Kapitulo 14

Ti Biblia ken Dakayo

Dagiti moderno a mammabalaw kunaenda a ti Biblia ket di nasientipikuan ken agsisinnubang, a naglaon laeng kadagiti sarsarita idi ugma. Ni Jesus, iti sabali a dasig, kunana: “Ti saom [saot’ Dios] isu ti kinapudno.” (Juan 17:17) Dagiti pammaneknek suportaranda ni Jesus imbes a dagiti mammabalaw. Dagiti pudno a pasamak ipakitada a ti Biblia pasingkedan ti historia. Sa, ti karkarna a panagtutunosna, dagiti pudno a padtona, ti nabagas a kinasiribna, ken ti puersana a mangpasayaat iti kabibiag dagiti tao iparangarangna a ti Biblia isu ti naisurat a Saot’ Dios. Kas insurat ni apostol Pablo: “Amin a Kasuratan impaltiing ti Dios ket naimbag.”​—2 Timoteo 3:16.

1. (Iramanyo ti introduksion.) (a) Dagiti pudno a pasamak paneknekanda ti ania maipapan iti Biblia? (b) Aniat’ kayuloganna ti kinapudno a ti Biblia isu ti naipaltiing a Saot’ Dios?

GAPU ta ti Biblia ket saot’ Dios, saan nga iti tao, addaan daytoy iti napateg a kayulogan. Kaipapananna a ti Dios talaga a nakisarita kadagiti tao. Adu kadagiti saludsodtayo ti sinungbatanna ket impakitanat’ solusion kadagiti kaaduan a problematayo. Kaipapananna pay a dagiti namnamatayo iti masanguanan a nadeskribir iti Biblia ket pudnoda. Talaga a ti Pagarian ti Dios ket agturturayen ket inton dumteng ti tiempo ikkatenna ditoy daga amin a kinadangkok, panangirurumen, ken panagsagaba.

2. No ammoyon a ti Biblia ket Saot’ Dios tignayennakay koma dayta a mangaramid ti ania?

² Itan, daytoy ti saludsod: Ananuenyo daytoy nga  impormasion? Gapu ta naammuanyon a ti Biblia ket Saot’ Dios, uray no dayta la koma ti mangparegta kadakayo a mangsukimat iti dayta. Ti salmista inkarina a naragsakto dagidiay mangsukimat iti dayta idi nga insuratna: “Naragsak ti tao a saan a magna iti patigmaan dagiti nadangkes . . . ngem ti pakaragsakanna adda iti linteg ni Jehova, ket iti lintegna imutektekanna iti aldaw ken rabii.”​—Salmo 1:1, 2.

Akseptarenyo ti Tulong

3, 4. (a) Kas ipakita a mismo ti Biblia, ania komat’ aramidentayo no addada banag a masarakantayo iti Biblia a ditay maawatan? (b) Asinoda dagiti kanayon a situtulok a tumulong kadagiti tao a mangtarus a nasaysayaat iti Biblia?

³ Nalabit, bayat a basbasaenyo ti Biblia, adda dagiti banag a narigatyo a maawatan. (2 Pedro 3:16) Adda pasamak a nairekord idiay Aramid a librot’ Biblia a mangipakita a manamnamayo a kastoy. Di nagbayag kalpasan ti ipapatay ni Jesus, adda Etiope a basbasaenna dagiti padto ti Isaias a librot’ Biblia. Ni Felipe a Kristiano nga ebanghelista inasitganna dayta a lalaki ket inimtuodna: “Maawatam met la kadi ti basbasaem?” Saan a maawatan ti Etiope daydi basbasaenna, isu a nagpatulong ken Felipe tapno matarusanna.​—Aramid 8:30, 31.

⁴ Adda babai idiay Estados Unidos a kasta met ti situasionna. Regular a basbasaenna ti Biblia, ngem nagadu a nasken a pannursuro ti Biblia ti dina matartarusan iti dayta bukodna a panagbasbasa. Sana la nasursuro dagiti pamunganayan a kinapudnot’ Biblia idi nakiinnadal kadagiti Saksi ni Jehova, agraman kinapateg ti Pagarian ti Dios ken dagiti adu a bendision nga iyegto ti Pagarian iti sangatauan. No awisenyo ida, maragsakanto dagiti Saksi ni Jehova a tumulong met kadakayo tapno ad-addayo pay a matarusan ti basbasaenyo iti Biblia.

 Iyaplikaryo ti Balakad ti Biblia

5. Sigun iti Biblia, ania nga aramid ti mangted ragsak?

⁵ Saantay la a maparegta a mangbasa iti Biblia no di pay ket ti panangipakat iti mabasbasatayo. (Salmo 119:2) Sa, paregtaennatay ti Biblia: “Nanamenyo ket kitaenyo ta ni Jehova naimbag, O dakayo nga umili; naragsak ti nabaneg-pammagina a tao a kumamang kenkuana.” (Salmo 34:8) Bale, aw-awisennatayo a mangsubok iti Dios. Padasenyo ti agbiag sigun kadagiti prinsipio ti Dios, nga agtalekkayo iti Dios ta ammona no aniat’ paglainganyo. Sayonto la makita a daytoy a talaga ti umiso a dalan kalpasan a maaramidyo ti kasta. Dagidiay kastat’ panagtalekda iti Dios talaga a naragsakda.

6. Praktikal kadi ti agbiag itatta a maitunos kadagiti estandarte ti Biblia? Ilawlawagyo.

⁶ Adut’ agkuna nga imposible ti agbiag a mayannugot kadagiti prinsipio ti Biblia iti daytoy kusit, imoral, naranggas a lubong. Kinapudnona, nupay kasta, adu dagiti mangan-annurot iti dayta. Asinoda? Adda baro idiay Africa a nabirukanna dagidiay kastat’ kabibiagda. Insuratna: “Pinalpaliiwko iti las-ud ti adun a tawtawen a ditoy Zimbabwe dakayo a tattao, a Saksi ni Jehova, ti talaga a mangan-annurot iti mismo nga ehemplo ni Kristo . . . Dakayo, pay laeng, ti kakaisuna a grupo ti nakakumbinsir kaniak iti ayat ti Dios ken ti puersa ti ebangheliona, baeten iti kabibiagyo a saan laeng a kadagiti sermon ken libro. Agbibiagkayo ken mangaskasabakayo a maitunos iti ebanghelio idinto ta nagadu dagiti tao a mangikaskasaba iti ebanghelio ngem dida agbibiag a maitunos iti dayta.”

Akseptarenyo ti Autoridadna

7. Ania dagiti gagangay nga aramid itatta ti maikontra iti kunaen ti Biblia?

⁷ Kuna ni apostol Pablo a ti Biblia ket “naimbag a pakasursuruan, pakababalawan, pakapalintegan.”  (2 Timoteo 3:16) No dadduma, nupay kasta, saanda a magustuan ti ibagbagat’ Biblia. Kas pangarigan, ti Biblia kondenarenna dagiti homoseksual nga aramid, ngem ti homoseksualidad matmatan dagiti adu a kas akseptado a kabibiag. (Roma 1:24-27; 1 Corinto 6:9-11; 1 Timoteo 1:9-11) Kuna pay ti Biblia a ti biag ti di pay naipasngay a maladaga ket napateg ket saan koma nga igagara a dadaelen, ngem agarup 50 milion nga aborsion ti maang-angay iti intero a lubong kada tawen. (Exodo 21:22, 23; Salmo 36:9; 139:14-16; Jeremias 1:5) Ania ngay no narigattay a personal nga akseptaren ti kunat’ Biblia kadagita a problema?

8, 9. No iti damo marigatantay a mangakseptar ti sumagmamano nga ibagat’ Biblia, ania koma ti laglagipentayo, ket makin-estandarte ti naynaytay nga akseptaren?

⁸ Ay ket, nasursuro dagiti Kristiano a kanayon a nainsiriban ti panangannurot iti Saot’ Dios. Apay? Ngamin ta inton agangay, ti panangannurot iti kunat’ Biblia agbanagto a pagsayaatan dagiti isuamin. (Proverbio 2:1-11) Kinapudnona, dagiti tao limitadoda unay no kinasirib ti pagsasaritaan. Mammano a masirmatada ti ultimo a pagbanagan dagiti aramidda. Impudno ni propeta Jeremias: “Pagaammok unay, O Jehova, a ti dalan ti naindagaan a tao saan nga agtaud kenkuana. Saan nga agtaud iti tao a magna ti panangiturong iti addangna.”​—Jeremias 10:23.

⁹ No matmatantay ti aglikmuttayo maawatantayo a husto daytoy a panangtingiting. Kaaduan a problema a mangtutuok iti lubong ket diretso a resulta ti di panangannurot dagiti tao iti balakad ti Saot’ Dios. Ti naunday, nariribuk a historia ti sangatauan ipakitana a dagiti tao dida sibaballigi a madesidiran a bukodda dagiti moral a parikut. Nasirsirib nga amang ti Dios ngem  kadatayo. Apay a ditay akseptaren ti ibagana, imbes nga agpampannuraytayo iti bukodtayo a sirib?​—Proverbio 28:26; Jeremias 17:9.

Awan ti Perpekto

10, 11. (a) Aniada a kinapudno maipapan iti wagas ti pannakabukeltayo ken ti lubong a pagtataengantayo ti mamataud kadagiti problema no padasentay ti agbiag a maitunos kadagiti estandarte ti Biblia? (b) Ania a pannakitimpuyog ti parparegtaen ti Biblia a birukentayo, ket adinot’ pakabirukantay ti kasta a timpuyog?

¹⁰ Iturongnatay ti Biblia iti sabali pay a banag a pakasapulantay ti tulong. Natawidtay amin ti pagannayasan nga agbasol. “Ti pagannayasan ti puso ti tao dakes manipud iti kinaubingna.” (Genesis 8:21; Roma 7:21) Dimmegdeg pay daytoy a problema gapu ta agbibiagtayo iti lubong a dina an-annuroten dagiti prinsipio ti Biblia. Gapuna, saantay la a kasapulan ti tulong tapno matarusantayo ti Biblia no di ket tapno maipakattayo pay dagiti banag a naadaltayo. Daytoy ti gapuna a paregtaennatay ti Biblia a makitimpuyog kadagidiay agngayangay nga agbiag a maitunos kadagiti nadiosan nga estandarte. Insurat ti salmista: “Kagurak ti gimong dagiti managdakdakes, ket diakto makikatugaw kadagiti nadangkes. . . . Kadagiti bunggoy a nagimong bendituekto ni Jehova.” Ket kuna ti sabali pay a salmo: “Anian a nagimbag ken anian a nakaay-ayo ti panagtitimpuyog dagiti agkakabsat iti kinamaymaysa!”​—Salmo 26:5, 12; 133:1.

¹¹ Ti panagtitimpuyog nasken a paset ti panagdaydayaw dagiti Saksi ni Jehova. Adda sumagmamano a gimongda iti linawas, agraman dagiti naiyurnos a kumbensionda, nga adalenda a sangsangkamaysa ti Biblia ket pagsasaritaanda ti panangiyaplikar kadagiti prinsipiot’ Biblia iti kabibiagda. Buklenda ti sangalubongan a  “timpuyog dagiti kakabsat” a dita tunggal maysa maparegta ken matulongan a mangtaginayon kadagitoy nangato nga estandarte ti Biblia. (1 Pedro 2:17) Apay a diyo padasen a tabunuan ti maysa kadagita a gimong ket kitaenyo no kasanonakay met a matulongan ti kasta a grupo?​—Hebreo 10:24, 25.

Agbiag a Maitunos iti Saot’ Dios

12. Ania dagiti magun-odan a bendison no maammuantay a ti Biblia isu ti Saot’ Dios?

¹² No kasta, ti pannakaammotayo a ti Biblia ket Saot’ Dios mangted kadagiti bendision ken responsabilidad. Mabendisionantayo gapu ta makagun-odtay ti giya iti inaldaw a konduktatayo a ditay magun-odan iti uray adino. Mainayon pay, nasursurotayo ti ayat ti Dios ta intedna ti bukodna nga Anak tapno subbotennatayo ket maaddaantay ti namnama nga agbiag nga agnanayon. (Juan 3:16) Mabigbigtayo a ni Jesus agturturayen kas Ari ket dandanin agtignay tapno ikisapna ti kinadakes manipud iti daga. Ket sitatalged nga ur-urayentayo ti nalinteg a “baro a langlangit ken maysa a baro a daga” nga inkari a mismo ti Dios.​—2 Pedro 3:13.

13. Ania dagiti responsabilidad nga umapay kadatayo no akseptarentay ti Biblia a kas Saot’ Dios?

¹³ Laglagipenyo, nupay kasta, a responsabilidadtayo nga adalen ti Biblia ken ipapuso ti ibagbagana. Idagadag a mismo ti Dios: “Anakko, dika lipaten ti lintegko, ngem salimetmetam koma dita pusom dagiti bilinko.” (Proverbio 3:1) Nupay kaaduan dagidiay mangmatmat iti Biblia a sao laeng ti tao, kadatayo sibibileg a “mapapati koma ti Dios, nupay tunggal tao matakkuatan a naulbod.” (Roma 3:4) Bay-anyo a ti sirib ti Dios ti mangigiya iti biagyo. “Agtalekka ken Jehova iti amin a pusom . . . Kadagiti amin a dalanmo isu ti bigbigem.” (Proverbio 3:5, 6) Ti kastoy a nainsiriban a panangipangagyo iti Saot’ Dios apektarannanto ti biagyo a maipaay a paglainganyo agpadpada itan ken iti agnanayon.

[Salsaludsod]

[Blurb iti panid 187]

Saantay la koma a basaen ti Biblia no di ket ipakattayo dagiti mabasatayo

[Blurb iti panid 188]

Ti panangannurot iti ibagat’ Biblia naynay nga agbanag a paglaingantayo