Kapitulo 78

Addakay Koma a Sisasagana!

KALPASAN panangpakdaarna kadagiti umariwekwek maipapan iti kinaagum, ken panangpagannadna kadagiti adalanna maipapan ti di umno a panangted atension kadagiti material a bambanag, imparegta ni Jesus: “Dikay agbuteng, bassit nga ipastoran, ta nagayatan ni Amayo nga ited kadakayo ti pagarian.” Iti kasta impalgakna a bassit laeng a bilang (iti kamaudianan naipamatmat kas 144,000) ti addanto iti nailangitan a Pagarian. Ti kaaduan kadagidiay umawat ti biag nga awan inggana ket isudanto ti naindagaan nga iturayan ti Pagarian.

Anian a nakaskasdaaw a sagut, “ti pagarian”! Iti panangdeskribir ti umiso a rikna iti panangawat koma dagiti adalanna iti dayta, inggunamgunam ni Jesus kadakuada: “Ilakoyo dagiti kukuayo ket mangtedkayo ti sagsagut ti asi.” Wen, usarenda ti kinabaknangda a panggunggona kadagiti dadduma iti naespirituan ket iti kasta makaibangon ti “maysa a gameng a saan a mapukaw kadagiti langlangit.”

Sumaganad binagbagaan ni Jesus dagiti adalanna nga addada koma a sisasagana iti panagsublina. Kunana: “Bariksanyo dagiti siketyo ket sigagangat koma dagiti silawyo, ket dakayo koma ti kas kadagiti tao nga agur-uray iti apoda no kaano ti panagsublinanto manipud iti pagbobodaan, tapno inton umay ket umawag dagus nga ilukatandanto. Naragsak dagidiay adipen nga inton umay ti apoda masarakannanto ida nga agpuypuyat! Pudno kunak kadakayo, ibariksannanto ket aramidennanto ida a sumango iti panganan ket umayto ket agserbinto kadakuada.”

Iti daytoy nga ilustrasion, ti kinasagana dagiti ad-adipen iti panagsublinto ti apoda ket naipakita babaen ti panangiguyodda kadagiti nagayad a kawesda ket igalutda iti babaen dagiti pagbarikesanda ken ti panangitultuloyda a mangtaming dagiti annongenda agingga iti rabii iti sidong ti lawag dagiti adut’ lanana a pagsilawan. Ilawlawag ni Jesus: ‘No ti apo umayto iti maikadua a paset ti panagbantay [agarup alas nuebe ti rabii ingganat’ tengnga ti rabii], wenno uray pay iti maikatlo [manipud tengnga ti rabii ingganat’ alas tres ti bigat], ket masarakanna ida a nakasagana, naragsakdanto!’

Ti apo ti manggunggona kadagiti adipenna iti karkarna a pamay-an. Pagsadagenna ida iti panganan ket sananto pagserbian ida. Tratuenna ida, saan a kas ad-adipen, no di ket kas nasungdo a gagayyem. Anian a nagsayaat a gunggona iti panagtultuloyda nga agtartrabaho para iti apoda iti intero a rabii bayat nga ur-urayenda ti panagsublina! Nagpatingga ni Jesus: “Addakay met koma a sisasagana, ta iti oras a dikay ipappapan ti Anak ti tao umay.”

Ita agsaludsod ni Pedro: “Apo, kunam daytoy a pangngarig a maipaay kadakami wenno kadagiti isuamin met?”

Imbes a sungbatanna a direkta, nangted ni Jesus ti sabali manen nga ilustrasion. “Asino ngarud ti mayordomo a mapagtalkan,” insaludsodna, “nga isaad ni apona nga agaywan kadagiti katulong ti balayna tapno inton pannakaipaayna itedna kadakuada ti pannakabagida a taraon? Naragsak daydiay adipen nga inton umay ni apona, masarakannanto a kasta ti ar-aramidenna! Kinapudnona a kunak kadakayo, nga isu isaadnanto nga agaywan kadagiti isuamin a sanikuana.”

Ti “apo” kaawatan isu ni Jesu-Kristo. Ti “mayordomo” iladladawanna ti “bassit nga ipastoran” dagiti ad-adalan kas kolektibo a bagi, ket “dagiti tao ti balayna” tuktukoyenna daytoy met laeng a grupo ti 144,000 nga umawat ti nailangitan a Pagarian, ngem daytoy a sao itamtampokna ti trabahoda kas indibidual. Dagiti “sanikuana” a pakaidutokanto ti matalek a mayordomo nga aywanannanto isuda dagiti naarian nga intereses ti apo ditoy daga, a ramanenna dagiti naindagaan nga iturayan ti Pagarianna.

Iti panangitultuloyna ti ilustrasionna, intudo ni Jesus ti posibilidad a saan nga amin a kameng dayta a mayordomo, wenno klase adipen, ti agbalinto a matalek, inlawlawagna: “Ngem no dayta nga adipen kunaennanto iti pusona, ‘Ni apok agbayag nga umay,’ ket rugiannanto a kabilen dagiti tagabo a lallaki ken babbai, ket mangan ken uminum ken agbartek, umayto ti apo dayta nga adipen iti aldaw a dina ipagpagarup . . . , ket masaplitto ti adu.”

Kuna ni Jesus a ti iyaayna nangyeg iti naapuy a tiempo para kadagiti Judio, ta dadduma awatenda ken dadduma laksidenda ti pannursurona. Iti nasurok a tallo tawen a nasapsapa, isut’ nabautisaran iti danum, ngem itan ti pannakabautisarna ken patay umadanin iti panagngudona, ket kas kinunana: “Ania ket ti panagtuokkon agingga iti di matungpal!”

Kalpasan ti panangiturongna kadagitoy a sasao kadagiti adalanna, kinasarita manen ni Jesus ti umariwekwek. Nagladingitanna ti natangken a panagmadida a mangakseptar ti nalawag nga ebidensia ti kinasiasinona ken ti kinapategna. “No makitayo ti maysa nga ulep a tumpuar iti laud,” kunana, “dagus a kunaenyo, ‘Umay ti bagio,’ ket kasta ti maaramid. Ket no agangin ti abagat, kunayo, ‘Addanto pudot,’ ket kasta ti maaramid. Managinsisingpet, ammoyo nga ilasin ti langa ti langit ken daga, ngem kasano dayta ket dikay ammo nga ilasin daytoy nga aldaw?” Lucas 12:32-59.

▪ Mano ti mangbukel ti “bassit nga ipastoran,” ket anianto ti awatenda?

▪ Kasanot’ panangipaganetget ni Jesus ti pannakasapul dagiti adipenna a sisasaganada koma?

▪ Iti ilustrasion ni Jesus, asino ti “apo,” ti “mayordomo,” ti “bagi dagiti katulong,” ken dagiti “sanikua”?