Kapitulo 14

Dagiti Immuna nga Adalan ni Jesus

KALPASAN ti 40 nga aldawna idiay let-ang, nagsubli ni Jesus ken Juan, a nangbautisar kenkuana. Bayat ti iyaasidegna, masinunuo nga isut’ tuktukoyen idi ni Juan ket kinunana kadagidiay siimatang: “Adtoy, ti Kordero ti Dios a mangikkat ti basol ti lubong! Daytoy isu daydi kinunak, Sumaruno kaniak nga umay ti maysa a lalaki isu a nagbalin nga umuna ngem siak, ta addan sakbay naiyanakak.” Nupay in-inauna ni Juan ngem ni kasinsinna a Jesus, ammo ni Juan a nagbiagen ni Jesus nga immun-una ngem isu a kas espiritu a parsua sadi langit.

Kaskasdi, sumagmamano a lawas a nasaksakbay, idi immay ni Jesus tapno agpabautisar, nalawag a di unay sigurado ni Juan a ni Jesus isut’ agbalin a Mesias. “Ket isu diak ammo idi,” inamin ni Juan, “ngem tapno maiparangarang iti Israel gapuna immayak a mangbautisar iti danum.”

Intuloy nga inlawlawag ni Juan kadagiti dumdumngeg kenkuana no aniat’ napasamak idi binautisaranna ni Jesus: “Naimatangak ti espiritu a bumabbaba idi manipud langit a kasla kalapati, ket nagtaeng kenkuana. Ket isu diak am-ammo idi, ngem Daydi nangibaon kaniak a mamautisar iti danum kunana kaniak, ‘Ti makitamto a babaan ti espiritu ket agtaeng kenkuana, daytoy met laeng ti mamautisar iti nasantuan nga espiritu.’ Ket siak nakitak ken pinaneknekak a daytoy ti Anak ti Dios.”

Iti sumuno nga aldaw nakatakder ni Juan a kadua ti dua kadagiti adalanna. Manen, bayat ti iyaadani ni Jesus, kunana: “Adtoy, ti Kordero ti Dios!” Iti dayta, dagitoy dua nga adalan ni Juan a Mammautisar sinurotda ni Jesus. Maysa kadakuada isu ni Andres, ket ti maysa nalawag nga isu a mismot’ nangirekord kadagitoy a bambanag, naawagan met iti Juan. Daytoy a Juan, sigun kadagiti indikasion, ket kasinsin met ni Jesus, a masinunuo nga anak ti kabsat a babai ni Maria, a ni Salome.

Idi timmalliaw ket nakitana a sumursurot kenkuana da Andres ken Juan, insaludsod ni Jesus: “Ania ti sapulenyo?”

“Rabbi,” insaludsodda, “adino ti pagtaengam?”

“Umaykayo, ket kitaenyonto,” insungbat ni Jesus.

Agarup alas kuatron iti malem, ket nakikadua da Andres ken Juan ken ni Jesus iti nabati pay paset dayta nga aldaw. Idin magagaran unay ni Andres ta nagdardaras a napan nangsapul iti kabsatna a lalaki, a managan Pedro. “Nasarakanmi ti Mesias,” imbagana kenkuana. Ket inyegna ni Pedro ken Jesus. Nalabit napan met sinapul ni Juan ni kabsatna a Santiago ket inyegna ken Jesus; kaskasdi, kas iti ugalina, di inraman ni Juan daytoy a personal nga impormasion iti Ebangheliona.

Iti sumuno nga aldaw, nasarakan ni Jesus ni Felipe, a taga Betsaida, ti isu met laeng nga ili nga orihinal a naggapuan da Andres ken Pedro. Inimbitaranna: “Surotennak.”

Idin ni Felipe sinapulna ni Natanael, a maawagan met Bartolome, ket kunana: “Nasarakanmi daydi insurat ni Moises iti Linteg, ken dagiti Mammadto, ni Jesus, a taga Nasaret, nga anak ni Jose.” Agduadua ni Natanael. “Mabalin aya nga agtaud idiay Nasaret ti aniaman a banag a naimbag?” insaludsodna.

“Umayka ket kitaem,” inyawis ni Felipe. Idi umasigdegdan ken Jesus, ni Jesus kinunana maipapan ken Natanael: “Adtoy ti maysa a napudno nga Israelita, a kenkuana awan ti ulbod.”

“Kasano ti pannakaammom kaniak?” insaludsod ni Natanael

“Kasanguanan ti panangayab ni Felipe kenka, idi addaka iti sirok ti kayo a higos, nakitaka,” insungbat ni Jesus.

Nasdaaw ni Natanael. “Rabbi [kayatna a sawen Mannursuro], sika ti Anak ti Dios, sika ti Ari ti Israel,” kunana.

“Gapu ta kinunak kenka a nakitaka iti sirok ti kayo a higos mamatika?” inyimtuod ni Jesus. “Bambanag a daddadakkel ngem daytoy ti makitamto.” Idin inkarina: “Pudno, pudno kunak kadakayo, Makitayonto ti langit a silulukat ken dagiti anghel ti Dios nga umuli ken bumaba itoy Anak ti tao.”

Di nagbayag kalpasan daytoy, ni Jesus, a kaduana dagiti baro nga adalanna, pinanawanna ti Ging-et ti Jordan ket napan sadi Galilea. Juan 1:29-51.

▪ Asino dagiti immuna nga adalan ni Jesus?

▪ Kasano a ni Pedro, nalabit agraman ken Santiago, naiyam-ammoda ken Jesus?

▪ Aniat’ nangkumbinsir ken Natanael a ni Jesus ket Anak ti Dios?