ti tao? (2 Tim. 3:16; Mar. 7:7) Imtuodenyo, kas pangarigan: Adino idiay Biblia nga isursurona a ti Dios ket Trinidad? Adino sadiay ti kunaenna a ti kararua ti tao ket di matay?

(2) Amirisenyo no ipakpakaammona ti nagan ti Dios. Kinuna ni Jesus sigun iti kararagna iti Dios: “Impalawagko ti naganmo kadagiti tao nga intedmo kaniak.” (Juan 17:6) Imbagana: “Agdaydayawka ken Jehova a Diosmo, ket isu laeng ti pangipaayam ti nasagraduan a panagserbi.” (Mat. 4:10) Insuro kadi ti relihionyo a ni ‘Jehova koma ti pagdaydayawanyo’? Naam-ammoyo kadin daydiay Persona a makinnagan iti dayta—ti pangpanggepna, dagiti aramidna, dagiti galadna—tapno sitatalekkayo koma nga umadani kenkuana?

(3) Maiparparangarang met la aya ti pudno a panamati ken Jesu-Kristo? Saklawenna daytoy ti panangapresiar iti pateg ti pannakaidaton ti natauan a biag ni Jesus ken iti saadna itatta bilang nailangitan nga Ari. (Juan 3:36; Sal. 2:6-8) Ti kasta a panangapresiar maipakita babaen iti panagtulnog ken Jesus—iraraman a personal ken sireregta iti trabaho nga intudingna kadagiti pasurotna. Ti pudno a relihion addaan ti kasta a pammati a mabuyogan iti ar-aramid.—Sant. 2:26.

(4) Puro kadi ritual, seremonia, wenno wagas ti panagbiag dayta? Ti Dios guraenna unay ti relihion a seremonia laeng. (Isa. 1:15-17) Ti pudno a relihion itandudona ti estandarte ti Biblia maipapan iti moralidad ken nadalus a panagsasao imbes a sikakapuy a sumursurot laeng kadagiti popular a pagannayasan. (1 Cor. 5:9-13; Efe. 5:3-5) Dagiti miembrona iparangarangda ti bungbunga ti espiritu ti Dios no iti kabibiagda. (Gal. 5:22, 23) Gapuna, dagidiay mangannurot iti pudno a panagdayaw mailasin ida gapu ta sipapasnekda a mangiyaplikar kadagiti estandarte ti Biblia kadagiti kabibiagda, saan laeng nga idiay paggigimonganda, no di ket iti sangapamiliaanda, kadagiti panggedanda, idiay eskuelaan ken iti panaglinglingayda.

(5) Talaga kadi nga agiinnayat dagiti miembroda? Kinuna ni Jesus: “Gapu itoy mailasindanto a dakayo dagiti adalak, no adda ayatyo iti maysa ken maysa.” (Juan 13:35) Ti kasta nga ayat salputenna dagiti beddeng ti rasa, sosial, ken pagilian, a pagtitimpuyogenna ti tattao iti napudno a panagkakabsat.  Nakabilbileg unay daytoy nga ayat nga isut’ mangisalsalumina kadakuada. No aggugubat ti nasnasion, siasinodat’ addaan umdas a panagayat iti Nakristianuan a kakabsatda nga agnanaed iti sabali a dagdaga gapuna agkitakitda nga agiggem iti armas ken mangpapatay kadakuada? Kastat’ inaramid dagidi nagkauna a Kristiano.

(6) Talaga aya a dayta a relihion ket naisina iti lubong? Kinuna ni Jesus a dagiti pudno a pasurotna “saanda a paset ti lubong.” (Juan 15:19) Tapno agdaydayawtayo iti Dios iti wagas nga anamonganna masapul nga agtalinaedtayo nga “awan tulaw ti lubong.” (Sant. 1:27) Masaoyo aya ti kasta no dagiti klerigo ken dadduma a miembro ket makinamnaminda iti politika, wenno ti kabibiagda ket nangnangruna a naipamaysa kadagiti materialistiko ken nainlasagan a tartarigagay?—1 Juan 2:15-17.

(7) Dagiti miembroda aktiboda kadi a mangikaskasaba iti Pagarian ti Dios? Impadto ni Jesus: “Daytoy naimbag a damag ti pagarian maikaskasabanto iti amin a napagnaedan a daga tapno mangpanekbek kadagiti isuamin a nasion; ket iti kasta umayton ti panungpalan.” (Mat. 24:14) Ania a relihion ti talaga a mangiwarwaragawag iti Pagarian ti Dios bilang namnama ti sangatauan imbes a parparegtaenda ti tattao a manginanama iti natauan a turay a mangrisut kadagiti problemada? Sinanaynakayo aya ti relihionyo a makiraman itoy a trabaho, ken aramidenyo dayta iti binalaybalay a kas insuro ni Jesus nga aramiden dagiti apostolna?—Mat. 10:7, 11-13; Ara. 5:42; 20:20.

Mamati kadi dagiti Saksi ni Jehova a ti laeng relihionda ti umiso a relihion?

Kitaenyo ti panid 337, 378, iti paulo a “Dagiti Saksi ni Jehova.”

Apay a dadduma a tattao ket addandat’ pammati idinto ta dagiti dadduma ket awanan?

Kitaenyo ti paulo a “Pammati.”

‘Saanak nga interesado iti relihion’

Kunaenyo: ‘Diak masdaawan. Adu ti kastat’ panangmatmatna.  Imtuodek man, Sigsigud kadi a kastat’ riknayo?’ Sayonto inayon: ‘Maysa kadagiti nagsiddaawak isut’ pannakatakuatko a dandani amin a kangrunaan a doktrina nga isursuro dagiti simbaan ket saan a masarakan ditoy Biblia. (Nalabit usarenyo ti masarakan idiay panid 337, 378, iti “Dagiti Saksi ni Jehova,” nga igunamgunamyo unay ti Pagarian. Kas panangidilig, ipatuldoyo ti patpatien dagiti Saksi ni Jehova, kas nabalabala idiay panid 372-374.)’

Kitaenyo met ti panid 16, 17.

‘Naumaakon kadagiti managinsisingpet a relihion’

Kunaenyo: ‘Wen, umanamongak kadakayo. Sabalit’ ikasabada ngem sabali met ti aramidenda. Ngem ibagayo man, Aniat’ makunayo no maipapan iti Biblia? (Sal. 19:7-10)’

‘Nalinteg ti panagbiagko. Diak dangran ti kakaarubak. Umdas a relihion daytan para kaniak’

Kunaenyo: ‘Yantangay kunayo a nalinteg ti panagbiagyo, nabatad a tagtagiragsakenyo ti biag, saan kadi? . . . Kayatyo kadi ti agbiag iti sidong ti kasasaad a nadeskribir ditoy Apocalipsis 21:4? . . . Paliiwenyo ti kuna ti Juan 17:3 a kasapulan tapno masagrapyo dayta.’

Kitaenyo met ti  panid 366, 367.

‘Saanak nga interesado iti relihion nga organisado. Mamatiak nga umdasen ti personal a relasionko iti Dios’

Kunaenyo: ‘Interesadoak man dita. Sigsigud kadi a kastat’ riknayo? . . . Nakitimtimpuyogkay met kadi a dati iti narelihiosuan a grupo? . . . (Sayonto usaren ti material idiay  panid 365-367.)’

‘Diak umanamong kadagiti dadduma nga isursuro ti relihionko, ngem diak kasapulan ti umalis iti sabali. Parang-ayek laengen daytoy ayanko’

Kunaenyo: ‘Apresiarek ti panangibagayo iti dayta. Sigurado nga umanamongkayo a ti talaga a nasken kadatay amin isut’ pannakagun-od iti anamong ti Dios, di ngamin?’ Sayonto inayon: (1) ‘Pagpanunotennatayo a nalaing ti Dios sigun iti  adda ditoy Apocalipsis 18:4, 5. . . . Uray no ditay personal nga ar-aramiden dagitoy dakes nga aramid, ipakpakita ti Biblia a makiramantayo iti basol no suportarantayo dagitoy nga organisasion. (Kitaenyo met ti paulo a “Dakkel a Babilonia.”)’ (2) (Nalabit mausaryo met ti material idiay  panid 368, 369.) (3) ‘Birbiroken ti Dios dagidiay mangayat iti kinapudno ket pagtitiponenna ida a maipaay iti nagkaykaysa a panagdaydayaw. (Juan 4:23, 24)’

‘Naimbag amin a relihion; adda relihionyo ket adda met kukuak’

Kunaenyo: ‘Talaga a nalawat’ panagpampanunotyo. Ngem bigbigenyo met a masapultayo ti giya nga itden ti Sao ti Dios, ket daytat’ gapuna nga adda relihionyo, saan kadi?’ Sayonto inayon: ‘Ditoy Mateo 7:13, 14 ikkannatay ti Biblia iti nagpateg a giya sigun iti sasao ni Jesus. (Basaenyo.) . . . Apay ngata a kasta?’

Kitaenyo met idiay  panid 361, 362.

‘Basta mamatika ken Jesus, awan diperensiana uray ania a simbaan ti serserkem’

Kunaenyo: ‘Di pagduaduaan, nesesita ti panamatitay ken Jesus. Ket nalabit gapu iti dayta akseptarenyo amin nga insurona. Nalabit, napaliiwyo, a kas napaliiwko, nga adu dagidiay agkunkuna a Kristianoda ngem dida met a talaga nga al-alagaden ti kayulogan dayta a nagan.’ Sayonto inayon: (1) ‘Paliiwenyo ti kinuna ni Jesus ditoy Mateo 7:21-23.’ (2) ‘Adda nakaskasdaaw a masanguanan dagidiay mayat a mangammo iti pagayatan ti Dios sadanto tungpalen dayta. (Sal. 37:10, 11; Apoc. 21:4)’

‘Aniat’ pagkunaanyo a maymaysa laeng a relihion ti umiso?’

Kunaenyo: ‘Awan duadua, adda dagiti napasnek a tattao iti nganngani amin a relihion. Ngem ti talaga a nasken isu daydiay kunaen ti Sao ti Dios. Mano kadi a pudno a pammati ti tuktukoyenna? Paliiwenyo man ti naisurat ditoy Efeso 4:4, 5.’ Sayonto inayon: (1) ‘Maiyataday dayta iti kunaen dagiti dadduma a texto. (Mat. 7:13, 14, 21; Juan 10:16; 17:20, 21)’ (2) ‘No kasta, ti karit a sarangtentayo, a ta, no kasanotay nga ilasin dayta a relihion. Kasanotay nga aramiden dayta? (Nalabit usarenyo ti material idiay  panid 368, 369.)’ (3) (Kitaenyo  met ti adda idiay panid 372-374, iti paulo a “Dagiti Saksi ni Jehova.”)

‘Basaek la ti Bibliakon ditoy balay saak dumawat iti Dios ti pannakaawat’

Kunaenyo: ‘Nabasayo kadin ti intero a Biblia?’ Sayonto inayon: ‘Bayat nga ar-aramidenyo dayta, adda makapainteres unay a mabasayo idiay Mateo 28:19, 20. . . . Nasken daytoy yantangay ipakitana a ni Kristo us-usarenna ti dadduma a tattao a tumulong kadatayo a mangtarus no aniat’ saklawen ti panagbalin a pudno a Kristiano. Maitunos iti dayta, ituktukon dagiti Saksi ni Jehova ti ibibisita kadagiti balbalay iti agarup maysa nga oras iti linawas, awan bayadna, tapno salaysayenda ti Biblia. Di la mabalin nga ipakitak biit kadakayo no kasanomi nga ar-aramiden dayta?’

Kitaenyo met ti  panid 367.

‘Ti kunak ti relihion ket personal a banag’

Kunaenyo: ‘Gagangay itan dayta a panangmatmat, ket no talaga a dagiti bumalay ket dida interesado iti mensahe ti Biblia, siraragsakkami a mapan kadagiti sabali a balay. Ngem nabigbigyo kadi a ti gapu ti isasarungkarko kadakayo a ta daytoy ti imbilin ni Jesus nga aramiden dagiti pasurotna? . . . (Mat. 24:14; 28:19, 20; 10:40)’