Kapitulo 58

Dagiti Tinapay ken ti Lebadura

DAGITI umariwekwek dimtengda ken Jesus idiay Decapolis. Adu dagiti nagdaliasat iti nawatiwat nga agturong iti daytoy a lugar nga iti kaaduanna ket pagnanaedan dagiti Gentil tapno umimdeng kenkuana ken tapno maagasan dagiti an-anayenda. Intugotda dagiti dadakkel nga alat, wenno kuribot, a nakaugalian nga usarenda iti panangitugot kadagiti kasapulanda no agdaldaliasatda iti luglugar dagiti Gentil.

Di nagbayag, nupay kasta, inawagan ni Jesus dagiti adalanna ket kunana: “Maasianak kadagitoy adu unay a tattao, ta tallo nga aldawen nga addada kaniak nga awan ti makanda; ket no pagawidek ida kadagiti balbalayda a dida pay mangan, agkapuydanto iti dalan. Ta, dagiti dadduma kadakuada naggapuda iti adayo.”

“Asinot’ makabalin a mangbussog kadakuada iti tinapay ditoy maysa a let-ang?” insaludsod dagiti adalanna.

Inyimtuod ni Jesus: “Mano dagiti tinapay nga adda kadakayo?”

“Pito,” insungbatda, “ken sumagmamano a babassit nga ikan.”

Binilinna dagiti tattao nga agdalupisakda iti daga, ket innala ni Jesus dagiti tinapay ken ik-ikan, nagyaman iti Dios, pinispisina ida, ket intedna kadagiti adalanna. Ket, isuda, intedda kadagiti tattao, a nanganda amin ket nabsogda. Kalpasanna, idi naakup dagiti natda, addada pito nga alat a napunno, nupay agarup 4,000 a lallaki, malaksid kadagiti babbai ken ub-ubbing, ti nangan!

Pinagawid ni Jesus dagiti tattao, naglugan iti barangay a kadua dagiti adalanna, ket naglayagda iti makinlaud nga igid ti Baybay iti Galilea. Ket dagiti Fariseo, nga iti daytoy a kanito kinuyog dagiti miembro ti narelihiusuan a sekta dagiti Saduceo, pinadasda a suoten ni Jesus babaen iti panangdawatda kenkuana iti panangipakitana ti pagilasinan nga aggapu sadi langit.

Sipapanunot kadagiti panagreggetda a mangsuot kenkuana, simmungbat ni Jesus: “No mumalem kunayo, ‘Nasayaatto ti tiempo, ta ti langit nalabaga’; ket iti bigat, ‘Dakes ita ti tiempo, ta ti langit nalabaga, ket naulep.’ Ammoyo ngarud nga ilasinen ti langa ti langit, ngem dikay mabalinan nga ammuen dagiti pagilasinan dagiti tiempo.”

Iti dayta, inawagan ni Jesus ida a maysa a nadangkes ken mannakikamalala a kaputotan ket pinakdaaranna ida a, kas iti imbagana a nasapsapa kadagiti Fariseo, awanto ti maited a pagilasinan kadakuada no saan a ti pagilasinan ni Jonas. Iti ipapanawna, isut’ limmugan iti barangay a kadua dagiti adalanna ket naglayagda nga agturong iti Betsaida iti makin-amianan a daya nga igid ti Baybay ti Galilea. Idi addadan iti dalan naduktalan dagiti adalan a nalipatanda ti nangitugot ti tinapay, ket adda laeng maymaysa a tinapay a naikuyogda.

Sipapanunot iti nabiit pay a pannakisangona kadagiti Fariseo ken kadagiti Saduceo nga adipen ni Herodes, ni Jesus impakdaarna: “Kitaenyo, agaluadkayo iti lebadura dagiti Fariseo ken ti lebadura ni Herodes.” Nabatad a ti pannakadakamat ti lebadura pinagpanunotna dagiti adalan a tuktukoyen ni Jesus ti pannakalipatda a mangitugot iti tinapay, gapuna pinagsusuppiatanda dayta a banag. Idi nadlawna ti saanda a panagkikinnaawatan, insaludsod ni Jesus: “Apay-apay nga agsusuppiatkayo gapu ta awan ti tinapayyo?”

Iti nabiit pay, namilagruan nga impaay ni Jesus ti tinapay para iti rinibribo a tattao, nga inaramidna daytoy maudi a milagro nalabit maysa wenno dua nga aldaw sakbayna. Masapul a maammuanda nga nga isut’ saan a maseknan maipapan iti kinaawan dagiti literal a tinapay. “Dikay aya malagip,” impalagipna kadakuada, “idi pinispisik dagiti lima a tinapay kadagiti lima ribo, mano nga alat a napno kadagiti pispisi ti inakupyo?”

“Sangapulo ket dua,” insungbatda.

Ket idi naiwaras dagiti pito kadagiti uppat a ribo, mano nga alat a napno kadagiti pispisi ti inakupyo?”

“Pito,” insungbatda.

“Dikay maawatan pay laeng?” inyimtuod ni Jesus. “Apay-apay ngarud a dikay maawatan a saan a gapu iti tinapay ti kinunak kadakayo? Ngem agaluadkayo iti lebadura dagiti Fariseo ken dagiti Saduceo.”

Idin naawatan dagiti adalanna ti punto. Ti lebadura, maysa a banag a mangiyeg iti panagalsem ken mangpaalsa iti tinapay, ket maysa a sao a nausar a mangipamatmat iti kinarugit. Itan naawatan dagiti adalanna a mangar-aramat ni Jesus iti maysa a panangiladawan, nga isut’ mangpakpakdaar kadakuada nga agsalukag a maibusor “iti sursuro dagiti Fariseo ken Saduceo,” a ti sursuroda ket addaan iti makatulaw nga epekto. Marcos 8:1-21; Mateo 15:32–​16:12.

▪ Apay nga ikuykuyog dagiti tattao dagiti dadakkel a basket a naglaon kadagiti kasapulanda?

▪ Kalpasan ti ipapanawda idiay Decapolis, ania a panagdaliasat babaen iti barangay ti insayangkat ni Jesus?

▪ Ania a di panagkikinnaawatan ti rimsua kadagiti adalan maipapan iti komento ni Jesus maipapan iti lebadura?

▪ Aniat’ kayat a sawen ni Jesus iti sasao nga “iti lebadura dagiti Fariseo ken Saduceo”?