Kapitulo 23

Adu Pay a Datdatlag Idiay Capernaum

ITI Aldaw ti Panaginana kalpasan ti panangawis ni Jesus kadagiti umuna nga uppat nga adalanna​—da Pedro, Andres, Santiago, ken Juan​—napanda amin iti maysa a lokal a sinagoga idiay Capernaum. Sadiay rinugian ni Jesus ti nangisursuro, ket nagsiddaaw dagiti tattao agsipud ta sinursuruanna ida kas maysa nga addaan kinaturay ket saan a kas kadagiti eskriba.

Iti daytoy nga Aldaw ti Panaginana adda maysa a lalaki nga adda sairona. Idi kuan, isut’ agpukpukkaw iti natbag a timek: “Ania ti bibiangmi kenka, Jesus a Nasareno? Immayka kadi a mangpukaw kadakami? Ammok no siasinoka, sika ti Santo ti Dios.”

Ti sairo a mangiturturong ti lalaki ket kinapudnona maysa kadagiti anghel ni Satanas. Iti panangtubngarna ti demonio, kuna ni Jesus: “Agulimekka, ket rummuarka kenkuana!”

Ket, ti demonio ti namagpigerger iti lalaki ket nagikkis iti napalalo. Ngem isut’ rimmuar iti lalaki a dina met sinaksaktan. Nagsiddaawda amin iti kasta unay! “Ania daytoy?” insaludsodda. “Situturay nga agbilin uray pay kadagiti espiritu a narugit, ket agtulnogda kenkuana.” Ti damag maipapan iti daytoy nagsaknap kadagiti kabangibangna a luglugar.

Idi panawandat’ sinagoga, napan ni Jesus ken dagiti adalanna idiay balay ni Simon, wenno ni Pedro. Sadiay ti katugangan a babai ni Pedro aggurigor unay. ‘Pangngaasim ta tulongam,’ impakpakaasida. Gapuna immasideg ni Jesus, iniggamannat’ imana, ket isut’ imbangonna. Apaman latta ta isu ti immimbag ket nangrugin a nangisagana iti taraonda!

Kalpasanna, idi limneken ti init, inyeg dagiti adu a tattao manipud nadumaduma a luglugar idiay balay ni Pedro dagiti masaksakitda. Di nagbayag ti intero a siudad naur-urnongdan idiay ruangan! Ket pinaimbag ni Jesus amin dagiti masaksakit, uray pay no ania ti saksakitda idi. Pinaimbagna pay dagiti naluganan ti sairo. Apaman a rummuarda, dagiti sairo a pinaruarna agpukkawda: “Sika ti Anak ti Dios.” Ngem tinubngar ni Jesus ida ket saanna ida a pinalubosan nga agsao agsipud ta ammoda nga isu ti Kristo. Marcos 1:21-34; Lucas 4:31-41; Mateo 8:14-17.

▪ Aniat’ napasamak idiay Sinagoga iti Aldaw ti Panaginana kalpasan nga inawis ni Jesus dagiti uppat nga adalanna?

▪ Sadinot’ napanan ni Jesus idi rummuarda iti sinagoga, ket ania a milagro ti inaramidna sadiay?

▪ Aniat’ napasamak iti kamaudiananna iti dayta met la a rabii?