Kapitulo 63

Dadduma Pay a Makapalinteg a Balakad

BAYAT a ni Jesus ken dagiti apostolna addada pay iti balay idiay Capernaum, adda pay banag a napagsasaritaan malaksid ti nagsusuppiatan dagiti apostol no asino ti kadadakkelan. Daytoy ti maysa a pasamak a mabalin met a napasamak idi nagsublida idiay Capernaum, idi saan a personal nga adda ni Jesus sadiay. Kinuna ni apostol Juan: “Nakakitakami ti maysa a mamaruar kadagiti sairo iti naganmo ket imparitmi kenkuana, agsipud ta saan a sumurot kadatayo.”

Kaawatan matmatmatan ni Juan dagiti apostol kas maysa a naisangsangayan, manangsalimetmet ti titulo a bunggoy dagiti mangngagas. Gapuna impatona a daydi lalaki di maiyanatup nga agar-aramid kadagiti nakaskasdaaw a bambanag agsipud ta saan a paset dayta a grupo.

Nupay kasta, imbalakad ni Jesus: “Dikay ipawil kenkuana dayta, ta awan ti tao a makaaramid iti maysa a datdatlag gapu iti naganko ket isaganadna ti agsao ti dakes kaniak; ta ti saan a bumusor kadatayo, umanamong kadatayo. Ta siasinoman a mangtedto kadakayo ti inumen a sangabaso a danum agsipud ta taonakayo ni Kristo, pudno kunak kadakayo, dinanto mapukaw ti gunggonana.”

Saan a nesesita para iti daytoy a lalaki ti sibabagi a sumurot ken ni Jesus tapno adda iti dasigna. Ti kongregasion Kristiano saan pay idi a naipasdek, gapuna ti saanna a pannakaipaset iti daytoy a grupo dina kaipapanan nga isu ket adda iti naisina a kongregasion. Ti lalaki kinapudnona addaan pammati iti nagan ni Jesus ket daytat’ gapuna a naballigi ti inna panangparuar kadagiti sairo. Isut’ agar-aramid ti maysa a banag a maiyarig a naimbag iti kinuna ni Jesus a maikari iti gunggona. Impakita ni Jesus nga iti panangaramidna iti daytoy, dinanto mapukaw ti gunggonana.

Ngem kasano no daydiay a tao ket maitibkol kadagiti sao ken tigtignay dagiti apostol? Daytoy ti agbalin a serioso unay! Kuna ni Jesus: “Ket siasinoman a mangitibkolto iti maysa kadagitoy babassit nga ubbing a mamati kaniak, nasaysayaat koma kenkuana no maibattoon iti tengngedna ti maysa nga a dakkel a bato a gilingan ken maitappuak koma iti baybay.”

Kuna ni Jesus a dagiti paspasurotna rebbeng nga ikkatenda manipud biagda ti aniaman a nakapatpateg kadakuada kas ti maysa nga ima, maysa a saka, wenno maysa a mata a mabalin a makaitibkol kadakuada. Nasaysayaat ti maawanan kadagitoy ipatpateg a banag ket sumrek iti Pagarian ti Dios ngem ti mangsalimetmet iti dayta ket maitappuak idiay Gehenna (maysa a sumsumged a pagbasuraan nga asideg idiay Jerusalem), nga isut’ mangisimsimbolo ti agnanayon a pannakadadael.

Namakdaar met ni Jesus: “Kitaenyo ta dikay umsien ti maysa kadagitoy babassit nga ubbing; ta kunak kadakayo a dagiti anghelda sadi langit agnanayon a makitada ti langa ni Amak nga adda sadi langit.” Kalpasanna inyilustrarna ti kinapateg dagiti “babassit nga ubbing” idi saritaennat’ maipapan iti maysa a tao nga addaan sangagasut a karnero ngem napukawna ti maysa. Ti tao panawanna ti 99 tapno sapulenna daydiay napukaw, inlawlawag ni Jesus, ket inton nasarakanna dayta agragsak unay iti dayta ngem iti daydiay 99. “Kasta met,” nagpatingga a kinuna ni Jesus kalpasanna, “saan a pagayatan ni Amayo nga adda sadi langit a mapukaw ti maysa kadagiti babassit nga ubbing.”

Nalabit silalagip iti pagsusuppiatan dagiti apostol iti bagbagida, ingunamgunam ni Jesus: “Addaankayo koma ti asin ken talna iti maysa ken maysa kadakayo.” Dagiti awan ramanna a taraon mapagbalinda a naim-imas babaen iti asin. Gapuna, ti makailadawan nga asin pagbalinenna ti sawen ti maysa a nalaklaka nga awaten. Ti pannakaadda ti kasta nga asin tumulong a mangtaginayon ti talna.

Ngem gapu iti natauan a kinaimperpekto, no maminsan mapasamak dagiti serioso a pagsusuppiatan. Mangted met ni Jesus kadagiti pagannurotan a panangtaming kadagita. “Ket no ni kabsatmo makabasol kenka,” kuna ni Jesus, “inka ibaga kenkuana ti basolna a dakdakayo. No denggennaka, naalam ni kabsatmo.” No saan a dumngeg, imbalakad ni Jesus, “mangikuyogka ti maysa wenno dua pay, tapno gapu kadagiti dua wenno tallo a saksi mapatalgedan ti amin a sasao.”

Kas maudi laeng a pagtungpalanna, kuna ni Jesus, ipanmo dayta a banag “iti kongregasion,” kayatna a sawen, kadagiti responsable a manangaywan ti kongregasion a mangipaay ti makaukom a pangngeddeng. No ti managbasol ket saanto nga agtungpal iti pangngeddengda, kuna ni Jesus, “ibilangmo a maysa a tao kadagiti nasnasion ken kas agsingsingir ti buis.”

Iti panangaramid ti kasta a pangngeddeng, kasapulan a dagiti manangaywan sisisinged a salimetmetanda ti bilbilin ti Sao ni Jehova. Gapuna, no makakitada ti maysa nga indibidual a sibabasol ken maikari iti dusa, ti panangukom ‘magalutanto idiay langit.’ Ket no “warwarandanto ditoy daga,” kayatna a sawen, masarakanda a ti maysa awan basolna, dayta met ti “mawarwaranto idiay langit.” Kadagita a makaukom a panangsukimat, kuna ni Jesus, “no adino ti naguurnongan ti dua wenno tallo gapu iti naganko, addaak iti nagtetengngaanda.” Mateo 18:6-20; Marcos 9:38-50; Lucas 9:49, 50.

▪ Apay a saan a nesesita idi kaaldawan ni Jesus ti panangkuyog kenkuana?

▪ Kasano kadagsen ti panangitibkol ti maysa kadagiti kabassitan, ken kasanot’ panangiyilustrar ni Jesus ti kinapateg dagita babassit nga ubbing?

▪ Nalabit aniat’ nakatignay ti pammaregta ni Jesus kadagiti apostol tapno maadda ti asin kadakuada?

▪ Aniat’ pateg ti ‘pananggalut’ ken ‘panangwarwar’?