Kapitulo 129

Dagiti Kanayonan a Panagparang

MALADLADINGITAN pay laeng dagiti adalan. Dida maawatan ti kaipapanan ti bakante a tanem, dida met patien ti impadamag dagiti babbai. Gapuna iti naladladaw a paset ti Domingo, ni Cleofas ken ti sabali pay nga adalan pinanawanda ti Jerusalem a mapandat’ Emmaus, agarup sangapulo ket maysa a kilometro ti kaadayona.

Iti dalanda, bayat a pagsarsaritaanda dagiti pasamak ti aldaw, kimmuyog ti maysa nga estranghero. “Ania ti pagsarsaritaanyo bayat ti pampannagnayo?” inyimtuodna.

Simmardeng dagiti adalan, a masmasnaayan dagiti rupada, ket simmungbat ni Cleofas: “Sangsangailika kadi sadi Jerusalem ta dika ammo dagiti banag a naaramid sadiay kadagitoy nga aldaw?” Insaludsodna: “Ania a bambanag?”

“Dagiti bambanag maipapan ken Jesus a Nazareno,” insungbatda. “Dagiti panguluen a papadi ken dagiti agturaytayo inyawatda tapno maipato a matay ket isut’ inlansada. Ngem ur-urayenmi idi nga isu koma ti mannubbot ti Israel.”

Ni Cleofas ken ti kaduana inlawlawagda dagiti nakaskasdaaw a pasamak ti aldaw​—ti damag maipapan ti karkarna a buya dagiti anghel ken ti bakante a tanem​—ngem idin impudnoda a mariribukanda maipapan ti kaipapanan dagitoy a bambanag. Tinubngar ida ti estranghero: “O nakuneng a tattao ken naladaw ti panagpuspusona a mamati iti isuamin a sinao dagiti mammadto! Saan aya a masapul idi a ni Kristo lak-amenna dagitoy a banag ken sumrek iti gloriana?” Inlawlawagna ngarud kadakuada ti sasao manipud sagrado a teksto a maipapan ken Kristo.

Kamaudiananna dimtengda iti asideg ti Emmaus, ket ti estranghero nagtignay a kasla mapan iti ad-adayo. Gaput’ tarigagayda a makangngeg iti ad-adu pay, dagiti adalan impakpakaasida: “Agbatika kadakami, ta rumabiin.” Gapuna nagbati para iti pannangan. Bayat a nagkararag ken pinisina ti tinapay ket intedna kadakuada, nabigbigda nga isu a talaga ni Jesus iti nagmaterial a natauan a bagi. Ngem idin nagpukawen.

Ita maawatandan no apay a nakaad-adut’ ammo ti estranghero! “Saan aya a rumayray ti rikriknata,” inyimtuodda, “itay makisasao kadata iti dalan, ta inlawlawagna kadata dagiti Sursurat?” Dagdagus, bimmangonda ket nagdardarasda a nagsubli idiay Jerusalem, a nakasarakanda kadagiti apostol ken dagidiay nakipaggian kadakuada. Sakbay a nakapagsao ni Cleofas ken ti kaduana, siraragsak nga impadamag ti dadduma: “Pudno a nagungar ti Apo ket nagparang ken ni Simon!” Idin dagiti dua sinaritada no kasano a nagparang met ni Jesus kadakuada. Daytoyen ti maikapat a panagparangna kadagiti nadumaduma nga adalanna iti dayta nga aldaw.

Giddato nga inaramid ni Jesus ti maikalima a panagparang. Nupay napunitan dagiti ridaw gaput’ buteng dagiti adalan kadagiti Judio, isut’ simrek, a nagtakder iti nagtetengngaanda, ket kinunana: “Talna kadakayo.” Nagbutengda, nga impapanda a nakakitada ti maysa nga espiritu. Gapuna, iti panangilawlawagna nga isut’ saan a maysa nga al-alia, kuna ni Jesus: “Apay-apay a mariribukkayo, ket apay-apay rumasok dagiti panagduadua iti pusoyo? Kitaenyo dagiti ima ken sakak, ta siak met laeng; arikapendak ket kitaenyo, ta ti espiritu awan ti lasag ken tulangna, a kas makitayo nga adda kaniak.” Kaskasdi, adda panagkedkedda a mamati.

Tapno matulonganda a makaawat nga isu a talaga ni Jesus, inyimtuodna: “Addaankay kadi ditoy ti aniaman a makan?” Kalpasan ti panangawatna ti maysa nga iwa ti natuno nga ikan ket nangan, kinunana: “Dagitoy dagiti sao nga insaok kadakayo idi addaak pay laeng kadakayo [sakbay ti ipapatayko], a masapul a matungpal dagiti isuamin a banag a naisurat maipapan kaniak iti Linteg ni Moises ken kadagiti Mammadto ken dagiti Salmo.”

Iti panagtultuloyna, iti kaiyariganna, iti katupag ti maysa a panangyadal ti Biblia kadakuada, insuro ni Jesus: “Kasta ti adda a naisurat ken masapul a ti Kristo agsagaba ken agungar kadagiti natay iti maikatlo nga aldaw, ket gapu iti naganna ti panagbabawi maipaay ti pannakapakawan ti basbasol maikaskasabanto iti isuamin a nasion​—mangrugi idiay Jerusalem, dakayo ti makasaksi kadagitoy a banag.”

Gaput’ sumagmamano a rason awan ni Tomas iti daytoy a napateg a taripnong iti rabii ti Domingo. Gapuna kadagiti aldaw a simmaruno, siraragsak dagiti adalan a nangibaga kenkuana: “Nakitami ti Apo!”

“No diak makita iti im-imana ti nagdalanan dagiti lansa,” insungbat ni Tomas, “ken maiserrek toy ramayko iti naggapuan dagiti lansa ken maiserrek ti imak iti bakrangna, diakto mamati.”

Bueno, walo nga aldaw kalpasanna nagtataripnong manen dagiti adalan iti uneg. Iti daytoy a gundaway addan kadakuada ni Tomas. Nupay sipupunit dagiti ridaw, naminsan pay a nagtakder ni Jesus iti nagtetengngaanda ket kinunana: “Talna koma kadakayo.” Kalpasanna, timmalliaw ken Tomas, ket inyawisna: “Igaw-atmo ta ramaymo ditoy, ket kitaem ti im-imak, ket iyegmo ditoy ta imam ket iserrekmo iti bakrangko, ket saanka a di mamati.”

“Apok ken Diosko!” inyebkas ni Tomas.

“Gapu ta nakitanak mamatika kadin?” inyimtuod ni Jesus. “Naragsak dagiti saan a nakakita ket namatida.” Lucas 24:11, 13-48; Juan 20:19-29.

▪ Aniadat’ inyimtuod ti estranghero kadagiti dua nga adalan idi agturongda sadi Emmaus?

▪ Aniat’ kinuna ti estranghero a nangparayray iti rikrikna dagiti adalan?

▪ Kasano a nabigbig dagiti adalan ti kinasiasino ti estranghero?

▪ Idi nagsubli ni Cleofas ken ti kaduana sadi Jerusalem, ania a makaparagsak a damag ti nangngeganda?

▪ Ania a maikalima a panagparang ti inaramid ni Jesus kadagiti adalanna, ket aniat’ napasamak kabayatan dayta?

▪ Aniat’ napasamak walo nga aldaw kalpasan ti maikalima a panagparang ni Jesus, ket kasano a ni Tomas namati iti kamaudiananna a sibibiag ni Jesus?