Kapitulo 1

Dagiti Mensahe Manipud Langit

TI INTERO a Biblia, iti kinapudnona, ket maysa a mensahe manipud langit, nga impaay ti nailangitan nga Amatayo a pakasursuruantayo. Nupay kasta, dua a naisangsangayan a mensahe ti naiyeg agarup 2,000 a tawen ti napalabasen babaen iti maysa nga anghel nga “agserserbi iti sanguanan ti Dios.” Ti naganna ket Gabriel. Sukimatentayo ti pannakapasamak dagitoy dua a napapateg a panagsarungkar ditoy daga.

Ti tawen ket 3 K.K.P. Idiay turturod ti Judea, nalabit di unay adayo manipud Jerusalem, adda maysa a padi ni Jehova a managan Zacarias. Isut’ lakayen, ken baket metten ni Elisabet nga asawana. Ket awan annakda. An-annongen ni Zacarias ti kinapadina iti pannakabatangna nga agserbi idiay templo ti Dios sadi Jerusalem. Pagammuan ta nagparang ni Gabriel iti makanawan ti altar ti insienso.

Kasta unay buteng ni Zacarias. Ngem pinakalma ni Gabriel ti butengna, a kunkunana, “Dika agbuteng Zacarias, ta naipangag ti kararagmo, ket ni baketmo nga Elisabet ipaayannakanto ti maysa nga anak a lalaki, ket panaganamto iti Juan.” Intuloy nga impakaammo ni Gabriel a ni Juan “dakkelto iti sanguanan ni Jehova” ket isu “isaganananto ti maysa nga ili nga awan pagkuranganna para ken Jehova.”

Nupay kasta, saan a patien ni Zacarias dayta. Kasla imposible unay nga isu ken ni Elisabet maaddaandat’ anak iti dayta nga edaddan. Gapuna kuna ni Gabriel kenkuana: “Agumelkanto ket dikanto makapagsao agingga iti aldaw a pannakaaramid daytoy, agsipud ta dika pinati dagiti saok.”

Kabayatanna, dagiti tattao idiay ruar masmasdaawda no apay a nakabaybayag ni Zacarias idiay templo. Idi rummuar met laengen saan a makapagsao no di ket nagsensenias laeng babaen iti im-imana, ket naawatanda nga isut’ nakakita iti maysa a banag a nakaskasdaaw.

Kalpasan dagiti aldaw a panagannong ni Zacarias idiay templo, isut’ nagawiden. Ket di nagbayag pudno a napasamak dayta—nagsikog ni Elisabet! Bayat nga ur-urayenna ti pannakaipasngay ti anakna nagtalinaed ni Elisabet idiay balay nga adayo manipud kadagiti tattao iti lima a bulan.

Kamaudiananna, nagparang manen ni Gabriel. Ket iti siasino ti nakisaritaanna? Iti daydiay balasang nga agnagan Maria manipud ili ti Nasaret. Ania a mensahe ti iyegna ita? Denggenyo! “Nakasarakka iti anamong ti Dios,” kuna ni Gabriel ken Maria. “Adtoy! agsikogkanto ket ipasngaymonto ti maysa nga anak a lalaki, ket panaganamto ti Jesus.” Innayon ni Gabriel: “Isu natanokto ket managanto iti Anak ti Kangatuan; . . . ket agserbinto iti balay ni Jacob iti agnanayon, ket ti pagarianna awanto ti inggana.”

Masiguradotayo a ni Gabriel imbilangna a pribilehio ti mangipan kadagitoy a mensahe. Ket bayat nga ad-adu pay ti mabasatayo maipapan kada Juan ken Jesus, makitatayto pay a nalawlawag no apay a dagitoy a mensahe manipud langit nakapatpategda. 2 Timoteo 3:16; Lucas 1:5-33.

▪ Ania a dua a napapateg a mensahe ti naiyeg manipud langit?

▪ Asinot’ nangiyeg kadagiti mensahe, ken iti siasino ti nakaiyeganda?

▪ Apay a narigat a patien dagitoy a mensahe?