Adda aya naisangsangayan a kaipapanan dagiti tagtagaineptayo itatta?

Aniat’ naadal dagiti managsirarak no maipapan kadagiti tagtagainep?

“Amin a tao agtagtagainep,” kuna ti The World Book Encyclopedia (1984, Tomo 5, p. 279). “Kaaduan a nataengan makabusbos ti agarup 100 minuto a panagtagtagainep bayat ti walo nga oras a pannaturog.” Normal ngarud a kapadasan ti tao ti panagtagtagainep.

Kuna ni Dr. Allan Hobson, ti Harvard Medical School: “Isudat’ di nalawag a panggutugot nga ipatarus daydiay therapista sigun iti kursonadana. Ti kayuloganda agpannuray iti daydiay manganag kadakuada—saan ket nga agpannuray iti mismo a tagtagainep.” Idi inreport daytoy ti “Science Times” section ti The New York Times, innayonna: “Kadagidiay institusion a dakkel ti panangipategda iti tagtagainep, nagadut’ wagas a panangiyulogda iti sikolohikal a mensahe ti tagtagainep, tunggal wagas nagduduma ti teoriana. Ti pasurot ni Freud sabalit’ panangipatarusna iti tagtagainep, ti met pasurot ni Jung, sabali met, ket ti therapista ni Gestalt sabali met ti patarusna. . . . Ngem inatakar dagiti neuroscientist ti idea a dagiti tagtagainep ket adda sikolohikal a kaipapananda.”—Hulio 10, 1984, p. C12.

Dagiti tagtagainep a mangipaay iti naisangsangayan a pannakaammo adda ngata sabali a paggapuanda malaksid iti Dios?

Jer. 29:8, 9: “Kastoy ti kuna ni Jehova ti buybuyot: ‘Saanyo nga ipalubos kadagiti mammadtoyo nga adda iti nagtengngaanyo ken kadagiti mammadlesyo nga allilawendakayo, ket saanyo met nga imdengan dagiti tagtagainep a tinagtagainepda. Ta  ‘isuda agipadtoda a siuulbod kadakayo iti naganko. Diak imbaon ida,” kuna ni Jehova.’”

Pakaammuannatay ti Harper’s Bible Dictionary: Dagiti taga Babilonia nagtalekda unay kadagiti tagtagainep gapuna iti karabian ti pannakagtengda kadagiti nasken a desision naturogda kadagiti temploda, a mangnamnamadat’ pammalakad. Dagiti Griego a nagtarigagay a manggun-od iti instruksion maipapan iti salun-at naturogda kadagiti simbaan ni Aesculapius [nga insimbolo ti uleg], ket dagiti Romano kadagiti templo ni Serapis [no dadduma nainaig iti nakaputipot nga uleg]. Dagiti Egipcio adda komplikado a liblibroda nga agipatarus iti tagtagainep.”—(Nueva York, 1961), Madeleine Miller ken J. Lane Miller, p. 141.

Idi ugma nagusar ti Dios kadagiti tagtagainep a pamakdaar, pangbilin ken pagipadtona, ngem kasta ngata pay ita ti panangidalanna iti ilina?

Ti kakasta a tagtagainep a nagtaud iti Dios masarakan ida idiay Mateo 2:13, 19, 20; 1 Ar-ari 3:5; Genesis 40:1-8.

Heb. 1:1, 2: “Ti Dios, a kadagiti un-unana nga aldaw nagsao iti adu nga okasion ken iti adu a wagas [agraman tagtagainep] kadagiti ammatayo babaen kadagiti mammadto, kadagitoy maud-udi nga aldaw kinasaonatayo babaen iti Anakna [ni Jesu-Kristo, a ti pannursurona nairekord iti Biblia].”

1 Cor. 13:8: “Uray adda sagsagut ti pammadto [ket no dadduma inted ti Dios ti pammadto kadagiti adipenna babaen kadagiti tagtagainep], manungpaldanto.”

2 Tim. 3:16, 17: “Isuamin a Kasuratan impaltiing ti Dios ket naimbag a pakasursuruan . . . tapno ti tao ti Dios nalaing koma, naan-anay a nakabalan a maipaay iti isuamin nga aramid a nasayaat.”

1 Tim. 4:1: “Nupay kasta, ti naipaltiing a sao nalawag ti panagkunana a kadagiti maud-udi nga aldaw dagiti dadduma suminadanto iti pammati, nga ipangagda dagiti napaltiingan a sasao [no dadduma mayallatiwda babaen ti tagtagainep] ken sursuro dagiti demonio.”