Dayawenyo ti Dios Sigun iti Kondisionna

INKARARAG ni Jesus iti Dios: “Daytoy kaipapananna ti biag nga agnanayon, ti pananggun-odda ti pannakaammo kenka, a maymaysa a pudno a Dios, ken iti daydiay imbaonmo, a ni Jesu-Kristo.” (Juan 17:3) Ania a kita a pannakaammo? “Pagayatan [ti Dios] nga amin a kita dagiti tao maisalakanda koma ket dumtengda iti umiso a pannakaammo ti kinapudno.” (1 Timoteo 2:4) Kastoy ti panangipaulog ti The Amplified Bible iti maudi a pasetna: “Maammuanyo nga apaghushusto ken siuumiso ti [nadibinuan a] Kinapudno.”

No kasta kayat ti Dios nga isu ken dagiti panggepna ket siuumiso a maammuantayo, a maiyataday iti nadibinuan a kinapudno. Ket ti Santa Biblia, a Saot’ Dios, isu ti gubuayan dayta a kinapudno. (Juan 17:17; 2 Timoteo 3:16, 17) No dagiti tao siuumiso a maadalda ti kunaen ti Biblia maipapan iti Dios, iti kasta didanto maitulad kadagidiay nadakamat iti Roma 10:2, 3, nga “adda regtada a maipapan iti Dios; ngem saan a kas mayannurot iti umiso a pannakaammo.” Wenno mayaspingda kadagiti Samaritano, a nagkunaan ni Jesus: “Agdaydayawkayo iti dikay ammo.”—Juan 4:22.

Gapuna, no kayattay ti anamong ti Dios, imtuodentay koma kadagiti bagitayo: Aniat’ kuna ti Dios maipapan kenkuana? Kasano ti kayatna a pannakadaydayawna? Ania dagiti panggepna, ket kasanotay a maiyataday kadagita? Ti umiso a pannakaammo ti kinapudno isut’ mangted kadatayo kadagiti umiso a sungbat kadagita a saludsod. Kalpasanna mabalintayton a daydayawen ti Dios sigun kadagiti kondisionna.

Mangibabain iti Dios

“DAGIDIAY a mangdayaw kaniak dayawekto,” kuna ti Dios. (1 Samuel 2:30) Panangdayaw kadi iti Dios no ibagatayo nga adda pumatas kenkuana? Panangdayaw kadi kenkuana no awaganda ni Maria nga “ina ti Dios” ken “Babai a mangibabaet . . . iti Namarsua ken kadagiti parsuana,” a kas kunaen ti New Catholic Encyclopedia? Saan, dagita nga ideya insultuenda ti Dios. Awan pumatas kenkuana; ket awan met ti nainlasagan nga inana, yantangay ni Jesus saan nga isu ti Dios. Ket awan ti “Babai a mangibabaet,” ta ti Dios dinutokanna laeng ti “maymaysa a manangibabaet iti Dios ken kadagiti tao,” a ni Jesus.—1 Timoteo 2:5; 1 Juan 2:1, 2.

Awan duadua, ti doktrina a Trinidad riniribukna ken tinulawanna ti panangtarus dagiti tao iti pudno a saad ti Dios. Pawilanna dagiti tao nga umammo a siuumiso iti Sapasap a Soberano, a ni Jehova a Dios, ken iti panagdayawda kenkuana sigun kadagiti kondisionna. Kas kinuna ni teologo a Hans Küng: “Apay ketdin nga inka nayonan ti aniaman dayta panagkaykaysa ken pannakaisalumina ti Dios idinto ta dayta met laeng ti manglibeg wenno mangdadael iti dayta a panagkaykaysa ken pannakaisaluminana?” Ngem kasta ti inaramid ti panamatida iti Trinidad.

Dagidiay mamati iti Trinidad saanda a “kinayat nga inammo a siuumiso ti Dios.” (Roma 1:28) Kuna pay dayta a bersikulo: “Ti Dios binaybay-anna ida iti di naanamongan a panagis-isip, tapno aramidenda dagiti banag a di maipaay.” Ilista ti Rom 1 bersikulo 29 inggat’ 31 ti sumagmamano kadagitoy banag a “di maipaay,” kas iti ‘pammapatay, ringgor, ulbod no kadagiti nagtulagan, awanan natural a panagayat, awanan asi.’ Dagita a mismot’ inaramid dagiti relihion a nangakseptar iti Trinidad.

Kas pangarigan, dagiti Trinitariano masansan nga indadanesda ken pinapatayda dagiti nangilaksid iti doktrina a Trinidad. Ket nakarkaro pay ti inaramidda. Pinapatayda dagiti padada a Trinitariano bayat ti gubat. Ania pay ti ad-adda a “di maipaay” ngem kadagiti Katoliko a pinapatayda dagiti Katoliko, dagiti Orthodox a pinapatayda dagiti Orthodox, dagiti Protestante a pinapatayda dagiti Protestante—amin iti nagan dayta isu met la nga isu a Trinitariano a Diosda?

Ngem, sibabatad a kinunan Jesus: “Gapu itoy mailasindanto a dakayo dagiti adalak, no adda ayatyo iti maysa ken maysa.” (Juan 13:35) Palawaen pay ti Saot’ Dios daytoy, a kunana: “Iti daytoy maiparangarang dagiti annak ti Dios ken dagiti annak ti Diablo: Siasinoman a saan nga agaramid ti kinalinteg saan nga agtaud iti Dios, uray ti di agayat ken kabsatna.” Iyaspingna dagidiay mangpapatay kadagiti naespirituan a kabsatda ken “ni Cain, a nagtaud iti daydiay nadangkes [a ni Satanas] ket pinatayna ni kabsatna.”—1 Juan 3:10-12.

Gapuna, ti panangisuroda kadagiti makatikaw a doktrina maipapan iti Dios nagresulta kadagiti aramid a mangsalungasing kadagiti lintegna. Talaga, ti napasamak iti intero a Kakristianuan isu daydiay dineskribir ni Søren Kierkegaard a teologo a Danes: “Ti Kakristianuan inwaksina  ti Kinakristiano a dina napupuotan.”

Ti naespirituan a kasasaad ti Kakristianuan maikanatad iti insurat ni apostol Pablo: “Ipaduyakyakda nga ammoda ti Dios, ngem gapu kadagiti aramidda tallikudanda, ta makarimonda ken nasukirda ket naisiasida kadagiti amin nga aramid a naimbag.”—Tito 1:16.

Din agbayag, inton iyegen ti Dios ti panungpalan daytoy agdama a dakes a sistema dagiti banag, masingirto ti Trinitariano a Kakristianuan. Ket isu madusanto gapu kadagiti mangibabain iti Dios nga aramid ken doktrinana.—Mateo 24:14, 34; 25:31-34, 41, 46; Apocalipsis 17:1-6, 16; 18:1-8, 20, 24; 19:17-21.

Laksidenyo ti Trinidad

SAAN a mabalin nga ikompromiso dagiti kinapudno ti Dios. Gapuna, ti panangdaydayaw iti Dios sigun kadagiti kondisionna kaipapananna ti panangilaksid iti doktrina a Trinidad. Kontraen dayta dagiti pinati ken insuro dagiti propeta, ni Jesus, dagiti apostol, ken dagiti nagkauna a Kristiano. Kontraenna ti ibagbaga ti Dios maipapan kenkuana sigun iti mismo a naipaltiing a Saona. Iti kasta, ibalakadna: “Bigbigenyo a siak laeng ti Dios ket awanen sabali a kas kaniak.”—Isaias 46:9, TEV.

Saan nga agserbi iti interes ti Dios no isu pagbalinen a makatikaw ken misterioso. Imbes ketdi, mientras matikaw dagiti tao maipapan iti Dios ken dagiti panggepna, ad-adda met a pabor dayta iti Kabusor ti Dios, a ni Satanas a Diablo, ti ‘dios daytoy lubong.’ Isu ti mangpampanuynoy kadagiti ulbod a doktrina tapno ‘bulsekenna ti isip dagiti di mamati.’ (2 Corinto 4:4) Ket ti doktrina a Trinidad agserbi pay met iti interes dagiti klero a kayatda a taginayonen ti panangpetpetda kadagiti umili, yantangay pagparangenda a kasla dagiti laeng teologo ti makatarus iti dayta.—Kitaenyo ti Juan 8:44.

Ti umiso a pannakaammo iti Dios mangyeg ti dakkel a bang-ar. Wayawayaannatayo kadagiti pannursuro a maikontra iti Saot’ Dios ken kadagiti organisasion a nagapostata. Kas kinunan Jesus: “Maammuanyonto ti kinapudno, ket ti kinapudno luk-atannakayto.”—Juan 8:32.

No padayawantayo ti Dios kas kangatuan ket agdaydayawtayo kenkuana sigun kadagiti kondisionna, maliklikantayto ti pannusa a dandaninan iyeg iti apostata a Kakristianuan. Imbes ketdi, intay seggaan ti parabur ti Dios inton manungpal daytoy a sistema: “Ti lubong aglabas ken kasta met ti tarigagayna, ngem ti agaramid iti pagayatan ti Dios mataginayon.”—1 Juan 2:17.

[Ladawan iti panid 31]

Daytoy siniglon ti kadaanna nga eskultura idiay Francia ipakitana a ti Trinidad kinoronaanna ni “birhen” Maria. Ti panamatida iti Trinidad intagadna ti pannakarukbab ken Maria a kas “Ina ti Dios”