Kapitulo 81

Gakgakat Pay a Mangpapatay ken Jesus

GAPU ta kalam-ekna idi, magmagna ni Jesus iti nalinongan a paset a makunkuna kas kolumnario ni Salomon. Daytat’ adda iti igid ti templo. Dagiti Judio ti nanglawlaw kenkuana ditoy ket kinunada: “Agingga ti kaano a pagduaduaennakami? No sika ti Kristo, ibagam kadakami a silalawag.”

“Imbagak kadakayo,” insungbat ni Jesus, “ket dikay mamati.” Saan a direkta nga imbaga ni Jesus kadakuada nga isu ti Kristo, kas ti panangibagana iti babai a Samaritana idiay bubon. Ngem, iti kaiyariganna, impalgakna ti kinasiasinona idi inlawlawagna kadakuada nga isut’ naggapu sadi ngato ken isut’ addan kasanguanan pay ni Abraham.

Ni Jesus, nupay kasta, kayatna a magtengan a mismo dagiti tattao ti konklusion nga isu ti Kristo babaen ti panangipadisda ti ar-aramidna iti impadto ti Biblia a magapuanan ti Kristo. Isut’ gapuna nga idi damo binilinna dagiti adalanna a saanda nga ibagbaga iti asinoman nga isu ti Kristo. Ken daytat’ makagapu no apay a kunana itan kadagiti nauyong a Judio: “Dagiti aramid nga aramidek iti nagan ni Amak, dagita ti mangpaneknek iti maipapan kaniak. Ngem dikay mamati.”

Apay a saanda a mamati? Gapu kadi iti kinakurang ti pammaneknek a ni Jesus isut’ Kristo? Saan, no di ket gaput’ rason nga inted ni Jesus idi nga imbagana kadakuada: “Saandakayo a kadua dagiti karnerok. Dagiti karnerok denggenda ti timekko, ket ammok ida, ket surotendak. Ket siak ikkak ida ti biag nga agnanayon, ket didanto mapukaw uray kaano, ket awanto ti mangrabsut kadakuada itoy imak. Ni Amak a nangted kaniak kadakuada dakdakkel ngem kadagiti isuamin, ket awan ti makabalin a mangrabsut kadakuada iti ima ni Amak.”

Kalpasanna insalaysay ni Jesus ti nasinged a pannakirelasionna ken Amana, a kunkunana: “Siak ken ti Ama maymaysakami.” Yantangay ni Jesus adda ditoy daga ket ni Amana adda idiay langit, nalawag a saanna ibagbaga nga isu ken ti Amana ket literal, wenno pisikal, a maymaysada. Imbes ketdi, kayatna a sawen nga isudat’ maymaysa iti panggep, adda panagkaykaysada.

Napapungtotan gapu kadagiti sasao ni Jesus, pimmidut dagiti Judio ti batbato tapno isut’ papatayenda, kas inaramidda a nasapsapa, bayat ti Piesta dagiti Tabernakulo wenno Abong-abong. Situtured a simmango kadagiti agbalinto a mangpapatay kenkuana, kuna ni Jesus: “Adu dagiti naimbag nga aramid a naggapu ken Amak nga impakitak kadakayo. Ania kadagita nga aramid ti pangbatuanyo kaniak?”

“Saandaka a batuen gapu iti naimbag nga aramid,” insungbatda, “no di ket gapu iti tabbaawmo, ken gapu ta sika, idinto a taoka, aramidem ti bagim a dios.” Yantangay di pulos imbagbaga ni Jesus nga isu ket dios, apay a kinuna dagiti Judio daytoy?

Nalawag gapu ta impabiang ni Jesus iti bagina met laeng dagiti pannakabalin a patienda a kukua laeng ti Dios. Kas pangarigan, kaibagbagana la unay maipapan kadagiti “karnero,” “Siak ikkak ida ti biag nga agnanayon,” a maysa a banag a di maaramidan ti asinoman a tao. Dagiti Judio, nupay kasta, linipatanda ti kinapudno a bigbigbigen ni Jesus ti panangawatna ti autoridad manipud ken Amana.

A ni Jesus annugotenna nga isut’ nababbaba ngem iti Dios, sumaganad nga impakitana babaen iti panagsaludsodna: “Saan aya nga adda a naisurat iti Lintegyo [idiay Salmo 82:6], ‘Siak kinunak: “Dakayo didioskayo”’? No ninagananna ida ti ‘didios’ dagiti nakaisawan ti sao ti Dios, . . . kunaenyonto aya kaniak a pinagsanto ti Ama ken imbaonna ditoy lubong, ‘Agtabbaawka,’ agsipud ta kinunak, Siak ti Anak ti Dios?”

Wen, yantangay ti Kasuratan aw-awaganna uray pay dagiti nakillo a natauan nga uk-ukom kas “didios,” ania a basol ti masarakan dagitoy a Judio ken Jesus iti panagkunana, “Siak ti Anak ti Dios”? Innayon ni Jesus: No diak agaramid kadagiti aramid ni Amak, didak patien. Ngem no aramidek ida, uray no didak patien, patienyo dagiti aramid, tapno maammuanyo ken maawatanyo a ti Ama adda kaniak ket siak addaak kenkuana.”

Idi kinuna ni Jesus daytoy, padpadasen manen dagiti Judio a tiliwen ni Jesus. Ngem isut’ naglibas, kas iti immuna nga inaramidna idi Piesta dagiti Tabernakulo. Pinanawanna ti Jerusalem ket bimmallasiw iti Karayan Jordan a yan ni Juan a mangbabautisar ngangngani uppat a tawenen a nasapsapa. Daytoy a lugar ket kaawatan a saanen nga adayo manipud umabagatan nga igid ti Baybay ti Galilea, maysa a dua-aldaw a panagdaliasat wenno nasursurok pay manipud Jerusalem.

Adu a tattao ti umay ken Jesus iti daytoy a lugar ket kunada: “Ni Juan pudno nga awan ti pagilasinan nga inaramidna, ngem isuamin nga insao ni Juan maipapan itoy a tao napudnoda.” Gapu itoy adut’ namati ken Jesus ditoy. Juan 10:22-42; 4:26; 8:23, 58; Mateo 16:20.

▪ Babaen iti ania a pamay-an a ni Jesus kayatna a bigbigen dagiti tattao nga isu ni Kristo?

▪ Kasano a ni Jesus ken ti Amana maymaysada?

▪ Kaawatan, apay a dagiti Judio kunada a ni Jesus pagbalbalinenna ti bagina kas dios?

▪ Kasano a ti panagadaw ni Jesus manipud Salmo ipakitana a dina ibagbaga nga isut’ kapada ti Dios?