Kasanot’ pannakaammotayo no talaga met la nga adda ti kasta nga espiritu a persona?

Ti Biblia isut’ kangrunaan a gubuayan ti pammaneknek. Idiay isu ket naulit-ulit a natukoy babaen iti naganna (Satanas iti 52 daras, Diablo iti 33 daras). Ti pammaneknek dagiti nakasaksi iti kaadda ni Satanas isut’ nairekord met iti Biblia. Siasino ti nakasaksi kenkuana? Ni Jesu-Kristo, isu a nagtaeng idiay langit sakbay ti yaayna ditoy daga a kas tao a Jesus ken isu a nangulit-ulit a nangdakamat iti nagan dayta a nadangkes.—Luc. 22:31; 10:18; Mat. 25:41.

Nakaaawat ti kunaen ti Biblia maipapan ken Satanas a Diablo. Ti kinadakes a mapaspasaran ti sangatauan nakaro unay no maidilig iti dakes a panagem ti tattao a nainaig dita. Ti panangilawlawag ti Biblia maipapan iti punganay ni Satanas ken dagiti aramidna ibuksilanna no apay, nga uray tarigagayan dagiti kaaduan ti agkikinnappia, ti sangatauan kanayon a nadidigra iti guranggura, kinaranggas ken gubat iti unos ti rinibribon a tawen ken no apay a kimmaro unayen daytoy a pagpeggadenna ti pannakadadael ti isuamin a tattao.

No talaga koma nga awan Diablo, ti panangakseptartayo iti kunaen ti Biblia maipapan kenkuana saan a makaited ti manayon a paglaingan ti maysa. Ngem iti adun a kaso, dagidiay dati a makinamnamin iti okulto wenno dagidiay kameng dagiti grupo a mangal-alagad iti espiritismo ireportda nga idi damo napalalot’ pannakadidigrada gaput’ pannakadengdengngegda kadagiti “timek” manipud kadagiti di makita a gubuayan, nga “inadipen” ida dagiti parsua a nabilbileg ngem tao, kdp. Sada la pudpudno a nabang-aran idi naadalda ti kunaen ti Biblia maipapan ken Satanas ken dagiti demoniona ket inyaplikarda ti balakad ti Biblia nga iwaksida dagiti espiritistiko nga aramid ket  birukenda ti tulong ni Jehova.—Kitaenyo ti panid 134-139, iti paulo nga “Espiritismo.”

Ti panamatitay iti kaadda ni Satanas dina kayat a sawen nga akseptarentayo ti idea nga isu ket adda sarana, nagtarid ti iposna ket adda dakkel a tinidorna a paglitsonna iti tattao idiay umap-apuy nga impierno. Awan kasta a ladawan nga itden ti Biblia maipapan ken Satanas. Produkto dayta ti is-isip dagidi nagkauna a pintor a naimpluensiaanda kadagiti ladawan ti sarsarita a Griego a dios a ni Pan ken ti Inferno nga insurat ni Italiano a dumadaniw a ni Dante Alighieri. Imbes nga isursuronat’ maipapan iti umap-apuy nga impierno, nabatad a kunaen ti Biblia a “dagiti natay . . . dida ammo ti aniaman.”—Ecl. 9:5.

Ni Satanas isu laeng ngata daydiay kinadakes iti uneg ti tattao?

Ti Job 1:6-12 ken 2:1-7 saritaenda maipapan iti panagsinsinnarita ni Jehova a Dios ken ni Satanas. No ni Satanas isu koma daydiay kinadakes iti uneg ti maysa a persona, rumsua a ti kinadakes no itoy a kaso ket adda ken Jehova. Ngem naan-anay a maisungani dayta iti ibagbaga ti Biblia kadatayo maipapan ken Jehova a kas isu Daydiay “awan kinakillo kenkuana.” (Sal. 92:15; Apoc. 4:8) Makapainteres nga ammuen a ti Hebreo a texto inusarna ti ebkas a has·Sa·tanʹ (ti Satanas) no kadagitoy a salaysay, nga ipakpakitana a ti tuktukoyenda isu daydiay karkarna a sumupsuppiat iti Dios.—Kitaenyo met ti Zacarias 3:1, 2, footnote ti NW Reference edition.

Ti Lucas 4:1-13 inreportna a ti Diablo inkagumaanna a sulisogen ni Jesus nga agtulok kenkuana. Dayta a salaysay saritaenna dagiti sinao ti Diablo ken dagiti insungbat ni Jesus. Ni Jesus sulsulisogen ngata ti kinadakes nga adda a mismo kenkuana? Ti kasta a panangmatmat saan a maitunos iti panangdeskribir ti Biblia ken Jesus kas maysa nga awanan basol. (Heb. 7:26; 1 Ped. 2:22) Nupay no idiay Juan 6:70 nausar ti Griego a sao a di·aʹbo·losʹ a nangdeskribir iti dakes a kababalin a timmanor ken Judas Escariote, idiay Lucas 4:3 nausar ti ebkas a ho di·aʹbo·los (ti Diablo), ngarud tudtuduenna ti maysa a persona.

Ti panangpabasoltay iti Diablo maysa la ngata a pamuspusan tapno maliklikantay ti basoltayo iti kaadda dagiti dakes a kasasaad?

Dagiti dadduma pabasolenda ti Diablo kadagidiay basolda a mismo. Kas panagdinnilig, ipakita ti Biblia a ti tattao masansan nga isuda met lat’ makimbasol kadagiti kinadakes a mapaspasaranda, uray no manipud sabali a tattao wenno kas resulta ti  mismo a kababalinda. (Ecl. 8:9; Gal. 6:7) Kaskasdi, ti Biblia dinatay baybay-an nga ignorante iti kaadda ken kinasikap ti kabusor a nabilbileg ngem tao a nangyeg iti sangatauan ti nakaro a ladingit. Ipakitana no kasanotay a makaluk-at manipud panangtengngelna.

Naggapuan ngay ni Satanas?

Amin nga ar-aramid ni Jehova perpektoda; isu saan nga autor ti kinakillo; gapuna dina pinarsua ti siasinoman a nadangkes. (Deut. 32:4; Sal. 5:4) Daydiay nagbalin a Satanas ket perpekto nga espiritu nga anak ti Dios idi damo. Idi kinuna ni Jesus a ti Diablo “saan a nagtalinaed iti kinapudno,” impasimudaagna nga idi damo isu ket adda “iti kinapudno.” (Juan 8:44) Ngem, kas pudno kadagiti isuamin nga intelihente a parparsua ti Dios, daytoy nga espiritu nga anak addaan iti siwayawaya a nakem. Inabusona daydi wayawayana nga agpili, pinalubosanna a tumanor idiay pusona dagiti rikna ti panagpaimportante, inagumanna ti dayaw a kukua laeng ti Dios, ket iti kasta sinugsoganna da Adan ken Eva nga umimdeng kenkuana imbes nga agtulnogda koma iti Dios. Gapu iti tigtignayna pinagbalinna ti bagina a Satanas, a kaipapananna ti bumusbusor.—Sant. 1:14, 15; kitaenyo met ti panid 56, iti paulo a “Basol.”

Apay a ti Dios dina dinadael a dagdagus ni Satanas kalpasan ti yaalsana?

Pinataud ni Satanas dagiti serioso nga isyu: (1) Ti kinalinteg ken ti kinaumiso ti kinasoberano ni Jehova. Adda kadi ikedkedked ni Jehova iti tao a wayawayana a mangnayon iti kinaragsakna? Ti ngata abilidad ti sangatauan a manarawidwid a sibaballigi kadagiti ganuatda ken ti pannakataginayon ti biagda talaga kadi nga agpannuray iti kinatulnogda iti Dios? Nagulbod kadi ni Jehova idi nangted ti linteg a kunana a ti kinasukir ket agturong ken patay? (Gen. 2:16, 17; 3:3-5) Gapuna, talaga ngata nga adda kalintegan ni Jehova a mangituray? (2) Ti kinatarnaw dagiti intelihente a parsua ken Jehova. Gaput’ isisiasi da Adan ken Eva rimsua ti saludsod a: Talaga ngata a dagiti adipen ni Jehova agtulnogda kenkuana gaput’ ayatda wenno isuda amin ket talikudanda ti Dios ket surotenda ti dana ni Satanas? Daytoy maikadua nga isyu lallalo pay a pinadakkel ni Satanas idi kaaldawan ni Job. (Gen. 3:6; Job 1:8-11; 2:3-5; kitaenyo met ti Lucas 22:31.) Dagitoy nga isyu saan a mabalin a marisut laeng babaen iti panangpapatay kadagiti immalsa.

Saan a gapu ta kayat a paneknekan ti Dios ti aniaman kenkuana  met laeng. Ngem tapno dagitoy nga isyu ket didanton pulos a singaen ti talna ken urnos ti uniberso, impalubos ni Jehova ti umdas a tiempo tapno marisut dagita nga awanan a pulos panagduadua. Idi agangay natay da Adan ken Eva kalpasan ti panagsukirda. (Gen. 5:5) Ngem adda pay nainaig iti dayta nga isyu. Gapuna, impalubos ti Dios a ni Satanas ken ti tattao ipadasda amin a porma ti gobierno a partuatda. Awan ti nakaited iti manayon a kinaragsak. Ti Dios pinalugodanna ti sangatauan aginggat’ kaykayatda a mangannurot iti kabibiag a di mangikankano kadagiti nalinteg nga estandarte ti Dios. Makitatay ita ti bunga dagita. Kas sipupudno a kunaen ti Biblia: “Saan nga agtaud iti tao a magna ti panangiturong kadagiti addangna.” (Jer. 10:23) Maigiddato met ti Dios intedna ti gundaway kadagiti adipenna a mangpaneknek iti kinasungdoda kenkuana babaen iti naayat a panagtulnogda, ket daytoy bayat a sarsarangtenda dagiti pangsulbog ken panangidadanes nga inyusuat ni Satanas. Bagbagaan ni Jehova dagiti ad-adipenna, a kunkunana: “Anakko, agmasiribka, ket paragsakem toy pusok, tapno masungbatak ti mangumsi kaniak.” (Prov. 27:11) Dagidiay agmatalek apitenda ti napalalo a pagimbagan itan ket addaanda pay namnama ti agnanayon a biag a buyogen ti kinaperpekto, a dayta a biag aramatenda a mangaramid iti pagayatan ni Jehova, a ti personalidad ken dandanana talaga nga ay-ayatenda.

Kasanot’ kabileg ti impluensia ni Satanas iti agdama a lubong?

Ni Jesu-Kristo tinukoyna ni Satanas kas “ti agturay iti lubong,” daydiay sapasap a pagtultulnogan ti sangatauan gaput’ panangipangagda iti idagdagadagna a panangilaksidda kadagiti bilin ti Dios. (Juan 14:30; Efe. 2:2) Isut’ aw-awagan pay ti Biblia a “dios daytoy sistema ti bambanag,” isu a mapadpadayawan gapu kadagiti relihioso nga al-alagaden ti tattao a sumursurot iti daytoy a sistema ti bambanag.—2 Cor. 4:4; 1 Cor. 10:20.

Idi a ti Diablo ikagkagumaananna a sulisogen ni Jesu-Kristo, “impangatona ket impakitana kenkuana iti apagdarikmat amin a pagpagarian iti napagnaedan a daga; ket ti Diablo kinunana kenkuana: ‘Amin dagitoy a pannakabalin ken dayagda itedko kenka, ta naitedda kaniak, ket itedko iti pagayatak. Sika, ngarud, no agrukbabka nga agdayaw kaniak, kukuamto amin ida.’” (Luc. 4:5-7) Ipalgak ti Apocalipsis 13:1, 2 a ni Satanas mangted ti ‘pannakabalin, trono ken dakkel a turay’ iti sangalubongan a napolitikaan a sistema ti panangituray. Ti  Daniel 10:13, 20 ipakaammona a ni Satanas nabayagen nga addaan kadagiti demonio a prinsipe a mangiturturay kadagiti prinsipal a pagpagarian ditoy daga. Ti Efeso 6:12 tukoyenna dagitoy a kas mangbukel ‘kadagiti gobierno, turturay, sangalubongan nga agtuturay itoy a kinasipnget, dagiti nadangkes a naespirituan a puersa kadagiti nailangitan a disso.’

Di ngad pagsiddaawan a kunaen ti 1 Juan 5:19: “Ti isuamin a lubong adda iti babaen daydiay nadangkes.” Ngem ti pannakabalinna agpaay laeng iti limitado a panawen ken babaen laeng iti pammalubos ni Jehova, ti mismo a Dios a Mannakabalin-amin.

Kasano pay kapautna ti pannakaipalubos ni Satanas a mangallilaw iti sangatauan?

Kas pammaneknek nga agbibiagtay itan kadagiti “maudi nga aldaw” ti dakes a sistema ti bambanag ni Satanas, kitaenyo dagiti panid 337-340, iti paulo a “Dagiti Petsa,” ken “Dagiti Maudi nga Aldaw.”

Kastoy ti simboliko a pannakadeskribir ti probision a mangpabang-ar kadatayo iti dakes nga impluensia ni Satanas: “Nakitak ti maysa nga anghel a bumaba nanipud langit nga adda kenkuana daydi tulbek ti mangliwengliweng nga abut ken ti maysa a dakkel a kawar iti imana. Ket tiniliwna daydi dragon, daydi uleg a kadaanan, nga isu ti Diablo ken Satanas, ket pinarautanna iti bayat ti sangaribo a tawen. Ket isu inggarangugongna iti abut a mangliwengliweng ket inrikepanna ken sinelioanna ti rabawna, tapno dina allilawenen ti nasnasion agingga iti maturpos dagiti sangaribo a tawen. Inton maturpos dagitoy isu maluk-atan iti bassit a kanito.” (Apoc. 20:1-3) Ket anianton? “Daydi Diablo a nangallilaw kadakuada naibelleng idi danaw nga apuy ken asupre.” (Apoc. 20:10) Aniat’ kaipapanan dayta? Sumungbat ti Apocalipsis 21:8: “Daytoy kaipapananna ti ipapatay a maikadua.” Isu ket agnanayonton nga awan!

Ti ‘pannakaibalud’ ni Satanas kaipapananna kadi a maipupokto iti langalang a daga nga awan ti sulisogenna iti unos ti 1,000 a tawen?

Adda dagidiay mangaramat iti Apocalipsis 20:3 (a naadaw iti panid 391) a pangsuportar itoy nga idea. Kunaenda a ti “yuyeng,” wenno ti “mangliwengliweng nga abut” (KJ), irepresentarna ti naglangalang a daga. Talaga aya? Ipakita ti Apocalipsis 12:7-9, 12 (KJ) a sakbay ti pannakaibaludna ni Satanas ket “naigarangugong” ditoy daga manipud langit, ket yegna ti nakaro a rigat iti sangatauan. Gapuna, no kunaen ti Apocalipsis  20:3 (KJ) a ni Satanas ket “naigarangugong . . . idiay mangliwengliweng nga abut,” talaga a saan nga idiay dati a lugar ti nakaikabilanna—a di makita ngem naipupok iti likmot toy daga. Maikkat ketdi manipud iti daga, “tapno dina allilawenen ti nasnasion, agingga iti maturpos ti sangaribo a tawen.” Paliiwenyo ta kunaen ti Apocalipsis 20:3 nga, inton maturpos ti sangaribo a tawen, ni Satanas, saan a ti nasnasion, ti maluk-atan manipud iti mangliwengliweng nga abut. Inton maluk-atan ni Satanas, dagiti umili a mangbukel kadagita a nasnasion addadanton a sigud.

No dadduma usarenda ti Isaias 24:1-6 ken ti Jeremias 4:23-29 (KJ) a pangsuportarda itoy a pammati. Kuna dagitoy: “Adtoy, ti APO aramidenna ti daga nga agongaong, ken aramidenna a langalang . . . Ti daga agongaongto unay, ken aglangalangto a naan-anay: ta ti APO insaona daytoy a sao.” “Kinitak ti daga, ket, adtoy, isu langalang ken ongaong . . . Kimmitaak, ket, adtoy, awan ti tao . . . Ta kastoy ti kuna ti APO. Ti amin a daga aglangalangto . . . Tunggal siudad mabaybay-anto, ket awan tao nga agnaed idiay.” Aniat’ kaipapanan dagitoy a padto? Damo a natungpalda iti Jerusalem ken iti daga ti Juda. Kas pannakaipatay ti nadibinuan a pangngeddeng, pinalubosan ni Jehova dagiti taga Babilonia a mangkisap iti daga. Idi agangay naglangalang ken nagongaong. (Kitaenyo ti Jeremias 36:29.) Ngem saan idi a pinukaw ti Dios amin a tattao iti intero a globo, ket dina met aramiden ti kasta ita. (Kitaenyo dagiti panid 97-100, iti “Daga,” kasta met iti paulo a “Langit.”) Nupay kasta, paglangalangennanto a naan-anay ti moderno a katupag ti nasukir a Jerusalem, nga isu ti Kakristianuan, isu a mangibabain iti nagan ti Dios gapu kadagiti narugit a kababalinna, ken agraman amin a makitkita a paset ti organisasion ni Satanas.

Imbes a ti daga agbalinto a langalang, bayat ti Sangaribo a Tawen a Panagturay ni Kristo, ken bayat a ni Satanas ket sibabalud, agbalinto ketdi a paraiso ti intero a daga. (Kitaenyo ti “Paraiso.”)