Kingdom News No. 36

Ti Baro a Milenio—Ania a Masakbayan ti Agur-uray Kenka?

 Ti Baro a Milenio—Pangrugian ti Baro a Panawen?

IDI tengnga ti rabii ti Disiembre 31, 1999, nagpatingga ti maika-20 a siglo. * Maysa dayta a siglo a napnuan riribuk. Ngem idi met a nangrugi dagiti baro a teknolohia, naisangsangayan nga irarang-ay iti medisina, aglaplapusanan nga impormasion, ken ti napartak nga iyaasenso ti sangalubongan nga ekonomia. Adu ngarud ti mangmatmat iti baro a milenio kas simbolo ti namnama ken panagbalbaliw. Daytanto ngata ti panawen nga agpatingga ti gubat, kinapanglaw, polusion iti aglawlaw, ken sakit?

Adu ti mangnamnama a kasta. Ngem adda kadi dagiti manamnama a panagbalbaliw iti baro a milenio a makagunggona kenka—dagiti panagbalbaliw a mamagbalin iti biagmo ken iti biag ti pamiliam a natalged ken natalingenngen? Usigem ti nalawa a saklawen ti sumagmamano laeng kadagiti problema a sarsarangtentayo.

Polusion

Dagiti industrialisado a pagilian ti “mangpatpataud iti sangalubongan a pannakadadael ti aglawlaw ken nasaknap a polusion ken pannakaperdi ti sistema ti ekolohia.” No agtultuloy dagiti agdama a pasamak, “ad-adda a madadael ti natural nga aglawlaw.”—“Global Environment Outlook—2000,” United Nations Environment Programme.

Sakit

“Inton tawen 2020, dagiti di makaakar a sakit ti maekspektar a pakatayan ti pito iti kada sangapulo a tattao kadagiti napanglaw a rehion, no idilig iti awan pay kagudua iti bilang dagiti matmatay iti kaaldawantayo maigapu iti dayta.”—“The Global Burden of Disease,” Harvard University Press, 1996.

Sigun iti dadduma nga eksperto, “inton 2010, natayton ti 66 a milion a tattao iti 23 a pagilian nga addaan kadagiti kakaruan nga epidemia [ti AIDS].”—“Confronting AIDS: Evidence From the Developing World,” maysa a report ti European Commission ken ti World Bank.

Kinapanglaw

“Kurang a maysa a doliar iti kada aldaw ti pagbibiag ti dandani 1.3 a bilion a tattao, ket dandani 1 a bilion ti di makagun-od kadagiti kangrunaan a pagbiagda.”—“Human Development Report 1999,” United Nations Development Programme.

Gubat

“Nakarkaro pay ti kinaranggas iti [nadumaduma a pagilian]. Gapu [kadagiti panagsisina] a nainaig iti etniko a grupo, tribu, ken relihion, . . . mangpataud ti kasta a kinaranggas . . . iti kadawyan unay a kita ti riribuk iti sumaganad a kakapat ti siglo . . . , a mangpapatay iti ginasut a ribu a tattao iti kada tawen.”—“New World Coming: American Security in the 21st Century,” U.S. Commission on National Security/21st Century.

Ti napanayag a pabuya ken panagraragsak gapu iti baro a milenio ti mangilimed ngarud iti kinapudno a kumarkaro ti polusion, sakit, kinapanglaw, ken gubat. Ti ramut dagitoy a problema ket kinaagum, kinaawan panagtalek, ken kinamanagimbubukodan—dagiti kababalin a saan a maikkat babaen laeng ti nasientipikuan a panagsirarak, teknolohia, wenno politika.

 Ti Milenio a Mangbendision iti Sangatauan

KINUNA naminsan ti maysa a mannurat idi ugma: “Saan a kukua ti naindagaan a tao ti dalanna. Saan a kukua ti tao a magmagna uray ti panangiturong iti addangna.” (Jeremias 10:23) Awan ti kabaelan ken kalintegan ti tao a mangituray iti daga. Ti Namarsua kadatayo a ni Jehova a Dios laeng ti addaan kalintegan ken pannakaammo a mangsolbar kadagiti problema ti sangatauan.—Roma 11:33-36; Apocalipsis 4:11.

Ngem kaano? Kasano? Aglaplapusanan ti ebidensia nga asidegtayon iti pagnguduan ti “maudi nga al-aldaw.” Pangaasim ta lukibem ta Bibliam, ket basaem ti 2 Timoteo 3:1-5. Nakalawlawag a deskribirenna ti kababalin dagiti tattao kabayatan dagitoy “napeggad a tiempo.” Deskribiren met ti Mateo 24:3-14 ken Lucas 21:10, 11 ti “maudi nga al-aldaw.” Naitampok sadiay dagiti makita a pasamak nanipud idi 1914, kas iti sangalubongan a gubat, angol, ken nasaknap a kinakirang ti taraon.

Asidegen nga agpatingga ti “maudi nga al-aldaw.” Kuna ti Daniel 2:44: “Mangipasdekto ti Dios ti langit iti maysa a pagarian a saanto a pulos maiyeg iti pannakadadael. . . . Rumekennanto ken pagpatinggaenna amin dagitoy a [naindagaan a] pagarian, ket dayta a mismo agtalinaedto agingga kadagiti tiempo a di nakedngan.” Isu a naipadto a mangipasdek ti Dios iti Pagarian, wenno gobierno, a mangituray iti daga. Sigun iti Apocalipsis 20:4, agturay daytoy a gobierno iti sangaribu a tawen—maysa a milenio! Imutektekam ti sumagmamano laeng kadagiti wagas a sumayaatto ti kasasaad ti panagbiag ti intero a sangatauan kabayatan daytoy nadayag a Milenio:

Ekonomia. “Mangbangondanto iti balbalay ket agnaedda; ket pudno unay nga agmuladanto kadagiti kaubasan ket kanenda ti bungada. Saandanto a mangbangon ket sabali ti agnaed; saandanto nga agmula ket sabali ti mangan.”—Isaias 65:21, 22.

Salun-at. “Iti dayta a tiempo maluktanto ti matmata dagidiay bulsek, ket maluktanto ti mismo a laplapayag dagidiay tuleng. Iti dayta a tiempo kumalay-atto daydiay pilay a kas iti panagkalay-at ti kalakian nga ugsa, ket ti dila daydiay umel umkisto gapu iti ragsak.” “Ket awanto ti agtataeng nga agkuna: ‘Masakitak.’”—Isaias 33:24; 35:5, 6.

Aglawlaw. Ti Dios ‘iyegnanto iti pannakadadael dagidiay mangdaddadael iti daga.’—Apocalipsis 11:18.

Natauan a Relasion. “Saandanto a mangaramid iti aniaman a panangdangran wenno mangpataud iti aniaman a panangdadael iti intero a nasantuan a bantayko; agsipud ta ti daga sigurado a mapnonto iti pannakaammo ken Jehova.”—Isaias 11:9.

Minilion ti mamati kadagitoy a kari iti Biblia isu nga optimistiko ken positibo ti panangmatmatda iti masakbayan. Kas resultana, nasaysayaaten ti panangdaerda kadagiti pakarigatan ken problema iti biag. Kasano nga agbalin ti Biblia a mangidalan a puersa iti biagmo?

 Pannakaammo a Mangiturong iti Biag!

No dadduma, makapasiddaaw ti siensia ken teknolohia! Nupay kasta, ti natauan a pannakaammo saanna a napagbalin ti biag a natalged ken naragsak para iti kaaduan a tattao. Ti kakaisuna a pannakaammo a makaipaay iti daytoy ket nadeskribir iti Biblia iti Juan 17:3 a kunana: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”

Masarakan ti kasta a pannakaammo kadagiti panid ti Biblia. Nupay adu ti mangyebkas iti bukodda nga opinion maipapan iti dayta a sagrado a libro, manmano pay laeng ti nangusig iti dayta. Sika ngay? Ipapantayon a kasapulan ti dakkel a panagregget iti panagbasa iti Biblia. Ngem makagunggona dayta. Ti Biblia ti kakaisuna a libro nga “impaltiing ti Dios ken makagunggona iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg.”—2 Timoteo 3:16.

Kasano ngarud a mairugim nga adalen ti Biblia? Apay a dika agpatulong kadagiti Saksi ni Jehova? Awan bayadna a mangisursuroda kadagiti minilion a tattao kadagiti mismo a pagtaenganda. Tapno matulongandaka iti daytoy a banag, agusarda iti nadumaduma a naibasar-Biblia a publikasion, kas iti broshur nga Ania ti Kalikaguman ti Dios Kadatayo? Mangted kadagiti ababa ken nalawag a sungbat ti adu a saludsodmo maipapan iti Biblia kas iti: Siasino ti Dios? Ania ti panggep ti Dios iti daga? Ania ti Pagarian ti Dios? Kasano a mapasayaat ti Biblia ti biag ti pamiliam?

No kayatmo nga adda Saksi ni Jehova a sumarungkar iti pagtaengam, pangngaasim ta suratam ti kupon iti baba. Maragsakandanto a mangted kenka iti ad-adu pay nga impormasion maipapan ti nadayag a Milenio a Panagturay ti Pagarian ti Dios!

□ Kayatko ti maaddaan iti broshur nga Ania ti Kalikaguman ti Dios Kadatayo?

□ Interesadoak iti libre a panagadal iti Biblia iti pagtaengan

[Footnote]