Kapitulo 56

Aniat’ Mangtulaw iti Tao?

TI IBUBUSOR ken Jesus ket kumarkaro. Saan laeng nga adu kadagiti adalanna ti pimmanaw no di ket dagiti Judio idiay Judea sapsapulenda ti pannakapapatayna, kas met laeng iti inaramidda idi adda idiay Jerusalem kabayatan ti Paskua idi 31 K.P.

Itan ket Paskua iti 32 K.P. Nalabit, maiyannurot iti pagalagadan ti Dios nga umatender, timmabuno ni Jesus iti Paskua idiay Jerusalem. Nupay kasta, inaramidna dayta a siaannad agsipud ta agpegpeggad ti biagna. Kalpasanna nagsubli idiay Galilea.

Nalabit adda ni Jesus idiay Capernaum idi a dagiti Fariseo ken escriba immayda kenkuana manipud Jerusalem. Kumitkitada iti rason a pangakusaranda kenkuana iti narelihiusuan a panangsalungasing iti linteg. “Apay-apay a dagiti adalam salungasingenda ti kadawyan dagiti panglakayen?” insaludsodda. “Kas pangarigan, dida bugguan dagiti imada no manganda iti tinapay.” Daytoy ket saan a maysa a kalikaguman ti Dios, kaskasdi a dagiti Fariseo ibilangda a serioso a panagbasol ti saan a panangaramid iti daytoy a kadawyan a seremonia, a nangiraman iti panagbuggo agingga kadagiti siko.

Imbes a sungbatanna ida maipapan iti akusasionda, intudo ni Jesus ti dakes ken sipapakinakem a panagsalungasingda iti Linteg ti Dios. “Apay-apay a salungasingenyo met ti bilin ti Dios a gapu kadagiti kadawyanyo?” kayatna nga ammuen. “Ta, ti Dios imbilinna a kinunana, ‘Dayawem ni amam ken ni inam’; ken, ‘Ti agsao iti dakes iti ama ken ina mapatayan koma iti patay.’ Ngem dakayo kunayo: ‘Uray siasino nga agkunanto iti amana wenno inana: “Amin daydiay nabalinko koma a pagserbi kenka naidatonda iti Dios,” daytoy saannanto a padayawan ni amana.’”

Pudno unay, dagiti Fariseo isursuroda a ti kuarta, sanikua, wenno aniaman a naidaton a pagserbi iti Dios ket maikari iti templo ket saan a mabalin nga usaren iti dadduma a panggep. Kaskasdi, kinapudnona, ti naidaton a sagut ket iduldulin daydiay nangidaton iti dayta. Iti daytoy a pamay-an ti maysa nga anak a lalaki, iti basta panangibagana a ti kuarta wenno sanikuana ket “corban”​—maysa a daton a naipaay iti Dios wenno iti templo​—liklikanna ti responsabilidadna a tumulong iti nataenganen a nagannakna, a nalabit nga agkasapulan unay.

Nainkalintegan a makaunget kadagiti panangtirtiritir dagiti Fariseo iti Linteg ti Dios, ni Jesus kinunana: “Pinukawyo ti kapapayan ti bilin ti Dios gapu kadagiti kadawyanyo. Dakayo a managinsisingpet, naimbag ti panangipadto ni Isaias iti maipapan kadakayo, a kunkunana, ‘Daytoy nga umili dayawennak kadagiti bibigda, ngem ti pusoda adda iti adayo kaniak. Ngem barengbareng ti panagdayawda kaniak, nga isursuroda dagiti sursuro a bilbilin dagiti tattao.’”

Nalabit a nagatras ti umili tapno palubosanda dagiti Fariseo nga agimtuod ken Jesus. Ita, idi a dagiti Fariseo ket awananda iti sungbat iti napinget a panangbabalaw ni Jesus kadakuada, inayabanna ti umili. “Dumngegkayo,” kinunana, “ken awatenyo. Saan a dayta sumrek iti ngiwat ti mangtulaw iti tao; no di ket dayta rummuar iti ngiwat, isu ti mangtulaw iti tao.”

Kalpasanna, idi simrekda iti maysa a balay, inimtuod dagiti adalanna: “Ammom a dagiti Fariseo itay nangngegda daytoy a sao nagluksawda?”

“Isuamin a mula a saan nga immula ni Amak a nailangitan maparutto,” insungbat ni Jesus. “Bay-anyo ida ta bulsekda a mangidalan kadagiti bulsek. Ket, no bulsek idalanna ti bulsek, agpadpadadanto a matnag iti abut.”

Kasla nasdaaw ni Jesus idi, kas panangibagi kadagiti adalan, dinawat ni Pedro ti pannakailawlawag iti no ania ti mangtulaw iti tao. “Uray dakayo met awan pay isipyo?” insungbat ni Jesus. “Dikay aya maawatan nga uray ania a sumrek iti ngiwat mapan iti tian ket maibelleng iti disso a nalemmeng? Ngem, dagiti banag a rummuar iti ngiwat agtaudda iti puso, ket isuda ti mangtulaw iti tao. Ta, iti puso rummuar dagiti dakes a panunot, pammapatay, pannakikamalala, ab-abig, taktakaw, naulbod a manangsaksi, tabtabbaaw iti Dios. Dagitoy isuda dagiti bambanag a mangtulaw iti tao; ngem ti pannangan a di bugguan dagiti ima, saanna a matulawan ti tao.”

Saan a papaayen ni Jesus ditoy ti kinadalus. Saanna nga irasrasonan a ti tao saannan a kasapulan ti panangbuggo kadagiti imana sakbay iti panangisagana iti taraon wenno pannangan. No di ket, konkondenaren ni Jesus ti kinamanaginsisingpet dagiti narelihiusuan a papangulo a sisisikap a mangliklik kadagiti umiso a linlinteg ti Dios babaen iti panangipapilitda kadagiti di nainkasuratan a kadawyan. Wen, dagiti dakes nga ar-aramid ti mangtulaw iti tao, ket ipakita ni Jesus a dagitoy aggapuda iti puso ti tao. Juan 7:1; Deuteronomio 16:16; Mateo 15:1-20; Marcos 7:1-23; Exodo 20:12; 21:17; Isaias 29:13.

▪ Ania nga ibubusor ti sanguen ita ni Jesus?

▪ Ania a pammabasol ti aramiden dagiti Fariseo, ngem sigun ken Jesus, kasanot’ sipapakinakem a panangsalungasing dagiti Fariseo iti Linteg ti Dios?

▪ Aniat’ ipanayag ni Jesus a bambanag a mangtulaw iti tao?